मरकुस 3

शुकेदे हाथा आलअ मणश ठीक करणअ

1यीशु तेऊकी प्रार्थना घरा वे नाठअ, तखे एक मणश, जासकअ हाथ शुकअद थी, 2होर त्याह तेऊ पैंदे दोषा लाउणे री तणी तेऊरी घाता में थी, की हेरा एऊ सब्ता री धयाडी यह ठीक करणअ या नांई। 3तेऊये शुकदे हाथा आले मणशा वै बोलू, वीचा में खड़अ हो। 4होर तेऊ बोलू, सब्ता री धयाडी भला करना सब्ता री धयाडी ठीक साह या माडा करना ठीक साह, प्राण बचाऊणे की नांई बचाऊणे? पर त्या चुप रही। 5तेऊये त्याह री मना री हठा री तणी नराज़ होई करे, रोशे संघे चौऊ तरफा हेरू, होर तेऊ तेऊबै बोलू, आपणे हाथा जेह कर। तेऊये हाथ जेह करू, होर तेऊरअ हाथ ठीक होऊ। 6तेबा फरीसी बागे नाशी करे राजा हेरोदिया संघे तेऊरे बिरोधा में साज़िश करदे लागे की यह केहड़े साबे खत्म करनअ।

भीडा रा यीशु पीछे हुणा

7यीशु आपणे चेले यहूदा संघे नइ फेरा वै नाठअ, होर गलीला कै एखा बहु लोका तेऊ पीछे नाठे। 8होर यह यहूदीया जागा, होर यरूशलेम, होर ईदुमिया, यरदना नइ पार, होर सूर होर सैदा री ओरी पोरी का एक बड़ी भीड़ यह शुणी करे की सह कई हेरानी आले काम करदा, तेऊ नेड आई। 9तेऊये आपणे चेले वै बोलू, भीड़ा री बज़ह का एक होछी किस्ती महावै त्यार डाहे कंई त्या महा दबाई ना सके। 10किबेकी तेऊये खासे लोका ठीक करी दे थी, तेबा जेतरे लोका बीमार थी, त्याह तेऊ छूणे री तणी तेऊ पैंदे पड़दे लागे। 11दुष्टात्मा भी, जेबा तेऊ भाला, तेबा तेऊ ज़ेह पडा, होर क्रींग्गा पाई करे बोला, तूह परमेश्वरा रअ शोहरू साहा दअ। 12होर यीशुये तयाबे यह चतैनगी दीनी की महा प्रकट नांई करे।

बारह प्रेरितां रा छांटणा

(मत्ती 10.1-4; लूका 6.12-16)

13तेऊकी सह जोता वै नाठअ, होर जासु सह चाहन्दा थी, त्या आपु नेड शादी, होर त्या तेऊ नेड आउऐ। 14तेऊकी तेऊये बारह प्रेरिता छांटी की त्या तेऊ संघे रहे, होर सह त्या भेजे की त्याह प्रचार करे, 15होर दुष्टात्मा काहडने रा अधिकार डाहे। 16त्या या साहा दे, सिमोन जासका ना तेऊये पतरस डाऊ, 17होर जब्दी रअ शोहरू याकूब होर तेऊरअ भाई यूहन्ना जासका ना तेऊए बूअनरगिस जासका मतलब गरजना रा शोहरू डाऊ 18होर अन्द्रियास होर फिलिप्पुस, होर बरतुल्मै, होर मत्ती होर थोमा, होर हलफई रअ शोहरू याकूब, होर तद्दै होर शिमोन कनानी, 19होर यहूदा इस्करियोति जासू सह ढाकणे भज़याल़ू।

यीशु होर बालजबूल

(मत्ती 12.22-32; लूका 11.14-23; 12.10)

20तेबा सह घरा वै आउओ , होर एथरी भीड़ कठी होई की त्याह रोटी भी खाई नांई सके। 21जेबा तेऊरे टबरे यह शुणू, तेबा त्याह तेऊ डाकते निकदे, किबेकी त्याह बोला, की एयुरा दिमाग ठिक नांई आंदा। 22शास्त्री भी जोह यरूशलेमा कअ आऊद, एड़ा बोला, एयुमें शैतान साहा दअ होर यह दुष्टात्मा रे सरदारा री सहायता संघे ओपरे काहड़ा। 23तेबा तेऊये त्याह नेड़ शादी करे त्याह वै दृष्टान्ता में खोजदअ लागअ, शैतान केई साबे शैताना काड़ी सका? 24जेबा जासु राज्य में फुट हुंदा, तेबा सह देश केई साबे टेकी रहण? 25जेबा कासु घरे फूट पड़े तेबा सह घर केई साबे बच़ण? 26जेबा शैतान हेरी आपणा बिरोधी होई करे आपु में फुट पाए, तेबा सह केई साबे बणी रहण? सह खत्म हूणअ। 27पर कोई मणश कासु बलबन्ता रे घरे नाशिकरे तेऊरा माल नांई लूटी सकत, जेबरे तणी सह तेऊ बलबन्ता बानी नांई लए , तेबा सह तेऊरे घरा लूटी सका। 28हाऊं तमा कै सच-सच बोल्दा की मणश चाहे जोह पाप होर निन्दा जोह त्याह करदा माफ हूणी, 29पर जोह कोई पवित्र आत्मा रे खिलाफ निंदा करे परमेश्वरा, सह कदी भी माफ नांई करणअ, अखे तक की सह अनन्त पापा रअ अपराधी ठहराउणअ। 30किबेकी त्याह एड़ा बोला, यीशु में दुष्टात्मा साहा दी।

यीशु री आमा होर भाई

(मत्ती 12.46-50; लूका 8.19-21)

31तेबा तेऊरी आमा होर तेऊर भाई तेऊ नेड आउये, होर बागे खड़ी करे तेऊबै बुलावा भेजू। 32खासे लोका तेऊ संघे बैठदे थी, होर त्याहे तेऊबै बोलू तेरी आम्मा होर भाई बागे खड़ीदे साहा 33तेऊये त्याह वै बोलू, मेरी आमा होर मेरे भाई कूण? 34होर त्याह फेरा वै हेरी करे बोलू, जोह तेऊ सेटा बैठदे, बोलू, भाला, मेरी आमा होर भाई या साहा दे। 35किबेकी जोह कोई परमेश्वरा री मरजी पैंदे चलदा, त्याह मेरे भाई, होर बहीण, होर आमा साहा दे।

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

मरकुस 3: ISJNT

Highlight

ಶೇರ್

ಕಾಪಿ