Lukasa 13
13
O Yesusu wadotoko abe ma titi kiani o nyawa yotoba
1De abe ma oraha gea naga o nyawa yoboaino o Yesusino de iwihingahu Unangika o abari o Yerusaleeme ma kotaino abe o doma idadioka genangoka. Abe bari naga manga gogianongoru o Yahudi ma nyawa yamuruono naga o Galilea ma tonakino yoboa, de manga huhuba yomahihuba Ma Jouiye to Una ai Tauoka. De yomahihuba manga gogiriaka de yatomaka, angamoi ma gubernuuru o Pilatusu wahuloko ai nyawa la yatoma ona gea. 2Masara ona yoade-ade yato bote o Galilea ma nyawa gea yohonenge ma titi yahowonoka Ma Jouika. De o Yesusu wahiorikoka ona yoade-ade manga hininga ho Una wahitararono onangika wato, “De ngini naa marai niato bote nia gogianongoru o Galilea ma tonakino abe yatoma-tomaka ka to onangohi manga howono ilamoko nako de manga gogianongoru utuoli o Galileaino? De niato bote genangino ma titi ho hiadono manga bodito ma dorou yadaenoka? 3Masara naa Ngohi tinihingahu dika abe ko ma titiua to onangohi manga howono ilamoko Ma Jou ai himangoka hiadono ona yatomaka. De hongoli Ngohi tinihitiari tato nginioo de nia howo-howonoka abe nimaketero dika hoka onangoli yatoma-tomaka. Ho kiani ngini nitoba nia howo-howonino done nginioo ahao nibodito ma oraha Ma Jou watailako de wahohowono o nyawa!”
4“De naa ma titi moioli tinileha. Abe ma titi o nyawa yangimoi de yatufange gea abe nengokadauino yohonenge o Yerusaleemoka. De gea idadi angamoi ma tau duru ilape-lapeiye o Siloamoka yadoturaba onanguku de yahohonenge. Tinileha, ma titi o kia hiadono o bodito gea yadaene onanguku? Gea marai ngini niato bote abe o Yerusaleeme ma nyawa mata-mataika de ka onangohi manga howono iwoe Ma Jou ai himangoka, de gea ma titi hiadono ona yohonenge. 5Koua, hokogenangua! Ko ma titiua to ona manga howono hiadono yadoturaba onanguku! De naa ma moioli tinihitiari nginika tato koaho ngini nimahidodiai de kiani nitoba nia howo-howonino, done nginioo ahao nibodito abe ma oraha Ma Jou ai hohowono ma wange adonoka!”
O gogilioro ma gota ko ihofo-hofokua ma hiketero
6De ahao o Yesusu wahiketero o Yahudi ma nyawa de o gogilioro ma gota, abe Una wahiketero wato, “Naga womatengo abe wodatomoka o gogilioro ma gota o utu moi to una ai angguru ma redioka. De ipahaino de una ma ngoe woboaino watutumu ma gogilioro ma gotaika angamoi woigo wamake to ena ma hofoko. Masara ma hohutuloo de ko wamakeua ma hofoko genangino. 7Ho una wotemo ai duduhunika abe wotobagoana ai redi gea wato, ‘Naa o taongo hangeino tatutumu ahi datomo naa angamoi tododamaa ma gogilioro ma hofoko, masara moioo de ko tamakeuahi. Ho kiani natolangoka dika, angamoi naa ka parahaja dika ma tonaka ma rahai de ko ihofo-hofokua.’”
8“De wotobagoana wato, ‘Ahi baluhu, togahoko la ma taongo naa hanoaikahi de bole-boleohi hatolanga, la ngohi ahao tapaliara de toodebini la ma gogilioro ma gota utuohi ikutufuru. 9De nako o taongo dokenali ihofoko, gea irahai. Masara nako ko ihofokuahi, gea de ahao ka idadi hatolangoka dika.’” Hokogea o Yesusu ai hiketero abe woade-ade onangika.
