Lucas 20

Jijweye iyo pa Jesús

(Mt 21.23-27; Mc 11.27-33)

1Yit'iyipe japa jloma, Jesús yits'e yi'i jlaja 'najla'wet ti taka'neyasa'n, ti 'yiyasajne'n papo i'nio', ka 'najane paka wone pa Sinia' jika'niye ti 'es. 'Nesat'i'nijpe papo pa'yijis jika anechiyasas, siu'neje papo taka'neyasane pet pa Moisés jika'neyasajnaye, jla'yisik'i siupapo kijilas jle' po', 2i'yasat'iyisimpe pa Jesús ti iyo'ate:

—¿Tepa taj'le ni ajweye, siuti jikajli ti jiwoyi niwaka? ¿Tempi iwi'na'm?

3Jesús iyo'ne 'ate ti isiujlie:

—Kia'iyo po' pet siunie ja'yasane ti ja'yasa aswa'am. Kiujliek'imna'a: 4¿Tempa tajleje pa Juan inajiejnawo pi jijweye ti 'yakajli ti iniejiejne'n papo i'nio'? ¿Tajle napo i'nio', ni'ne ka nakaye Sinia' ka intajle?

5Sekyi'i ti ini'yasisie papo i'nio' ti iyo'ate:

—¿Tepat'e jayoki? Siut'itie ka yok'iate, “Tal Siniayi”, janwo'ate “¿Yot'iyi'ni jiat'eje ti jikakiuye?” 6Je 'es ka yok'iate, “Tajle napo i'nio'”, 'lojwinie'e ka int'ekits'i, ka sisajas inkients'e, kajeyepa wikie'eyi napo i'nio' ti 'yijene pi iyone ti Juan ijiate ti jla'am ti injwejlanik jiwo ti tal Siniayi.

7'Yina kiak t'ipa iyoyeyisipi wek ti isiujlisie:

—T'eyi, je kasts'ajane siupa tajle.

8Sekyi'i Jesús kiak iyo'ni pet:

—Kia'awo je ajwe'lasem ni i'nio' ni atajleje ni ijwiye ti akajli ti awoyi niwaka.

Jesús i'yejnap jiwek siupapo inkijmayewos ti ijiuski'lajne'n

(Mt 21.33-46; Mc 12.1-12)

9Ti pajat'ijyi Jesús iyoyeyi ka intamti'yi papo i'nio', ti yijnapeje wek siu'nie ti iyo'ate:

—Pojompe pa i'nio', jiwomki puwa ts'ejnietio'.#Is 5.1-2 Itimeje ti yikiaj'l isia'm ti iyoyeyi ka nek, iwijnam'ne papo inkijmayewos ka inijnajiet'e kan wen'ni ti wakajlata puwa jla'. Tojk'i siupa ijiojwi. 10Siupa anechiyas ti itijnisieyi ka wakajla puwa jla' puwa ts'ejnietio', ijliuyet'ipi pa jikawo ka jitiej inayi papok inkijmayewos, ka poye japa ka inlesanis k'iye, siojopa laja ti iwinayis'ni, pa jikimet pa ajnat. 'Yina i'winis jiwek ilia'm, isimisie'e ti yejes'ni. Yapiliet'ipi wek ejlo'o wek ti lajk'i japa ka inenis jikiojyi. 11Ijliuyet'ijyi jiwek pi jikiecha jikawo, kiak iyonjliyisi ti iliakiyis, jla'yi ti yejes'ni. Ijliuyet'iyits'i jiwek ka inapi, ka kia'iwo ka poye japa ja nenis'ni jikiojyi. 12Paj ti ijliuyet'ijyi wek pa jikiecha, pak ijiate'ne ti jikie' po'. Itietat'iyisijpe kisie'e ji'wechaja pa iwasok.

13'Yina yiyi jlaja siupa jikimet pa ajnat iyo'ne 'ate, “¿Tepat'e jayoyi?” Itienkiun'ni'ne ti iyo'ate, “Ja ijliu'ne ni yas, siu'nie ti wuj ti emi'n, ent'a ja tik'iukie'ne jla'yi ti ja lajak'i wek pa ja tiwonaja, kajeyepa ti ja ke injweyisie. 14Ijliu'ne paka. I'winis jiwek ilia'm papo inkijmayewos, iyoyis'ne 'ate ti inijlok'ijin'ni, “'Nak jlas ja anechiyas, siu'nie ja jikimita ni ajnat. ¡Jalianajna'aja!” 15Ijiatjliyi isimits'i'ne, ilianis'ne, sekyi'i ti itietayisi 'wechaja pa inwasok.”

Jesús iyone'ne 'ate papo i'nio':

—Siupi jikimet pa ajnat, ¿tepi iyo? ¿Tempet siupa jijwela' ka inwone papo inkijmayewos? 16Ya'am awo'ate, janeki jantej'we ti janlajne'n, sekjane'yi ka inekiajlayinie'e papo ijia siupa inkijmaye.

