Mahengu 2

Loho jaka Sapanga jaahuluki apwasi.

1Palaika lisoba la Pentekosite, apwasi boka babi aketangini pamu. 2Apalapa sauti jajowanika kuhuma kunani, sauti je jabii ngati kimbonga kikolongu, nukutwele mu nyumba jela joka. 3Ndienu, yabonikana hindu yeyabi ngati ilimi ya mwotu, yabaganika nukutola panani ja kila mundu. 4Ndipala boti batwelila Loho jaka Sapanga, nukutumbuli kulonge luga yengi ngati Loho ja Sapanga ejalongua.

5Ku Yelusalemu kola babi Ayaudi bingi ba bunhobale Sapanga kuhuma kila ndema. 6Pabajowa sauti yela Yaatena, bahegalaninya pamu. Boti lwaakamwi lujogopu ndaba kila mundu jojwabi pala jwajogwana bakalongila kwa luga jaki mweni. 7Basangi nukulwehuka koni bakapwaga, “Boo, bandu boka batwajogwa akalongela hela haba, nga lee benei buku Galilaya! 8Henu kubi bole, mbona kila mundu jaajoane kwa lugha jaki jukusaliwa najo? 9Alapalati na Aamedi na Aelamu na buku Mesopotamia na Yudea na Akapadokia na Buku ku Ponto na buku Asia, 10Afulugia na Pamfilia, na buku Misili nu upandi woka Uku Libiya na pambipi nuku Kilene na bangi bababi ageni kuhuma ku Loma. 11Ayaudi na bangi babang'anambwiki kuba Ayaudi, na Akilete na buku Alabuni twaboa twaajogwana banganya aba alonge kwa luga jitu twabete, aga majambu makolongu gaka Sapanga!” 12Boti basangi nukujogopa koni alaluana, “Majambu geaga mana jaki kike?”

13Bandu bangi bapwaaga, “Bandu aba atei kulobe!”

Petili jwaalandi bandu bingi

14Ndienu Petili jwajema pamu na atumi baka Yesu ajaki komi na jumu, jwatumbuliya kwaalandi kwa sauti ngolongu kaapwagi, “Mwaalongu bangu Ayaudi na mwa bandu boka mwontama ku Yelusalemu, nzoaninya sapi malobi gangu. 15Bandu ababa ngase alobii ngati enhwasali mwanganya, sajenuje saa tatu pee pulukela. 16Ila lijambu le eli lejwalota Joeli Mlota waka Sapanga pajwapwaga,

17‘Bambu jupwaga, mumasoba ga mwisu,

niijakanakia Loho jangu panani ja bandu boka.

Bana bii akakombu na aka kamwali bitenda kulandi malobi gaka Sapanga,

akakombu binu bibona majambu gagipitila masoba gapalongi,

na aseja binu biilota ndotu.

18Heloo, hata atumisi bangu akanalomi naaka mbomba,

naajakaniya Loho jangu masoba gehaga,

nabombi biitenda kulandi majambu gaka Sapanga.

19Nane niitenda ndonduke kunani,

na nginyuli yiibonikana pai punndema,

gwibonikana mwai na motu na liyoi likolongu.

20Lyoba ligubikwa na lwii,

nulubalamwei lwikuba nkeli ngati mwai, gokaaga gilonguliya

kabula jukuhika lisoba likolongu lu ulumbi waka Bambu.

21Hapandi, jokapi jojiiloba kupetee liina laka Bambu jwiitenda kulama.’ ”

22Mwabandu buku Izilaeli, nnzowaniniya malobi aga! Yesu juku Nazaleti jwabii mundu jojwayekuliwi pangwendu kupete uwesu goguhuma kwaka Sapanga kwinu kupete ndonduke, maajabu na nginyuli yejatei Sapanga kwinu mwanganya kupete jombi, ngati hemanyiki mwabeti. 23Ngati hegwabi mpangu waki mweni Sapanga, jwabi jumanyi mwanganya mwiitenda kunkamu Yesu, nanamu mwankoma kupete maboku ga bandu abaja. 24Lakini Sapanga anhyoa kabee kuhuma koatama bandu bawii, nuku mmboke ubini wa kua ndaba ngase kwawesakini makili ga kuwa gunkamulakiya. 25Ndaba Daudi andongali jombi pajapwaaga,

“Nummbona Bambu palongi jangu masoba goti,

jubii nanepani upandi wangu wa malele, nga niangajike.

