Luka 10
10
Yesu nipumi ali ria repona ali mendana ki laapona ange mendana laapo alinu rapaisaya ei
1Gonde aunu la puma Reali nipumi ali ria repona ali mendana ki laapona ange mendana laapo ali mendapare muma laapo laapolo nipu polameyanda pisaya ree anda paranu rapa rapa pisaya.
2Gupuma Yesu nipumi nimu para lalore, Mo e mapuna enda porei waru andapu wiapare mo enda mulame pupudengi nape wenaali andapu na-ao-aeme. Go peandare nimimi mo e mapu Reali para nipumi ali andapu mo e mapu para rapaoma nimumi pupudengi noma mo endanu minya yainya palepape, lisaya. 3Nimi pulupape, lisaya. Neme nimi sipisipi menana sinu yano rarane yananu aeme paranu apo rapandondae, lisaya. 4Nimimi pasu menda pange maa nusi pange ange andanu menda na-ma-pulupape, lisaya. Menda ali rapu porana angele lo na-pua ala pipape, lisaya. 5Nimimi anda menda para pua konda pambelemendare ririna nimimi gupi dapape. Go anda para aeme repaa repara kuma pi ei epenae, lo dapape, lisaya. 6Kuma pi ei rupara ao-ape rana komoae ali menda go para aliandare gore nena kuma pi eina angele laende angele pa lapa winyalape. Go peapare menda na-aliandare gore nena kuma pi eina angele laende ei pane mupape. 7Pupudengi nao-aya aliri nipuna yangi ora mula piara. Go peale anda lumbu na-liri komea anda para pa ao-ara enda pange ipanu gilimi einu pawa noalepape, lisaya. 8Gupuma nimi ree anda menda para pua konda pambalimindare go ree anda wenaalinumi nimi para raname komala ara nimi muma nimuna anda rupara karu pelemendare nimumi gilimi endanu pa nalepape, lisaya. 9Go einare nimimi go ree anda para yainya komeme wenaalinuna yainyanu waru ma-epealepape, lisaya. Gupuma nimimi go para aeme wenaalinu para lalore, Godena Ki Rambuao-aya Ei repara epande lo, la adapape, lisaya. 10-11Go peapare nimimi ree anda komea menda para pua konda pambelemenda nimumi nimi nimuna anda paranu na-karu pelemendare gore nimimi puma mo pora wi ale nani pua lalore, Nimina ree anda para wi dokolo danga naana angena akipe ei go randolo rumbalemanda lo la adapape, lisaya. Go peapare go ei kone sialepape, lo la adapape, lisaya. Godena Ki Rambuao-aya Ei nimi repara reesi para epande, lo la adapape, lisaya. 12Neme nimi para ora lalo. Godena wenaali Rali Pia Naare epeleandare Godeme Sodomo ree anda wenaali para pumi yarame andapu waru komola ara peapare nipumi nimi para ongepusi yarame komelea, lisaya.
Nimuna koae einu para yalame na-kome wenaali para yarame kome ei
(Madiu 11:20-24)
13Gupuma Yesumi nimu para lalore, Korasini ree anda wenaalinuo, nimimi yarayoae, lisaya. Bedesaida ree anda wenaalinuo, nimimi pange yarayoae, lisaya. Neme nimina ree anda laapo rupara na-ande aunu raayosi pawande, lisaya. Go na-ande aunu pange Daya Saidoni ree anda laapo rupara pula pawayalore go anda laapona wenaalinumi go na-ande einu andoma go gole nimuna koae aunu giaisimiya ei andenayanda nimumi pirile pange rungulu pape pi akanu marere puma dokolo danga nimuna do nani kida pame, lisaya.
14Gode nipuna Wenaali Rali Pape Naarele epelea dina nipumi mo Daya pange Saidoni ree anda laapo para aeme wenaali repara pumi yarame andapu waru komola peapare Bedesaida pange Korasini wenaalinu nimi para ongepusi yarame komelea, lisaya. 15Gupuma nimi Kapeneame ree anda wenaalinu nimiri Gode mandana aluame pamepae, lisaya. Nimiri repana ralae para peleme, lisaya.
