लूका 24

यीशु रा पुनरुत्थान

1पर हप्ते री पहिली धयाडी दोती त्याह शोभली चिजा जोह त्याहे तैयार करी दी थी, आणी करे कब्रा वै आई। 2त्याहे कब्रा का पाथर सकेऊद हेरू, 3पर मितर प्रभु यीशु रअ शव नांई भेटअ। 4जेबा त्याह एसा गला का हैरान हुन्दी लागी, तेबा दुई मर्द शेते झिकड़े बानी करे खड़े होई। 5जेबा त्याह डरी होर धरती फेरा वै झुकी करे रही; तेबा त्याहे त्याहा का बोलु, तमे जिऊंदे मणशा मुयदे में किबे लोडा? 6सह अखे नांई, पर जिऊंदअ होऊ। याद करा तेऊ गलीला में तमा का कैह बोलू थी, 7जरूरी साहा कि मणशा रअ शोहरू पापी रे हाथे ढाकण, होर क्रुसा पैंदे चडाउण, होर चिहुणे धिहाडे जिउंद हुणअ। 8तेबा तेऊरी गला याद आई। 9होर कब्रा का इछी करे त्याहे त्या ग्यारहा वै, होर होरी सभी वै, याहा गल्ला खोजी। 10जासूये प्रेरिता वै याहा गला खोजी त्या मरियम मगदलेनी होर योअन्ना होर याकूबा री आम्मा मरियम होर तेसा संघे होरा बेटड़ी भी थी। 11पर त्यारी गला त्याह एकी कहाणी जेडी लागी, होर त्याह त्यारी गला रा बुशाह नांई होऊ। 12तेबा पतरस उठी करे कब्रा वै ठुरु, होर झुकी करे सीधी झिकड़े पड़ीदे हेरी, होर जोह होऊ थी, तेतका अचबा करी करे आपणे घरा वै नाठअ।

इम्माऊसा री वाता चेले वे दर्शन

(मरकुस 16.12,13)

13तेसी धियाड़ी दुई मणश इम्माउसा ना रे एकी ग्रां वै नांहदे लागेदे थी, जोह यरूशलेमा का सात मील दूर थी। 14होर त्या याहा सभी गला पैंदे जोह होऊ थी , आपु में गला करदे नाह्दे लागदे थी। 15होर जेबा त्याह आपु में गला करदे होर पूछदे लागदे थी, तेबा यीशु आपे त्या सेटा इच्छी करे त्याहा संघे हाण्डदअ लागअ। 16पर त्याह री आछी एडी बंद करी कि त्याह पछेणी नांई सके। 17तेऊये त्याका पुछु, यह कैह गल साहा, जोह तमे हाण्डदे-हाण्डदे आपु में करदे लागेदे? त्या चुप खड़ी। 18एता शुणी करे क्लियुपासा ना रे एकी मणशे बोलू, कैह तुह यरूशलेमा में केलअ परदेसी साहा, जोह नांई जांदअ कि याहा धियाड़ी तखे कैह-कैह होऊ दा साहा। 19तेऊ त्याह का पुछु, कुणा गला? त्याहे तेऊका बोलू यीशु नासरी रे बारे में जोह परमेश्वरा होर सभी लोका सेटा काम होर बचना में सामर्थ्यी, भविष्यद्वक्ता थी। 20होर प्रधान याजक होर हमारे सरदारे सह ढाकु कि तेऊवै मऊती रा दोष दे। होर तेऊकी सह क्रुसा पैंदे चड़ाऊ। 21पर हामा आशा, कि एउ इस्राएला वै छुटकरा दिणा, याह सभी गला रे सिबाये आज चिउणा धियाडा साहा। 22होर हामा मेंजा का कई बेटड़ी भी हामे हैरान करी जोह दोती कब्रा वै नाठीदी थी। 23होर जेबा तेऊरअ शव नांई भेटअ तेबा एता बोल्दी आई कि हामें स्वर्गदूत हेरी, जासुये बोलू कि सह जिऊंदअ साहा। 24तेबा हमारे कई साथी कब्रा वै नाठे, होर जेहड़ा त्याह बेटड़ी बोलू, तेहडा पाऊ; पर त्याहे सह नांई हेरू। 25तेबा तेऊये त्याका बोलू, हे निर्बुधियो; होर भविष्यद्वक्तओ री सभी गल्ला पैंदे बुशाह करणे में मन्दमतियो! 26कैह जरूरी नांई, कि मसीह एउ दुखा चुआकि करे आपणी महिमा में इछे? 27तेबा तेऊये मूसा री व्यवस्था का होर सभी भविष्यद्वक्ता का शुरू करी सारी पवित्र शास्त्रा मे का आपणे बारे में लिखिदी गल्ला रअ अर्थ त्याहवै समझाऊ। 28तेतरे में त्या तेऊ ग्रा सेटा पूजे जखा वै त्याह चालीदे थी, होर सह जेह नाहणा चाह्न्दा थी। 29पर त्याहे सहे एडा बोली करे रोकू, हामा संघे रह, किबेकि निहारा हुणे आला साहा होर तेऊकी सह त्याह संघे मितरा वै नाठअ 30जेबा सह त्याहे संघे रोटी खान्दअ बैठअ, तेऊ रोटी ढाकी करे धन्यवाद करू, होर तेसा चोडी करे त्याह वै दिनी। 31तेबा त्यारी आछी खुली; होर त्याहे सह पछेणू, होर तेऊकी सह त्याहरी आछी में गोजु। 32त्याये आपु में बोलू, जेबा सह वाता हामा का गल्ला करा थी, होर पवित्र शास्त्रा रा अर्थ हामा वै समझाऊदा थी, तेबा हामें आपणे मने किबे नांई सोचु? 33त्याह तेवरी उठी करे यरूशलेमा वै आये, होर त्याहे त्या ग्यारहा होर त्याह रे संघी कठे भेटे। 34त्या बोल्दा थी, परमेश्वर सची जिऊंदअ होऊ, होर सिमोने भी हेरूदअ साहा। 35तेबा त्या वाता री सारी गल्ला खोजी होर यह भी कि त्याहे सह रोटी चोडदअ कैहडअ पछेणू।

