Luka 15

Ikataniso lya ng'onzi ilaghaye

(Matayo 18:12-14)

1Nao wafunyi kodi na wakaung'a wose ilyi weluo wekemtindirira Jesu wamsikizile, 2Wafarisayo na walimu wa Sheria wakanung'unika, wekeghamba, “Uyu mundu wanawahokeragha wakaung'a na kulyanya nawo!” 3Na Jesu kawaghorera ikataniso ilyi: 4“Ni mundu muni kwenyu ewo na ng'onzi ighana, ilyi alaghaza mojori, sesighagha zilya mirongo kenda na kenda kireti na aghende kuhada ilya ilaghaye hata aione? 5Naye ilyi aiona, uitukagha iwegha kwa kuboelo, 6naye ilyi auya kaya, uwapang'agha wagheni wake na wambawe awauze, ‘Boeloni ngila mojori nemi, kwani naiona ng'onzi yangu yelaghaye!’ 7Hung'u kwenyi namuza, kujekala na kuboelo kubwaa mlunguni kwa mkaung'a mumojori erihagha kuchumba kwa wahachi mirongo kenda na kenda siwewo na undu ghoriha.

Ikataniso lya pesa ilaghaye

8“Ango ni muke muni kwenyu ewo na shilingi ikumi, kalaghaza mojori, sewashagha taa na kushera nyumba, na kuihada hata aione? 9Naye ilyi aiona upang'agha wagheni wake na wambawe, awauze, ‘Boeloni nemi, kwani naiona shilingi yangu ilaghaye.’ 10Hung'u kwenyi namuza kujekala na kuboelo kwa malaika wa Mlungu kwa mkaung'a mumojori erihagha.”

Ikataniso lya mwana alaghaye

11Nao Jesu kaghora, “Koluo na mundu mumoju eluo na wana waili. 12Na ulya mchache kamuza tatie, ‘Aba nihawe mali ilya ikalagha yangu.’ Naye tatie kawasarira mali yake. 13Nao nyuma ya majua machache, ulya mwana mchache katagha mali yake yose, kapata pesa na kutamba isanga lya kulele. Naye alye kahakila mali yake kwa kulya laghelaghe. 14Naye aghenda amalila kuzitumia zose, njala ikangila kele lyilya isanga. Naese kadyowa kusowa chelya. 15Nao kaghenda kwa mundu mumoju wa isanga lyilya, kaghenzo mbweni kwake kulisa nguluwe. 16Naye karirigho ni kulya makoko gheluo ghekelyigho ni nguluwe, hata sikowesi mundungi emuhawile kindu chingi. 17Nao aghenda atoka akili, karirikanya, ‘Ni watumishi walinga wa aba welyighagha na kuhangala, nemi aha nendefwa kwa njala! 18Niukagha nighende kwa Aba nimuze, Aba nanadeile kaung'a ighulu ya Mlungu na hambiri yako. 19Sifweni kuito mwana wako. Nidee nikale mumoju wa watumishi wako.’ 20Nao kauka kaghenda kwa tatie.

“Ela ilyi eluo kulele kwenyi, tatie kamwona kamufwila waya, na kamkimbilila na kamusura na kumususuga. 21Nao ulya mwana kamuza, ‘Aba, nanadeile kaung'a ighulu ya Mlungu na hambiri yako na siinifweni kuito mwana wako.’ 22Ela tatie kawauza watumishi wake, ‘Leteni shoshoa nguo yaloli mumurwarise, na mumungize ngome kele chala chake na vilatu kele maghulu ghake. 23Na mulete ngache ibandile muishinje tilye na tiboelo! 24Kwani uyu mwanwangu wofwile naye wazuka, olaghaye na waoneka.’ Nawo wakadyowa kuboelo.

25“Naye ulya mwanwake mubwaa oluo mbweni ilya ngelo, nao ilyi eluo keuya, afika avui na kaya, kasikila ngoma na kivini. 26Kampang'a mumoju wa watumishi na kamkotela; ‘Ni kimuni chio aho?’ 27Ulya mtumishi kamuza, ‘Wakwenyu weja, na tatio wamushinjila ilya ngache ibandile, kwa kukala wampata ewo moyo.’ 28Ela iye kawasilo na kalegha kungila kaya. 29Tatie kafuma kamungolangola, ela kamuza tatie, ‘Lola ni miaka milinga nakutumikila na lyingi seleghile malagho ghako? Hata na lyingi sunihawile ndangina eri niboelo na wagheni wangu. 30Ela uyu mwanwako amalile mali yako na vijimbo eja, wamushinjila ngache ibandile.’ 31Nao tatie kamuza, ‘Mwanwangu, ngelo zose uwo ngila mojori nemi, na vose nio navo ni vako. 32Kwa hung'u ni hachi tibwelo na tiseke, Kwani uyu wakwenyu wofwile na wazuka, wolaghaye na waoneka.’”

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

Luka 15: SAGALLANT

Highlight

ಶೇರ್

ಕಾಪಿ