Lucas 17
17
Siunie i'nio' ti jlam ti it'imina ni jikiecha ti iyo keye, jitis japoye pet
(Mt 18.6-7; Mc 9.42)
1Jesús iyonat'iyijpe 'ate japo t'eyasajnas:
—Ja ke lajak'ipa siupa jant'emi'nase ka awoyeyi ni ake', 'yina awo'ate, ¡wuj wata'a ti ja p'ijliusieja naka ni siunie ti itiojna'm napo ijia ni je 'es! 2Ja 'esieyiji siuka kiak tiwonataja ta'a, ka tilie'nitie ji'woyi jana sisaj siojona kiojieti. Ka je i'we'en ape'e siunie jiliayeja' ts'ijiye, sekjane'yi ka titietajayijamna'a ni i'niat lajlik'i, ka kiak iwotajanie'e ka intojna'm ni jike' pa janjwanjli siu'napo sajmela'aja'n. 3Siuti kia'iyo, ¡Joskiyeyi!
“Siunie akiecha ti jane'na'm ni je 'es, jloye'ni. Siuti jantant'ieje ti je 'es ni iyo'na jla'yi ti ilik'i, netiajnat siuni iyo'na, p'elisi'n.#Mt 18.15 4'Wanjliyi ka ijwienjli sikio' itij'we times tom'nijijayiji'ni ka kiak iwo'naja, ka ine'na'm ni je 'es, ka intejwik'i japa jlomaye, 'yina jajno'wa'ni ti janwo'ate, “Itis po' ajelia'm, alek'i”, paj ka neyeyipi jana ijwienjli sikio' itij'we times tom'niji ti janinekial'ni, 'esijyi ka netiajnat ni jitis iyo, p'elisi'n.
Jijweye ni intankiujnieye ti 'es
5Siojopo injlojwajnas i'yasat'iyisijimpe pa Saka'niona ti iyoyits'i 'ate:
—Womeje sik'ioye ni sitienkiujnieye ti 'es ka wents'e'm.
6Saka'niona isiujlie ti iyo'ate:
—Ka poye siunie astankiujnieye ni 'es 'wanjlit'itie ka wo'ate jana jlojlase' jana mostaza ti samjlie'e, je jwela ka je akajlajyi ka wonayi 'ate ka ne'yi japa a'laye, “Taj'le ni jle'yi, jlase ni i'niat lajlik'i”, siojona a'la' jana jlamti'yi jank'iu'wa'm ni jiwone.#Mc 11.22-23
Jikijmaye ni i'nio' inkawo
7Siuti asa'am ti po' ni askawo ti k'iejli 'nes ti tal awasoki, ti iliyetaja ti isijme'n ti iwiets'ilat pijia'm ni ajnat, ni'ne ti i'yenk'i puwa aslajwas, ¿ma jawonayi 'ate ti ja'yasayi, “Weje'n, 'yekiu'n”? 8Kiak ja ká awone, 'wenajliyi ti jawone'ate, “Nisiamaja'ni ka 'otate paka tiujw, ja teme ka atoniek'inie'e, niwakajlanit ka 'yenk'i'm siuti ja'yekiu'n jla'yi ti ja'yaje pa k'iejliyi. Ja timeje ka jiwekie'ajana'a pet ka 'yekiu'n ti a'am”. 9Ka pakaye 'neje wek ka anikanitiejeye awejna'm pa akawo ti itimataja siunie jikijmaye ti isimataja'n ak'ioye.
10“Kiak jiwoyeyi ti asa'am ti Sinia' jikawosts'ase'm. Ti jitimayetaja ni askijmaye ni Sinia' ijliuye'ase'm, ka kiak awoyeyipi 'ate, “Sinia' jikawosts'e'm jiwek. Siunie tijliukits'e'm ka iyoki, awoki, lajk'ipa jikiechaye”.”
Jesús ijwiejiete'n papo itijwa'm niwa sikioye inkiso'l jitio' yi'i
11Jesús yama'aja ti ijio 'niji yi'i jlaja Jerusalén, jijwalk'i jawak ajnatis Samaria siu'neje jlaja Galilea. 12Ti yiyet'iyipi siupuwa isi'il jilis ji'wetis t'ipi papo i'nio', sek taj'le siupapo i'nio' inkiso'l jitio' yi'ik'i, siupapo itijwa'm niwa sikioye ti yisitis k'iye. Tojwe siupa takasitisijyi'n. 13Tank'i wita'm ti i'yasisk'i'ni, ti iyo'ate:
—¡Inka'neyasajnawo Jesús, kasp'elisijne'n wata'a!
14Jesús ti i'winat'iyipi, ijliuye'ni ti iyone'ate:
—Maye'ni, ni'wenkinayi napo pa'yijis.#Lev 14.1-32; Lc 5.14
Yamat'iyis'nijpe. Pa yit'iyits'ipe 'nayiji ti isisiet'ipi, 'yina netian'ne siupuwa ijiok'i'ni jiwatis. 15Ijwienjli'ne siupa ti ini'yenat'ipi, ti netia'n siupuwa ijiok'i'ni, yapi'ne jlam isia'm, tanayi'ni ti iyunit pa Sinia'. 16Yiyi wek pa Jesús, ti t'akosat'iyijpe kiajwe ti jinikanitieyi iwijna'm. Siupa i'nio' tal Samaria. 17Jesús iyone'ate:
—Ajwelp'an ka intejwjliya'm niwa sikioye siojopo ti tijwajyi siukia jiwet'ia iyo. ¿Najapo siojopo ijwienjli sikio' itij'we ijniujlits'i tom'niji? 18¿Ijiatp'aneje ti lajk'iyi pa ka inapimet, ka iwo ka iwunit pa Sinia', ijwienjliyet'i jla'am siu'nie i'nio' ti je Judío ti yapimet?
