မဿဲ 11
11
ယေရှုန ဗတ္တိဇံယောဟန်ကြောန်း
(လုကာ ၇.၁၈–၃၅)
1ယေရှုဟှာ တဗဲ့တော်ဆယ့်နှေ့ပါးဟှို အယ်မူဇာလေ အားလောင်းဂူ မိန့်မှာဘီးဟှာ ဂါလိလဲပြည်ရဲ့ ဗြို့လေမာ ဆောင်းမဩဝါဒပေးဘီး ဒန်းကောန်းဟှို ကြေညာဟှို့တွပ် အယ်အရပ်ဟှနေဘီး ထွပ်ကြွဟှားတော်မူလေဟှယ်။
2ခရစ်တော်ပြုလောက်နေဟှူ ကြောန်းရာလေဟှို ထောန်ထဲမာ ယောဟန်ကြားရဟှူ ခီမာ သူ့တဗဲ့တချို့ဟှို ကိုယ်တော်နားဟှို လွှတ်ဘီး 3“ကိုယ်တော်ဟှာ ကြွလာတော်မူဟှူ ခရစ်တော်ဘဲ့လော။ နော့‑က်မှုဘဲနေဟှာ တခြားတယော့‑က်ဟှို စောန့်မျှော်ရဟှို့သေးလော” ဆိုဘီး မေးလျှော့‑က်စေလေဟှယ်။
4ယေရှုဟှလည်း “နန်းနို့ကြားသိဟှူရာလေ၊ ဗြင်တွိဟှူရာလေဟှို သွားဘီးဟှာ ယောဟန်ဟှို ပြောပြဂေ့ပါ။ 5မျစ်စိကန်းနေဟှူသူလေဟှာ မျစ်စိဗြင်ရဟှယ်။ ခေလတ်သေနေဟှူ သူလေလည်း လမ်းသွားရဟှယ်။ နူနာရောဂါသယ်လေဟှာ သန့်ရှင်းမှုဟှို ရဟှယ်။#၁၁.၅ သန့်ရှင်းမှုဟှို ရဟှယ်၊ ရှု ၈.၂။ နားကြားဘဲနေဟှူသူလေ နားကြားရဟှယ်။ သေဟှူသူလေဟှာ ပ္လန်ရှင်ဇာဟှိုခံရဟှယ်။ ဆင်းရဲသားလေလည်း ဝန်းသာဇာဒန်းကောန်းဟှို ကြားရလေဟှယ်။ 6ငါ့ဟှို ငြင်းပယ်ဘဲဟှူ လူလေဟှာ မင်္ဂလာရှိဟှယ်!” ဆိုဘီး မိန့်တော်မူလေဟှယ်။
7ယောဟန်ရဲ့ တဗဲ့လေ ပ္လန်ဟှားခီမာ ယေရှုဟှာ ယောဟန်ဟှို ကြောန်းပြုဘီးဟှာ ဒေသနာ နားထောန်ဟှို့ လာဟှူသူလေဟှို “နန်းနို့လေဟှာ ဖယ်ဇာဟှို ကေ့ဟှို့ တောထဲဟှိုသွားဂေ့နူး။ လေတိုက်ဘီး လှောက်ရှားတတ်ဟှူ ကျူဗန်ဟှို ကေ့ရှင်ကြောန့် သွားဂေ့လော။ 8အယ်မျိုးမှုဟှ ဆိုဟှာ ဝတ်ကောန်းစားလှဝတ်ဟှားဟှူသူဟှို ကေ့ရှင်ကြောန့် သွားဂေ့လော။ အယ်မူမျိုးဝတ်ဟှားဟှူသူလေဟှာ မန်းဂီးရဲ့ နန်းတော်လေမာဘဲ့ ရှိဂေ့ဟှယ်! 9ပရောဖက်ဟှို ကေ့ရှင်ကြောန့် သွားဇာလော။ မှန်ဟှယ်။ ပရောဖက်ထတ် ကီးမြတ်ဟှူ သူလည်းဖြစ်ဟှယ် ဆိုဘီး နန်းနို့လေဟှို ငါပြောဟှယ်။ 10ကျမ်းစာမာ ‘နန်သွားမယ့် လမ်းဟှို ပြင်ဟှို့တွပ် ဘုရားသခင်ဟှ ငါ့ရဲ့တမန်ဟှို နန့်ရှေ့မာ စေလွှတ်မယ်’ ဆိုဘီး ယောဟန်ကြောန်းဟှို ရေးဟှားလေဟှယ်။ 11ငါ မှန်တိုင်းပြောရမယ် ဆိုဟှာ မီးမမွီးဟှူ သူလေထဲမာ ဗတ္တိဇံယောဟန်ထတ် ကီးမြတ်ဟှူသူ တယော့‑က်လည်း ပေါ်ထွန်းသေးဟှ။ အယ်ဘေမဲ့ ကောန်းဂန်နိုင်ငံတော်မာ ငယ်ဆောင်းဖြစ်ဟှူသူဟှာ ယောဟန်ထတ် ပိုဘီး ကီးမြတ်လေဟှယ်။ 12#လု ၁၆.