Maka 14
14
Kalu alinumi Yesu duame rapisaya ei
(Madiu 26:1-5; Luka 22:1-2; Dioni 11:45-53)
1Ambiare ande Pasopa pange palawa ma-poyao-ae danga na-piri palawa enda pambape di yapi laapo komea wisaya. Go dina mo Gode repara alinau puaisimiya alinuna kalu alinu pange Mosesimi Rudule Angele waloaisimiya alinu Yesu duame rapoma kundiripu pa ripinyuma liiape pora aisa pisimiya. 2Wenaalinu mendame andoma yanda ma-rekapana enda pambalema dinare go au na-paminya, lisimiya.
Wena mendame Bedani anda para Yesuna kaluna roropo pi wambala koyaisaya ei
(Madiu 26:6-13; Dioni 12:1-8)
3Bedani ree anda para Yesuri ande kindi yainya komoma ma-epeaisaya ali Saimono nipuna anda para pirisaya. Go anda para enda nalo pirinya wena menda ipisaya. Go wename kaname wari kopona yangi ora andaaipe roropo pi wambala ma-ipisaya. Gupuma mo kopo runa adubi luma Yesuna kaluna mo wambala koyaisaya. 4Go pirisimiya alinu menda parame rono pangala ara nimuna nimuna lalore, Go roropo pi wambala, alendana ma-koyadapae, lisimiya. 5-6Mo roropo pi wambala muni ora andapupe muma mo narali wenaalinu pa ma-ada pama, lisimiya. Gupuma monde wena roro lo rumbisimiyapare Yesumi lalore, Nipu minyapalaoma pane pulupae, lisaya. Alendana koae kone ma-siademepae, lisaya. Nipumi ni para ora epe yole aupae, lisaya. 7Narali wenaalinuri naare raayo nimi rapu ao-alimi. Go einare rana pilia naare nani rambameapeyapare niri naare raayo nimi rapu na-ao-aluae, lisaya. 8Nipumi pape au pande, lisaya. Werepe ni komoma dapa pape ei analao siala ara na dona roropo pi wambala koyaripande, lisaya. 9Ambiare go ei kone sualepape, lisaya. Yesuna epe angele pamilia su kuni kuni raayo para gonde nipumi pande eiri wenaalinumi nipu kone siala ara lao-alimi, lisaya.
Diudasimi Yesu rombisaya ei
(Madiu 26:14-16; Luka 22:3-6)
10Go au pumare ande ki laapo pereya angena laapo Yesuna kou nane raluaisimiya alinu komea Diudasi Isakariodi Yesu pa ripinyu ma-adoame, Gode repara alinau puaisimiya alinuna kalu alinu para paisaya. 11Nipumi pua lisaya angele nimumi pangala ara raname waru komala ara nipu muni adoame angele la wisimiya. Go einare Diudasi nipumi Yesu rombape poranu walisaya.
Yesu pange nipuna kou nane raluaisimiya alinu rapu Pasopa enda nisimiya ei
(Madiu 26:17-25; Luka 22:7-14; Dioni 13:21-30)
12Ande palawa ma-poyao-ae danga na-piri palawa enda rambamu pamboaisimiya naarenu engali naare ipisaya. Go naaremere ande Pasopa enda pambape sipisipi mena sisinu liiala pisimiya. Go dina Yesu nipuna kou nane raluaisimiya alinumi angaa meala ara lalore, Nena Pasopa endare ale para wamo pu siala pomanayapae, lisimiya. 13Yesumi ali laapo ree anda nane ambala rapaisaya. Yesumi go angele loma rapaisaya. Ree anda para ali menda bakedina ipa no ria ipula-ainya mandalipi, lisaya. 14Nipu raluma puma pua konda pambalia anda para pulupape, lisaya. Gupuma go anda reali para lalore, Ande Godena Angele Waloaya Alimi lalore, Na kou nane raluaeme alinu pange ni, nana Pasopa enda nola pema anda pandare a para wiapae, dapape, lisaya. 15Gupuma nana alenda alenda analao sula pepe para anda panda mandaa andaai analao wi para wadea, lisaya. Go para nana alenda alendanu niipimi pua wamo pu sialepape, lisaya. 16Ande Yesuna kou nane raluaisipiya ali laapo anda minyapalaoma anda andaai para paisipiya. Gupuma Yesumi lisayande rupa, alenda alendanu analao pa wi para paisipiya. Go para Pasopa enda wamo pisipiya.
