Luka 20

Ikotelo ighulu ya ndighi za Jesu

(Matayo 21:23-27; Marko 11:27-33)

1Nao ijua imoju ilyi Jesu eluo kefundisa wandu hekaluni na kuwachilila Ilagho Lyaloli, wakohani wabwaa na walimu wa Sheria ngila mojori na waghosi wakamjila, 2na kumuza, “Tighorere ni kwa ndighi muni udeagha agha malagho ango ni ani akuhawile ndighi izi?” 3Jesu kawatumbulila, “Namose nimukotelagha ikotelo, 4Nighorereni, ubatizo ghwa Johana ghwanafumile kwa Mlungu ango kwa wandu?”

5Nao wakadyowa kuhelea wenyi wekeghamba, “Tikaghora, ‘kufuma kwa Mlungu,’ ughoragha, ‘Kudani simomudumuse?’ 6Ela tikaghora; ‘Kwa wandu,’ wandu wose wejetilasa na mawe. Kwani wanadumuse kamba Johana woluo tondolo.” 7Nao wakaghamba, siwamanyile andu ghufumile. 8Nao Jesu kawauza, “Hata imi simughoreragha ni kwa ndighi muni nideagha izi ghore.”

Ikataniso lya walimi wa mbuwa ya mizabibu

(Matayo 21:33-46; Marko 12:1-12)

9Nao Jesu kadyowa kuwaghorera wandu ikataniso ilyi: “Mundu mumoju owandile mizabibu mbweni, kawahawa walimi; katamba isanga lya kulele kwa majua mengi. 10Nao ngelo ifika ya mavalo, katuma mtumishi kwa walimi, eri wamuhawe ifungu lya mavalo gha mbuwa ya mizabibu. Ela walye walimi wakamkwita na wakamugalisa mikonu mituu. 11Nao katuma mtumishi muzima, naye wakamkwita na kumufwisha waya na kumugalisa mikonu mituu. 12Nao katuma mtumishi wa katatu, naye wakamushoghonola na kumkumba shighati. 13Nao ulya mundu wa mbuwa ya mizabibu kaghora, ‘Ndamu nideagha ije? Nimutumagha mwanwangu nimshaile, ngera wemuhawagha ishima.’ 14Ela walye walimi waghenda wamwona, wakaghora wenyi, ‘Uyu niye mundu wa ufwa, ndokoni timulaghe eri ufwa ghukale ghwetu.’ 15Nawo wakamufunya shighati ya mbuwa ya mizabibu, wakamuulagha.” Jesu kawakotela, “Ndamu ulya mundu wa mbuwa ya mizabibu uwadeagha ije walye walimi?

16“Ujeja na kuwaulagha walye walimi na kuwahawa walimi wazima mbuwa ya mizabibu.” Nawo waghenda kusikila hung'u wakaghamba, “Agho ghakale kulele.” 17Ela Jesu kawazighana na kawauza, “Ndamu nini kutambula kwa Iwandiko ilyi lya Kuela?

‘Iwe lyeleghilo ni wawaghali,

lyakala iwe ibwaa lya msingi.’

18“Mundu uwo wose egwilagha ilyo iwe ujechukachuka, ela lyikamgwila mundungi ujekindihiso.”

Ikotelo ighulu ya kulipa kodi

(Matayo 22:15-22; Marko 12:13-17)

19Walimu wa Sheria na wakohani wabwaa wakatima kumwata ilya ngelo yenyi, kwani wemanyile kamba ikataniso lyilya lyeghoriro ighulu yawe, ela wakawaogha wandu. 20Kwa hung'o wakamlolila. Wakatuma wanguchi wakudeile wenyi kukala wandu wa hachi wamwate kwa ghore zake, nao ima wamungize kele mikonu ya wabwaa na mubwaa wa serikali. 21Walye wanguchi wakamkotela, “Mwalimu, tamanya kamba wanaghoragha na kufundisa kwa hachi hata susaghulagha mundungi, ela wafundisa ngila ya Mlungu kwa fulo. 22Ndamu tighorere, ngera ni hachi kulipa kodi kwa Kaisari ango ije?”

