Luka 22

Njama yemulagha Jesu

(Matayo 26:1-5; Marko 14:1-2; Johana 11:45-53)

1Nao karamu ya mikate siyengizilo chachu, iitogho Pasaka yeluo avui. 2Wakohani wabwaa na walimu wa Sheria weluo wekehada ngila yemulagha Jesu; kwani weluo wekeogha wandu.

Juda kudumusa kumfunya Jesu

(Matayo 26:14-16; Marko 14:10-11)

3Nao Shetani kamungila Juda Iskariote uyu eluo mumoju wa wairimi ikumi na waili. 4Naye Juda kaghenda kaghoranya na wakohani wabwaa na warindiri, selyi edimagha kumfunya Jesu kwawe. 5Nawo wakabwelo na kudumusila kamba wemuhawagha pesa. 6Juda kadumusa, naye kahada ulalo ghomufumya kwawe ngelo makoghano sigheo.

Jesu kukuboesa kulya chakulya cha Pasaka

(Matayo 26:17-25; Marko 14:12-21; Johana 13:21-30)

7Nao lyifika ijua lya karamu ya mikate siyengizilo chachu, nalyo lyeluo ni ijua lyeshinjo mwana wa ng'onzi wa Pasaka. 8Jesu kawatuma Petro na Johana kewauza. Ghendeni mutiikile kirani chakulya cha Pasaka eri tilye. 9Nawo wakamuza, “Ni hiyo ushaile tiike kirani?” 10Kawatumbulila, “Zighaneni ngelo yengila kele muzi mjekoghana na mundu atuka sangu ya meji, muirimeni hata ilya nyumba engilagha, 11na mumuze mundu wa nyumba, ‘Mwalimu wakukotela, chio hiyo chumba cha wagheni, andu nilyilagha chakulya cha Pasaka na wairimi wangu?’ 12Naye ujemwonyeza chumba kibwaa cha ighulu chipambilo kirani andu muikagha Pasaka kirani.” 13Nao wakaghenda wakadoka selyi kwenyi awauzile, wakaika kirani chakulya cha Pasaka.

Kilalilo cha Bwana

(Matayo 26:26-30; Marko 14:22-26; 1 Wakorintho 11:23-25)

14Nao ngelo ifika, Jesu kakala kitembo mezeni ngila mojori na watumo. 15Naye kawauza, “Naririgho kulya chakulya cha Pasaka iyi ngila mojori nenyo hambiri ya kutiriro. 16Kwani namuza, Silyighagha sena hata ikatile kele Uzuri ghwa Mlungu.”

17Nao Jesu kausa kikombe, naye aghenda afunya asanta kwa Mlungu, kaghora, “Wateni ichi msare inyo wenyi. 18Kwani namuza kamba kufuma indakwenyi sinweghagha sena divei ya mzabibu hata ilya ngelo ghujeja Uzuri ghwa Mlungu.”

19Nao kausa mkate, naye aghenda afunya asanta, kaghuvunja, kawahawa keghamba, “Ughu ni muli ghwangu, [ ghufunyogho kwa inyo. Deeni hung'u kwa kuniririkanya imi.” 20Na hung'u kwenyi nyuma ya kilalilo kausa kikombe keghamba, “Kikombe ichi ni Ilagano Iwishi lya Mlungu lya bighati yangu itikagha kwa inyo.]

21“Ela loleni! Mkonu ghwake uyu enifunyagha ghuo mezeni nemi! 22Mwana wa Mdamu ughendagha kufwa selyi kwenyi iikilo, ela ni bugha kwake uyu mundu emufunyagha!” 23Nao wakadyowa kukotelana, nani wawe edeagha hung'u.

Nganyi ighulu ya ubwaa

24Nao kukakala na nganyi ghati ya wairimi nani ekalagha mubwaa. 25Nao Jesu kawauza, “Wazuri wa mbari nzima weo na ndighi ighulu ya wandu wawe na walye weo na ndighi wanaitogho walindi wandu. 26Ela kwenyu siikalagha hung'u kungi, sala uyu ewo mubwaa kwenyu akale sa mchache na kilongozi akale sa mtumishi. 27Kwani nani ewo mubwaa, uyu ekalagha kitembo mezeni, ango uyu etumikagha? Ni suti akale ulya ewo mezeni. Hata sani, imi nio sa mtumishi kwenyu.

28“Inyo ninyo wandu mwakalanya nemi kele ngelo zangu za matimo; 29na ndamu namhawa Uzuri selyi Aba anihawile Uzuri. 30Kamba mulye na kunwa kele meza yangu ya Uzuri, na kukalila vifumbi vetaghanya mbari ikumi na mbili za Israeli.

Jesu kutondola ighulu ya Petro kumukana

(Matayo 26:31-35; Marko 14:27-31; Johana 13:36-38)

31“Simoni, Simoni, zighana! Shetani wadumusilo amupepete inyo sa ngano; 32ela nakulombela uwe idumusi lyako silyagotie; na ilyi waniuila, uwamangise wana wakwenyu.” 33Nao Petro kamtumbulila, “Nio tayari kughendanya newe kifungoni na kifweni!” 34Jesu kamuza, “Petro, nendekughorera, jongole siitetagha ichi kiro sonikanile mandu matatu kamba suniweni.”

