Lucas 24

Jesús iniu kisie'e ti tajli pa a'no' (Mt 28.1-10; Mc 16.1-8; Jn 20.1-10)

1Siojopa jloma inia'ne jana inkijmaye, k'iejli mot, ti yamat'i'nijpe siojopo asejnia, ti yapilisi pa jika a'no'. Puwak itiunis siupuwa ilisanis'ni ta'a, siupuwa jini inkask'iji'n. 2Jlampa yiyet'iyisipi pa a'no', i'yent'itiej'nijpe siojopa sisaj tip'onatajaja'm, sek k'iejliyiji pa totieje. 3Yamisieta jik'ioyi pa a'no', ti je i'winis pa t'ajwes pa Saka'niona Jesús. 4Kawojliyisi pa, je 'yakaj paka jitienkiujnieye inwonisi. 'Yaka jla'm iwoyisi ti i'winat'iyispe, siupapo times i'nio' ti sek takasit'ik'iji'n siupa yiyits'i, ji'wuye puwa ijiat ti isis, siupa k'iejliyiji'n intaj je ijwi'yi. 5Jnots'ijnits'iyi, sek t'opiyeyisi'iji'n wek, 'yina papok i'nio' iyoyis'ne 'ate:

—¿Yot'iyi'ni ti jlekiajlajyi'ni 'niwa t'o'l kiapo i'nio mases, ti jiwoyetajyin'ni siojo ti 'wasa'n? 6Lajk'ipa ka ne 'neye. Iniu kisie'e, tajli niwa a'no'l. Ataj wunitiets'i siojo iyopi ti je tal Galiléaja, ti iyo'ate, 7“I'nio' Jlas ja tekiajlaja napo i'nio' ti je isis ti iyoyi ni jloski'la, jank'iejwatits'i jana cruz, jlomas ja najapeja ka inoyena'a kisie'e ti jantajli ni a'no'.”#Lc 9.22; 18.31-33

8Jiwekie'ejat'ipi ti jitiej wujwa siupa iyot'iyipi pa Jesús. 9Ti yapiliet'i'nijpe sekyi'i takajwejlanayisi siojopo itijwa'm niwa sikioye ijwienjli tom'niji injlojwajnas siupi iyo ti i'winis, je japokata siu'neje papo i'nio' t'ipi. 10-11'Yina siojopo injlojwajnas 'yakakiuyeyits'iji pet. Iyonat'iyisijpe 'ate japo asejnia ti takajwejlanistaja:

—Ma 'es pi jiwoyeyi, jlajmi woyeyi.

Siojopo asejnia japokajimpe japo María Magdala jleliki, siu'neje jlaja Juana, siujlieja María 'neje Santiago jlet. Po' 'neje papo ijia jla'yispe.

12Pedro yamat'ipi wek ti i'yene pa a'no', je iyo ka je int'osi. Yiyi ti t'akanat'iyi'nijpe ti i'yentaja'ni jik'ioyiyi, pajata'ne jla'am pa lotakinie ti i'wine siupa tekiajlaja wita'm, sek yi'i wek. Yapiliet'ipi wuj ti jnots'ijni ti i'wina pet ti kia'iyo.

Jesús ini'wenkijna'm siupapo times i'nio', ti ijioyisi siojopa isi' Emaús

(Mc 16.12-13)

13Japak siojopa jloma ti Jesús iniu kisie'e, japo times i'nio' siojopo jla'yist'i'nijpe jla'am pa Jesús, ti yamat'i'nijpe pet ti ijlias 'niji yi'i jlaja Emaús, isi' jlase' t'ipi ni'ne ka itijwa'm niwa sikioye ijwienjli tom'niji kilómetroja pa k'iejliyiji yi'i pet jlaja Jerusalén. 14Jitiej ijiutisie 'najk'i siupa iyot'iyiyipi paka ti kia'iyo. 15'Yina ti takamtijniejne'n, Jesús 'yakets'iyeje'n ape'e ti t'iskiunk'iji'n sekyi'i ti jla'yisa'. 16'Wanjliyi i'winisieta, 'yinit'iyijpe ka poye pa kanto'm ilia'm pa jlosik, it'imina ti je itiant'iejesi. 17Jesús i'yasat'ijyimpe ti iyo'ate:

—¿Tempa ataj jlotieyi 'najk'i?

Sekyi'i yajapayisk'iji'n kiu', 'yakaja'a ti je inkase'n. 18Iyo'ne 'ate siojo jle' iyo'ate Cleofas ti isiujlie:

—¿Amkatat'e ti jlejyi jana Jerusalén ti je 'najane pa ka wone siukia iyo ki po'?

