Lucas 15

Jesús i'yejnap jiwekie'e pa sontas jiwo ti i'wi'in japa jiliajwa ti netia'n

(Mt 18.10-14)

1Siupapo i'nio' jikijmayet'ipi ti isi'm ilia'm niwa inkat'ijnieyejes siupapo anechiyasas Roma jlele t'ajla'ni papo ka inkat'i'n ape'e, siu'neje papo i'nio' tijwela je isisi, ijioyet'iyisipi pa Jesús ti its'iuyisi. 2Siupapo Fariséojos, siu'neje papo taka'neyasane pet siupa Moisés jika'neyasajnaye, iyoyet'iyispe 'ate, ti iliakiyis pa Jesús:

—'Yenayi pit siunie, je ikawona jla'yi ti isijwane siunapo je isis ti jike' po'.

3Ti ipi'yayet'iyipi sekyi'i Jesús yamtiyet'iyipi k'iye siupa ti jla'm i'yejnap jiwekie'e, iyoyet'ipi 'ate:

4—“¿Tepa yi'i siupa ti asa'am ti cien puwa jiliajwas sontas ti po', ka injwanjli japa ka netia'n, ti je sek ilitaja'a wekie'e siupuwa noventa y nueve jiliajwas 'neje, ti jawojyi'n siojopa ijwienjli ti netia'n? Janwojyin'ni; siuti i'wina, sekyi'i ti iliyeyi ti iyojyi'n. 5'Yina ti i'wi'in japa jiliajwa, wuj ti inkaj'ni, yinatipe'e ti itijlia.#Is 40.11; Ez 34.11-12; Jn 10.1-16; Heb 13.20 6'Nes jiwekie'e ji'wete tanak'i'ni papo ijia, siu'neje papo ji'wetijwas jla'am, ti iyone 'ate, “¡Wuj ti ts'ajkaj'ni, a'we'en siujlie'e iliajwa netian'ne! ¡Jonie'ni jayok siliakijnieyeja' ape'e!”

7Sekyi'i Jesús iyo'ne 'ate:

—Jajwi'lase'm ti kiak iyoyi siunie i'nio' ti je tajli ni jike' ti ininekiajlata. Ni inkanitiejeye wuj yi' poliyi 'yaka'm ape'e siunie inkanitiejeye tena'a siunapo noventa y nueve i'nio' ti ijwil kanses, ti je iyo ka inwo jlosikis ink'iejyisa'.

Jesús i'yejnap jiwekie'e siojopa i'nioki ti k'iejli i'wi'in japa jika wikiniet'aj ti initiajnat

8“Siu'neje ni jikiecha, ¿tejnapa i'nioki itijwa'm niwa sikioye puwa jika wikijniest'ejes puwa i'wi'in ti laja po', ti ijwienjli japa initiajnat, ma jwat je yintaja japa jika kates, jla'yi ti je isimtaja 'niji japa ji'wet jikie' ti janwojyin'ni siojopa initiajnat? 9'Yina siuti jan'we'en, jantanayi napo ijia, siu'neje napo ji'wetijwas, kanwone 'ate kanjwejla'm, “¡Wujwat ti ts'ajkaj'ni ti a'we'en jla'a ika wikiniet'aj siujlie'e anetiajnat'ne! ¡Jonie'ni, jayok siliakijnieyeja' ape'e!”

10Jesús kiak t'ipa iyoyeyi'ijyi:

—Jajwi'lase'm ti kia'iyoyeyi pet napo Sinia' jijliujwajnas poli jlele ti potie pa i'nio' k'iejli iyo jlosik ink'ieye.

Jesús i'yejnap jiwekie'e siupa i'nio' ti ip'ilisi'n pa jlas

11'Naka 'neje ti Jesús yamtiyi ti iyo'ate:

—Pojompe pa i'nio' ti times papo jilis. 12Siupa kia'le iyone 'ate pa jinia', “Papa, wenk'imna'a ta'a siupuwa isijmatis ti jijniejietk'i'm pet.” Ijiatjliyi iwinat'ijiamk'ipe papo jilis, ti its'isak'iye puwa i'wi'in. 13Jlomas 'nak nojwaja'm siupa jlas kia'le iwin'ni'ne siupuwa jikijmatis ti jinia' ijniejiet ta'a pet. Itiej jiwek siojopa wikiniet'aj laja siupuwa iwin'ni, ti yamat'ipi ti ijioyi siojopa ajnat 'wenayi ti tojwe. Yi'i siupa ijiojwi, iyoyeyi siupi iyoyi ti jlam pak iyonits'i'ni japa jika wikiniet'aj, paj ti initejwe'e k'iye papo jlosie, jla'yi ti ilisane'ni puwa inlakijnieye.

