लूका 13

मन फरेऊणा या नाश होया

1तेऊ बक्ते कुछ लोका तखे पूजे, होर त्याह संघे गलीलीयो री चर्चा करदे लागे, ज़ासरे लोहू पिलातुस त्याहरे बलिदाना संघे मिलाऊ दा थी। 2यह शूणी करे तेऊ त्याह वै उतर दीना होर बोलू, “तमे समझा की यह गलीली होर सभी गलीली कअ जयादा पापी थी, कि त्याह पैंदे एडी मुसीबत पड़ी?” 3हाऊं तमावै बोलदा की नांई; पर तमे ज़ेबा नांई मना फेरले तेबा तमे सभे एडे साबे नाश हुणे। 4तमे यह समझा कि शिलोह त्याह अठाहर लोका जासू पैंदे शीलोहा रअ मीनार पडू होर त्याह दबी करे मूंए यरूशलेमा रे होर सभी रहण आले कैह पापी थी? 5हाऊं तमावै बोलदा की नांई; पर ज़ेबा तमे ना मना फेरले तेबा तमे सभे एडी तरह ही खत्म हुणे।

बूटे रअ उदाहरण

6तेऊकी तेऊये यह दृष्टान्त भी बोलू, कासु मणशा रे अंगूरा रे बगीचे में अंजीरा रअ बूटअ थी। सह तेता में फलाह लोडअ आऊओ, पर तेऊ एक भी फल नांई भेटअ। 7तेबा तेऊए बारी रे माली वै बोलू, हर चीण साला होई रोज हाऊं फलअ लोडदा पर नांई भेटदे एऊ अंजीरा रे बूटे काटे कि यह धरती में भी भोझ साहा। 8तेऊये तेऊवै उतर दिना कि हे मालक एऊ बूटे ऐसा साला होर रहणे देआ; कि हाऊं एऊ बूटे रे चहू तरफे कोती करे खाद पाऊ। 9अगर सह फल़ नाई दिल़अ तेबा ठीक सह काटण।

कुबड़ी बेटड़ी चंगी करणी

10सब्ता री धियाड़ी सह एकी प्रार्थना घरा में उपदेशा दीनदअ लगदअ थी। 11होर हेरा एक बेटड़ी, जासू अठारह साला का एक कमजोर करन आली दुष्टात्मा शाती दी थी, होर सह कुबड़ी भी थी, होर सह जयाछी भी नांई होई सका थी। 12यीशुये सह बेटड़ी भाल़ी होर आपु सेटा शादी होर बोलू, हे बेटड़ी तूह आपणी कमजोरी का छुटी। 13तेबा यीशु तेसा पैंदे दुहे हाथ डाही होर सह बेटड़ी ज्याछी होई होर परमेश्वरा री बड़ाई करदी लागी। 14तेबा कि यीशुये सह सब्ता री धियाड़ी ठीक करी, प्रार्थना घरा रे सरदार रिसियाकर लोका वै बोलदअ लागअ छह, धियाड़ी, जासू में काम करू लोडी तेबा तयाही धियाड़ी इच्छी करे ठीक पर सब्ता री धियाड़ी नांई। 15यह शुणी करे प्रभु यीशु यह उतर देई करे बोलू, हे कपटियों कैह सब्ता री धियाड़ी तमे सभे आपणे बलदा यह गाधे खुडा का खोली करे पाणी पिलऊंणे बे नांई निन्दे। 16होर केह यह ठीक नांई आधा, कि यह बेटड़ी जोह अब्राहमा री शोहरी सा जोह शैताने ठारहा साला तक गाठी, डाही दी थी, सब्ता री धियाड़ी यह एऊ बंधना का छुडाई। 17जेबरे यीशुये यह गलअ बोली तेबरे तेऊरे सभी बिरोधी शर्मिंदा होई, होर सारी भीड़ यीशु रे कामा री तारिफा करदे लागे जोह तेऊ काम करू, तेताका खुश होई।

राई रे दाणे रा दृष्टांत

(मत्ती 13.31,32; मरकुस 4.30-32)