O Hiaini ma wangeoka de o Yesusu womihitogumu momatengo mofugu
10De o Hiaini ma wange moiuku de o Yesusu naga wadotoko o nyawaika abe o dodotoko ma tauoka. 11De naga genangoka momatengo abe o tokata imibare-barene ami taongo ngimoi de tufangeino ma dekana. De ma titi ma tokata gea hiadono muna mokangelauku abe duru mofugu ho ko idadiokaua momarikoto. 12De o Yesusu womimake munangika de womiahokino. Ho muna moboa de ahao wotemo munangika wato, “Hobata, naa tonihitogumoka ani kangelaino!” 13De hokogea wotemo de womiso munangika, de ka itodokanino motogumoka de momarikotiye abe hoka ma dihirali. De motogumoka de ahao muna duru mihigiriiri Ma Jouika o nyawa gea manga hima-himangoka.
14Masara o dodotoko ma tauoka ma hidimono una ai hiningaka de duru wongamoholi ma titi o Hiaini ma wangeoka de o Yesusu womihitogumu munangika. De ma hidimono gea wotemo o nyawa yowoe-woeika wato, “Ngini nihioriki to ngone nanga Pareta, abe inahitiari ato naga o wange butaangaino abe ka idadi hokarajaanga, masara o Hiaini ma wange ko idadiua. Ho abe nginioka nioigo niato nitogumu nia kokangelaino, gea ngini kiani niboa ka o wange ma homoa dika, ma ufa niboa o Hiaini ma wangeoka la niato inihitogumu nginika!”
15De ma hidimono gea wotemo ibooto de ahao nanga Baluhu idodutu wopaluhu wato, “Ngona duru nomadokangelukino dika ani hiningaka! De onagona dika yomaketehiningamoi de ngona, onangoo yomadokangelukino! Angamoi ngaro ngini ma hirete ma nginioo nikarajaanga o Hiaini ma wangeoka! Abe ngini homoi-homoi niohohe nia hapi eko nia keledai to ena ma ngolomo ma ngioka de ahao niahihira-hira o akerika la ka idadi nihiokere, de genangino nikarajaanga o Hiaini ma wangeoka!”
16“De ngini mata-mata kangano nimimake nanga gianongoru naa abe munangoo o Abarahaama ai toforauku momatengo, abe muna imipaki-pakitoka de imibare-barene ami taongo ngimoi de tufange ma dekanino ma titi o Ibilihi ma haeke. Ho naa tinileha, ahi datoro kangano de ngini niato ko itiaiua abe Ngohi tomihihohe ami papakitino ma titi o wange naa o Hiaini ma wange? Nako Ngohi, tamao abe kiani tomihihohe ami papakitino de ahi datoro gea ko ihowonua!” 17De o Yesusu womademo hokogea de ahao ona mata-mata abe iwilawana Unangika ona duru yamaleke manga hiningaka. Masara abe o nyawa utu yowoe-woe genangoka duru iwidogarago Unangika ma titi ai datoro ma hohailoa mata-mata wodiaioka.
O Yesusu ai hiketero ma ade-ade abe ma titi o sawi ma mui
Matiusu 13:31-32; Maruku 4:30-32
18De ahao o Yesusu wotemo wato, “Ka o kia ka idadi tohiketero de ma oraha Ma Jou wahikoano ai nyawaika? Ma hiketero o kia duru itaana? 19Marai hokonaa ma hiketero. Naga o mui moi, o gauku ma mui, abe ihiromanga o sawi, de ngini nihiorikoka nako o gauku ma mui mata-mataika, masara ka enangohi duru ieteke. Ho o sawi ma mui gea womatengo wodatomo ai redioka. De ipahaino de iwangoiye ka hiadono idadi o gota. De mangale ma titi ma jaga hatoli ilago-agomo ho hiadono o totaleo iboaino de imaigutu ma gota ma jagaka. De hokogenangoo idadi abe ma oraha Ma Jou wahikoano ai nyawaika.”
O Yesusu ai hiketero ma ade-ade abe ma titi o ragi ma hohutulu dika
Matiusu 13:33
20De ahao o Yesusu wotemoli onangika wato, “Ka o kiali tohiketero de ma oraha abe Ma Jou wahikoano o nyawa? 21De hokonaa ma hiketero. Naga momatengo o ngofeka abe o roti modiai. De muna maleino o ragi ma hohutulu dika de gea masapuru de mohidoojo de o tarigu kohaamoko abe ngade-ngade o litere moruata ma amoko. De ngaro o tarigu gea kohaamoko de ma ragi duru ma hohutulu dika mohidogo, masara gea ahao ma tarigu mata-mataika ifero ma titi ma bobero ma kuaha ma ragioka gea. De hokogenangoo idadi abe ma oraha Ma Jou wahikoano ai nyawa.”
