Luka 17

Kaung'a

(Matayo 18:6-7,21-22; Marko 9:42)

1Nao Jesu kawauza wairimi wake, “Matimo ghedea wandu wagwe kaung'eni ni suti ghakale; ela ni bugha kwako uyu mundu eghaletagha. 2Yeluo ni baha kwake afungo lwalwa lwesha singo kwake na akumbo baharini, kuchumba kumshekerera mumoju wa wachache awa kugwa kele idumusi. 3Kwa hung'u kulindeni! Ilyi wakwenyu akukosa, mkanye; naye ilyi ariha umufwile waya. 4Naye ngera akukosa mandu mfungate kwa ijua, na kukujila mandu mfungate kekuuza, ‘Nariha’, ni suti umufwile waya.”

Idumusi

5Nao watumo wakamuza Bwana, “Tijuzile idumusi.” 6Naye Bwana kawauza, “Ngera moluo na idumusi sa ndembe ya haradali, macho mwaghuuza ughu mukuyu, ‘Kuka aha na uwandike baharini,’ nagho ghumusikilagha.”

Ghamfweni mtumishi kudea.

7“Naye nani wenyu ewo na mtumishi olima ango olisa ng'onzi, emuzagha ngelo eja kufuma mbweni, ‘Njuu aha ukale kitembo ulye?’ 8Ado semuzagha! ‘Boesa chakulya changu cha hafukeni na urighirire eri unitumikile hata nilye na kunwa, nao ko nyuma ulye na kunwa?’ 9Ado umuhawagha asanta ulya mtumishi kwa kudea selyi emuuzile? 10Niko kwenyi nenyo, ilyi mwadea ghose selyi mwauzo, ghoreni, ‘Isi watumishi sitefweni tadea ilyi lyetifweni kudea.’”

Jesu kuboesa wandu ikumi

11Nao ilyi Jesu eluo keghenda Jerusalemu, kaitila ghati ya Samaria na Galilaya. 12Nao ilyi eluo kengila kele muzi, kakoghana na wandu ikumi weluo na ukoma. Nawo wekalile kimusi kakulele. 13Wakaghora na lwaka lubwaa “Jesu Bwana, utifwile waya.” 14Naye Jesu aghenda awaona, kawauza, “Ghendeni mukuwonyeze kwa wakohani.” Nawo ilyi weluo wekeghenda wakaombochoka. 15Nao mumoju wawe aghenda aona wabowa, kauya kemlika Mlungu kwa lwaka lubwaa. 16Kamgwila Jesu maghuluni kamhawa asanta. Naye oluo ni Msamaria. 17Nao Jesu kaghora, “Ado wose ikumi siwaombocholo? Weo hiyo walye kenda? 18Ungi saoneke wouya kumlika Mlungu sala uyu mundu wa mbari nzima?” 19Nao Jesu kamuza, “Uka ughenda ngila zako, idumusi lyako lyakuboesa.”

Kuja kwa Uzuri ghwa Mlungu

(Matayo 24:23-28,37-41)

20Nao Wafarisayo wakamkotela Jesu, “Uzuri ghwa Mlungu ghukuja nini?” Naye kawatumbulila, “Uzuri ghwa Mlungu sighukujagha na alama zewono. 21Hata siweghoragha, ‘Lola ghuo aha,’ ango ‘lola ghuo alye,’ kwani Uzuri ghwa Mlungu ghuo ghati yenyu.”

22Nao kawauza wairimi wake, “Ngelo ikujagha, mjeshaya kuona imoju lya majua gha Mwana wa Mdamu na simulyionagha. 23Nawo wejemuza, ‘Loleni alye’, ango ‘Loleni aha.’ Simwaghende, hata simwawairime. 24Kwani selyi kwenyi king'alang'ala chilangazagha mlunguni iyi gasi na iyi gasi niko kwenyi na Mwana wa Mdamu ekalagha kele ijua lyake. 25Ela ni suti jako atiriro na malagho mengi na alegho ni wandu wa kivali ichi. 26Kwani selyi kwenyi yeluo majua gha Noa, niko kwenyi ikalagha majua gha Mwana wa Mdamu. 27Wandu welyile, wakanwa, wakalola, wakauso, hata ijua lyilya Noa angilile kele safina na meji ghakaruka na kuwahaitisa wose. 28Niko kwenyu yeluo matuku gha Loti, wandu welyile, wakanwa, wakaghula, wakadea zoghori, wakawanda na kuwaghala. 29Ela ijua lyilya Loti afumile Sodomu, moto na kibiriti ikanya sa mvula kufuma mlunguni na kuwahaitisa wose. 30Niko kwenyi ikalagha kele ijua lyilya Mwana wa Mdamu eonekagha.

31“Ijua ilyo, Uyu ewo ighulu ya nyumba seselelagha angile nyumba ause vindu vake; hata uyu ewo mbweni naese seghalukagha na nyuma. 32Mkumbukeni muke wa Loti. 33Uwo wose eshayagha kughukiza umana ghwake ughulaghazagha, ela uwo wose eghulaghazagha; umana ghwake ughukizagha. 34Nemi namuza, kele kiro chilya kujekala wandu waili watungure ulilini, mumoju ujetwalo na mumoju ujesigho. 35Wake waili wejekala wekesha, mumoju utwalogho na mumoju ujesigho.”

[ 36“Wandu waili wejekala mbweni, mumoju utwalogho na mumoju usighogho.”]

37Nao wakamkotela, “Hiyo Bwana” Naye kawatumbulila, “Andu kwenyi kimba chio niko kwenyi na nderi zio.”

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

Luka 17: SAGALLANT

Highlight

ಶೇರ್

ಕಾಪಿ