၁၆ဗတ္တိဇံယောဟန် လတ်ထတ်ဟှနေဘီး ခုခီထိ ကောန်းဂန်နိုင်ငံတော်ဟှာ အဓမ္မလူလေရဲ့ ကြမ်းဖတ်မှုလေဟှို ခံရလေဟှယ်။#၁၁.၁၂ ကြမ်းဖတ်မှုလေဟှို ခံရလေဟှယ်၊ အယ်မျိုးမှုဘဲနေဟှာ ကြမ်းဖတ်မှုလေ ဖြစ်နေဟှယ်။ 13ယောဟန်ပေါ်ထွန်းခန်ဂဒဲဟှ မောရှေရဲ့ ပညတ္တိကျမ်းန ပရောဖက်လေ အားလောင်းဂူဟှာ ကောန်းဂန်နိုင်ငံတော်ကြောန်းဟှို ပြောဟှားဟှယ်။ 14#မ ၁၇.၁၀–၁၃; မာ ၉.၁၁–၁၃နန်းနို့လေဟှာ လတ်ခံဟှို့ ဆန္ဒာရှိမယ် ဆိုဟှာ အယ်သူဟှာ ဧလိယဘဲ့ ဖြစ်ဟှယ်။ 15နန်းနို့မာ နားရှိဟှယ် ဆိုဟှာ ကြားဂေ့!”
16“အယ်ခေတ် လူလေဟှို ငါဖယ်မျိုး နှိုင်းပြရဟှို့နူး။ ဇာတ်ပွဲကနေဟှူ လူငယ်လေဟှာ သူးနို့ငယ်ဂျင်းလေဟှို အော်ဘီးဟှာ 17‘နို့လေဟှာ သားသာယားယာဟှား တီးမှုဂေ့ဟှူလည်းဘဲ့ နန်းနို့လေ ကဂေ့ဟှ! ဝန်းနဲပူဆွေးဟှူချင်းဟှို ဆိုဟှူလည်းဘဲ့ ငိုဂေ့ဟှ!’ ဆိုဘီး ပြောဟှူလူငယ်လေန အယ်လူမျိုးလေဟှာ တူလေဟှယ်။ 18ယောဟန်ဟှ စားသော့‑က်ဘဲန လာဟှယ် ဆိုဟှာ သူးနို့လေဟှာ ‘အယ်သူဟှာ နတ်ဆိုးဝမ်နေဟှူ သူဖြစ်ဟှယ်!’ ဆိုဘီး ပြောဆိုဂေ့လေဟှယ်။ 19လူ့ရဲ့သားဟှာ စားသော့‑က်ဘီးလာဟှယ် ဆိုဟှာ ‘ကေ့ကေ့ အယ်လူဟှာ စားမတ်ဘီး ဝိုင်သော့‑က်သူ၊ ခွန်ကော့‑က်မားလေန ပြစ်သားလေရဲ့ မိဆွေဖြစ်ဟှယ်!’ ဆိုဘီး ပြောဂေ့ဗ္လန်ဟှယ်။ အယ်ဘေမဲ့ ဘုရားသခင်ရဲ့ ဉာဏ်ပညာတော်ဟှာ မှန်ကန်ကြောန်းဟှို အယ်မူကြောန်းရာအားဖြင့် သတ်သေပြဟှယ်” ဆိုဘီး မိန့်တော်မူလေဟှယ်။
ယောင်ကြည်ဘဲဟှူ ဗြို့လေကြောန်း
(လုကာ ၁၀.၁၃–၁၅)
20အယ်ဘီးန ယေရှုဟှာ နိမိတ်လတ်ခဏာလေဟှို ပြဘီးလည်းဘဲ့ နောန်ဒရဂေ့ဘဲဟှူ ဗြို့လေဟှို ပြစ်တန်ဘီး ဆောင်းမတော်မူလေဟှယ်။ 21“အို၊ ခေါရဇိန်ဗြို့၊ နန်ဟှာ အမင်္ဂလာရှိလေဟှယ်! အို၊ ဗက်ဇဲဒဗြို့၊ နန်ဟှာ အမင်္ဂလာရှိလေဟှယ်! နန်းနို့လေမှာ ငါပြဟှူတဂိုးလေဟှို တုရုဗြို့န ဇိဒုန်ဗြို့လေမှာ ပြလိုက်မယ် ဆိုဟှာ အယ်ဗြို့လေဟှာ ရှေးမဆွဂဒဲဟှ လျှော်တေဝတ်ဟှို ဝတ်ဘီး၊ ပ္လာနလူးဘီး နောန်ဒရဟှားဂေ့ဘီ! 