O Yesusu ai dodotoko abe ma titi o Horoga ma ngorana ma eteteke
Matiusu 7:13-14; Matiusu 19:30
22De o Yesusu wohigila-gila ai dodagi abe ai dumutu o Yerusaleeme ma kotaika. De ai dodagi ma goronaka de wotulu-tulu o kota-kotaika de o kapo-kapongika de wadotoko o nyawaika. 23De ma moiuku naga abe iwileha Unangika ato, “Ahi Baluhu, marai o nyawa ko yowoeua abe ahao Ma Jou waduhunu manga howo-howonino?”
De Una wipaluhu wato, 24“Gea ufa nipusingi ma titi yamuruono naga abe wadafongo Ma Jou. Masara naa ena ka idadi nimafikirohi. O Horoga ma ngorana ieteke, ho ngini kiani nimahiribuutu la ka idadi niwohama ma ngoranika gea. Angamoi tagou-goungu tinihingahu abe ahao naga ma oraha abe o nyawa manga ngoe yoigo yowohama genangika ma ko idadiokaua angamoi yokokapaangoka.”
25“De gea imaketero hoka ma tau ma dutu womatengo abe wakusioka ma ngorana la ko idadiokaua o nyawa yowohamika. De o nyawa abe ma hoanokahi ahao iwiaho-ahoko ma ngoranoka ato, ‘Mia baluhu, ani ngorana nomibelenga ngomino!’ De ma dutu ahao wopaluhu wato, ‘Ma ngorana ko tinibelengaua angamoi ko tinihiorikua ngini o kiaino ma nyawa.’ 26De ona ahao yomademo ato, ‘Nengokadau ngomi de ngona mia baluhu homakokutuono holomo de hokere, de ngona nomidotoko mia ngeko-ngekomoka. Ho ngona tanu nomihioriki ngomi naa!’ 27Masara ma tau ma dutu ahao wapaluhu wato, ‘Naa tohigalioli tinihingahu abe ko tinihiorikua ngini o kiaino niboa. Angamoi ngini mata-mata o datoro ma dorou nitobadiai, ho naa ngini ka nihinoaka dika!’ Hokogea ma tau ma dutu wapaluhu onangika abe yokapaanga yoboa unangino.”
28De o Yesusu wogila-gila wato, “De ma oraha gea ngini abe ko idadiua niwohamika ngini ahao duru niari-ari de nia ingiri nihidokagoli ma titi ma odiri ko niapoaua. Angamoi ma oraha gea de ka idadi niamake Ma Jou ai datekoka nanga totofora o Abarahaama de o Isaka de o Yakubu de abe Ma Jou ai uru ma dodofanga ona mata-mata yowohamika ho Ma Jou wahikoano onangika. Masara nako ngini ma hirete gea ko idadiua niwohama ho ma hoanoka dika. De genangino ma titi hiadono ngini ahao duru niari-ari. 29De ma oraha gea nagali ona ko o Yahudi ma nyawaua abe o dunia ma amokino yokokiboa la yomakokutuono yolomo Ma Jou ai ngolo-ngolomo ma ngioka. Abe ona utu daiiha yoboa de utuoli dinaoko, de nagali daukiye de abe dakuku, de onangoo mata-mata ahao Ma Jou wahikoano onangika.”
30“De naa moioli ka idadi nimafikirohi, abe naga o nyawa manga ngoe abe ma oraha naa ona ka yotipokoukuohi, masara ahao Ma Jou wagoraka ona gea la manga gogere ikurutiye o Horogaka. Masara naga o nyawa utuoli manga ngoe abe ma oraha naa ona manga gogere hatoli ikurutiye, masara ona gea ahao wahitipokouku Ma Jou abe ma oraha ahao iboa.” De hokogea o Yesusu ai dodotoko ma demo onangika abe ma titi hokokia idadi ma oraha Ma Jou wahikoano ai nyawaika.
