Luka 7
7
Romo ali menda endali ripinyi kalu ali piri alina pupudengi nao-aya ali Yesumi ma-epeaisaya ei
(Madiu 8:5-13)
1Gupuma Yesu nipumi go angele raayo wenaali para la alomare go anda minyapalaoma mo Kapeneame ree anda nane paisaya. 2Gupuma mo Romo andasu nane endali ripinyi ali, ali ria ki kalelepuna kalu ali go para aisaya. Go andaa ali nipuna pumi raname waru komo-ae naki menda nipuna pupudengi nao-ae naki aisayapare repara komolame rapisaya. 3Gupuma go andaa alimi Yesumi puaisaya einu pangoma nipumi mo Isaraelimi mandu rangala pae repaana kalu alinu mendapareme Yesu lamula puma mo andaa alina pupudengi nao-ae naki epa ma-epeainyaya rapaisaya. 4Go kalu alinumi Yesu repara ipuma epa kongeyala ara lalore, gupi lisimiya. Go aliri epe ali ayandare neemere nipu ora rambamiliae, lisimiya. 5Nipumi naana wenaali repara pumi waru komoaya pange nipumi nipuna gole na angele kuruaema anda menda elaripae, lisimiya.
6Go ei pangoma Yesu nipu nimu rapu mendaa dina paisimiya. Yesu nipuna anda repara ainyaloma mo endali ripinyi alinuna kalu alimiri nipuna yangonu menda paramere Yesu para angele menda lenayanda rapaisaya. Nimumiri epa gurupa lalore, Realio, pinyawa, lisimiya. 7Mo kalu alimi nee para lalore, Niri nee Yesu reena epe ali nee rapu ana pape-na-ayale nee na anda para na-konda pambola epape, loma lisaya ei la alisimiya. Gurupa pange ni Yesu nee ale lena epape pange ora anasi na-pea, loma lisaya ei la alisimiya. Go einare na pupudengi nae naki epelenayanda neeme pa angele koma dendare nipu ora epedeale, la, loma lisimiya. 8Akepeanda ni pange nee mandana ayo, la, loma lisimiya. Ni pange andaa alinuna rolea para ayo. Gupuma nina rolea para pange endali mini alinu mendapare ao-peme. Neme go na endali ripinyi ali menda para pu, doandare na angele pangoma wangepu pelea, la. Neme mo endali ripinyi ali menda para ipu, doandare na angele pangoma wangepu epelea, la. Gurupare neme na pakama muni na-muaya pupudengi noaya naki para go au pa, doandare nipumi na angele pangoma wangepu pilia, la, loma lisimiya.
9Go eina Yesu nipumi mo kalu alimi lisaya angele pangoma rungula mealo pambisaya. Nipumiri lekeyoma mo nipuna kou nane raluma ipisimiya wenaalinu para lalore, Ora lalo. Mo Isaraeli andasu rupara pange andasu menda nane pange ali mendame go kalu alimi kone rulao-aya rupa ora na-andoayo, lisaya.
10Go einare mo kalu alimi rapaisaya alinu wala lekeyoma mo kalu alina anda para puma mo pupudengi noaya nakiri wala epe rupa pa pirisaya ei andisimiya.
Yesumi waisa wenana komea naki ma-endaisaya ei
11Engesinda aoma werepe nanere Yesu pange nipuna kou nane raluaisimiya alinu pange wenaali waru andapu rapu Naini ree anda para paisimiya.
12Nipu pumare mo ree anda para wisaya kuda pape andaa pora gape para puma reesi para pua ainyare alinu menda parame kome pena ali ro menda ria ipisimiya. Mo komisaya alina angiri waisa wena aisaya. Go komisaya ali kome komea mandu wisaya. Go dinare mo ree anda para aisimiya wenaali andapu mo waisa wena rapu ipisimiya. 13Go einare Realimi mo waisa wena andoma nipuna pumi yarame komala ara nipumi mo wena para lalore, Neeme ree na-lape, lisaya. 14Yesu nipumi go ali reke reesi para puma nipuna kimi mo ali reke waraoma mo reke ma-ria ipisimiya alinuri na-pe pa aisimiya. Yesu nipumi mo ali ro para lalore gupi lisaya. Pena alio. Neme nee para lalole, rekae, lisaya.
15Go angele lisayandare monde komisaya aliri rekoma piriri angelenu kini pu lisaya. Gupuma Yesu nipumiri nipuna ama para lalo ara lalore, Nena naki gonda, lisaya.
16Go eina wenaali andapumi go au andoma pururumi komala ara Godena bi ma-minyasiaisimiya. Gore nimumi lalore, Ora Godena poropedi kalu ali menda naa rupara epande, lisimiya. Gode nipumi nipuna wenaalinu rambamulameya epande, lisimiya.
17Mo Yesumi pisaya einuna angelenuri go Diudia andasu raayo paranu pange su kuni kuni paranu la eiri pamuaisimiya.