Ti ipi'yayis ti Jesús kia'iyo, iyoyis'ne 'ate:

—¡Wuj ti je 'es ka kiak inwoyi!

17Jesús i'yejnen'ne papo ti iyoye 'ate:

—Jakajliete, ¿ten jiat'eje siupi ijwi'il siuniwa Sinia' jlamtis ti yi'i ni ji'wet ti iyo'ate:

“Siojona sisaj 'wukiu'ul jiwos iwit'iane,

janakap'an siojona ti jla'm ijiatayiji ti 'es, 'nakayi laja po'”?#Sal 118.22 18Jane'yina'a pa janoyiji'n ape'e janaka sisaj, jawo jwala'. Ni'ne ka janakaye jla'am jana sisaj kano ape'e pa jawo jimakie.

“Siuti tajle ni anechiyas ekiajle, jlampet ti jantajle ni Sinia' ekiajle ti jlam jikimet”

(Mt 22.15-22; Mc 12.13-17)

19Siupapo pa'yijis ti kia'iyo jijweye po', siu'neje papo taka'neyasane pa Moisés jika'neyasajnaye, iyoyisiet'itiejepi ka inkimits'i, kajeyepa ti itijnisieyisi pa Jesús ji'lij 'yijejnap'ni, ti yijnapeje papok inkijmayewos t'ipi. 'Yina papoka jla'am papo i'nio' ti je ijwiyisie. 20Jitiej je ilienits'i pa Jesús, iyoyet'ipi jikawosa' kan'yenits'i ape'e ka poye paka k'iejliyeyi paka ji'lija ka je 'esie, sekjane'yi ka inekiajlayisi pa anechiyas. 21Yiyisi pa Jesús papok inkawos, ti iyonat'iyisijpe 'ate:

—Inka'neyasajnawo, kasts'ajane pa awonaja ti ijiate a'am ti 'es siunie jiwoyi amtikie', siu'neje ni aka'neyasajnaye iyo. A'am je 'yene paka t'oniye iwo pa i'nioye, najata jla'am siunie Sinia' iyotaja kawo napo i'nio' ti jika'neyasane. 22Jak je iyoyiji ti a'yasaja'n ti awok'iate, ¿'est'iyiji ka itisie ni anechiyas Roma jlele, ti iyo ka 'yakat'inie ape'e niwa inkat'ijnieyejes, ni'ne ka jeye?

23Jesús itiant'ieje ti jlam iyonistaja, kajeyepa ti ijyijlittajas. Iyo'ne pet 'ate ti isiujlie:

24—'Wenkinak'i'm japa wikiniet'aj janjwanjli.

Iwinisiam'ne. Jesús i'yen'ni, sekyi'i iyo'ne 'ate:

—¿Tempi jipe'el 'ni siu'nie yi'i siu'neje ni jle'?

Iyo'ate ti isiujlisie:

—Siunie anechiyas Roma jlele.

25Jesús kiak iyo'ni 'ate:

—¿Yot'iyi'ni jiat'eje ti je jlekiajlayi siunie jikimet pet ni anechiyas Roma jlele ti jla'am ti tajle? Jlampet ni jikimet ni Sinia', nak ja ekiajlayi, ti jla'am ti tajle.

26Ti ipi'yayis ti kia'iyo pa Jesús, ka wojlijinipi, sekyi'i its'iuyisiek'i 'ate. Kajeyepa ti lajk'ipa ka ji'lija' ka jiniliakie ka inwo, jitieyi'i papo i'nio', kant'emina ka tikima'a ka t'otie a'laja'm.

Jesús ijwijla'm papo ti janapits'i pijia'm siupapo 'yajle'n

(Mt 22.23-33; Mc 12.18-27)

27Paj ti poyet'ipi'iji papo Saducéojos, ti ijioyi pa Jesús. Saducéojos papoka ijwil pet ka je inapits'i pijia'm siunapo 'yajle'n.#Hch 23.8 Nak it'imina ti ijioyisi pa Jesús, ti iyonisi 'ate:

