यूहन्ना 8
8
ब्यभिचारणी बे क्षमा
1पर यीशु जैतूना रे पहाडा पैंदा बे नाठअ। 2बयाल्के सह भी देहुरे बे आउअ; सभे लोका तेऊ सेटा आऊए होर बेशी करे तयाबे उपदेशा दींदअ लागअ। 3तेबा शास्त्री होर फरीसी एक बेटड़ी आणी जोह ब्यभिचारा में ढाकी दी थी, होर सह मंझे खड़ी करी करे यीशु का बोलू, 4हे गुरु, यह बेटड़ी ब्यभिचारा मे ढाकी दी साहा। 5व्यवस्था में मूसा हामा बे आज्ञा दिंनी कि एह्डी बेटड़ी पैंदे पथराब करे। पर तूह ऐसा बेटड़ी रे बारे में कैह बोला? 6त्याहे तेऊ परेखणे बे यह गल बोली कि तेऊ पेंदे दोषा लाऊणे बे कोई गल बणे। पर यीशु झुकी करे गुठी संघे धरती री जमीना पेंदे लिखतअ लागअ। 7जेबा त्या तेऊका पूछते ही रही, तेबा तेऊ सीधे होई करे तयाबे बोलू, तमामें जोह निष्पाप साहा, सहे पहिले तेसाबे पाथरे बाहे। 8होर तेहुकी झुकी करे धरती जमीना पैंदे गुठी करे लिखतअ लागअ। 9पर त्या यह शूणी करे बजुर्गा का होछे तक, एक-एक करी करे बागे निकतए, होर यीशु केलह रहू, होर बेटड़ी तखी मेंझे खड़ी रही। 10यीशु सीधे होई करे तेसाबे बोलू, हे बेटड़ी, त्या कई नाठे? कैह कोही भी ताहबे दण्डा री आज्ञा नांई दिंनी? 11तेसा बे बोलू, हे प्रभु, कोही नांई। यीशु बोलू, हाऊं भी ताहबे दण्डा री आज्ञा नांई दींदअ; नाह, होर भीआक पाप नांई करे।
यीशु संसारा री ज्योति
12यीशु भी लोका बे बोलू, संसारा री ज्योति हाऊं साहा; जोह माँह पीछे होलअ सह नयारे में जिंदगी नांई हाडणा, पर जीबना री ज्योति पाऊणी। 13फरीसी तेऊबै बोलू, तूह आपणी गुआही आपे दिंदा, तेरी गुआही ठीक नांई आँधी। 14यीशु तयाबे उतर दिना, भले ही आपणी गुआही आपे दींदाआ होलअ, पर तेबा भी मेरी गुआही ठीक साहा, किबेकि हाऊं जाणा कि हाऊं कंधा का आउअ दअ साहा होर कंधा बे नाहंदा? पर तमे ज़ाणदा कि हाऊं कंधा का ईहंदा या कंधा बे नाहंदा। 15तमे शरीरा रे साबे न्याय करा; हाऊं कासी रा न्याय नाँई करदअ। 16होर अगर हाऊं न्याय करे भी, मेरा न्याय सच्चा साहा; किबेकी हाऊं केलह, पर हाऊं साहा, होर बापू साहा जूणी हाऊं भेजु। 17थारी व्यवस्था में भी लिखुदा साहा कि दुई री गुआही मिली करे ठीक हुँदा; 18एक तअ हाऊं आपणी गुआही आपे दिंदाआ, होर दूजी गुआही बापू मेरी दिंदाआ जूणी हाऊं भेजु। 19त्याहे तेऊबै बोलू, तेरअ बापू कई साहा। यीशु उतर दिंना, नाह तमे माँह ज़ाणदे, नाह मेर बापू, अगर माँह ज़ाणदे तेबा मेरे बापू भी ज़ाणदा। 20या गला तेऊ देहुरे में उपदेशा दींदे भण्डारा रे घरे बोली, होर सह कोही नांई ढाकु किबेकी तेऊरा वक्त ऐबरे तणी नांई आउआ थी।
आपणे बारे यीशु रा बोलणा)
