Madiu 11
11
Dioni Baparaisi nipumi nipuna kou nane raluaisimiya alinu Yesu para rapaisaya ei
(Luka 7:18-35)
1Gupuma Yesu nipumi go mana angele nipuna ki laapo pereyoma angena laapopu kou nane raluaisimiya alinu para waloma nipumi go andasu minyapalaoma repara ree andanu para angele wadoame paisaya.
2Go dinare Dioni mo dipula rupara ara Yesu nipumi pisaya einu raayo pangisayandare Dioni nipumi nipuna kou nane raluaisimiya alinu mendapare Yesu para rapaisaya. 3Go einare go alinumi Yesu para ipuma epa lalore, Dioni Baparaisi nipumi nee para naa raparipanda epama, lisimiya. Dioni nipumi lalore, Ali mendame epelea, la, lisimiya. Go einare neere go epelea la aliyapae, lisimiya. Go ali dia deandare naame wala ali menda waida pomonoyapae, lisimiya.
4Gupuma Yesu nipumi mo alinuna angele yango liada ara lalore, Nimi wala lekeya puma go andamende einu pange pangamende einu Dioni para pua la adapape, lisaya. 5Gurupa dapape, lisaya. Mo lee rumbu pi wenaali lee kiyaoma alenda alenda pamu andaleme pange mo ange kole wenaalinu ange rindapeaoma angena pa pamualeme dapape, lisaya. Gupuma mo kindi yainya komisimiya wenaalinu nimuna kindi yainya komisimiya ei pereyaoma epe rupa aeme dapape, lisaya. Gupuma pange mo kale poae kalenu ma-lomboma angelenu ma-pangaripa dapape, lisaya. Ora komisimiya wenaalinu pange wala rekoma epe rupa aeme dapape, lisaya. Gupuma pange Godena Epe Angelenu mo narali wenaalinu para la ada dapape, lisaya. 6Ni repara kone laapo laapolo wili eimi nee na-lopeleandare gore go ali neere yakili ali ale, lisaya.
7Monde alinu Dioni para Yesumi lisaya angele ma-puluainyare monde pa aisimiya wenaali para gupi lisaya. Ambaisenandere nimimi mo alinu na-ao-pali su para Dioni andolame puamendare nimimiri go para pe auri ale ora andolame puamepae, lora pisaya. Kambe kera pea ei andolame puamepae lisaya. Dia, go ei andolame na-peme. 8Pa marea, neme kone sialoparere ali mendame epe pe amo akanu pambaoma epea einu andola pemepae, lora pisaya. Dia, go ei andolame na-peme. Ali menda apimi ora epe amo akanu pambaomare kini alina andaa anda para piruaeme, lisaya. 9Go peapare nimimi ni para la gialepape, lisaya. Go para pe auri ale ora andolame puamepae, lisaya. Nipuna koneme Godena poropedi ali andola puamepae, lora pisaya. E, ora au peme. Go peapare ora poropedi alinu raayo lu angulae ali andamende.
10Godena angele wia bukame Dioni nipumi pi ei para gurupa lea.
Gurupa lalore, Gode nipumi lalore,
Neere ambe na-epe-ainyalomare ambala ririna
neme na angelenu ma-epenayandare
ali menda rapalua, la loma lea, lisaya.
Ririnare nipumi nena pora pialia, la loma lea, lisaya.
11Yesu nipumi angele wala lalore, Pangalepape lisaya. Dioni nipumiri suna ambala aisimiya alinu raayo lu rambuaya lisaya. Go peapare Godena wenaalimiri ora andaa alinu pange lu angulaya lisaya.
12Neme nimi para ora lalo. Dionina naarena ora kini puma ambia pange Godena wenaalimi rendaa ora andaai midame. Go rendaare ora koae alinumi nimu ma-koyaluame rapoaeme. 13Dioni ambe na-epe dina ande poropedi alinumi pange ande Rudule Angeleme go pa Godena wenaali ma-koyala peme ei ambala angele lisimiya. 14Go einare nimimi nimuna angele wape pi ei para ora lea kone wilimindare gore Dioniri Ilaidia aya, lisaya. Ora ambaisenande Dionimi pula pea auna angele wape pisimiya, lisaya. 15Go einare angele pangape kale lombelea alimiri waru pangena, lisaya.