26Henu, mwoju wangu watenda kutogule,

nululimi lwangu lwatweli malobi guku togule,

nhyega jangu

jitama mu mahobale,

27ndaba ngauleki mwoju wangu koatama bandu baawii,

wala kunzetake mundu wa sapi waku juboola.

28Gunaangi indela ja womi,

gwindwelakiya kutogule mmoju wangu palongi jango!”

29“Mwaalongu bangu mwa Izilaheli, mbala numpwagila hotuhotu majambu gagumpata ahoku bitu bambu nkolongu Daudi jojamanyakini ngamaa. Jombi jawii, nukuntaga, ni litenge laki libi apambane mbaka lelenu. 30Lakini ndaba Daudi jabi Mlota waka Sapanga, jwamanyiki Sapanga andagila kupwaga jwihagula mundu jumu mukibeleku saki nuku mmbeka jubia Bambu nkolongu ngati ejabii jombi. 31Daudi jagamanyiki majambu gajwihenga Sapanga palongi ndi jwaamua kulongale kuyoka kwaka Kilisitu pala pajapwaga,

‘Ngase bundekiti koatama bandu baawile,

nhyega jaki ngase jabolike.’ 32Henu, Sapanga anhyoa Yesu hoju natwepani twaboti tugabweni majambo goka haga. 33Yesu pabunkwea nuku mbeka upandi wa malele waka Sapanga, jajopa kuhuma kwaka Atati Loho jaka Sapanga jojutulagi, jutujakani Loho we hoju. Hesi ndi semwikibona nukukijoana sajenu. 34Ndaba mweni Daudi ngase jwakwehi kunani kwaka Sapanga, jombi jwapwaga pee,

‘Bambu ampwagila Bambu wangu,

gutama upandi wangu wa malele,

35mbaka panaabeka abaja baku pai ja magolu gaku.’ ”

36“Mwabandu boti muku Izilaeli mpalika kumanya sapi ana Yesu hoju ndi jomumbambaliya punsalaba, ndi Sapanga ambei jubia Bambu nu Nkombosi!”

37Ndienu, bandu pabajogwa gala, mioju jabu jatenda kuligana, bundalukia Petili na atumi ajaki, “Boo mwaalongu bitu tutenda bole?”

38Petili jajibua, “Nzetakia mahakau nukugaleka na kila jumu jubatiswa kupete liina laka Yesu Kilisitu ili junndekakiya mahakau ginu nukujopa nhupi kuhuma kwaka Sapanga ndi Loho jaki. 39Ndaba, lilagi heli labi liitu na bana bitu na bandu boka baatama kutali na laka kila mundu joankema Sapanga.”

40Petili jahingamakia kwa malobi gangi gingi nakaaloba bandu bala koni jupwaaga, “Muliboa mukibeleku sana mahakau asese.” 41Bandu bingi bajetaki malobi gaki, nukubatiswa. Ni lisoba lelela bajonzukika bandu kuhegale elupu itato. 42Boka haba baendaliya kulibola kwaka atumi bala, kutama pamu ngati kilongu simu, kumega libumunda pamu nu kundoba Sapanga.

Kujangatana kwa bandu ba bunhobali Sapanga

43Atumi batei ndondoke hingi mbaka bandu babia nulujogopu nu kusangaa. 44Bandu boa babia sindu simu hata hindu yabu batenda kubagana. 45Babia alombesa mali gabu na hindu yabu nukubagana lupija kulengana nili tatisu laka mundu. 46Baendaliya kuketangana pamu mu Nyumba jaka Sapanga kila lisoba. Lakini kipindi sa kula posu, baketangana mu manyumba gabu na nukunuku libumunda lela koni atogule kwa mwoju wa sapi. 47Bundumbaliya Sapanga na bandu boti baapala bombi. Kila lisoba Bambu jaendaliya kwaagombo bandu baki.

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

Mahengu 2: NTMBL2020

Highlight

ಶೇರ್

ಕಾಪಿ