यीशु रा चेले वै हेरना

(मत्ती 28.16-20; मरकुस 16.14-18; यूहन्ना 20.19-23; प्रेरित 1.6-8)

36त्या या गला खोजदे ही लागे थी, की सह आपे ही त्या मंझे खडअ होऊ, होर त्याह वै बोलू तमा शांति भेटे। 37पर त्याह डरी, होर समझू कि हामें कासु दुष्ट आत्मा हेरे लागदे साहा। 38तेऊये त्याह का बोलू, किबे घबराऊंदा? थारे मने शक किवै उठू?

39मेरे हाथा होर जाघा हेरा कि हाऊं सह साहा महा छुई करे हेरा, किवकि आत्मा री हडडी होर शरीर नांई हुंदा जेहड़ा महा में हेरा। 40एडा बोली करे तेऊ आपणे हाथ जांघा रिहाई। 41तेबा त्या बखे खुश होई करे होर बुशाह नांई होऊ, होर बखे हेरान होई, तेबा तेऊ त्याह का पुछु, कैह तमा जैह कुछ खाणे वै साहा? 42त्याहे तेऊवै माछी रअ भुजू दअ एक पिस दिनअ। 43तेऊ नी करे त्याही रे सामने खाऊ। 44यीशुये चेले बे बोलू, माए तमा संघे रहंदे वक्ते तमाबे बोलू थी की जो कुछ मूसा री व्यवस्था में भविष्यद्वक्ता रे ग्रन्था में होर भजन-सहिया में मेरे बारे में लिखुदा आसा तेता सभी रा पूरा हुणा जरूरी साहा, 45तेबा तेऊ पवित्र शास्त्रा समझाऊणे री तणी त्याह री समझ खोली, 46होर त्याह वै बोलू, यह लिखुदा साहा मसीहा दुःख चुआकणा होर चीई धियाड़े मरी करे तेऊ जिउंणा। 47होर यरूशलेमा का लई करे भी सभी जाति में मन फिराव वै होर पापा री क्षमा री तणी प्रचार, तेऊरे ना का करना 48तमे या सभी गला रे गुआही साहा। 49होर हेरा, जासकी प्रतिज्ञा मेरे बापू करी दी साहा, महा सह तमा पैंदे उतारणी होर जेबरे तणी स्वर्गा का बडी सामर्थ्य नांई पाऊले, तेवरे तणी तमे एउ नगरे ठहरी रहे।

यीशु रा स्वर्गारोहण

(मरकुस 16.19,20; प्रेरित 1.9-11)

50तेबा तेउ त्या बैतनिय्याह तणी बागे निई, होर आपणे हाथ उज़े चुआकी करे त्याह वै आशीष दिनी; 51होर त्याह वै आशीष दिंदे सह त्याह का अंगी होऊ होर सरगा वै चुआकू। 52तेऊकी त्याहे तेऊबे नमस्ते करी करे खुशी संघे यरूशलेमा वै आऊऐ; 53होर त्याहे मंदिरे लगातार परमेश्वरा री स्तुति करदा थी।

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

लूका 24: ISJNT

Highlight

ಶೇರ್

ಕಾಪಿ