17Noleyala ainya, Yesu nipuna ki laapo pereyoma angena laapopu kou nane raluaisimiya alinu rapu ipisaya. 18Enda nala piri, Yesumi lalore, Nimi la gialo, lisaya. Nimi mendame ni rombo diimi, lisaya. Go ni rapu enda naleme ali mendame ni rombo diia, lisaya. 19Ande kou nane raluaisimiya alinumi go ei pangoma kendame komala ara komea komealo lora pulandi pula ara lalore, Ni para na-le, pa ali menda para lale lo lora pulandere pisimiya. 20Gupuma Yesumi lalore, Go ni rapu komea para piri kopo para palawa paliaoma naleme ki laapo pereya angena laapo alinu nimi menda kondo dea, lisaya. 21Godena angele wia bukame lea rupa Alina Si Nakiri komola peapare go ni rombo diia ali komeare rendaa waru milia, lisaya. Angimi nipu na-maida pisare epeda pa, lisaya.
Yesumi nipuna kou nane raluaisimiya alinu para enda ipa alisaya ei
(Madiu 26:26-30; Luka 22:14-20; 1 Korindi 11:23-25)
22Enda nala piri, Yesumi palawa kiri muma Gode para ranae angele loma yainya puma nipuna kou nane raluaisimiya alinu mindi mindipu ale ale pisaya. Go eiri, Na doyale mipa, lisaya. 23Go au puma kapo muma Gode para ranae loma ipa kapona yupima mendaa rupa alama alama pisaya ei nisimiya. 24Yesumi lalore, Gore na wee, wenaali raayona koyayo ei, lisaya. Godeme nimi rapu angele go lo kora widanda lisaya. 25Ora lalo nimi para la gialo, lisaya. Neme go weepi waini ipa wala nape-na-ya, lisaya. Godena Ki Rambuao-aya anda para pumare pena weepi waini ipa nolae, lisaya.
26Gupuma yainya pi yaisa komea loma Olipi kana rumu para paisimiya.
Yesumi Pida para lalore Ni kou wade, lisaya ei
(Madiu 26:31-35; Luka 22:31-34; Dioni 13:36-38)
27-28Go dina Yesumi lalore, Nimi raayome ni gioma pongola peleme, lisaya. Akepeandare mo Godena angele wia bukana wape pea ei gurupa wape pea, lisaya.
Godeme mo sipisipi mena andere-ae ali diiandare
mo sipisipi menanu raayo rapa rapa deme, lea,
lisayapare ni komoma endoaya ei wala muma rekomare Galili andasu nane ni ambala ririna pola, lisaya. Nimiri werepe epeleme, lisaya. 29Pidame Yesuna angele yangi liada ara lalore, Mo mendane alinumi pilimi rupa nee na-minyapalalua lisaya. 30Yesumi Pida para angele yangi liada ara lalore, Go ei kone siape, lisaya. Ambia rimbala kokola rana laapo ambe na-reke-ainya, neeme ni na-ande, ni marea angele rana repo de, lisaya. 31Pidame angele rendaa pimi lalore, Ora nee rapu komapedea pange ni nee na-ande, ni marea angele lape-na-ya, lisaya. Ande kou nane raluaisimiya alinu raayome pange ora mendaa angele lisimiya.
Yesumi Gesemani mapu para yainya pisaya ei
(Madiu 26:36-46; Luka 22:39-46)
32Gesemani mapuna opola ipuma Yesumi nipuna kou nane raluaisimiya alinu para lalore, Ni yainya punu, go lena pidapae, lisaya. 33-34Gupuma Pida, Dieimusi pange Dioni ambo karu paisaya. Nipuna pumi rendaame komala ara ree rambamu da ipisayanda lalore, Na lo para kenda ora andaai pia, lisaya. Go peale lee opoma ni rapu andere-aminya, lisaya. 35Engepusi papare puma nipuna pumi komape ei paalame komala ara komanopae, o na-komanopae loma suna andainyao ara yainya pisaya. 36Apa, na Apa, neeme alenda alenda raayo kone suma puale, lisaya. Go komape rendaa na-meanolae lisayapare na kone pea ei diayapare nena kone pea ei pae, lisaya.