23Ela Jesu kemanya mtegho ghwawe, kawauza. 24“Nionyezeni pesa iitogho dinari. Sura na mawandiko agha ni ghani?” Nawo wakamtumbulila, “Ni va Kaisari.” 25Nao Jesu kawauza, “Mhaweni Kaisari, vindu va Kaisari na Mlungu vindu va Mlungu.” 26Nawo siwadimile kumwata hambiri ya wandu kwa maghori ghake, ela wakakirimuwa kwa matumbulilo ghake, wakanyamala.

Ikotelo ighulu ya kuzuka kufuma kwa wafwa

(Matayo 22:23-33; Marko 12:18-27)

27Nao Wasadukayo wamoju awa waghambagha sikwesi kuzuka, wakamjila Jesu, wekeghamba, 28“Mwalimu, Musa wanatiwandikile ketiuza kamba ngera mundu afwa kasigha muke sewesi wana, wakwawe amuse ulya muke ampatile wakwawe wana. 29Nao koluo na wana wa mundu mumoju mfungate, wa hambiri kamusa muke, kafwa sesighile wana. 30Nao Wa kaili kumusa kafwa, 31na wa katatu naese kamusa; na hung'u kwenyi walye wose mfungate wakafwa siwesighile wana. 32Nao ko nyuma ulya muke naese kafwa. 33Ndamu kele kuzuka kwa wafwa ulya muke ukalagha wa ani? Kwani wose mfungate wemuusile?” 34Jesu kawatumbulila, “Wana wa urumengu ughu walola na kuuso, 35ela awa wetalogho kamba wanafweni kuzuka kufuma kwa wafwa na kukala na ngaro kele urumengu ghukujagha, siwausogho na siwalolagha. 36Kwani siwefwighagha lyingi kwa kukala wendefwanana na wana malaika na ni wana wa Mlungu, kwa kukala wazuso kufuma kwa wafwa. 37Ela kamba wafwa wazuka, hata Musa wanaonyeze kele mawandiko gha songa, andu omupang'ile Bwana, Mlungu wa Abrahamu, Mlungu wa Isaki na Mlungu wa Jakobo. 38Kwani iye si Mlungu wa awa wafwile, ela wa awa weo moyo. Kwani kwake wose wanakalagha moyo.”

39Nao wamoju wa walimu wa Sheria wakatumbulila, “Mwalimu, watumbulila kirani.” 40Kwani sikowesi mundungi adimile kumkotela makotelo ghengi sena.

Ikotelo ighulu ya Masihi

(Matayo 22:41-46; Marko 12:35-37)

41Ela Jesu kawakotela, “Kudani waghoragha kamba Masihi ni Mwana wa Daudi? 42Kwani Daudi mwenyi kele chuo cha Zaburi waghamba:

‘Bwana omuzile Bwana wangu:

Kala kitembo kele mkonu ghwangu ghwa kijo,

43hata niwadee wamaiza wako

kukala andu koikilila maghulu ghako.’

44Kwa hung'u Daudi wampang'a Bwana, ndamu udimagha ije kukala mwana wake?”

Jesu kuonya ighulu ya walimu wa Sheria

(Matayo 23:1-36; Marko 12:38-40)

45Na wandu wose wekesikila, Jesu kawauza wairimi wake, 46“Kulindeni na walimu wa Sheria waboelogho ni kughenda warwara nguo ndele na washayagha kuroghoo ni wandu sokoni, na kukala vifumbi va hambiri kele sinagogi na andu kwa ishima kele karamu. 47Wanalyighagha na kuusa vindu va wake wafwililo ni walume wawe na walomba malombi malele dali. Nawo makwito ghawe ghejekala mabwaa.”

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

Luka 20: SAGALLANT

Highlight

ಶೇರ್

ಕಾಪಿ