لُوقا 23

یسُوع دی پِیلاطُس دے سامنڑے پیشی

1وَل اُنہاں دی ساری جماعت اُٹھی تے یسُوع کُوں پِیلاطُس دے کولھ گِھن گئی۔ 2اُنہاں اُوندے اُتے اِلزام لاوݨ شروع کیتا جو ”اساں ڈِٹھے جو ایہ بندہ ساڈی قوم کُوں ورغلیندے، رومی بادشاہ قیصر کُوں ٹیکس ڈیوݨ تُوں منع کریندے تے آپنڑے آپ کُوں المسیح بادشاہ آدھے۔“

3پِیلاطُس یسُوع کنُوں پُچھیا، ”کیا تُوں یہُودیاں دا بادشاہ ہیں؟“

اُوں جواب ءچ اُونکُوں آکھیا، ”تُوں خود آدھیں۔“

4پِیلاطُس سردار کاہِناں تے عوام کُوں آکھیا، ”مَیں اِیں بندے ءچ کوئی قصُور نئیں ڈیدھا۔“

5پر او زور ڈے تے آکھنڑ لگے جو ”او سارے یہُودیہ ءچ بلکہ گلیل تُوں گِھن تے اِتھاں تئیں لوکاں کُوں تعلیم ڈے تے ورغلیندے۔“

یسُوع کُوں ہیرودیس دے کولھ بھیجیا ویندے

6پِیلاطُس ایہ سُنڑیا تاں پُچھیا، ”کیا ایہ بندہ گلیلی ہے؟“ 7تے جِینویں ای اُونکُوں معلوم تھیّا جو او ہیرودیس دے علاقہ دا ہے تاں اُونکُوں ہیرودیس دے کولھ بھیج ڈِتا کیوں جو ہیرودیس اُنہاں ڈینہاں ءچ یروشلیم ءچ ای ہا۔ 8جِیں ویلے ہیرودیس یسُوع کُوں ڈِٹھا تاں بہُوں خوش تھیّا کیوں جو اُونکُوں بہُوں عرصے کنُوں یسُوع کُوں ڈیکھنڑ دی خواہش ہئی، اِیں واسطے جو اُوں اُوندے بارے ءچ بہُوں گالھیں سُنڑیاں ہَن تے اُونکُوں اُمید ہئی جو او یسُوع کنُوں کوئی معجزہ تھیندا ڈیکھ سگسی۔ 9او اُوں کنُوں بہُوں سارے سوال پُچھدا ریہا، پر یسُوع اُونکُوں کوئی جواب نہ ڈِتا۔ 10سردار کاہِن تے شریعت دے عالم اُتھاں کھڑے تھی تے بہُوں زور شور نال اُوندے اُتے اِلزام لیندے ریہے۔ 11وَل ہیرودیس آپنڑے سپاہیاں دے نال رَل تے اُونکُوں ذلیل کیتا تے اُوندا مذاق اُڈایا، تے ہِک چمکنڑاں چوغہ پوا تے اُونکُوں پِیلاطُس دے کولھ واپس بھیج ڈِتا۔ 12اُونہئی ڈینہہ پِیلاطُس تے ہیرودیس ہِک ڈُوجھے دے دوست بنڑ گئے کیوں جو پہلے اُنہاں دی دُشمنڑی ہئی۔

یسُوع کُوں سزائے موت سُنڑائی ویندی ہے

13وَل پِیلاطُس سردار کاہِناں، سرداراں تے عوام کُوں جمع کر تے 14اُنہاں کُوں آکھیا جو ”تُساں اِیں بندے کُوں ایہ آکھ تے گِھن آئے ہیوے جو ایہ لوکاں کُوں ورغلیندے۔ مَیں خود تُہاڈے سامنڑے تفتیش کیتی ہے پر جیہڑے اِلزام تُساں اِیندے اُتے لیندے ہیوے، مَیں اِیندے ءچ ایجھی کوئی گالھ نئیں ڈیدھا، 15تے نہ ای ہیرودیس، کیوں جو اُوں اِینکُوں ساڈے کولھ واپس بھیج ڈِتے۔ ڈیکھو اِیں کنُوں کوئی ایجھا کم نئیں تھیّا جیندی وجہ تُوں اِینکُوں قتل دی سزا ڈِتی ونجے۔ 16بس مَیں اِینکُوں کوڑے مروا تے چھوڑ ڈیندا ہاں۔“

17[عید دے موقع اُتے لازم ہا جو پِیلاطُس مُجرماں ءچوں کہیں ہِک کُوں لوکاں دی خاطر چھوڑ ڈیوے۔]