37Gupuma wala perekeya ipuma ande kou nane raluaisimiya ali ambo repo u paliae winya pua andisaya. Yesumi Pida para lalore, Saimono, neere u paliae wilipae, lisaya. Go puawande ambo reka pirape ana na-papae, lisaya. 38Gore Yesumi nimu para lalore, Nimi la andala eimi ma-lopapana yainyanu waru puma andere-alepape. Nimina konemere ora epe aunu pape eina raname komeapare nimi go au pape eina puri menda na-wimi, lisaya.
39Rana menda wala puma menda ande yainya wala pisaya. 40Ande kou nane raluaisimiya ali ambo wala u paliae winya epa andisaya. Nimu u palialame lee kiya pirape ana na-pisaya. Gupuma nipu para lape angele ma-marisimiya.
41Rana repopao wala ipuma epa lalore, Nimiri wala palu liru piruaemepae, lisaya. Ana, lisaya. Ande naare apo ipulandae, lisaya. Andalepae, lisaya. Alina Si Naki koae yanda runguli alinuna ki para apo ma-pangadandae, lisaya. 42Bainya rekalepa, lisaya. Ni romboma ada aliri goyale andalepae, lisaya.
Yesu epa ripinyisimiya ei
(Madiu 26:47-56; Luka 22:47-53; Dioni 18:3-12)
43Yesu angele pa lala-ainya, ande nipuna ki laapona angena laapopu kou nane raluaisimiya alinuna komea ali Diudasi ipisaya. Goleme Diudasi rapu, kamo ae alinu pange Gode repara alinau puaisimiya alinuna kalu alinu pange Mosesimi Rudule Angele waloaisimiya alinumi rapaisimiya alinu, rai pange dolo rili rilipu ipisimiya. 44Monde makirae alimi karu paisayande alinu para yanda rombo alalo lalore, Pua nunu pula aliri Yesu ae, lisaya. Pa ripinyuma waru karu pulupape, lisaya.
45Go para Yesu pa aisaya lena, Diudasi opapaisaya. Gupuma Yesu repara puma lalore, Waloae alio loma, nunu pisaya. 46-47Monde karu paisayande alinumi andere-aoma ambala pa ripinyaisimiyapare gonde para aisaya ali mendame nipuna rai muma Gode repara alinau puaisimiya alinuna kalu alinuna andaa alina pupudengi nao-aisaya alina kale rakepe poaisaya.
48Gupuma Yesumi angele lalore, Ali lu ambuli alinu raliala ara pimi rupa, keperenu pange kamindunu kombe rili rilipu epamepae, lisaya. 49Naare raayo nimi rapu Gode para alinau puaisimiya andaa anda para ara angele waloaripunde dinare na-meamendeae, lisayapare Godena angele wia bukame lea ei ora pinya, lisaya. 50Goleme nipuna kou nane raluaisimiya alinumi nipu minyapaoma pongola alo paisimiya.
51-52Go papare epe aka rungulimi kee rongambaoma pena ali menda Yesu mea pula-ainya werepe ao-lopoaisaya. Nipu pange pa ripinyulame ralisimiyapare nipuna aka koyapa lopala-ainya, pongola paisaya.
Yesu mo kalesoro alinu para karu paisimiya ei
(Madiu 26:57-68; Luka 22:54-55,63-71; Dioni 18:13-14,19-24)
53Gupuma Yesuri Gode repara alinau puaisimiya alinuna kalu alinuna andaa alina anda para ma-paisimiya. Go para monde Gode repara alinau puaisimiya alinuna kalu alinu pange kamo ae alinu pange Mosesimi Rudule Angele waloaisimiya alinu raayo mombealo ae para karu paisimiya. 54Pida werepe ao-lopoma Gode repara alinau puaisimiya alinuna kalu alinuna andaa alina anda pape rupara paisaya. Ande andaa kalu alina endali ripinyi alinu anda kama repana kira pirisimiya lena kupa raisa pulame pua pira monelisaya.
55Monde Gode repara alinau puaisimiya alinuna kalu alinu pange kalesoro alinu raayome Yesu liiape koae au menda pea pa lo aisa pisimiyapare Yesu para koae au menda ora na-anda wisimiya. 56Yesumi pi ei andoma la alo ae alinu andapumi Yesu ma-lopaluame payapo angele waru epa lisimiyapare nimuna angelenu komea neka para na-pambisaya. 57Gupuma mendane alinu rekoma Yesu ma-lopaluame payapo angele gurupa lisimiya. 58Naame go la ei pangama, lisimiya. Go Gode para alinau puaisimiya andaa andare alimi kimi pi ei lakipima naare repo rupara neme alimi na-pape nono pi rupa anda neme pula, la, lisimiya.
