Madiu 7
7
Wenaalimi gole wenaali rali pimi eina Yesumi angele lea ei
(Luka 6:37-38,41-42)
1Neeme menda kone waru na-wi ara wenaali na-rali pape. Akepeare Godeme nee na-rali pilia. 2Akepeare neeme go wenaali rali pili rupare Godeme nee gurupa nee rali pilia. 3Nena lee para polopelea repana rombe na-ande arare wala nena yangona lee para ralea onge kodosiri akepea andaluameya lalepae. 4Neeme mo nena lee para polopelea repana rombe pa polopele-ainyare nena ame para lalo ara lalore neeme nena kodosi pea ei kunu rumbano lea auri akepa lalepae. 5Neere yayapi angele waru loale ali ae. Ririnare nena lee para polopelea repana rombe ambala pane mupape. Gupuma nena leeme waru andala arare gurupa mo nena yangona lee para ralea kodo gurupa werepe wamopape.
6Epe yaakopi alenu yananu repara na-adapape. Nimumi lekeyalo arare wala nimi neleme. Nimina epepe kalu sekerenu menanu repara na-adapape. Go au pilimindare nimumi ange aoma lambe rambua rambua pilimi, lisaya.
Gode repara olemole konge da peme rupa Yesumi walisaya ei
(Luka 11:9-13)
7Nee ale menda dia deandare Gode repara konge dendare nee ora gilia. Neeme ale menda go waisalo loma waidindare neeme ora andawili. Godena pora gape dindare nipumi pora ora lombelea. 8Go einare ali apimi Gode para yainya pula ara ale menda nipu para konge deandare mo konge dea alenu ora milia, lisaya. Gupuma ali mendame ale menda aisaya piliandare ora andawilia, lisaya. Gupuma ali mendame pora pombae ale para epa koro deandare ali mendame go pora nipu para ora lombelea, lisaya. 9Nimi nakinuna aranumi nimina nakinumi mondo gi loma konge demendare mondo adame rupare wala kana ma-ale auri ali apimi go au piliayapae. 10Repali konge dealena koae kero ma-ale auri apimi piliayapae. 11Nimiri koae alinuyapare golere nimina nakinu repara epepe alenu ma-alalore waru andeme. Nena apa Gode ora epe ali so yaa nane aya alimiri ale menda nipu repara konge dendare ora epepe alenu andapu gilia.
12Mendame nee repara epepe aunu pina kone siale rupa mandare neeme pange nimu repara go au pape. Go aunuri ande Mosesina walisaya Rudule Angelena ree pange ande poropedi alinumi walisimiya angelenuri go eina gole leeme.
Rengepele pora gapena angele lea ei
(Luka 13:24)
13Rengepele pora gape parayame kondo pambalepape. Akepeare ande repana ralo ae para pora gapere pealea. Gupuma pange go para puluri rendaa na-pea. Gupuma wenaali andapu go parayame peme. 14Go peapare ande endoaya eina pula pora gapere rengepelea pange go para popere rendaa peandare reposinda komea go para kondo pambeme.
Repana pange nipuna kili laapona angele lea ei
(Luka 6:43-44)
15Yayapi poropedi alinu waru andere-alepape. Nimu andelendare mandare sipisipi menanu leale epola pemepare golere no nimuna ruparare ora rarane yananumi gole pimi. 16Nimu ande auri nimuna pilimi aunumi gole andasiali. Poke porenuri reke ae repanana na-poro aya pange mambo reke ae repananare poke pore na-edea. 17Gurupa mandare epe repananumiri epe kili edeme pange koae repananumiri koae kili edeme. 18Epe repananare koae kilinu na-edea pange koae repanana epe kilinu na-edeme. 19Epe kilinu na-ele repananuri repanana po kiruame. 20Go einare yayapi poropedi alinuri nimuna pilimi aunumi gole andasialimi.
Yesumi ni nee na-ande dapea ei
(Luka 13:25-27)
21Ni repara Reali Reali loaeme wenaalinu raayosi Godena Ki Rambuao-aya andasu para na-epeleme.
Nina Apa so epeni nane aya alina rana pea aunu puaeme repaa komea peleme. 22Ande wenaali rali pia naare epele dinare wenaali raayome ni repara go deme. Realio, Realio, naame nena bina Godena angele larima deme. Gupuma nena binare remonu waru ralu rumbama pange wenaalinumi na-ande aunu waru pamu pama lopilimi. 23Go naarenare neme nimu para neme gupi doa. Neme nimi ongepusi pange ni na-ande doa. Go peale nimi koae aunu puaeme wenaali nimi ni na-andele pane pulupa doa.
Anda eloaepe ali laapona angele lea ei
(Luka 6:47-49)
24Go einare menda apimi nina angele pangoma puaya ali nipuri ande kone waru suma kana mandaa anda eloaya ali mandana. 25Yai andapu lopisaya pange pupulu ae ipanu pange roma mo anda rambu aisaya pange pokiki andaaimi mo andana lu pisayapare ande anda na-lopisaya. Akepeare mo andare kana mandaa ele andayalo arare na-lopisaya. 26Go peapare go neme lalo angele na-pangoma puaeme alinuri keyali mendame ipa kekelena anda elisaya ali mandana.
27Ande yai ipisaya pange ipa risaya pange pokiki andaaimi mo anda lupisaya dinare ande anda lopisaya.
28Yesumi go angele lo pereyaisayandare monde wenaalimi go angele pangomare rungulu mealo pambisimiya. 29Akepeare nipumi walisaya angelenuri ande Rudule Angelenu waloaisimiya alinumi waloaeme rupa na-walisaya. Go au na-piri nipumiri bi waru wi alinumi leale angele waru lisaya.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Madiu 7: POLENT23
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