21तेऊ भी तयाबे बोलू, हाऊं नाहूँ, होर तमा हाऊं लोढ़नअं होर आपणे पापा में मरने; ज़खे हाऊं नाहंदा, तखे तमे नांई इच्छी सकते। 22ऐता पेंदे यहूदी बोलू, कैह तेऊ मरना, जोह बोला, ज़खे हाऊं नाहंदा तखे तमे इच्छी नांई सकते? 23तेऊ तयाबे बोलू, तमे उंधले साहा, हाऊं उझलअ सरगा रअ साहा; तमे संसारा रे साहा, हाऊं संसारा रअ नांई। 24एतकि तणी मांई तमाबे बोलू कि तमे आपणे पापा में मरने, किबेकि तमा बुशाह करना कि हाऊं सह साहा तेबा आपणे पापा में मरने। 25त्याहे तेऊबै बोलू, तूह कुणह साहा? यीशु त्याहबे बोलू, सहे साहा जोह तमाबे पहिले का बोलदअ आउअद। 26थारे बारे में महा बहू कुछ बोलना होर न्याय करणा; पर मेरअ भेज़ण आलअ सचअ साहा, होर जोह मांई तेऊका शूणु तेहू संसारा में बोला। 27त्या यह समझी कि हामा बे बापू रे बारे में बोला। 28तेबा यीशु बोलू, जेबा तमे मणशा रे शोहरू उछटे पेंदे चढ़ाउले, तेबा ज़ाणले कि हाऊं सह साहा; हाऊं आपणे आपा का किछे नांई करदअ पर जेड़ा मेरे बापू माँह बे सिखाऊ तेडी ही याह गला करा। 29मेरे भेजणअ आलअ मांई संघे साहा; तेऊ हाऊं केलह नांई छाडण किबेकि हाऊं सदा सह काम करा जासू संघे सह खुश हुंदा। 30सह याह गला करदअ ही लागअ थी, कि बहू कै तेऊ पेंदे बुशाह करू।
सच्चाई तमे अज़ाद करने
31तेबा यीशु त्या यहूदी बे जूणी तेऊ पेंदे बुशाह करू, बोलू, अगर तमे मेरे बचना में बणी रहले, तेबा सची मेरे चेले रहंणे। 32तमा सच ज़ाणना, होर सचाई ही तमे आज़ाद करने। 33त्याहे तेऊबै उतर दिना, हामें तअ अब्राहमा रे बंशा का साहा, होर कधी भी कासी रे सेबक नांई होई। तेबा तूह केह बोला कि तमे आज़ाद हूँणे? 34यीशु तयाबे उतर दिना, हाऊं तमाबे सच-सच बोला कि जोह कोई पाप करा सह पापा रअ नोकर साहा। 35नोकर सदा घरे नांई रहंदअ; शोहरू सदा रहंदा। 36ऐतकी तणी अगर शोहरू तमा आज़ाद करलअ, तेबा सची तमे आज़ाद हूँणे। 37हाऊं जाणा कि तमें अब्राहमा रे बंशा का साहा; तेबा भी मेरअ बचन थारे मना में जागा नांई पाऊंदअ, ऐतकी तणी तमे महा मारना चाहंदा। 38हाऊं सह बोला, जोह आपणे बापू रे अखे हेरा; होर तमे सहे करदे रहंदा जोह तमे आपणे बापू का शूणुदा साहा। 39त्याहे तेऊबै उतर दिना, माह रअ बापू अब्राहम साहा। यीशु तयाबे बोलू, अगर तमे अब्राहमा रे शोहरू हूँदे, तेबा अब्राहमा रे बराबर कामा करदे । 40पर ऐबा तमे महा साही मणशा मारना चाहंदा, जूणी तमाबे सह सचअ बचन खोजू जोह परमेश्वरा का शूणु; ऐढ़ा तअ अब्राहमे करू। 41तमे आपणे बापू रे बराबर काम करा। त्याहे तेऊबै बोलू, हामें ब्यभिचारा का नांई ज़न्मी, माह रअ एक बापू साहा मतलब परमेश्वर। 42यीशु तयाबे बोलू, अगर परमेश्वर थारअ बापू हूँदअ, तेबा तमे मांई संघे प्रेम ढाहंदे ; किबेकि हाऊं परमेश्वर री तरफा का आउअद साहा। हाऊं आपे नांई आउअ, पर तेऊ हाऊं भेजुदअ साहा। 