19Jesús iyo'ne 'ate ti i'yase'n papoka:

—¿Tepit'i iyoyiyi paka?

Sekyi'i iyoyis'ne 'ate:

—Siukia tiwonaja'ne kia Jesús Nazaret jlele, injwejlanik jiwo ti jijweye po', Sinia' wuj ti ijiuniti siukiwa ilisane, siu'neje kiwa iyo jlamtikie', pajlat napo i'nio' ti ijiat ti yiminis. 20Siunapo pa'yijis jika anechiyasas siu'neje napo saka anechiyasas jlam ti iwinis ka tiliana, it'imina'ne ti tik'iejwata'a jana cruz. 21Atejnisiejap'antajape ka jlama ka i'manit napo Israel jika kia'lis ka injwajiete'n. 'Nakayi najapaja kiwa jlomas yamk'i. 22-23Asejnia siojopa talts'e awak'i kaskelit siukia motk'i ti 'nesa'ni ti tajlis a'noyi, ti ijwilts'e je i'winis ka nejyi pa a'no'. Ijwilts'e ti po' papo injlojwajnas poli jlele inikajanitia'm, ti iyoyi pet jika'niyejayi japoka asejnia ti Jesús iniu kisie'e, 'wasa'n. 24Jlampet ti sa'am po' japo jitiej iniayisi pa yi'i pa a'no', ijiate ka 'wena iwo wata'a siupa iyo japo asejnia ti i'winayis pet, 'yina je i'winis pa Jesús.

25Sekyi'i Jesús kiakt'ipa iyonayipi:

—¡Ijiatp'aneje ti int'oniejyi'n, ti jikakiunieyi siuniwa ijwi'il papo injwejlanawos t'ipi! 26¿Jet'imi 'esiji ka jitiej inok'i ti wuj ti janilayiti siunie tiwonaja siunie Injwajieti ti Sinia' jijliujwanik, siuti je yijliyi'ijyi ti jawo anechiyasa'?

27Sekyi'i ti yamtiyek'iji'n k'iye siupa iyo niwa Sinia' jlamtis, ti ijwi'il jla'am pa Jesús. Iniajnat pa Moisés iyo kiwa ilisant'iyijpe, paj ti yiyeyi papo injwejlanawos t'ipi iyo pet puwa ilisane.

28Ti yiyeyisi siupa isi' siupa ijioyisi, Jesús ijwil ka jnajyiyi siupa jajnojwi. 29It'imina'ne ti kiak iyonisi:

—K'iuts'e'm ti ja ke iwina, ká ajalas ka ak, no'ot majleyeyi ka ajnaja.

Jesús its'iuye'ne japoka, sek 'wanjle'e'ne siupa ajnaj, yamak'i siupa ijioyits'i. 30Jlampa tejeyeyits'i ape'e japa inak totieja ape'e, Jesús isimat'iyipi japa woye, iyoye jinikanitieyejayi pa Jinia', its'isajaja'n, sekyi'i ti iwinayi. 31Sekyi'i ti jiwekie'aja ti itiant'iejesi, kajeyepa ti 'yiniye ka t'eki ape'e siupa iyo ti laj jlosikiejets'i'ni. 'Yina Jesús ininetiajnata t'ipi. 32Ininekiajlayisi siupa iyo ti iyoyis 'ate:

—Siuti anamak'i ni 'nayi, ti takamtijnien'ni sik'ioye, ti ijwilts'e'm niwa Sinia' jlamtis yi'i ni ji'wet, po' ni awoyi ti alate ti ts'ajkaj'ni.

33Ta'a t'ipi ti tejeyis ji'niajk'i, ti yapilis Jerusalenne. Yiyi siojopo itijwa'm niwa sikioye ijwienjli tom'niji injlojwajnas, 34ijwilisiam'ne ti iyo'ate:

—¡Ijiatp'aneje ti yapi pijia'm ja Saka'niona, ini'wenkijna'm ja Simón!

35Kiak iyoyet'iyi'ijyi pet siojopo times, ti takajwejlajna'm japo ijia, siupa i'nio' ti yisitk'iye, siu'neje ti jiwekie'aja t'ipi ti itiant'iejesi ti paka Jesús, ti its'isajaja'm japa woye.

Jesús inikajanitia'm papo t'eyasajnas

(Jn 20.19-23)

36Jlam'ne je ilitajasi'iji ti jitiej ijiutisie, ti Jesús inikajanitieja'm japo t'eyasajnas jikiowe'e. Itijwil'ne jik'ioye ti iyo'ate:

—'Esiji ka akamaja'.

