Mateo 28
28
Jesús kuerajy
1Hasama putu'uava jy'ararã, pente ara semana õñepyrõhea kõ'ẽi, Maria Magdalena hareka ĩrũ Maria jyraha hesha verãre tã'õve rẽnda. 2Hãrã sapy'ãi hỹnatu yvyryry shara pente Ñandeja jokueva vejy mbysyry verã tã'õve rẽnda jochapya, hãma vapy'ẽ ĩãrẽ. 3Tũpa jokueva ara verava rãĩmi himbipe hareka mondeva tĩĩ mandyju rãĩmi. 4Hãrã hesha syndaro retarã opa ryry kyjeiterã, pyta manova rãĩmi. 5Haipe Tũpa jokueva ijetashu taupe retarã hei: Avy pykyje. Aikuaa rãnga pyhekapeĩ Jesús, kurusure jukaha vekua. 6Mba'ety kope, kuerajy hai heiva rãĩmi. Pei pymãihe ñonoa vekuape. 7Ãrẽ'ãite pekua pymbeushu mboireare, kuerajymava manoare pãuvi hareka ohoma pynynonderã Galilea kyty, haipepo pyheshashukui. Kova rãnga haije haipe verã. 8Haivi taupere ohojy tã'õvere kyje ryheve, ñaniavei jyraha mbeushu verãre mboireare. 9Haipe Jesús õhẽ hỹvãiti retarã heishu: Hãmarate. Haire ñymboja Jesús ẽvape, ipyipi kũãva jyrerã haivi ĩñesu hỹnonde reta, 10hãrã Jesús heishu reta: Avy pykyje. Pekua pymbeushu shyryvyre toho Galileape, haipepo shyresha retakui.
Syndarore mbeu vekua
11Taupere jyraha jyrerã, ĩme'ẽ syndarore ñyngareko'õre tentape ohova hãrã opa mbeushu pai juhuvishare jehuva. 12Pai ruvishare oho karai kuakuavare ẽvãpe, pente ñeepe iñiñono heta meẽshu verãre kyrypoti syndarore. 13Hãrã heishu reta: Pee perepokui pynturã pechepẽĩrã, ou Jesús mboireare hareka manarõhe reta hetekue. 14Hãrã huvisha kova kuaarã, orepo mbe'uha kavishu hãrã mba'ẽãpo jehupe. 15Haipe syndarore raha kyrypotirã jyraha japo he'iashuva rãĩmi. Hãrã Judiore ã'ẽpeve kyrã hei reta.
Jesús mondoshu mboireare
16Hãrã 11 mboireare jyraha Galileape, yvyturusu'õpe Jesús heishuvape. 17Heshama retarã ĩñesu hỹnonde, ĩmetẽ'õ rojambavare. 18Haipe Jesús ñymbojahe retarã heishu: Opa me'ẽã she mbaikatu vate arapy'õ hareka yvy'ĩãrẽ'õre. 19Pekua opaite tentaipi pijaposhi reta shimimbo'ẽrã, pymyngaraishu reta Tuu, Tay hareka Espiritu Santo heepe. 20Hãrã pymboishu opaite tijapo reta she hai pee vekua. Pikuaapo she ãĩmẽpo penendie opa arape ko yvy opapeve. Amén.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Mateo 28: TPJ
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
©2023 LETRA Paraguay