16-17Yesu nipumi lala ara lalore, Go einare go gole go suna aeme wenaalinu ake pi wenaalinu mandana aemepae, lisaya. Nimuri makedi runa naki nongosinu piruaeme rapa piri nongo nakinu mendame angele dapa loaeme, lisaya. Mendane nongo nakinumi menda para wi lala ara lalore,
Naame bu kenange liala ara ali mendame wena menda midanda diame yaisanu dapa lamaparere nimimi go yaisanu na-lame, lisimiya loma lisaya. Naame ali ro dapa para wi ei yarame kome eina yaisa mandana lamaparere nimimi reenu na-lame, lisimiya loma lisaya.
18Go einare Dioni ipuma epa nipumi Gode para kone sulame enda na-ne pange waini ipa pange na-ne ipisayandare nimumi nimuna lala ara lalore, Koae remo nipu para pia, lame, lisaya. 19Go loma Alina Si Naki ipuma epa enda pange waini ipa nipu rapu nandare nimumi nimuna lala ara lalore, Go ali andalepa, lame. Nipumiri enda waru andaai nea pange waini ipa waru andaai noaya, lame loma lisaya. Nipuri dakisi muni muaeme alinu pange koae koae aunu puaeme wenaalinuna ali aya, lame loma lisaya. Go peapare alenda alenda kone waru wi alinumiri Godena kone waru wi eiri muma go epe aunuri ora orayanae deme, loma lisaya.
Nimuna koae einu para yalame na-kome wenaali para yarame kome ei
(Luka 10:13-15)
20-21Yesu nipumi na-ande aunu ongepusi ree anda menda paranu pisayapare ree anda menda paranuri nipumi na-ande aunu ongesinda andapulele pisaya ree anda paranuri wenaali nimumi go aunu andoma nimuna koae koae einu na-giaisimiya. Go einare Yesu nipumi go ree anda wenaali para rono pangala ara lalore, Korasini wenaalinuo, nimi para yarayoe. Bedesaida wenaalinuo, nimi para pange yarayoe, lisaya. Neme nimina ree anda laapo rupara na-ande aunu raayosi pawande, lisaya. Go na-ande aunu pange Daya Saidoni laapo rupara pula pawayalore go anda laapona wenaalinumi go na-ande einu andoma go gole nimuna koae koae aunu giaisimiya ei andenayanda nimumi pirile pange rungulu pape pi akanu marere puma dokolo danga nimuna do nani kida pame, lisaya. 22Neme nimi para ora angele lalo. Gode nipuna wenaali rali pape naarele epelea dina nipumi mo Daya pange Saidoni ree anda laapo para aeme wenaali repara pumi yarame andapu waru komola peapare Bedesaida Korasini wenaali nimi para ongepusi yarame komelea, lisaya. 23Kapeneame wenaalinu pange nimiri Gode mandana aluame pamepae lisaya. Nimiri repana ralae para peleme lisaya. Nimina rupara pande na-ande aunu Sodomo andasu para pulupayalore Sodomo andasu na-koda pisa, lisaya. 24Neme nimi para lalo. Gode nipuna wenaali rali pape naarele epelea dina nipumi mo Sodomo ree anda para pumi yarame andapu waru komola peapare nimi para ongepusi yarame komelea, lisaya.
Ni para ipuma koro pidapa lisaya ei
(Luka 10:21-22)
25Go naarena Yesu nipumi lalore, Apao, yaa nane pange suna Realio, neme nena bi minyasiado. Neeme nena pula kone wisina eiyanda ranae lalo. Neme nee repara ranae lalo eiri neeme mo kone waru suma rekele peme wenaali repara kundiri pele aunu wala mo olemole waru na-andeme wenaali repara walalenda laloae, lisaya. 26Ee Apao, loma lalore, Nena rana pi eiri go ei koma, lisaya. 27Nina Apamere alenda alenda raayosi na ki para gea, lisaya. Mo Naki nipuri mendame kone na-wiapare nipuna Apame komea kone wia, lisaya. Gupuma pange nipuna Apare mendame kone na-wiapare nipuna Nakimi komea kone wia, pange nipuna rana pea wenaalinu go Nakimi nimu para nipuna Apa waloma nimumi nipu kone wilimi, lisaya.
28Wenaali apimi kenda pi eina rupara ao-ale ali ni repara epape. Akepeare neme nimi repara kuma pi ei gula lisaya. 29Neme walalo angelenu waru pangalepape. Akepeare niri kuma puae ali pange niri rendaa rendaa na-pe. Neme lalo einu pilimindare gore nimina punu pange siainyao alimi lisaya. 30Akepeare nina waloayo angelere rendaa na-pea pange neme ma-rialua kendare yapa pea, lisaya.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Madiu 11: POLENT23
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
