लूका 18

अधर्मी जज होर बिधवा रअ दृष्टान्त

1यीशु त्याह वै नराज नांई हुणे री तणी, होर प्रार्थना में बणी रहणे री तणी त्याह वै एक दृष्टान्त खोजू 2कासु नगरा रअ एक न्यायधीश रहंदा थी, जोह परमेश्वरा का डरा थी, होर कासी का नांई डरदा थी, 3तेऊ नगरे एक बिधवा भी रहंदा थी, जोह तेऊ सेटा ईनदी रहदा थी, होर बोल्दी रहन्दा थी, मेरा न्याय कर 4खासे वक्ता बाद तेउए तेसकी नांई शुणी, बाद में तेऊ सोचु की हाऊं परमेश्वरा का भी नांई डरद, होर कासी मन्शा री पर्बाह नांई करद। 5तेऊकी भी यह बिधवा महा तंग करदी लागीदी साहा, महा एसका न्याय चूकाऊणा कई एडा ना होए की यह लगतार महा सेटा ईछी करे रोज महा तंग करदी रहे। 6प्रभु यह बोला शुणा एउ अधर्मी न्यायधिशे केह बोलू, 7तेबा केह परमेश्वरा आपणे चुनीदे मणशा रा न्याय नांई करना, जोह राच धियाड तेऊ पुकारदअ रहंदा केह तेऊरे बारे में परमेश्वरा देर करणी 8हाऊं तमावै बोला की तेऊरा न्याय तेवरी हुणा तेबा भी मणशा रअ शोहरू जेबरे ईण केह तेऊ धरती पैंदे तेऊ बुशाह भेटना?

फरीसी होर चुंगी मागण आले रा दृष्टन्त

9होर तेऊए त्याह लोका जोह एसा गला पैंदे बुशाह डानदा थी, की त्याह धर्मी साहा होर होरी नीच समझा थी, त्याह लोका वै यह दृष्टान्त खोजू। 10दुई मणश देहुरे वै प्रार्थना करदे नाठे, त्याह में एक फरीसी, होर एक चुंगी नीणआल थी, 11फरीसी खड़े होई करे प्रार्थना करदअ लागअ, तेऊये बोलू हे परमेश्वर, हाऊं तेरा धन्यावाद करा कि हाऊं होरी जेहड चुंगी होर व्यभिचारी नांई आंधअ, होर एउ चुगी निण आल़अ जेहअ अधर्मी नांई आंधअ। 12हाऊं हप्ते में दुई बारी ब्रत डाहनडा होर जोह कुछ महा भेटा, हाऊं तेत्का दशमाश दीनदा। 13पर चुंगी नीण आलअ थोडअ दूर खडूदअ थी, तेऊये स्वर्गा फेरा वै आपणी आछी भी नांई चकी पर छाती टोकते बोलू, हे परमेश्वरा महा पापी पैंदे दया कर। 14हाऊं तमावै बोला सह की यह मणश धर्मी होई करे आपणे घरा वै नाठअ ना की सह दूजअ किबेकि जोह आपणे आपा वै बडअ मनलअ सह होच्छअ हुण, होर जोह दीन बणनलअ होर सह बडअ करण।

शोहरू वै आशर्वाद

(मत्ती 19.13; मरकुस 10.13-16)

15लोका आपणे शोहरु भी तेऊ सेटा आणदे लागे, की यीशु त्याह पैंदे हाथ डाहे, पर जेबा चेले यह हेरू की त्याह यहा वै डांटते लागे। 16पर यीशुये बोलू बच्चे देआ महा सेटा ही हीणे, याह नांई रोका, किबेकि परमेश्वरा रा राज्य एडे रा साहा 17हाऊं तमावै सच बोला की, जोह कोई परमेश्वरा रे राज्य बच्चे रे समान ग्रहण नांई करले सह कधी तेऊमें प्रवैश नांई करी सकदअ।

सेठ मणश होर अनन्त जीबन

(मत्ती 19.16-30; मरकुस 10.17-31)