43तमे मेरी गला किबे नांई समझदे ? ऐतकी तणी कि तमे मेरा बचन शूणी सकते। 44तमे आपणे बापू शैताना का साहा होर आपणे बापू री लालसा पूरी करणा चाहंदा। सह तअ पहिले का हत्या करन आलअ साहा होर सत्य पेंदे स्थिर नांई रहू, किबेकि सत्य तेऊमें साहा ही नांई। जेबा सह झुठ बोला; तेबा सह आपणे स्बभावा का ही बोला; किबेकि सह झुठअ साहा पर झुठा रअ बापू साहा। 45पर हाऊं जोह सच बोला, याह री तणी तमें मेरा बुशाह नांई करदे। 46तमा में का महा कूण महा पापी समझा? अगर हाऊं सच बोला, तेबा तमे मेरा बुशाह किबे नांई करदे? 47जोह परमेश्वरा का हुँदा, सह परमेश्वरा री गला शूणा; होर तमे ऐतकी तणी शूणदे कि परमेश्वरा री तरफा का नांई हो।
यीशु होर अब्राहम
48यह शूणी करे यहूदी तेऊबै बोलू, कैह हामें ठीक बोलदे कि तूह सामरी साहा, होर ताह में दुष्टात्मा साहा? 49यीशु उतर दिना, महा में दुष्टात्मा नांई; पर हाऊं आपणे बापू रा आदर करा, होर तमे मेरा अनादर करा। 50पर हाऊं आपणी आदर नांई चाँहंदअ; उओह, एक साहा जोह चाहंदा होर न्याय करा। 51हाऊं तमाबे सच-सच बोला कि अगर कोई मणश मेरे बचना पेंदे चले, तेबा अनन्त काला तणी मऊत नांई हेरणी। 52यहूदिये तेऊबै बोलू, ऐबा हामें ज़ाणु कि ताह में दुष्टात्मा साहा। अब्राहम मुंअ, होर भविष्यद्वक्ता भी मुएं; होर तूह बोला, अगर कोई मेरे बचना पेंदे चले तेबा अनन्त काला तणी मऊती रा सुआद नांई चाखणा। 53माह रअ बापू अब्राहम तअ मुअं। कैह तूह तेऊका बढ़अ साहा? होर भविष्यद्वक्ता भी मुअं। तूह आपणे आपा बे कैह समझा? 54यीशु तेता मे बोलू, अगर हाऊं आपणी महिमा आपे करे, तेबा मेरी महिमा किछे नांई, पर मेरी महिमा करने आलअ मेरअ बापू साहा जासूबे तमे बोला कि सह थारअ परमेश्वर साहा। 55तमे तअ सह नांई ज़ाणु पर हाऊं तेऊ जाणा। अगर हाऊं बोले कि हाऊं तेऊ ज़ाणदअ, तेबा हाऊं तमा साही झूठअ हूंणअ; पर हाऊं तेऊ जाणा होर तेऊरे बचना में चला। 56थारअ बापू अब्राहम मेरी धियाड़ी भालणे री आशा में मगन थी, होर तेऊ हेरू होर खुश होऊ। 57यहूदी तेऊबै बोलू, ऐबरे तणी तूह पज़ाह साला रअ नांई होऊ, तेबा भी ताँईं अब्राहम हेरू दअ? 58यीशु तयाबे बोलू, हाऊं तमाबे सच-सच बोला, कि ऐतका का पहिले अब्राहम होऊ, सह हाऊं साहा। 59तेबा त्याह तेऊ बाहणे बे पाथर चुआकी, पर यीशु तखा का गोझी करे देहुरे का निकदअ।
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
यूहन्ना 8: ISJNT
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Inner Seraji (ईनर सराजी) Bible by The Love Fellowship is licensed under Creative Commons Attribution-ShareAlike 4.0 License.
