लूका 16

चलाक भंडारी

1तेबा यीशु चेले वै भी बोलू; कासु सेठा रअ एक भण्डारी थी, होर लोके तेऊरे सामने तेऊ पैंदे दोष लाऊ कि यह तेरी संपति उडाऊंदअ लागअद। 2तेबा तेऊ सेठे सह भण्डारी शादू होर बोलू, यह कैह सा, जोह हाऊं तेरे बारे में शूणदअ लागदअ? आपणे भंडारीपना रा हिसाव दे; किबेकि तूह एबा भंडारी नांई रही सकदअ। 3तेबा भण्डारी सोचदअ लागअ; कि तेबा हाऊं कैह करू? किबेकि मेरे मालका महा का एबा भंडारी रा काम पोरी मागना तेबा हाऊ माटे कोतणे बे सामर्थ्य नांई, होर भीखा मांगणे का महा शर्म इहंदा। 4हाउ समझू कि महा एवा कैह करना; की जेबरे मेरे भंडारी रा काम छुटणा तेबा लोका महा आपणे घरा वै नीये। 5होर तेऊए आपणे मालका रे कर्जदारा में एक शादू होर पुछु, कि तहा पैंदे मेरे मालका रा केतरा कर्ज साह। 6तेऊ बोलू शअ मण तेल तेबा तेऊ भंडारी तेऊवै बोलू, कि आपणे खाते तखी काहड होर वैशी करे छेकअ पजाह लिख। 7तेऊकी तेऊ दूजे का पुछु, ताह पैंदे केतरा कर्जा साहा? तेऊ बोलू शअ मण गिहू; तेबा तेऊये तेऊवै बोलू आपणे खाते सह काहडे होर अशी लिख। 8तेऊरे मालके सह अधर्मी भण्डारी साराहू कि तेऊ चुश्ती संघे काम करूदा साहा; किबेकि एऊ संसारा रे लोका आपणे वक्ता रे लोका संघे रीति व्यबहारा में ज्योति रे लोका का ज्यादा चुश्त साहा। 9होर हाऊं तमावै बोलदा, कि अधर्मी रे धना का आपणे दोस्त बणा, तेबा जेबरे सह नाहदअ लागअ, तेबा सह तमाबे अनन्त निवासा में निए। 10जोह थोडे का थोडे में बुशाह लायक साहा, सह बहू में भी बुशाह लाईक साह होर जोह थोडे कअ थोड़े में अधर्मी साह, सह बहू में भी अधर्मी साह। 11जेबा तमे संसारा रे अधर्मी रे धना कअ बुशाह लायक नांई ठहरले, तेबा सच्चअ घन कूण तमाबे देलअ? 12होर ज़ेबा तमे पराये धना में बुशाह लायक नांई होले, पर जोह थारा साहा सह तमावै कासू दीणा?। 13“कोहे भी नोकर दुई मालका री सेवा नांई करी सकदअ; किबेकि सह एकी कअ दुशमनी होर दूजे कअ प्रेम डाहंदा किबेकी यह एकी कअ मिलदा होर दूजे बुरअ मना तमे परमेश्वरा होर धना दूही री सेवा नांई करी सकदे।”

यीशु री शिक्षा

(मत्ती 11.12,13; 5.31,32; मरकुस 10.11,12)

14फरीसी जोह लालची थी, याह सभी गला शूणी करे तेऊरे मजाका ऊडाऊदे लागे। 15तेऊए त्याहवै बोलू; तमे तो मणशा रे सामने आपणे आपा वै धर्मी ठहराउंदा, पर परमेश्वर थारे मना जांणदा, किबेकि जोह चीज मणशा री आछी रे सामने राम्बड़ी साहा परमेश्वरा रे सामने सह बुरी साह। 16यूहन्ना बपतिस्मा दिहंण आले रे बक्त मूसा री व्यवस्था होर भविष्यद्वक्ता प्रभाबा में थी होर परमेश्वरा रे राज्य सुसमाचार शुणऊणा लाऊदा, होर जोह कोहे तेता में बडी-चडी करे इन्हद लागद साहा। 17सरग होर धरती टल़ए, पर व्यवस्था रअ एक बिन्दु भी नांई मटाई सकदअ। 18“जोह कोई आपणी लाड़ी छाडी करे दूजी सगे ब्याह करे, सह ब्यभिचार करदा, होर जोह कोई छाडी दी बेटड़ी संघे ब्याह करदा सह भी व्यभिचार करदा।”

सेठ मणश होर लाज़र

19एक सेठ मणश थी, जोह मेहगे बैजनी झिकडे होर मलमला रे झिकडे बानाहा थी, होर रोज खुश होर धूमधामें संघे रहदा थी। 20होर लाजर ना रअ एक कंगला जख्में संघे भरुदअ थी, तेऊरी डेहली पैंदे पजेरी दींन्दा थी। 21होर सह चाह्न्दा थी, कि सेठा री मेजा पैंदे जोह जूठे संघे आपणें पेटा भरणा चांहदा थी, पर कुत्त्ते भी इच्छी करे तेऊरे जख्मा चाटा थी, 22होर एडा होऊ की सह कंगाल मुंअ, होर स्वर्गदूते सह नीऊ होर अब्राहमा रे भोसले पजेरु; होर सह सेठ भी मुंअ; होर आटू। 23होर नरका में तेऊ दुःखा में पडी आपणी आछी खोली, होर दूरा कअ अब्राहमा रे भोसले लाजर हेरू। 24होर तेऊ पुकारी करे बोलू; हे बापू अब्राहम! महा पैंदे दया करी करे लाजरा भेज; तेबा सह आपणी गुठी पांणी में शगी करे मेरी जीभआ ठाडी करे, किबेकि हाऊं ऐसा आगि में तडपदअ लगदअ। 25पर अब्राहमें बोलू; हे शोहरूआ याद कर, कि तूह आपणी जिंदगी में शोभली चीजा रे मजे लई छेकू दअ होर तेऊ साबे ही लाजर बुरी चीजा; पर एवा यह शांति पाऊदअ लागदअ होर तूह तडपदअ लागदअ। 26होर याह सभी गला छाहडी करे माह रे होर थारे बीचा में एक बडअ नालअ साहा कि अखा कअ तमे जेह इच्छणा चाह्न्दा पर नांई इछी सकदअ, होर ना ही कोई ताह सेटा कअ ओरी ईछी सकदा। 27तेऊ बोलू; तेबा हे बापू हाऊं ताकअ बिनती करदा, कि तमे तेऊ मेरे बापू रे घरा वै भेजा। 28किबेकि मेरे पाज भाई साहा, सह त्याह सामने याह गला री गुआही दे, एडा ना हो कि त्याह भी ऐसा दाहू री जागहा में इछे। 29अब्राहमें तेऊवै बोलू, त्याह सेटा मूसा री व्यवस्था होर भविष्यद्वक्ता री कताबा साहा, त्याह तेतकी शूणा। 30तेऊए बोलू; हे बापू अब्राहम; पर ज़ेबा कोई मुंएदे में त्याह सेटा नाहे, तेबा त्याहा रा मन फेरना। 31तेऊये तेऊवै बोलू; कि जेबा त्याह मूसा री व्यवस्था होर भविष्यद्वक्ता समझाई करे नांई शूणदे, तेबा ज़ेबा मुंएदे में ज़ेबा कोई जिऊंदअ होए तेबा तेऊरी भी नांई मनले।

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

लूका 16: ISJNT

Highlight

ಶೇರ್

ಕಾಪಿ