Matiye 2
2
Bɔ̀dũnbáa dɔ̀ ɛ́ ɓɛrɛ ɛ́ Yiezu ɛ̀ húi
1Yiezu ɛ́ hàarí tɔn Bɛtilehɛɛmu lóo hũn, hɔ̀ Zudee pɛ̃̀hɛ̃ hũn, lè yìi lɛ á Herɔɔde ɛ́ dàa iè bɛ́zuú. Ɛ́ ɓɛ́ bɔ̀dũnbáa dɔ̀ lɛ kɛ̀rɛa hɔ ńpĩ́inàwuò cɛ̃̀un ɛ́ van lɔ́ àá lé wurù hànlén ɛ́ dàa ɓɛrɛ hɔ̀ Zerizalɛɛmu lóo hũn. 2Ɛ́ ɓɛ́ ɓɛrɛ ɛ́ dìe nɛ làa: «Ɓɛ̀ Zuifuɓɛ bɛ́zuú lɛ ɛ́ tɔn hɔ̀pe sáalɛ lɛ ɛ́ wi yí? Ké mɔn piè ńpĩ́inàwiì àá lé wurù hànlén ɛ́ ké ɓɛrɛ ɛ́ ke ɓen ɓàaní-ɛ̀ ǹ.» 3Ɛ́ bòo lɛ á bɛ́zuú Herɔɔde ɛ́ ɲɛ́ hɔ́, á hɛ̀ hũn yerɛ, àpe àá ɓɛ́ Zerizalɛɛmu nìɛ ɓɛ́kùi. 4Á vɔn ɓɛ̀ Dɔfĩn khɛ̃́ndàariè hándíe ɓɛ́kùi àá ɔ́ Moyiize làndɛ́ kɛ̀ránliè ɛ́ koo ɓánlɔ̀n, à ɛ́ ɓɛ̀ dìenin nɛ hɔ iè yí á Kirisa ɛ́ fɔ́ɓáǹ à te hũn? 5Ɛ́ ɓɛ́ nɛ hɔ iè Bɛtilehɛɛmu lóo hũn hɔ̀ Zudee pɛ̃̀hɛ̃ hũn iè hɔ̀ lɛ ɛ́ Dɔfĩn bɔ̀háanírɔ ɛ́ hàarí wɛ̃́ bie nɛ làa:
6 «Ɛ́ kɔ́pe Bɛtilehɛɛmu, kɔ̀pe lɛ iè Zudee lóo dɔ̀, hɔ̀ yí kɔ́pe ɛ́ temu ɲún mí hɔ́ Zudee lóoniɛ̀ hũn wɛ̀; iè hɔ̀ lɛ ɛ́ hɔ́ iè kɔ̀pe hũn á nìnbírɔ lɛ mii dí niǹ nìɛ lɛ iè ɓɛ̀ Yizarayɛɛle nìɛ híɛhɔ́ ɛ́ ɓén zɔ́ lé hũn.»
7Á Herɔɔde ɛ́ tànkɔ̀niɛ ɛ́ vɔn ɓɛ̀ bɔ̀dũnbáa à ɓɛ̀ dìenin nɛ ɓɛ zɛ̃́ní lé yìi lɛ ɛ́ ɓɛ́ dàa mɔn lè ńpĩ́inàwiì. 8À khie tɔrɛ ɓɛ̀ nɛ ɓɛ vɛ hɔ Bɛtilehɛɛmu, à bie lɛ́ ɓà ǹ nɛ làa: «Mì vɛ dìe ɔ zĩncáahɔ́ sɔ bòo sãàní, kɛ́ mí ɓen mɔn ɔ̀, ɛ̀ mì lɛ́ nɛ n ɲí hɔ́, bòo lɛ ɛ́ wé ɛ̀ ǹ vɛ yán ɛ̀ ɓiɛ̀ vɛ ɓàaní-ɛ̀ ǹ.»