16Yesu nipumi nipuna kou nane raluaisimiya alinu para lalore, Ali apimi nimina angaa para dame ei pangoma miliandare gore neme lalo ei pange pangoma miliae, lisaya. Ali apimi nimi gialiandare gore ni para pange giadae, lisaya. Gurupa pange ali apimi ni gialiandare mo ni rapaya Gode pange giadae, lisaya.
Mo ali ria repona ki laapo pereyoma ange mendanena laapo alinu wala lekeya ipisimiya ei
17Werepe nane monde ali ria repona ki laapo pereyoma ange mendanena laapo alinu raname waru komala ara pu na-ayale mandana Yesu para wala lekeya ipisimiya. Monde alinumi Yesu para lalore, Realio, naame nena bi larimandare mo koae remonuri naana angeleme lu rambuarima, lisimiya.
18Gupuma Yesu nipumi nimu para angele yango liada ara lalore, Neme Sadani so yaa naneyame kari yapa mandana suna lopa eiri neme andawae, lisaya.
19Pangalepape. Nimimi mo keronu pange kaala einu rengepe rambuape ei ana pinyayanda pange yanda runguli remona puri lu rambualiminyayanda neme nimi lu rambuao-aya kongapu palea alinu ma-aripunde, lisaya. Go einare nimi para ale mendame na-waralia, lisaya. 20Go peale mo koae remonumi nimina angele pangoma pilia ei para raname na-komalepape, lisaya. Go peapare nimina binuri ambala Godena Aya Lena wape pu wiandare raname komalepape, lisaya.
Yesumi Gode repara rana komisaya ei
(Madiu 11:25-27; 13:16-17)
21Go naarena mo Epe Yaakopi Sipiridimi Yesu nipuna kone lo romba rupara rana pi ei pu na-ayalesi mandana ma-aisayandare Yesu nipumi lalore, Apao, yaa nane pange suna Realio, neme nena bi minyasiado. Neeme nena pula kone wisina eiyanda ranae lalo. Neme nee repara ranae lalo eiri neeme mo kone waru suma rekele peme wenaali repara kundiri pele aunu wala mo olemole waru na-andeme wenaali repara walalenda laloae, lisaya.
22Nina Apamere alenda alenda raayosi na ki para gea, lisaya. Mo Si nipuri mendame kone nawiapare nipuna Arame komea kone wia, lisaya. Gurupa mandanare nipuna Arare mendame kone na-wiapare nipuna Simi komea kone wia, pange nipuna kone pilia wenaalinu go Simi nipuna Ara waloma nimumi komea Ara kone wilimi, lisaya.
23Gupuma Yesu nipumi nipuna kou nane raluaisimiya alinu para lekeyalo ara go repaasi para kundiripu lalore, Nimiri yakili lia alinuae, lisaya. Nimimi andaleme alenu andalemenda laloae, lisaya.
24Neme nimi para lalo. Godena poropedi alinu pange kini alinu waru andapumi nimimi andaleme alenu andola pisimiyapare nimumi andape-na-ya, lisaya. Nimumi nimimi pangaleme alenu pangolameya pisimiyapare pangape-na-ya, lisaya.
Sameria andasu ali mendame epe pisaya eina siapi angele lisaya ei
25Mosesimi Rudule Angele waloae ali menda ipuma Yesu la andolameya lalore, Waloae Alio, neme endo-aya ei mulameyare ake au pulayapae, loma angaa misaya.
26Go einare Yesu nipumi nipuna angele yango liala ara lalore, Godena angele wia bukamere ale wape peapae, lisaya. Gupuma neeme go angelenu yarepedendare neemere alenu andawilipae, loma angaa misaya.
27Go einare go alimi nipuna angele yango lialo ara lalore, Naame pu lo romba raayome pange naana remonu raayome pange naana puri raayome pange naana konenu raayonumi Reali naana Gode para pu ora waru andapu aloalima, lisaya. Gupuma naame naana repaasi para naana gole naa pu andapu aloaema rupa pu alala paminya, lisaya.