14“Jlam pa itijwat'i'yijpe siojopa itiu'un, ti ijyiwitajam'ni siojopa jloma ti nel'liap yi'i siojopa ajnat 'wenayi, pak jwemik wuj ti inilayiti pi iyo pa jika nel'lia. 15Yamat'ipi ti ijioyi pa i'nio' ti iyojyi'n pa jikijmayeja', 'yina ijliuyet'iyipi pa yi'i siupa jiwasok, kan'yena puwa ijnisies jitio'. 16Paj ti itiliajat'iyi'i'nijpe puwa jwa'a', jikas puwa ijnisies jitio', iyoyet'itiejepi ka intojw ka poye paka inwejna'm.

17“Sekyi'i itienkiun'ni'ne ti iyo'ate, “Ijiate wata'a ti soski'la'n. Ja papa 'loj japo jikawos ji'wet'e, jlak 'yakam'ni ape'e ti ti'yekiunietaja'n, jlam'ne 'na a'yi pet nel'lia silia'an. 18Jayiknie'e jayapilinie'e ja papa, jayiyi ka iyonayijna'a 'ate, “Papa awo 'yakeye, ata'yi ilia'm pa Sinia', jla'yi ti ata'yi ajelia'm. 19Je 'yuk'i'm ka wo asak'i'm. Siwone 'ate siunapo akawos”.”

20“Yamat'ipi pa jwemik ti yapili pa jinia'. To'ilia'm ti i'winat'ipi ilia'm pa jlas, ip'ilisinat'i'nijpe, t'osiyet'ipi ilia'm, its'iewatt'iyijpe ilia'm, sekyi'i its'iuyet'ipi jik'iolo'we pa jlas. 21Siupa jwemik iyo'ne 'ate, “Awo 'yakeye, ata'yi ilia'm pa Sinia', jla'yi ti ata'yi ajelia'm. Je 'yuk'i'm ka wo asak'i'm.” 22Siupa jinia' tanak'i'ni papo jikawos ti iyone 'ate, “Jlam wonayi'ni 'ate, woyejyin'ni siojo lotakinie 'es ka 'ojienats'i. Woyejyin'ni japa jijwukijniesa ka 'otiek'i jana jijwuki, jisieti kia'iyojliyi 'asa'najyits'i. 23Sekjane'yi ka akinieyinie'e jlaja wakia 'woma ti yata ka lana'. ¡Ja 'yekiuniejana'a! ¡Kajeyepa ti jayok siliakijnieyeja'! 24Tepa jawo ka kiak je iwo ti siunie yas 'yalta'ne, 'nakayi 'wasa'n. Netian'ne, a'wena.”

“Iyoyis'ne jiliakijnieyeja' ape'e.

25“'Yina siupa jlas isijli je t'eki jiwasokia'm, paj ti iyoyeyi ka inapi. Ti majleye 'wete ipi'yayet'iyi'nijpe puwa 'woso'l, siu'neje papo tiliakijni'n ti pesieje. 26Sekyi'i tanat'iyi'nijpe pa ijwienjli siupapo jinia' jikawos, i'yasen'ne ti iyo'ate, “¿Yot'iyi'ni siupapo?” 27Iyo'ne 'ate ti isiujlie, “A'yini ja 'nes, it'imina ja ana' ti takajlunie ka tiliana jlaja wakia 'woma ti yata, lapakawo ti wuj ti inkaj'ni ti jlas yapili, jla'yi ti lajk'ipa kawo ti 'nes paka jiwet'iaye.” 28Jwesie'ne pa jikilia ti 'yijenayi pi iyone, je iyo'ni ka inamit ji'wete. Yam'ne pa jinia' ti ijioyi ti inip'elisine, iyo'ate, “Yas, k'iuk'i'm, amite napo ti awok siliakijnieyeja'.”

29“Isiujlie pa jinia' ti iyo'ate, “'Najanataja pi jiwone ti 'loj kiwa najkapis ti akijmen'najap, je po' japa ka jlomaye ka je iyo siunie jiwo ka iyoyi. Ka poye japa ka jlomaye ka wenk'i'm pet ka sonta jlasiye ka ilia'n pet ka iyo iliakijnieyeja' k'iye pet napo 'yijejnajwas. 30'Nes'ne jla'am ni as ti itij'we jakia aka wikiniet'aj ti itijwe'e napo asejnia, ti ijiuski'lajne'n, jilianak'iye jana wakia 'woma ti yata.”

31“Jinia' isiujlie ti iyo'ate, “Yas, a'am je tialk'i'm. Wikie'eyi siuniwa isijmatis, akijmatis a'am. 32'Nakayi ti awok siliakijnieyeja' 'yu'we kajeyepa ti kaskask'i wita'm. Siunie a'yini ti 'yalta'ne, 'nakayi 'wasa'n. Netian'ne, 'nakayi a'wena”.”

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

Lucas 15: CRT97

Highlight

ಶೇರ್

ಕಾಪಿ