28—Inka'neyasajnawo, siupa Moisés t'ipi iliyisajap siuniwa jilisajna' ti iyo'ate, “Siunie i'nio' ti tijwa'yiyeta, 'yina laj jilisayi siojona yitaja. 'Yina paj ti 'yala wek ti laj jilisa', siunie ji'yini ti po' nak jank'iuyeje japa ji'liela, 'nakayeyi ti japoye napo janto'm ape'e pa jikilia masa.”#Deut 25.5-6 29Jayamtiki ak'ioye siupapo i'nio' ijwienjli sikio' itij'we times tom'nijijimpe ji'niayi ijwienjli. Siupa isijli pak inia'an ti tijwa'yi, paj ti 'yala wek ti laj jilisayi siojopa yitaja. 30Siupa tomik'i pak its'iuyeje japa ji'liela, 'yina kia'iyojliyi paj ti 'yala wek ti laj jilisa'. 31Siupa tomtajak'i siupa je pajk'i ti 'ya'al, pak its'iuyetaja'ne japa ji'liela, kia'iyojliyi iyo papo jikiliawot mases. Paj ti nojwat'ipi wek ajnata'm ti laj jilisa', papo i'nio t'ipi. 32Tomt'iyijpe pet pijia'm japa asejnia ti 'yala. 33Jlajmiliet, 'napo i'nio' ti ijwil ka inapits'i pijia'm, napoka siunapo 'yajle'n, ti janekiajle'e ti ja'wasanaja'n, ¿tepat'e jane'yi siupa ja ijiatayi ti ja jik'iemjlayeyi, siojopa i'nioki? 'Yina ti itij'weje'n papok ijwienjli sikio' itij'we times tom'niji ti jijwa'yis.

34Jesús isiujlie ti iyo'ate:

—'Napo i'nio' yi' ajnat'e, jlajmike' ti tijwa'yits'iji'n. 35Siunapo i'nio', ayijnies asejnia ti jlajma ke inwo wek kajeyepa ti ja'nakajats'i ti janek'ni jla'yi ti janapits'i pijia'm, ti jajnayi ni ajnat jikiecha, ja ke kiak inwo, ja lajk'i papo kawo jwa'yisa'. 36Siunie jota jiliayeja', ja ke injlan'ni, kajeyepa jawo'ate siunapo injlojwajnas poli jlele, ti iniuk'i kisie'e ti tajla'm ni a'no' ti yapits'i pijia'm, nak jant'emina ti Sinia' jawoyi jilisa'.

37“Ti ijwi'il napo ti yapits'i pijia'm napoka napo 'yajle'n Moisés kia'iyo 'yakajanitk'iyi siupi iyot'iyipi ti ijwi'il ti ilisane, pakayi siojopa a'la' jwatjli je yi'i, ti ijwil pa Sinia' ti Abraham Jinia', Isaac Jinia', Jacob Jinia'.#Ex 3.6 38Siunie Sinia', je Jinia' siunapo 'yajle'n, jla'm ijiate siunapo 'wasajne'n. 'Yina wikie'eyi siunapo itiant'ieje ti jika'niona napok 'wasajne'n.”

39Iyoyet'ipi 'ate siupapo taka'neyasane pa Moisés jika'neyasajnaye:

—'Es wat ni jiwo ti jlamti, 'ni Inka'neyasajnawo.

40Sekyi'i ti lajat'ik'ipe pa ka ji'lij je inkip'e kan'yas'ni.

Injwajieti ti Sinia' jijliujwanik

(Mt 22.41-46; Mc 12.35-37)

41Sekyi'i Jesús i'yasam'ne papo ti iyo'ate:

—¿Yot'iyi'ni napo i'nio' ti ijwil ka pakaye David ka intajla'm ni Injwajieti siunie Sinia' jijliujwanik? 42Jlam'ne paka jla'am David ti iyo'ate ti yiji niwa sálmojos:

“Saka'niona iyone 'ate ni 'Yaka'niona,

Weje'n 'nijiye ijwiyeje,

43je ijiat ka je iyi'na kiajwe napo atajiejwas.”#Sal 110.1 44¿Yot'iyi'ni ijiat'eje, ka intajla'm papo David naka Injwajietiwo, ti David iyo pet jika'nionaja'?

Jesús iyo tisa' papo taka'neyasane pa Moisés jika'neyasajnaye

(Mt 23.1-36; Mc 12.38-40; Lc 11.46-54)

45Wikie'eyi papo i'nio' its'iuyisie'ni pa Jesús, kiak t'ipa iyonayipe japo t'eyasajnas:

46—Joskiyeyi napoka napo taka'neyasane na Moisés jika'neyasajnaye. Yiminis ti 'yuts'iji'n niwa ji'wuye ti itiojyits'i ti t'iskiunietak'iji'n. Iyotaja ka titijwilaja, ka tiwunitie. Ti yiyetajas kiajwe niwa 'najla'wetis, je iyojonk'iye ka je inses puwaka ji'wetisa' kajeyepa ti iyo ka ti'wena. Ti ijioyi jana inlakijnieye kia'iyojliyi. 47Tajlane niwa ji'wuki'l napo ask'ilieki, ti inistajanitisi ni jloski'la iyo ti iliaki napo, je iliakiyisi'i ti iyoyis t'ajlayeja'. ¡Sinia' wuj ti jansa'ak'i napoka!

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

Lucas 20: CRT97

Highlight

ಶೇರ್

ಕಾಪಿ