59Go angele lisimiya alinuna angele pange komea neka para na-pambisaya. 60Gupuma monde Gode repara alinau puaisimiya alinuna kalu alinuna andaa kalu alimi rikana reka ara Yesu para lora pula ara lalore, Angele menda yangi na-lialiyapae, lisaya. Andapu go epa lalape dame angelenuri ora dame, o payapo dame lore komeanda na-lalepae lisayapare Yesumi angele na-le, yola mea aisaya.
61Monde andaa kalu alimi Yesu wala lora pula ara lalore, Neere Keriso alepae. Wenaalinumi Godena bi minyasiao-aeme. Neere ora ande bi minyasiao-aeme Godena Naki alepae, lisaya. 62Yesumi angele yangi liada ara lalore, Eae, go lalendae, lisaya. Nimi raayome andeleme, lisaya. Alina Si Nakiri alenda alenda raayo papeya Godena popeke kina pirapale, yaa para koaa rapu epelea, lisaya. 63Yesuna angele pangoma monde andaa kalu alimi nipuna maa aka singi singi puma rono pangala ara lalore, Wenaali mendame pi ei andoma la alo ae alinu menda para na-wi laminya, lisaya. 64Nipuri Godena Naki ae, lande eiri pangamendele nimina konemere, ake au paminya kone widamepae, lisaya. Nimu raayome lalore, Nipu Godena Naki da pange nipu Gode rapu mendaa pea lande, lisimiya. Go angele loma nimu raayome kone komea suma lalore, Nipu komena liiaminya, lisimiya.
65Alinu menda parame Yesu supi ra kira kira pisimiya. Nimumi Yesuna lee laapo rengepe minyambo rongaoma ambuname diiandere pisimiya. Diiandere puala ara lalore, Ni go alimi liiaende kone waru suma lala pisimiya. Gupuma endali ripinyi alinumi karu puma ki warame liiala pisimiya.
Pidame Yesu ni na-ande, lisaya ei
(Madiu 26:69-75; Luka 22:56-62; Dioni 18:15-18,25-27)
66Pidare monde anda pape rupara pa pirisaya lena pa pirinyaloma monde Gode repara alinau puaisimiya alinuna kalu alinuna andaa alina pupudengi nao-aisaya nongo menda opola ipisaya. 67-68Mo nongome Pida kupa raisa palo pirinya andoma Pidana lee para andae siala ara lalore, Nee pange Yesu Nasarere ree anda ali rapu pamuaripinde lisayapare Pidame lalore, Ni dia, ni marea, lisaya. Nena lale angelena ree, ni kone na-sialo, lisaya. Go angele la loma Pida rekoma pape lombapa wi pora para opalumba paisaya. Mendane na-pe pa pora gape para ainyalomare kokola e lo rekisaya. 69Monde pupudengi naisayande nongome Pida andoma gonde aisimiya alinu para la alala ara lalore, Go aliri Yesu rapu pamuamende alinu menda kondo gondae, lisaya. 70Go lisayapare Pidame wala lalore, Ni diae, lisaya. Engeisi aoma gonde aisimiya alinu Pida kandepe ma-riaisimiya. Nimumi ma-riada ara lalore, Nee pange Galili andasu nane aoma epe ali ale. Ni Yesuna ali dia angelere akipuma lalepae, lisimiya. 71Gupuma Pidame nipuna wili mandaa ki minyasiada ara lalore, Ora na apa ma-sua ora lalo, lisaya. Nimina go dame aliri ni marea, lisaya. 72Go angele lala-ainya rana laapopao ande kokola e lo rekisaya. Go dina Yesumi Pida nipu para lisayande angele niminyala ipisaya. Kokola e rana laapo ambe na-le-ainya, Ni na-ande ni marea angele rana repo de lisayande ei ma-niminyala ipisaya. Gupisayanda nipuna kalu siamba ara ree waru lisaya.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Maka 14: POLENT23
Highlight
ಹಂಚಿಕೊಳ್ಳಿ
ಕಾಪಿ
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