37'Yina ti wuj ti jnots'ijnits'i, ilianayi'ik'i ijwil'ne ka jisiak'ala pa Saka'niona pa ka in'wenis.

38Jesús iyone'ne 'ate;

—¿Yot'iyi'ni ti ijnots'inajyits'i? ¿Yot'iyi'ni ti kiak jiwonayi niwa asosikis, ti askakiujnieye po'? 39'Yenajyi'n 'niwa isioye, siu'neje 'niwa isietis. Kiesak'i'm 'nakayijna'a ti ja 'najanayi pa jawonayi ti ya'am. Si'wanjli wita'm ti 'isie'n po', jla'yi ti yili po', je iyoye 'ate ni insak'al ti laj t'isiena', jla'yi ti laj jleliye.

40Iyojlitieje ti i'winkinaja'm japo puwa jikioye, siu'neje puwa jisietis. 41Mawat 'wanjliyi siupi iyo ti 'yakakiuyis, kajeyepa ti jnots'ijnits'i, jla'yi ti wuj ti inkase'n. Jesús i'yasen'ne japo ti iyo'ate:

—¿Lajk'i pet paka k'iejliyeyi pa ka tiujw?

42Iwinisiam'ne pa si'yus jiwa ti tisiniana t'ipi. 43Isimat'ipi ilia'm, sekyi'i itiujw'ne jitieyi'i japo t'eyasajnas. 44Ti itimat'iyijpe sekyi'i iyonat'iyijpe 'ate:

—Siukia awo 'neye, ki tiwonak'i, siuniwa ajwe'lasem'ne ta'a ti je atal aska kiowe'e, ti awo'ate, “Janeyi siojona jloma ti ja'nakaj siunie iyo ti sijwe'el ni Moisés jika'neyasajnaye, siu'neje niwa yi'i pet niwa jilisajna' t'ipi pet papo injwejlanawos, jla'yi ti yi'i niwa sálmojos.”

45Sekyi'i ti jiwekie'aja t'ipi ti itiant'iejesk'i, kajeyepa ti jlam jla'am ti iyo jlosikie' ka 'najane kiwa Sinia' jlamtis yi'i ni ji'wet, 46ti iyoyet'ipi 'ate:

—Siuniwa Inamtis yi'i ni ji'wet ijwi'il ni Injwajieti ni Sinia' jijliujwanik ja wujwa ni jijliak'ali, janekieyinie'e ti ja tiliana, 'yina jlomas ja najapeja ka inoyena'a kisie'e. 47Sekyi'i ji'lij iwijna'm pet napo jika kia'lis ka wo jika'niyejayi napo ijia ka wone'ate, “Woye asosikis ink'iejyisa', 'nakayeyijna'a ti Sinia' jamp'elisina', ka je intajlat'ase'm ni aske'.” 'Yina iyo jla'am niwa Sinia' jlamtis ka tiniajnata napo Jerusalén jlele ka tiwok jika'niyeja' yiji 'niwaka, 'yina paj ka ineyeyinie'e siunapo i'nio' yijits'i wikie'eyi niwa ajnatis. 48Asa'am ti askimet ti ja akinieyiji'n ti ja ajwela 'niwaka ni siuniwa ji'wena'. 49Je ijiat ka je ijliu'wase ti jane astepe'e siojona Inia' pajk'i ti ijwilt'ipi.#Hch 1.4 Ká atajlakiunie'e 'ne yi'i jla'a Jerusalén, ijiatjliyijna'a jla'am ka atajatiejna'a siunie asjweyeja' ti jantal poliyi.

Jesús tikinieje poliyi

50Jesús yamat'iyijpe japo t'eyasajnas, ti ijioyi kisie'e ti tajla'm jlaja isi', je tojwape'n jlaja Betania siojo ijioyi'i. Yiyisi siojo ijioyits'i, Jesús jikioye t'ipa ijieyet'ik'ipe pijia'm, ti iwijna'm pa 'es japo t'eyasajnas. 51'Yina je iliyi ti jikioye yink'i ape'e ti iwijna'm pa 'es japo t'eyasajnas, ti tikiniejayi pijia'm ti toki poliyi.#Mc 16.19; Hch 1.9-11

52Itimisi ti iyunitis ti yapiliet'iyispe Jerusalenne, wuj ti inkase'n pa ijioyisk'i'ni. 53'Yina je iliyisi ti ijioyisi'ni japa 'najla'wet ti iyunitis pa Sinia'.

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

Lucas 24: CRT97

Highlight

ಶೇರ್

ಕಾಪಿ