Dioni Baparaisi nipumi nipuna kou nane raluaisipiya ali laapo Yesu para rapaisaya ei
(Madiu 11:2-19)
18-19Go dinare Dioni nipuna kou nane raluaisimiya alinumi mo Yesumi pisaya einu raayo nipu para la alomare Dioni nipumi nipuna kou nane raluaisipiya ali laapo para Ipulupae, loma lalore, Reali para angele menda lora pulame pulupape, loma rapaisaya. Niipimi Yesu para pelependare gurupa lora pula ara lalore, Dioni nipumi lalore, Neere ande naa ambuname epelea loma maisamba pima ande aliyapae o ali menda pa epelea loma maisambo piru panayapae, loma Yesu lora pinyayanda rapaisaya.
20Monde ali laapore Yesu para ipuma epa lalore, Dioni Baparaisi nipumi nee para saa raparipanda epapa, lisipiya. Dioni nipumi lalore, Neere ande naa ambuname epelea loma maisambo pima ande aliyapae, o ali menda pa epelea loma maisambo piru-aema ali menda manayapae, loma Dionimi lora pa, lisipiya.
21Go dina go au pulu-ainya Yesu nipumi yainya menda menda ae wenaali pange koae remo pa pirisaya wenaali waru andapu pange ma-epeaisaya. Lee rumbu pi wenaali andapu pange lee ma-kiyaoma ma-epeaisaya.
22Gupuma Yesu nipumi mo Dioni nipumi rapaisaya ali laapona angele yango liada ara lalore, Niipi wala lekeya puma go andapende einu pange pangapende einu Dioni para pua la adapape, lisaya. Gurupa dapape. Mo lee rumbu pi wenaalinu neme lee ma-kiyaoma alenda alenda pamu ma-andala pi, lisaya. Mo ange kole wenaalinu neme ange ma-rindapeaoma angena pa ma-pamuala pi, lisaya. Gupuma mo kindi yainya komisimiya wenaalinu nimuna kindi yainya komisimiya ei pereyaoma epe rupa ma-ala pi, lisaya. Gupuma pange mo kale poae alinuna kalenu ma-lombaoma angelenu ma-pangala pi, lisaya. Ora komisimiya wenaalinu pange wala ma-rekoma epe rupa pa aeme, lisaya. Gupuma pange neme Godena Epe Angele mo narali wenaali para la aloayo, lisaya. 23Ni repara kone laapo laapolo wili eimi nee na-lopelendare gore go ali neere yakili ali ale, lisaya.
24Monde ali laapore Yesu minyapalaoma penalomare Yesu nipumi go para aisimiya wenaali waru andapu para Dionina angele laisaya. Nipumi lalore, Nimimi mo alinu na-ao-pali weambi pi su para Dioni andolame puamendare nimimiri go para ale ora andolame puamepae, loma angaa misaya. Kambe kera pea ei andolame puamepae, lisaya. Dia, go andolame na-peme. Diama, ora diae. 25Nimimi go lena ale ora andolameya puamepae, loma angaa misaya. Nimimi ali mendame epepe amo akanu pambaoma alia loma andolameya puamepae, loma angaa misaya. Dia, go ei andolame na-peme. Gurupa akanu yamoma aeme wenaalinuri amo alinu lee ale epepe anda para pange kini alinuna anda andaaipe paranu komea andele, lisaya. 26Nimimi ni la gipanda. Nimiri api andolameya puameyapae. Godena poropedi ali andolameya puamepae, loma angaa misaya. Eeye, ora go pamendepare nipuri ora Godena poropedi alinu raayosi ora nipumi lu angulaya ali andamende, lisaya.
27Godena angele wia bukame Dioni nipumi pi ei para gurupa wape pea. Gode nipumi lalore,
Neere ambe na-epe-ainyalomare ambala ririna neme
na angelenu ma-epenayandare ali menda rapalua,
lisaya.
Ririnare nipumi nena pora pialia, loma lea, lisaya.
28Yesu nipumi angele wala lala ara lalore, Pangalepape, lisaya. Dioni nipuri ambala aisimiya alinu raayosi lu angulaya. Go peapare Godena Ki Rambuao-aya Eina rolo para aya alimiri Dioni lu angulao-aya lisaya.
29Go einare go para aisimiya wenaalinumi go angele pangisimiya. Go wenaalinu pange mo dakisi muni muaisimiya alinu rapu Dionimi ambalande baparaisi aunu painyalomare nimumi Godere ora aunu komea puaya lisimiya. 30Go peapare mo Parisi alinuri pange mo Mosesimi Rudule Angele waloaisimiya alinu pange Dioni nipumi nimu baparaisi au na-painya pange Godeme nimu para pula koae aunu ora giaisimiya.
31Go eina Yesumi lala ara lalore, Ambiare go suna ao-paleme wenaalinuri ale rapu manda meanoyapae, o nimuri ale mandanayapae, loma lisaya. 32Go wenaalinu nimuri makedi kama piruae nongo nakinu mandana aeme, lisaya. Repaa mendane mo repaa menda para lala ara lalore,
Naame bu kenange liala ara ali mendame wena
menda midanda diame yaisanu dapa lamepare
nimimi go yaisanu na-lame, lisimiya loma lisaya.