9Ɛ́ hɔ́ lɛ ɛ́ ɓɛ́ bɔ̀dũnbáa ɛ́ ɲɛ́ á bɛ́zuú bòo vɔ́, ɛ́ ɓɛ́ hĩ́nà cɔ́. Ɛ́ lé ńpĩ́inàwiì lɛ ɛ́ ɓɛ́ hṹn sɛ̃̀nɛ́hã̀ mɔn lè wurù hànlén, ɛ́ dú peɓɛ̀ híɛhɔ́. Ɛ́ hɔ́ lɛ ɛ́ lé van dɛ̃un lè dáanú lɛ á zĩncáahɔ́ ɛ́ wi hũn, ɛ́ lé yòó dɛ̃̀. 10Ɛ́ hɔ́ lɛ ɛ́ ɓɛ́ mɔn lè ńpĩ́inàwiì kɛ́ lé dɛ̃̀, ɛ́ ɓɛ́ wɛniɛ ɓɛ́te cɛ̃̀un. 11Ɛ́ ɓɛ́ yòó zɔn le zũnù ɛ́ zɔn mɔn ɔ̀ zĩncáahɔ́ àá ɓá nín Maari. Ɛ́ ɓɛ́ síɛ kɛkɛsí ɓɛ́ nunkɛ́yìe lɔ̀n ɛ̀ ɓɛ̀ ɓàaniɛ ɔ̀ zĩncáahɔ́ ǹ, ɛ̀ ɓɛ̀ khie hánkɛa ɓɛ́ tĩ̀ɛ ɛ̀ ɓɛ̀ hɛ̃un ɔ̀ àá hɔ́ sɛ̃́ní àá hɔ́ bòo dɔ̀ lɛ ɛ́ wóo cĩ̀ní kɛ́ hɔ́ tũnù tĩ, àá hɔ́ yurɔ́ lɛ tũnù tĩ lɛ ɛ́ ɓɛ́ wóò ve nɛ miire 12Ɛ́ pehɔ̀ máahṹ, ɛ̀ Dɔfĩn den bie lɛ́ ɓà ǹ peɓɛ̀ dɛ̀woò hũn nɛ ɓɛ bí khũ̀á vɛ lí-e pe Herɔɔde lɔ̀n wɛ̀. Ɛ́ ɓɛ́ wo khie bɔ̀ wṹn dɛ̀ɓuɛ̀ ɛ́ dàa van ɓɛ́ cɛ̃̀mɛ̀nɛ́ hũn.
Boo lɛ ɛ́ Zozɛɛfu àá Maari ɛ́ dàa zɔ̀ van Eziputi àá ɔ́ zĩncáahɔ́
13Ɛ́ bòo lɛ ɛ́ ɓɛ́ bɔ̀dũnbáa ɛ́ cɔ́ ɓɔn, ɛ́ Ɲunsɔ mɛlɛkɛ dɔ̀ ɛ́ bie lɛ́ á Zozɛɛfu ǹ hɔ̀ dɛ̀woò hũn ɛ́ nɛ làa: «Zozɛɛfu, síɛ hĩ́ní mìí ɔ́ zĩncáahɔ́ àá ɓá nín ɛ̀ kɔ̀ zè vɛ hɔ Eziputi cɛ̃̀mɛ̀nɛ́ hũn ɛ̀ vɛ kansí yán fúu kɛ́ yí bòo ɛ́ ń bie lɛ́ kɔ̀ ǹ nɛ kɔ khũ̀á ɓen. Iè hɔ̀ lɛ á Herɔɔde ɛ́ mii bie nɛ mi cànkɛ a zĩncáahɔ́ ɛ̀ ɓé.» 14Ɛ́ Zozɛɛfu ɛ́ wo síɛ hĩ́nà hɔ̀ sṹnúhṹn ɛ́ mɔ̀ à zĩncáahɔ́ àá ɓá nín ɛ́ dàa cɔ́ van hɔ̀ Eziputi cɛ̃̀mɛ̀nɛ́ hũn. 15Á van ɛ́ kɛsí yɔn fúu á Herɔɔde ɛ́ van húrun lɔ̀n. Hɔ̀ ɛ́ wɔ́ kɛ̀amu ɛ́ hɔ́ Dɔfĩn bɔ̀háanírɔ bòo lɛ á hàarí bie ɛ́ dàa ɲunù tú. À hàarí bie ɛ́ nɛ làa: «Ń vɔn niǹ zuú nɛ a lé hɔ́ Eziputi cɛ̃̀mɛ̀nɛ́ hũn ɛ̀ ɓen.»