O Yesusu ai hininga ma dora ma hiokoo itagi o Yerusaleeme ma nyawaika
Matiusu 23:37-39
31De duru ma oraha gea o Farisi manga doomuino ma nyawa yamuruono naga yoboa o Yesusino de iwihitiari Unangika ato, “Ngona koaho nomataiti nanoaika ma tonaka naa, angamoi nanga hibaluhu o Herodese Antipasa una wonihideeoka wato wonitoma!”
32De o Yesusu wapaluhu onangika wato, “Ngini niloiki o Herodesika gea abe wotobabudi o nyawa de niwihingahu unangika abe Ngohi nagahi ahi karajaanga nenangoka. Ho ma oraha naa de tohigila-gilahi abe o tokata takokititoko de o nyawa manga popanyakeino tahitogumu. De ahao naga ma oraha ahi gahe adono de ahi karajaanga ka idadi tamata, de ahao ma oraha gea de tanoa o Herodese ai tonaka. 33Masara abe ma oraha naa, gea kiani tohigila-gilahi ahi dodagi de ahi karajaanga to una ai kapo-kapongoka naa. Masara ko itedekanokaua de ahao tomahiadono ma tonaka ma batingika ho tanoaika o Herodese ai tonaka de togila-gila abe ahi dumutu o Yerusaleeme ma kotaika. Angamoi duru ko itiaiua nako Ma Jou ai uru ma dodofanga yohonenge o ngi moioka abe ko o Yerusaleeme ma kotakaua! Ho Ngohi kiani togila-gila de tomahiadono ma kotaika gea la Ngohioo ihitoma genangoka!”
34De ngaro o Yesusu ko womahiadonuahi o Yerusaleemika masara ai hininga duru ihuha ma titi o Yerusaleeme ma nyawa gea. Ho ai hininga itagi o Yerusaleeme ma nyawaika hiadono wotemo wato, “Hiokoo ngini o Yerusaleeme ma nyawa! Angamoi ngaro Ma Jou ma dodihirainohi de wahidingoto ai nyawa manga ngoe nginika abe utu ai uru ma dodofanga de utuoli ai abari ato inihingahu nginika, masara ngini niaolukoka to Una ai nyawa gea. Abe ona utu hiadono ngini niahakaru onangika hiadono yohonenge, masara utu niatomaka abe ko de o hakaruinoua, ho gea niaolukoka Ma Jou ai Demo-demo nginika. De ngaro ngini nia hininga hokogea masara Ngohi naa ma ngoe toigo tapake ahi hininga ma dora nginika masara Ngohioo nihioluku. De gea tonahiketero abe Ngohi hoka o kuru-kuru ma ayo abe yoigo atoomuino to ena ma ngofa-ngofaka ma gafuufu ma timiuku la duru imahidutukino ma ayo ma badangino. Masara ngini naa ka nioluku niboa Ngohino.”
35“De naa abeika nitotoihene ahi demoino, angamoi tinihingahu abe ahao naga ma oraha nia kota ma amokika naa de hiadono Ma Jou ai Tauoo, gea mata-mata ahao Ma Jou wanoaka, ho duru ihomoakahi dika nia kota.”
“De naa moioli tinihingahuohi nginika, abe ma oraha nginioka de Ngohi tosobo de ahao duru ma dekana ipahaikahi de ahao nihimakeoli Ngohi. De gea kiani ihira ngini nihidafongohi Ngohi abe niato,
‘Una woboaino naa, Una nanga koano woboaka. Ho naa adonoka ma oraha abe Una naa wonahikoano hoka ma dodihiraka nanga tofora o Dautu wonahikoano, ho hihigiriiri Unangika!’ # 13:35
Higiriiri 118:26
Ho nako hiadono ngini nihidafongo de nia demo Ngohino hokogea, gea de ahao adonoka ma oraha abe ngini ka idadi nihimakeoli Ngohi naa.” De hokogea o Yesusu ai hininga ma huha ma demo o Yahudi ma nyawaika angamoi ona yowoe-woe iwiolukoka, de Una wohiorikoka abe ahao manga hohowono kohadubuho yamake ma titi manga ngo-ngolukino gea.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Lukasa 13: MJDD
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Gereja Firman Allah, Yayasan Misi Masyarakat di Pedalaman