18तेऊकी एकी सरदारे तेऊ कअ प्रश्न करू, हे भले गुरु अनन्त जीबना पाउणे वै हाऊं कह करू? 19यीशुये तेऊवे बोलू तूह महा वै भलअ किवै बोला? परमेश्वरा छाडी करे कोहे भी भलअ नांई आंदअ। 20तूह आज्ञा तो जाणा ब्यभिचार नांई करणा, होर हत्या नांई करणी, झूठी गुआही नांई दीणी चोरी नांई करणी, होर आपणे आमा बापू रा आदर करणा 21तेऊये बोलू हाऊं एता होच्छे पोरी जाणा, 22जेबा यीशुये यह शुणू होर बोलू ताह में एकी गला री कामी एबरे भी साहा आपणी सम्पति कंगाला वै दे, एतके बदले में ताह स्वर्गा में धन भेटना, होर महा पीछे हानडअ। 23पर यह शुणी करे सह हेरान होऊ किबेकि सह बहू सेठ थी। 24यीशु तेऊ फेरा वै हेरी करे बोलू, सेठा मन्शा रा परमेश्वरा रे राज्य में हीहणा केतरा मुशिकल साहा। 25परमेश्वरा रे राज्य में सेठा मन्शा रा ईहणा ऊटा रा सीऊणी रे छेद नाके का निखलना सान साहा। 26एता पैंदे शुड़न आले बोलू, तेबा कासका उद्धार होई सका? 27पर यीशुये बोलू, जोह गला मणशा वै मुशिकल साहा त्याह परमेश्वरा वै साहन साहा।

28एता शुणी करे पतरसे बोलू हेर हामें तो घर बार छाडी करे ताह पीछे साहा। 29यीशुये त्याहवै बोलू, हाऊं तमावै सच बोला की, एडा कोहे नांई आन्ध जासुये परमेश्वरा रे राज्य री तणी आपणे घर, या बेटड़ी या भाई या माँ बाब या बाल बच्चे छाडी दे साहा। 30पर एडा साहा की त्याहे एउ वक्ते त्याह किछे नांई पाउणा, पर हीहणे आले वक्ते अनन्त जीबन पाऊणा।

आपणे मरने रे बारे में यीशु री चिहुणी भविष्यवाणी

(मत्ती 20.17-19; मरकुस 10.32-34)

31तेऊकी तेऊ बारह संघे नाही करे बोलू, हेरा हामा एवा यरूशलेमा वै नहांदे लागे जेथरी गला, मणशा रे शोहरू रे बारे में भविष्यद्वक्ता री भविष्यवाणी होई दी त्याह सवै पूरी हुणी। 32किबेकि सह अन्यजाति रे हाथे ढाकण, होर त्याहे सह ठठे में ऊडाउण होर तेऊरा अपमान करना होर तेऊ पैंदे थूकना, 33होर तेऊवै कोड़े भाहणे, होर तेऊवै घात करनी, होर सह चिऊणे धियाडे जिऊंदअ हुणअ। 34पर त्याह याह गला में कोई भी गला नांई समझी, होर याह गला त्याह का गोजी रही, होर जोह बोलू, सह त्याहरी समझा में नांई आउआ।

काणे भिखारी रा दृष्टान्त

(मत्ती 20.29-34; मरकुस 10.46-52)

35जेबा यीशु यरीहो सेटा पूज़ोअ तेबा एक काणअ भिखारी सडका री कोडी भीखा मागदअ लागदअ थी। 36सह लोका हानडणे री छेहडा शुणी करे बोलदअ लागअ, यह केह लागादा हुंदा? 37लोके बोलू यीशु नासरी नाहदअ लागदअ। 38तेबा तेऊये बोलू हे यीशु नासरी दाऊदा री सन्तान महा पैंदे दया कर। 39जोह जेह-जेह लोका हानडदे लागे थी, त्याह तेऊवै डांटी करे बोलू चुप रह, पर सह होर भी जोरे-जोरे बोलदअ लागअ, हे दाऊदा री सन्तान महा पैंदे दया कर। 40तेबा यीशुये खडी करे बोलू एऊ महा सेटा वै आणा।

41होर जेबा सह नेड आओ तेबा यीशुये सह पुछू हाऊं ताहबे केह करू? तेऊ बोलू प्रभु हाऊं हेरना चाहंदा। 42यीशुये बोलू, हेरदअ लागअ तेरे बुशाहे तुह बचाऊ ठीक करू। 43सह तेवरी हेरदअ लागअ होर परमेश्वरा री बड़ाई करद लागअ होर यीशु रे पीछे हांणदअ लागअ होर सवै लोका एता हेरी करे परमेश्वरा री बडाई करदे लागे।

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

लूका 18: ISJNT

Highlight

ಶೇರ್

ಕಾಪಿ