Matyo 4
4
Sidan taam ul tɨ Jesu tan
Mrk 1.12-13; Luk 4.1-13
1Lɔ tɨ plaa, Ndɨla Lal si na Jesu tɨ tap hul nɨ ka Sidan sang ər. 2Gorne ər ka ɗa̰y dugso, tili la syɛl la bla tudi, ər so asam. 3Sidan, wo tɨ bi tan hina tɨ ər ndɔ ja gɨ ər ɓə: «Jo yim tɨ Ndɨla ɓa̰ kuri gɨna, əm naa əm gṵ ka kura ne yɛr tudi.» 4Jesu duga gɨ ər: «Maktub tɨ Ndɨla maan ja ɓə: “Wo ɓari ɓə tɨm jili tɨ dunya̰ hul na wa̰y tudi ngoy lo, lɛ na jaa gun ne wag tɨ Ndɨla mu.”»
5Gɨna Sidan duga si na ər tɨ Jerusalɛm. Ər si na ər tɨ Ndɨla li sul ne ura paa tɨ ndal la ər ja gɨ ər ɓə: 6«Jo əm tɨ Ndɨla ɓa̰ gɨna, nɨm əm daa, əm tɨba tɨ nəgri sul, kəysul Ndɨla maktub ja ɓə:
“Ndɨla ɓə ər gṵ naa gɨ ər malayka-a
a ɓə əm par tɨ ndal
nɨ əm ɗa̰y ɓə kura ɗɨb lo.”»
7La Jesu ja gɨ ər: «Ndɨla maktub ja ɓə: “Əm ɓə əm Baali tɨ Ndɨla sangni lo.”»
8Sidan si na ər tɨ nan baw sul cam la ər ɓla gɨ ər waan gun tɨ nəgri sul la a mum tɨ tina gun la, 9ər ja gɨ ər: «Ən ɓə gɨ əm mum ne gun naa gorne əm ha̰w əm ɗa̰y tɨ ən kwi tɨ ən yabu.» 10Jesu ja gɨ ər: «Duga pi Sidan! Kəysul Ndɨla na maktub ja ɓə: “Əm ɓə əm Baali tɨ Ndɨla ngoy yabu la əm ɓə ər cida kar la.”» 11Gɨna Sidan nɨm ər la, Malayka-a hina tɨ Jesu ndɔ a yar ər.
Jesu na cida lɔ ɗula
Mrk 1.14-15; Luk 4.14-15
12Ɗa̰y paa, Jesu laa ɓə Ja̰ wo tɨ dangay gɨna, ər si tɨ Galile#4.12 Galile tɨ lɔr nəgri sul ne ti tɨ ɗaglə ɗəng taal tɨ kɔ tɨ lula lɔ tɨ wag.. 13Ər nɨm Najarɛt, ər si ər ti tɨ Kapɛrnom, lɔr ne wo tɨ larɨm ɓɔ mu, tɨ lɔr nəgri sul tɨ Jabulo̰ la Neptali la, 14nɨ ka jaa ne nebi Esay ja toni ti jaa kuri:
15«Lɔr nəgri tɨ Jabulo̰ la lɔr nəgri tɨ Neptali la,
lwərgɨ tɨ larɨm ɓɔ mu, tɨ larɨm tɨ Jurdḛ tapaa la,
Tɨ Galile, bi ne tɨ Juyb lo ti tɨ lɔr nəgri ne sul la,
16Bi ton ti tɨ syɛl hul kuna bi tɨ ulu
ləg un ndeeri ɗəng,
Ya̰ ton ti tɨ lɔr ɗoyri hul kuna bi tɨ ulu
ɓə un ndeeri ləg la#4.16 Es. 8.23; 9.1!»
17Na lula sul ɗay, Jesu ɗolɔ tɨ beel ɗula la ər ja ɓə: «Yḭ nɨm i ɓijim lɔ kəysul Ndɨla waan tɨ ndog.»
Jesu soon ndɛb tɨ nḛni
Mrk 1.16-20; Luk 5.1-11
18Lɔ tɨ pla, Jesu yang tɨ ɗaglə ɗəng tɨ Galile mu. Ər ləg peer ɓungɨ tɨ ndidi: Simo̰ ne a soon ər ɓə Piyɛr la A̰dre la ne a wo man kura̰ tɨ larɨm, kəysul a tɨ ndɛb. 19Jesu ja gɨ a: «I hina tɨ ən lɔ la ən ɓə i duga bi tɨ biɓari taam.» 20Tɨ daamu a nɨm a məngɨ la a si tɨ ər lɔ. 21Gorne Jesu si ɓag ɓa̰ndḛni gɨna, ər ləg peer ɓungɨ paa tɨ ndidi cam: Tɨ Jak la Ja̰ la, Jebede na ɓimi. A ti tɨ kwa̰r hul na a ba tɨ Jebede. A wo a man kaaw, la Jesu soon a. 22Tɨ daamu Jesu soon a la, a nɨm a kwa̰r la a ba tɨ Jebede na ər bi tɨ cida le a si na ər.
23Jesu si tɨ un gun tɨ nəgri sul tɨ Galile, ər ɓla gɨ bi mum dɨbla tɨ Juyb-a na ləgɨ tɨ peer tina. Ər ɗo beel tɨ Jaa Ndinimani tuna Ndɨla waan sul la ər nen bi tɨ mo̰y gun la mum dɨbla ne wur a jindemni la. 24Ər ndil cḛy tɨ nəgri sul tɨ Siri. A hina gɨ ər na bi ton mo̰y lɔ jak jak ka a, ɓee pɛw lɔ dɨbla kuna: Jinsə la, bi tɨ sakur la, bi ne a ndula taal ɓudu uy la. Ər nen a gun. 25Bi dɨbla si tɨ ər lɔ: A o̰ tɨ nəgri sul tɨ Galile la, lwargɨ nii dɔkɔmɛ hul la, lɔr tɨ Jerusalɛm la, lorgɨ nəgri sul tɨ Jude la, tɨ larɨm tɨ Jurdḛ tapaa la.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Matyo 4: nie
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
© 2023, ATALTRAB
