MATHAI 2
2
Niangzae Bangih Angvinnawk
1Jesuh loa, Herod to Judea prae ah sangpahrang ah a oh nathuemah, Judea prae Bethlehem vang ah zah. Akraa parai ai nahlanah sakae ka khenkopnawk to niangzae bang hoitoah Jerusalem vang ah to angzoh o moa, 2“Judah sangpahrang ah ka om han naukta kaza to naamaw a oh? Anih ih sakae niangzae bang hoitoah ka tacawt to ka hnuk o moa anih to bok hanah kangzoh o,” tiah a naa pae o.
3To lok to sangpahrang Herod mah a thaih na-ah katingai palungbet. Tobatih toengah Jerusalem vang ih kaom mi boih mah doeh palungbet o toengh. 4Herod loa qaihma kacoetanawk boih hoi Tawklok patukkungnawk to kawk cu moa, “Messiah loa naamaw za tih?” tiah a duengh.
5Anihcae mah, “Judea prae Bethlehem vang ah za tih,” tiah pathim pae o. “Kawmawtiah tahma mah tarik ih loa:
6‘Judah prae thungih kaom Bethlehem vang,
Nang loa Judah prae
vangpuinawk thungah
ka thoeng hloe ah na om ai;
Kawmawtiah nang thung hoitoah
pahoikung longto tacawt ueloa,
kai kami Israel-nawk to
zaehoi tih,’ a ti,”#Mik 5:2 tiah a oh.
7Topongah Herod loa niangzae bang kacing kaminawk to tamqu lamah a kawk moa kawtih tue nathuemah maw sakae to amtueng, tito kamnoek ta-ah a duengh. 8Topacoengah anihcae to Bethlehem vang ah patoeh moa, “Caeh oloa naukta to hoihdak ta-ah pakrong oah, na hnuk o na-ah na thui oah. Kai doeh ka caeh moa anih to ka bok toeng han,” tiah lok taquk.
9-10Herod mah thui ih batih toengah a caeh o moa niangzae bangih a hnuk o sakae to a hnuk o let. To sakae to a hnuk o na-ah katingai anghoe o. Naukta ohhaih ahmuenh ranui ah anghak airoek sakae loa anihcae hma-ah caeh poe. 11Im thungah akun o moa naukta hoi amno Meri a hnuk o na-ah khokkhu samkrawn o moa a bok o. Tamqum sinh o ih sui, frankinsen hmuihoihtui hoi murrah hmuihoihtui to pathong o moa a paek o.
12Topacoengah Sithaw mah anihcae ih a mang ah Herod khaeah amlaem let han aiah a thuih pae o pongah lam kalah bang hoitoah angmahcae prae ah ahloih o.
Izipt Prae Ah Proenghaih
13Niangzae bang kacing kaminawk a caeh o pacoengah Angraeng ih vanmi longto Joseph ih mang ah amtueng pae moa, “Hi naukta hae Herod mah hum hanah pakrong boah. Topongah angthawk loa naukta hoi amno to la aloa Izipt prae ah proeng haih ah. Amlaem let hanah kang thuih airoek loa toah om ah,” a naa pae.
14Joseph loa angthawk moa naukta hoi amno to a lak moa aqum ah Izipt prae ah a cawnh haih. 15Herod duek airoek Izipt prae ah oh o. Hi hmuen ohhaih ih loa Angraeng mah tahma pakhaa ah, “Ka Capa loa Izipt prae hoitoah ka kawk” tiah a thui ih to akoephaih hanih ni.#Hos 11:1
Naukta Humhaih
16Herod loa niangzae bangih kacing kaminawk mah angling o boah tito panoek na-ah paroeai palungphui. Palunghanawk mah a thuih o ih sakae amtuenghaih tue hoitoah pakoep moa Bethlehem hoi a taenghaek vang ih kaom naukta nongpa saning hnetto hoi ahlimbang boih to hum hmen hanah lok a paek.
17Hitiah tahma Jeremiah mah a thuih ih to acung. A thuih sut ih lok loa:
18“Ramah vang thungah tuenpawk lok amsawk,
palungset khuihqahhaih lok ni.
Rachel mah a caanawk to qah haih;
A caanawk duek o boih boah pongah a qah,
pahloep thaiah om ai,” tihae ni.#Jer 31:15
Izipt Prae Hoitoah Amlaem Let
19Herod a duek pacoengah Izipt prae ah to Joseph khaeah Angraeng ih vanmi longto Joseph ih a mang ah amtueng pae moa, 20“Angthawk ah, naukta hoi amno to la aloa, Israel prae ah amlaem haih let lai ah, kawmawtiah naukta hum han patoem kungnawk loa a duek o boih boah,” tiah a naa pae. 21Topongah Joseph loa angthawk moa naukta hoi amno to a lak moa Israel prae ah amlaem haih.
22To-e Arkhelaus mah ampa Herod zuengah Judah sangpahrang a tok tito a thaih na-ah toah caeh han a zit. A mang ah thuih pae ih batiah Galili prae ah to a caeh. 23Nazareth naa pae ih vangpui ah to a oh poe. Tahmanawk mah thuih sut ih, “Anih loa Nazareth kami naa o tih,” ti ih to acung. #Mrk 1:24; Luk 2:39; Jhn 1:45
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
MATHAI 2: AKNT2023
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Asang Khongso New Testament in Eastern Khumi © Bible Society of Myanmar, 2023.