18سارے لوک رَل تے چیخنڑ لگے جو ”اِیں بندے کُوں گِھن وَنج، تے برابّا کُوں ساڈے کیتے چھوڑ ڈے۔“ 19برابّا شہر ءچ بغاوت تے قتل کرݨ دی وجہ تُوں قید ہا۔

20پر پِیلاطُس یسُوع کُوں چھوڑ ڈیوݨ دے اِرادہ نال، اُنہاں نال ولا گالھ کیتی۔ 21پر او چیخدے ریہے جو ”اُونکُوں صلیب اُتے چڑھا، صلیب اُتے چڑھا!“

22اُوں تریجھی پھیری اُنہاں کنُوں پُچھیا، ”کیوں؟ آخر اُوں کیہڑی بُرائی کیتی ہے؟ مَیں اُوندے ءچ قتل دی کوئی وجہ نئیں ڈِٹھی۔ اِیں واسطے مَیں اُونکُوں کوڑے مروا تے چھوڑ ڈیندا ہاں۔“ 23پر او چیخ چیخ تے مطالبہ کرݨ لگے جو اُونکُوں صلیب اُتے چڑھایا ونجے تے اُنہاں دے چیخنڑ نال اُنہاں دی سُنڑی گئی۔ 24بس پِیلاطُس اُنہاں دی مرضی دے مطابق فیصلہ کیتا، 25تے اُوں بندے کُوں چھوڑ ڈِتا جیہڑا بغاوت تے خون دے جُرم ءچ قید ہا تے جیندی رہائی کیتے اُنہاں درخاست کیتی ہئی، پر یسُوع کُوں اُنہاں دی مرضی دے مطابق سپاہیاں دے حوالے کر ڈِتا۔

یسُوع کُوں صلیب اُتے چڑھایا ویندے

26جِیں ویلے سپاہی یسُوع کُوں گِھدی ویندے ہَن تاں اُنہاں شمعون ناں دے ہِک کُرینی بندے کُوں جیہڑا دیہات تُوں آندا پِیا ہا پکڑ گِھدا، تے صلیب اُوندے اُتے رکھ ڈِتی تاں جو او اُونکُوں چا تے یسُوع دے پِچُھوں پِچُھوں ٹُرے۔

27لوکاں دی ہِک بِھیڑ اُوندے پِچُھوں ٹُر پئی جیِندے ءچ بہُوں ساریاں عورتاں ہَن جیہڑیاں اُوندے کیتے وینڑ تے ماتم کریندیاں پئیاں ہَن۔ 28یسُوع مُڑ تے اُنہاں کُوں آکھیا، ”یروشلیم دی دِھیو! میڈے کیتے نہ رووو، بلکہ آپنڑے تے آپنڑے بالاں کیتے رووو۔ 29کیوں جو او ڈینہہ آوݨ آلے ہِن جِیں ویلے تُساں ایہ اکھیسو جو او بانجھ عورتاں مُبارک ہِن جِنہاں دے رِحم خالی ریہے تے او چھاتیاں جِنہاں کھیر نئیں پِلایا۔ 30وَل او پہاڑاں کُوں اکھیسن جو ’ساڈے اُتے ڈھے پوو‘ تے ٹِبیاں کُوں جو ’ساکُوں لُکا گِھنو۔‘ 31جے او ساوے درخت نال ایہ سبھ کُجھ کریندے ہِن تاں سُکے درخت نال کیا کُجھ نہ کریسن؟“

32سپاہی یسُوع دے نال ڈُو بئے مُجرماں کُوں وی گِھدی ویندے ہَن تاں جو اُنہاں کُوں وی قتل کیتا ونجے۔ 33جِیں ویلے او اُوں جاہ تے پُجے جِینکُوں کھوپڑی آدھے ہِن تاں اُنہاں اُتھاں اُونکُوں صلیب اُتے چڑھا ڈِتا تے اُنہاں ڈُو مُجرماں کُوں وی، ہِک کُوں اُوندے سجے پاسُوں تے ڈُوجھے کُوں کھبے پاسُوں۔ 34یسُوع آکھیا، ”باپ! اِنہاں کُوں معاف کر کیوں جو ایہ نئیں جانڑدے جو کیا کریندے ہِن۔“

وَل اُنہاں پرچی پا تے اُوندے کپڑے آپس ءچ وَنڈ گِھدے۔ 35لوک کھڑے ڈیدھے پئے ہَن تے سردار وی ٹھٹّھے مار مار تے آدھے ہَن جو ”اِیں بئیاں کُوں بچایا۔ جے ایہ خُدا دا المسیح تے اُوندا چُنڑیا ہویا ہے، تاں آپنڑے آپ کُوں وی بچاوے۔“