28Yesu nipumi nipuna angele yango lialo ara lalore, Ee, ora neeme angele yango epe rupa liaende, lisaya. Neeme go au pilindare gore endo-aya ei ora mili, lisaya.
29Go peapare mo Rudule Angele waloae alimi nipuna angele komea ora ei loma wadoameyandare Yesu para angele menda angaa meala ara lalore, Nina repaare apirapoyapae, loma angaa misaya.
30Go einare Yesu nipumi nipuna angele yango lialo ara lalore, Ambaisenande ali komeame mo Diurusaleme ree anda minyapalaoma no Dieriko ree anda nane puaya, lisaya. Nipu pulu-ainya wenaalinuna alenu pakama ralu lopao muaeme alinumi nipu pa riminyuma nipuna aka olemolenu pake muma pukaleale waraoma puameya dina rana mena komolame raparipaya. 31Go dinare Gode repara alinau puaya ali go porana pulu-ainya monde lu pa wisaya ali andoma wanduaoma puaya. 32Werepe nanele Lipaimi mandu rangala pae anda repaa ali menda pange mendaa ali lu pa wisaya lena opapaisayapare nipumi mo ali lu pa wisaya ei andoma alepae loma wanduaoma popaya. 33Mo Lipaina anda repaa alina ange nane Sameria ali menda pange go pora nani mendaa ali do wisaya porana ipuma mo ali do epa andaya. Nipumi mo ali andoma nipuna pumi ora yarame waru komaya, lisaya. 34Go einare nipumi mo lu pa wisaya ali para puma nipumi wambala ipa pange waini ipa laapome mo alina liameyale do naini koyaoma aka rungulinumi koraripaya. Go au pumare monde ali nipuna dongi menana kouna kupi muma ma-piraoma mo kimisu wenaalinu epa paliala puaisimiya anda para ma-puma go para andere-aripaya. 35Wala yapi pu kepea nane monde alimi kimisu wenaalinu epa paliala puaisimiya anda andere-aisaya ali para yapi laapome pupudengi noaisimiyanda yangi aloaisimiya kana kili alala ara lalore, Go ali waru andere-ape, lisaya. Nena muni pange nena alenu ade alenu ni wala lekeya ipuma nena muni pange nena alenda alendanu yango wala epa gula, laya, loma lisaya.
36Pereyada arare Yesumi gupi lisaya. Nena konemere go ali repomere go lu pa wia ali reparare nimuna repaa repara pu adapame rupa mandana aliri apimi go au payapae, lisaya.
37Go einare Rudule Angele waloae alimi nipuna angele yango lialo ara lalore, Mango ali para yarame komoma rambamea ali, lisaya. Yesu nipumi nipuna angele yango lialo ara lalore, Ee, nee pange puma mendaa rupa go alimi pisaya aunu pua papeae, lisaya.
Yesu nipu Meari Mada laapo para kimisu paisaya ei
38Yesu nipu nipuna kou nane raluaisimiya alinu rapu porana pulu ara ree anda menda para paisimiya. Go ree anda para wena menda nipuna bi Mada nipumi epe kone siala ara Yesu nipuna anda para karu paisaya.
39Mada nipuna akisi komea menda aisaya. Nipuna biri Meari. Meari nipumi ipuma mo Realina ange lopoma pirisaya lena ree nane epa piruma nipumi angele walaya ei pangisaya. 40Gupisayapare Mada nipumi enda andapu wamo pisaya eimiri nipuna kone kenda waru andapu suma nipumi Reali para puma lalore, Realio, nina akimi neme pupudengi nalo ei na kunuma nanoloma pakama pi eiri neeme ale kone sialepae, lisaya. Ni rambaminya angele nipu para lae, lisaya.
41-42Gupi lisayandare Reali nipumi nipuna angele yango liada ara lalore, Madao, Madao, neeme ale andapu para kone su rapale pange kone kendame komalepare ale komea komea manda pea, lisaya. Mearimiri kone suma ora ale meandare mendame ralu lopao meape-na-ya, lisaya.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Luka 10: POLENT23
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