18तेऊकी तेऊ भी बोलू, परमेश्वरा रअ राज्य कासु साही साह दा होर हाऊं तेऊरी तुलणा कासु संघे करू। 19सह राई रे एकी दाणे बाराबर साहा कासु मणशे आपणे खेचे बई होर जोह बढ़ी करे एक बूटअ बणू होर सरगा रे चेलू भी तेऊरी डाली री छाईंटा में बसेरा करी सकता।

मखीरा रा दृष्टन्त

(मत्ती 13.33)

20तेऊकी भी बोलू, हाऊं परमेश्वरा रे राज्य री तुलणा कासु संघे करू। 21सह मलेडे साही साहा, जोह एकी बेटडी दस किलो पीठे मे मीलऊदा होर हुंनदे-हुंनदे सह पीठा पूरा मलेडा बणू।

घाटअ दुआर

(मत्ती 7.13,14,21-23)

22सह नगरे-नगरे होर ग्राए-ग्राए होई करे होर उपदेशा दिंदअ यरूशलेमा री तरफा बे नांहद लगदअ थी। 23होर एकिए तेऊका पुछु; परमेश्वरा रे उद्धारा पाउण आले थोड़े साहा। 24तेऊए त्याह वै बोलू, घाटे दुआरा में नाहणे री पूरी-पूरी कोशिश करा; किबेकि हाऊं तमावै बोलदा कि जोह लोका मीतर इंहणे री कोशिश करल़े पर मीतर ईहणे लायक नांई आंदे। 25जेबा घरा रअ मालक उठी करे दुआर बंद करल़अ होर तमे बागे सब टोकी करे बोले, हे प्रभु, हामा बे दुआर खोल होर सह मीतरा का उतर दिंदा कि हाऊं तमा नांई जाणदअ, तमे कंधा का आयदे। 26तेबा तमे बोलदे लागदे, कि हामे तेरे सामने खाऊ पिऊ होर तांई महारे बजारे उपदेशा दिने। 27पर सह बोला, हाऊं तमावै बोलदा, हाऊं नांई जाणदअ, हे कुकर्म करन आल़ो, महा सेटा का दूर नाहां। 28तखे लेरना होर दानदा रा पीशणा हूँणा। जेबा तमे अब्राहम होर इसहाक होर याकूब होर सभी भविष्यद्वक्ता जोह परमेश्वरा रे राज्य में वैठदे हूणे होर आपणे आप वै परमेश्वरा रे राज्य का बागे हेरले। 29होर पूरब होर पशिचम; उतर होर दक्षिण सभी जागाह का परमेश्वरा रे राज्य में पवित्र धाम करदे इच्छणे। 30होर हेरा कूण पिछल साहा होर त्याह पहिल हुणे होर जोह पहिले साहा, त्याह पिछले हुणे।

हरोदेसा री दुश्मणी

31तेऊ वक्ते केतरे फरीसी आए होर बोलू, अखा कअ निखल किबेकि हेरोदेस ताहा मारना चाह्न्दा। 32तेऊए त्याह वै बोलू, नाशी करे तेसा शयाली वै बोला कि हाऊं आज होर काला दुष्टात्मा काडा होर बीमरा चंगे करा होर चिहुणी धयाडी आपणा काम पूरा करना। 33तेबा भी आज होर काला होर परदेशी हांडणा जरूरी साह किबेकि होई नांई सकादा कि कोई भविष्यद्वक्ता यरूशलेमा बागे मरे।

यरूशलेमा वै दुःख

(मत्ती 23.37-39)

34हे यरूशलेम! हे यरूशलेम! तूह जोह भविष्यद्वक्ता करन आले तुह मारी पाऊदा होर जोह ता सेटा भेजी दे साहा त्याह पैंदे पाथर फेकदा केतरी बारी मांई यह चाहू कि जेड़ा मुर्गी आपणे होछे चेलू आपणे फियाखा थन्ही कठे करदा साहा तेड़े मांइ भी तेरे शोहरू कठे करने चाही, पर ताई यह नांई चाही। 35हेरा, थारअ घर तमाबे उजाडी छाडू, होर हाऊं तमवै बोलदा, कि धन्य साहा त्याह जोह परमेश्वरा रे ना का ईहंदा, तेबरे तणी तमा कधी भी नांई भाल़ण!

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

लूका 13: ISJNT

Highlight

ಶೇರ್

ಕಾಪಿ