Jesu kuwaonya wairimi wake

35Nao Jesu kawauza, “Ngelo nemtumile simwowesi mifuko ya pesa ango vikuchu ango vilatu, mwanasowile kindu chingi?” Nawo wakatumbulila, “Hata.” 36Naye Jesu kawauza, “Ela ndamu nendemuza kamba uyu ewo na mfuko ghwa pesa atwale na hung'u kwenyi uyu ewo na kikuchu. Na uyu sewesi lufu ataghe nguo yake aghughule. 37Kwani nendemuza kamba, ni suti ilyi Iwandiko lya Kuela lyiwandiko ighulu yangu lyikatile: ‘Wanatalilo ngila mojori na wakosi.’ Kwa kukala agha ghawandiko ighulu yangu gheo na kukatila kwake.” 38Nawo wakamuza, “Lola Bwana aha kuo na nyufu mbili!” Naye kawauza “Izo zakata.”

Jesu kulomba kele mghondi ghwa Mizeituni

(Matayo 26:36-46; Marko 14:32-42)

39Nao Jesu kafuma kaghenda kele mghondi ghwa Mizeituni selyi yeluo mailiso ghake, na wairimi wake wakamwirima. 40Naye aghenda afika alye kawauza, “Lombeni eri simwangile matimoni.” 41Nao kawasigha, kaghenda sa ukulele ghwa mundu kukumba iwe, kadyaya ngokoro kalomba. 42“Aba, ngera ni mashayo ghako, nifunyile ichi kikombe cha matiriro, ela ima si selyi nishaile imi, ela selyi ushaile ghadeike.” [ 43Nao alyenyi kaoneka malaika kufuma mlunguni, kamukumba ngolo. 44Naye kwa kusirima kubwaa kajuzila kulomba, na rughudi yake yeluo sa matonyi gha bighati ghetikagha msangeni.]

45Naye aghenda auka kufuma kulomba, kawaghendela wairimi wake, kawadoka watungura kwa undu ghwa furuse. 46Nao kawauza, “Kudani mwatungura? Ukeni mlombe eri simwangile matimoni.”

Kuwato kwa Jesu

(Matayo 26:47-56; Marko 14:43-50; Johana 18:3-11)

47Nao ilyi eluo keghoranya nawo, ikoghano lya wandu lyikafika lyikelongozo ni Juda, uyu eluo mumoju wa wairimi ikumi na waili. Kamughendela Jesu kamususuga. 48Ela Jesu kamuza, “Juda, ondemfunya Mwana wa Mdamu kwa wamaiza kwa kumususuga?” 49Nao wairimi wake waghenda waona ghalye wakamuza, “Bwana, tiwateme na nyufu?” 50Nao mumoju wawe kamtema msunyi wa Mkohani Mubwaa na lufu kampasa kisikilo cha kijo. 51Ela Jesu kaghora, “Hata! Sigheni ghakata!” Naye kawata kisikilo cha ulya mundu kachiboesa.

52Nao Jesu kawauza Wakohani wabwaa na warindiri wa Hekalu na waghosi walye wejile alye kumwata, “Mweja kuniwata na nyufu na rungu selyi wavekuri wawatogho? 53Ngelo neluo nenyo Hekaluni kila ijua simudimile kuniwata. Ela iyi ni ngelo yenyu na ya ndighi za kiza.”

Petro kumkana Jesu

(Matayo 26:57-58,69-75; Marko 14:53-54,66-72; Johana 18:12-18,25-27)

54Nao wakamwata Jesu wakamghenza kele nyumba ya Mkohani Mubwaa. Petro kamwirima ewo kakulele. 55Nawo wekozile moto ghati na ghati ya baraza ya shighati, wakakala kitembo ngila mojori, Petro naese wokalile kitembo ngila mojori nawo. 56Nao mtumishi mumoju wa kiwake, amwona akala kitembo kele mlangazi kamuzighana kaghora, “Uyu mundu wokezanye na Jesu naese!” 57Ela Petro kakana, “Mundu muke, simweni!” 58Na kumukamuka, mundu mumoju kamwona, kamuza, “Nawose nuwe mumoju wawe.” Ela Petro kaghamba “Ee mundu simungi!” 59Nao nyuma ya saa kudua mundu mumoju kaghora, “Fulo uyu mundu wokezanye naye, kwani naese ni Mgalilaya!” 60Ela Petro kaghora, “Ee mundu, simanyagha agho ughoragha!”

Nao iyo ngelo yenyi eghoragha jongole ikateta. 61Nao Bwana Jesu kaghaluka kamzighana Petro, naye Petro kakumbuka malagho gha Bwana agha amughorere, “Hambiri ya kuteta jongole ichi kiro unikanagha mandu matatu.” 62Nao Petro kafuma shighati kalila.

Jesu kusholelo na kukwito

(Matayo 26:67-68; Marko 14:65)

63Nao walye wandu wemwatile Jesu wakamusholela na kumukwita. 64Hung'u kwenyi wakamfunga meso na kumukotela, “Tondola! Nani akukwita?” 65Nawo wakaghora malagho mengi ighulu yake wekemtukana.

Jesu hambiri ya Baraza

(Matayo 26:59-66; Marko 14:55-64; Johana 18:19-24)

66Nao kuela ikoghano lyose lya waghosi wa wandu lyikakoghanika andu kumojori na wakohani wabwaa na walimu wa Sheria, nao wakamghenza Jesu kele Baraza yawe, 67Wakamuza, “Tighorere, ngera uwe nuwe Masihi?” Ela iye kawatumbulila, “Nikamghorera simudumusagha; 68na nikamkotela simunitumbulilagha. 69Ela kufuma indakwenyi, Mwana wa Mdamu ujekala kitembo kele mkonu ghwa kijo ghwa Mlungu.”

70Nao wakaghora wose, “Nuwe Mwana wa Mlungu-ba?” Naye kawauza, “Inyo mwaghora.” 71Nao wakaghora, “Ni ushuhuda muni tihadagha sena? Tasikila isi wenyi selyi aghora na mlomu ghwake.”

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

Luka 22: SAGALLANT

Highlight

ಶೇರ್

ಕಾಪಿ