Ɓɛ̀ zĩncãahɛ̃ ɓénlɔ́ bòo
16Ɛ́ bòo lɛ á Herɔɔde ɛ́ mii húi ɛ̀ ɓɛ̀ bɔ̀dũnbáa iè bìe ɛ́ khɛ̃̀niɛ ɔ̀, ɛ́ piè tĩì ɛ́ síɛ hĩ́nà. Á lɛ́ lé ɲunù nɛ ɓɛ vɛ ɓé ɓɛ́ bɛ́zikĩ́ini lɛ ɲɛùn yí dɛ̃̀ lɔ́líe bɔ̀nbɔ̀ ɲu ɲu ɓɛ́kùi, hɔ̀ Bɛtilehɛɛmu àá hɔ́ pɛ̃̀hɛ̃ lɛ lúwikɛ hɔ̀ ǹ míkùi hũn. Hɔ̀pe lɔ́líe ɲunù sɔ sí iè hɔ̀pe lɛ ɛ́ ɓɛ́ bɔ̀dũnbáa ɛ́ zɔǹ zɛ̃́niɛ lɛ́ à ǹ. 17Ɛ́ hɔ́ wɔ́ kɛ̀amu ɛ́ hɔ́ Dɔfĩn bɔ̀háanírɔ Zeremi bòo lɛ á hàarí bie ɛ́ dàa ɲunù tú. À hàarí bie ɛ́ nɛ làa:
18 «Hɔ̀ wũamaà dɔ̀ ɛ́ tɛ̀ hɔ́ Rama lóo hũn.
Hɔ̀ wíɛ àá hɔ́ cãamɛkɛà ɛ́ tɛ̀;
À iè Rasɛɛli temu ɛ́ wírí mí nìɛ lɛ húrun bòo hũn;
À yá cɛ̀ nɛ ɓɛ yankɛ mí,
Iè hɔ̀ lɛ ɛ́ piè nìɛ ɛ́ húrunkɛ.»
Zozɛɛfuɓɛ̀ khũ̀á ɓenlɔ́ hɔ̀ Yizarayɛɛle cɛ̃̀mɛ̀nɛ́ hũn
19Ɛ́ hɔ́ lɛ á Herɔɔde ɛ́ húrun vɔ́, ɛ́ Ɲunsɔ mɛlɛkɛ dɔ̀ van ɛ́ zɛ̃́niɛ míte hɔ̀ dɛ̀woò hũn ɔ̀ Zozɛɛfu ǹ hɔ̀ Eziputi cɛ̃̀mɛ̀nɛ́ hũn. 20À bie lɛ́ à ǹ nɛ làa: «Hĩ́ní mìí ɔ́ zĩncáahɔ́ àá ɓá nín ɛ̀ kɔ̀ khũ̀á vɛ hɔ Yizarayɛɛle cɛ̃̀mɛ̀nɛ́ hũn, iè hɔ̀ lɛ ɛ́ ɓɛ́ lɛ hṹn cɛ̀ ɛ̀ ɓɛ̀ ɓí-e pe zĩncáahɔ́ ɛ́ húrunkɛ.» 21Ɛ́ Zozɛɛfu ɛ́ síɛ hĩ́nà ɛ́ mɔ̀ à zĩncáahɔ́ àá ɓà nín à khũ̀a ɛ́ van hɔ̀ Yizarayɛɛle cɛ̃̀mɛ̀nɛ́ hũn. 22Ɛ́ hɔ́ lɛ á ɲɛ́ ɛ̀ ɓɛ̀ nɛ Arikelɔɔse ɛ́ temu zɔn wɔ́ á bɛ́zuú ɓá yàá Herɔɔde kṹun hũn hɔ̀ Zudee pɛ̃̀hɛ̃ hũn, á zɛ́rɛ nɛ mí yá vɛ́ kansí yán wɛ̀. Ɛ́ Dɔfĩn bĩniɛ lɛ́ hɔ́ bérɛ́ ɔ̀ ǹ hɔ̀ dɛ̀woò hũn, á hĩ́nà cɔ́ van hɔ̀ Kalile pɛ̃hɛ̃ hũn, 23ɛ́ van kɛsí hɔ́ lóo lɛ ɛ́ ɓɛ́ wóo ve nɛ Nazarɛɛte hũn, ɛ́ hɔ́ Dɔfĩn bɔ̀háaníriè bòo lɛ ɛ́ ɓɛ́ bie nɛ: «Ɓɛ̀ wóo ɓén vi-e nɛ Nazarɛɛte nùún», ɛ́ dàa ɲunù tú.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Matiye 2: bwj
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
© 2023 L’Association Nationale pour la Traduction de la Bible et l’Alphabétisation