36سپاہیاں وی اُوندا مذاق اُڈایا۔ اُنہاں اُوندے کولھ آ تے اُونکُوں پِیوݨ کیتے سِرکہ پیش کیتا تے آکھیا جو 37”جے تُوں یہُودیاں دا بادشاہ ہیں تاں آپنڑے آپ کُوں بچا۔“

38یسُوع دے سِر اُتے ہِک تختی#23‏:38 ہِک چھوٹی تختی جیندے اُتے کہیں دا جُرم لِکھیا ہوندا ہے۔ لا ڈِتی گئی جیندے اُتے ایہ لِکھیا ہا جو ”ایہ یہُودیاں دا بادشاہ ہے۔“

39وَل جیہڑے مُجرم اُوندے نال صلیب اُتے چڑھائے گئے ہَن، اُنہاں ءچوں ہِک اُونکُوں طعنہ ڈے تے آکھیا، ”کیا تُوں المسیح نئیں؟ آپنڑے آپ کُوں وی بچا تے ساکُوں وی۔“

40پر ڈُوجھے اُونکُوں جِھڑک تے آکھیا، ”کیا تیکُوں خُدا دا ڈر نئیں؟ تیکُوں وی تاں اُوہو سزا مِلی ہے جیہڑی اُونکُوں مِلی ہے۔ 41ساڈی سزا تاں جائز ہے کیوں جو اساں آپنڑے کماں دا بدلہ پیندے پئے ہیں پر اِیں کوئی ایجھا کم نئیں کیتا۔“ 42وَل اُوں آکھیا، ”یسُوع! جِیں ویلے تُساں آپنڑی بادشاہی ءچ آؤ تاں میکُوں یاد کرائے۔“

43یسُوع اُونکُوں آکھیا، ”مَیں تیکُوں سچ آدھا ہاں جو تُوں اَج ای میڈے نال فِردوس ءچ ہوسیں۔“

یسُوع دی موت

44وَل ڈوپہر کنُوں تریجھے پہر تئیں پُورے مُلک ءچ اندھارا چھایا ریہا، 45کیوں جو سِجھ اندھارا تھی گِیا ہا۔ تے ہیکل دا پڑدہ پھٹ تے ڈُو ٹوٹے تھی گِیا۔ 46وَل یسُوع وڈی اواز نال پُکار تے آکھیا، ”باپ! مَیں آپنڑی رُوح تیڈے ہتھاں ءچ ڈیندا ہاں۔“ تے ایہ آکھ تے دم ڈے ڈِتا۔

47جِیں ویلے صوبہ دار ایہ ڈِٹھا تاں خُدا دی تعریف کریندے ہوئے آکھیا، ”بے شک ایہ بندہ راستباز ہا۔“

48سبھ لوک جیہڑے اُتھاں جمع ہَن ایہ سبھ ڈیکھ تے چھاتی پِٹدے ہوئے پِچُھوں وَل گئے۔ 49تے یسُوع دے سبھ جاݨ پچھاݨ آلے تے او عورتاں جیہڑیاں گلیل کنُوں اُوندے نال آئیاں ہَن، پرے کنُوں ایہ سبھ ڈیدھیاں پئیاں ہَن۔

یسُوع دی تدفین

50اُتھاں یُوسف ناں دا ہِک نیک تے راستباز بندہ ہا جیہڑا صدر عدالت دا ممبر ہا، 51پر او اُنہاں دی صلاح تے فیصلے اُتے راضی نہ ہا۔ او یہُودیاں دے شہر ارِمَتیاہ دا راہنڑ آلا ہا تے خُدا دی بادشاہی دے اِنتظار ءچ ہا۔ 52اُوں پِیلاطُس دے کولھ وَنج تے یسُوع دی لاش منگی، 53تے اُونکُوں لہا تے مہین چادر ءچ ولھیٹیا تے اُونکُوں ہِک قبر ءچ رکھ ڈِتا جیہڑی چٹان ءچ کھودی گئی ہئی۔ اُوں قبر ءچ پہلے کوئی نہ رکھیا گِیا ہا۔ 54او تیاری دا ڈینہہ ہا تے سبت دا ڈینہہ شروع تھیوݨ آلا ہا۔

55جیہڑیاں عورتاں گلیل کنُوں اُوندے نال آئیاں ہَن، یُوسف دے پِچُھوں پِچُھوں گئیاں تے اُنہاں اُوں قبر کُوں ڈِٹھا تے ایہ وی جو اُوندی لاش کُوں کِینویں رکھیا گِیا ہے۔ 56وَل اُنہاں واپس وَنج تے خوشبودار مصالحے تے عِطر تیار کیتا پر سبت دے ڈینہہ اُنہاں حُکم دے مطابق ارام کیتا۔

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

لُوقا 23: SKRV

Highlight

ಹಂಚಿಕೊಳ್ಳಿ

ಕಾಪಿ