19Sekyi'i kiak iyoni'ni pak i'nio', ti iyone'ate:
—Neppijia'm, maj. Lapakawo ti atankiujnieye po', nak it'imina ti 'nes.
Siunie jawo ni Sinia' jika anechijiayas ka 'nesta
(Mt 24.23-28,36-41)
20Siupapo Fariséojos i'yasis'ni pa Jesús, iyonisi 'ate:
—¿Nit'it'iyijna'a ka 'nes pa Sinia' jika anechijiayas?
Isiujlie'ne ti iyo'ate:
—Ja ke iwo'ate siunie ti 'yaka ti ti'wena, ka 'nesta. 21Ja lajak'i pa ka wo'ate, “Siu'nie yi'ne”, ni'ne ka wo'ate pa, “Siusie yits'iji”. Kajeyepa ti pajk'i ti yiye aska kiowe'e.
22Sekyi'i iyonat'iyijpe 'ate japo t'eyasajnas:
—Jana'm siojona jloma ti ja jalasajyink'iye ka'wena' siupa ka k'iejliyeyi paka inajne'n k'iye ni I'nio' Jlas ti ja 'nes, 'yina ja ke a'wena'. 23Japoye napo janwo'ate, “Siu'nie yi'ne”, ni'ne kanwo'ate, “Siusie yi ts'ijiye”. Ja ke inets'e paka wo ka nekk'i. 24Kajeyepa ti jawo'ate ni tak'ajyi, ti jlal tal 'niji yi'i ni taj'le ni kilie', jla'yi ni siunie ijio'we, kiak janwo ni ji'niayi ni I'nio' Jlas ka napitiemet. 25'Yina jana'an kiu' ti ja wujwa ti janilayiti siunie ja tiwonaja, siunie janwone siunapo i'nio' yiji pet 'nak siu'nie jloma, ti janlakiyis ti ja ke inkimis ilia'm.
26Kiak jawoyiyi iyot'iyipi siupuwa jlomas yit'iyipi pet pa Noé, ka inapitiemet ni I'nio' Jlas. 27Papo i'nio' 'es ti ti'yekiujni'n, 'es ti i'yayis kajeyepa ti its'iyisie, jlam tijwa'yijlits'iji'n papo i'nio', paj ti yiyet'iyipi ti Noé yamaja'm japa kasejkana. Yiyet'iyipi pak siupa pejla, ti ijiate jla'am ti isieje'n, paka'ne ti iliajne'n papo i'nio' t'ipi.#Gén 7.6-24 28'Wena ja ke inwoyi iyot'iyipi siupuwa jlomas yit'iyipi pa Lot. Papo i'nio' ti'yekiujni'n jla'yi ti i'yayis, tik'iajwajyi'n, ijia papo takawejnajne'n, takawijnajne'n, ijia papo ilisane puwa ji'wuki'l. 29'Yina ti yajmiwek pa Lot ti tajla'm japa Sodoma, 'nakayet'ipi 'ni jwat ti na'm isia'm, siu'nie azufre ti tisa'yi ape'e papo i'nio', pak itij'we'ne.#Gén 18.20—19.25 30Kiak jawo ti ja 'nakaj ni I'nio' Jlas.
31Janak siojona jloma, i'nio' ni yi' ape'e jana ji'wuk, siojona tomi pijia'm, 'esijyi ka je insojmajyi'n ka ineki puwa jikijmatis. I'nio' ni yi' jiwasoki ti isijme'n, 'esijyi ka je inapi 'wete. 32Ataj enayi 'ate siojopa Lot jik'iemjla t'ipi.#Gén 19.26 33Jajwi'lase'm ti siunie i'nio' ti ja initejna'm ni jiliaye, nak janetia'n. Jlampet siunie i'nio' ti ja ke initejna'm, ja nakaye'e pet ni janjwa'.
34“Jajwi'lase'm ti pak siupa ajnaj, siunie jlotiojwa po', janjwanjli ni ja tikinieje, siunie jikiecha sek ja tiliki wek. 35Siupapo asejnia times ti tikiojwajne'n, janjwanjli jana tikinieje, janjwanjli'ne siojona sek ja tiliki wek.”#17.35 V. 36 jlam je yiji ta'a siupuwa inkio' lisajna' jlamt'iyijipe, siupuwa ti iyo'ate: Jlampet siunapo i'nio' times je t'eki jiwasokia'm, ijwienjli ni ja tikinieje 'yina jlampet siupa jikiecha sek ja tilik'i (17.35)
37Jesús t'eyasajnas ipi'yaye ti kia'iyo, i'yasat'iyisimpe ti iyo'ate:
—'Yaka'niona, ¿tepat'e jane'yi ka kiak iwotajanie'e?
Isiujlie ti iyo'ate:
—Je istieyiji siunie ijio'we niwa t'isiukis, sekyi'i na 'ya'al.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Lucas 17: CRT97
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Nuevo Testamento en Chorote © Sociedades Biblicas Unidas, 1997.