22ငါပြောမယ်။ တရားစီရင်ဟှူနေ့မာ ဘုရားသခင်ဟှာ နန်းနို့လေထတ် တုရုဗြို့န ဇိဒုန်ဗြို့ဟှို ပိုဘီးကရုဏာတော်ပြလေ့မယ်! 23ကပေရနောင်ဗြို့! နန်ဟှာ ကောန်းဂန်ဘောင်ထိအောန် မ္လော့‑က်စားခံရလေ့မယ် ဆိုဘီး ထန်နေလော။ မရဏာနိုင်ငံဟှို ပစ်ခ္လခံရလေ့မယ်! နန့်နို့ဆီမာ ပြလိုက်ဟှူ တဂိုးလေဟှို သောဒုံဗြို့မာလည်း ပြဖူးမယ် ဆိုဟှာ အယ်ဗြို့ဟှာ ခုခီထိ ပျစ်စီးဘဲရှိနေလေ့မယ်။ 24#မ ၁၀.၁၅; လု ၁၀.၁၂ငါပြောမယ်။ တရားစီရင်ဟှူနေ့မာ ဘုရားသခင်ဟှာ နန့်ထတ် သောဒုံဗြို့ဟှို ပိုဘီး ကရုဏာတော်ပြလေ့မယ်!” ဆိုဘီး မိန့်တော်မူလေဟှယ်။
ငါ့နားဟှို လာဘီး နားယူဂေ့
(လုကာ ၁၀.၂၁,၂၂)
25အယ်ခီမာ ယေရှုဟှ “ဖ၊ ကောန်းဂန်ဘောင်န မ္လေဂီးရဲ့သခင်! ကိုယ်တော်ဟှာ ပညာရှိလေဟှို သိစေဘဲ ဖောင်းကွယ်ဟှားဘီး ပညာမှေ့ဘဲဟှူ သူလေဟှိုဘဲ့ ဖွမ့်ပြပေးဟှိကြောန့် ကျွန်တော်ဟှို ချီးမွမ်းပါဟှယ်။ 26မှန်ပါဟှယ် ဖ၊ အယ်မူဇာဟှာ ကိုယ်တော် လိုတော်ရှိဟှူဇာဖြစ်ဟှယ်။
27 #
ယော ၃.၃၅;
ယော ၁.၁၈; ၁၀.၁၅ “ငါ့ဖဟှာ ရာအားလောင်းဂူဟှို ငါ့ဟှို ပေးဟှားပီးဘီ။ ဖခမည်းတော်ဟှလွဲဘီး ဖယ်သူလည်း သားတော်ဟှို သိဂေ့ဟှ။ ခမည်းတော်ဟှိုလည်း သားတော်န သားတော်ဟှ ဖွမ့်ပြလိုဟှူ သူဟှလွဲဘီး ဖယ်သူလည်း သိဂေ့ဟှ။
28“ဝန်လေးဘီး ပန်ဘန်းနေဟှူသူလေ အားလောင်း ငါ့နားဟှို လာဂေ့ပါ။ ငါနန်းနို့ဟှို နားပေးမယ်။ 29ငါ့ထမ်းဘိုးဟှို ယူဘီးထမ်းဂေ့ပါ။ ငါ့နားမာ သန်ယူဂေ့ပါ။ ငါဟှာ နူးညံ့သိမ်မွေ့ဘီး နှိခ္လဟှူ စိသဘောရှိကြောန့် နန်းနို့ဟှာ သတ်သာမှုဟှို တွိဂေ့လေ့မယ်။ 30ဖြားဖြစ်ကြောန့်နူးဆိုဟှာ ငါ့ထမ်းဘိုးဟှာ ထမ်းရလွယ်ဘီး ဝန်လည်းပေါ့ဟှယ်” ဆိုဘီး မိန့်တော်မူလေဟှယ်။
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
မဿဲ 11: NTDWB24
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
The New Testament in Dawei Language © The Word for the World International and The Dawei Bible Translation Committee, 2024.