Naame ali ro dapa para wi ei yarame koma eina
yaisanu lamapare nimimi reenu na-lame,
lisimiya loma lisaya.
33Dioni Baparaisi pao-ae ali ipuma Gode para kone sulameyanda naare raayosi koro mendame enda na-nala pisaya ei pange waini ipa na-nala pisaya eina nimimi lalore, Koae remo pia ali lamende, loma lisaya.
34Go eina Alina Si Naki nipu ipuma enda pange waini ipa epa nande ei andoma nimina niminale lalolo pula ara lalore, Go ali andelepa, lame. Gupuma nipumiri enda waru andaai nea pange waini ipa waru noae ali mo dakisi muni muaeme alinu pange mo wenaalinumi raname na-komeme wenaalinuna menda yango ali aya, lame lisaya. 35Wenaali ambuna Godena kone waru suma rekele pu wia ei raluaeme wenaalimiri ora eiyana loaeme, lisaya.
Yesu Parisi ali menda Saimono nipuna anda para enda nola paisaya ei
36Gupuma rana menda Parisi ali mendame nipuna anda para Yesu enda nenaya, wi lisaya. Yesu go alina anda para pua piruma enda nolameyanda pirisaya.
37Go andaa ree anda para ali yoloae wena menda aisaya. Go wename Yesu nipu mo Parisi alina anda para epa piri enda no pia angele lisimiya ei pangoma nipumi kaname wari karumbina roropo waru pi wambala ripinyuma mo anda para ma-paisaya. 38Gupuma mo wena nipumi Yesuna kou naneyame puma Yesuna ange repara pua reka aisaya. Gupuma nipumi nipuna koae aunu puaisaya einu yarame komala ara nipuna ree rondopa ipare Yesuna angena lopenalisaya. Gupuma nipuna kalu irimi wala Yesuna angena monde ree rondopa kunaoma nunu pisaya. Gupuma mo roropo waru pi wambalare Yesuna angena koyaisaya. 39Monde Parisi alimi go ei andoma nipuna gole lalore gupi lisaya. Go aliri ora Godena poropedi aliyalore nipumi niri go wename warada lo pename andolo pa. Nipumi go wenare koae koae einu rupara ao-paluaya einu pange kone sula paa pi nipuna gole lisaya.
40Go einare Yesumi nipu para lalore, Saimono o. Nee saame angelesi menda depa, lisaya. Nipumi angele yango liada ara lalore, Waloae alio, nee saamere ale angele depayapae, lisaya.
41Go lisayanda Yesumi gupi lisaya. Rana menda kana rundu aloae ali mendame ali laapo kana rundu alisaya. Ali mendare ali ria mendane ki aloma ali mendare ki laapo komea alisaya. 42Monde alimiri mo rundu meapeya ali laapome anana ambulape-na-yanda nipuna rundu ali laapo raidipuname mone ara nena giaisaya. Go einare Yesumi Saimono para angaa meala ara lalore gupi lisaya. Go rundu mepe ali laapomere mo rundu mepe ali reparare pu apimi andapu adeayapae, lisaya.
43Go einare Saimono nipumi nipuna angelena yango liada ara lalore, Pa marea. Neme kone sialopare, nipuna rundu waru aya ei giada alimi mo ali menda para pumi kome eiri ora andapupe adea, lisaya. Go angele lisayandare, Yesu nipumi lalore, Neeme ora lale, lisaya. 44Gupuma Yesu nipumi wala mo wena andala ara Saimono para lalore, Neeme go wena andalepae, lisaya. Niri nena anda para epa konda pambawapare neeme mo ipame na ange na-randepearipinde, lisaya. Go peapare mo wename nipuna lee para piri ree rondopa ipame na ange randepeaoma nipuna irimi wala ma-kapuyaripande, lisaya. 45Go einare, neme go anda para konda pambaripu dinare ni nunu na-paepare neme go anda para konda pambaripu dinare mo wenamere na ange nunu pi ei kini puma ambia go pange go au pala pia, lisaya. 46Neeme mo olipi repanana kili wambala wari ei na kaluna na-kiraripindepare mo wenamere ora epe roropo pi wambala mumare na angena kiraripa, lisaya.
47Neme nee para la gialo. Nipuna pu ada ei andaai nipumi ni para gida eimiri nipuna koae aunu andapupe pea einuri go peredanda lo wada. Go peapare mendame koae aunu ongepusi piliandare nipuna koae einu repara ongepusi Godeme kone na-wiliandare nipumi Gode repara pu ada eiri ongepusi loma wada, lisaya.
48Go einare Yesu nipumi mo wena para lalore, Neeme pele koae aunu raayosi perelea, lisaya.
49Mo Yesu rapu enda no pirisimiya wenaalinumi nimuna nimunale angele angele lalolo pula ara lalore, Go koae einu randepeada aliri apiyapae, lisimiya.
50Go einare Yesu nipumi mo wena para lalore, Nena kone rulale eimiri nee rambameande, lisaya. Go peale nena pu para kuma pula-ainyaloma pope, lisaya.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Luka 7: POLENT23
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
