यूहन्ना 4

यीशु होर सामरी बेटड़ी

1फरीसी बे यह पता लागा की यीशु यूहन्ना का ज्यादा चेले बणाऊदा होर तयाबे बपतिस्मा दींदा। 2हलांकी यीशु आपे नांई पर तेऊरे चेले बपतिस्मा दींदा। 3तेबा सह यहूदी छाड़ी करे भी गलीला बे नाठअ, 4होर तेऊ सामरिया होई करे नाहणा जरूरी थी। 5ऐतकी तणी सह सुखार ना रे सामरिया रे ऐकु नगरा तणी आऊअ, जोह तेसा जमीना सेटा साहा जोह याकूबे आपणे शोहरू यूसुफ बे दीनी दी थी; 6होर याकूबा रअ कुंअँ भी तखे थी। यीशु बाता रअ थकूदअ तेऊ कुंएँ पेंदे एढअ बैठअ। होर या गला ध्याडके बकते होई।

7तेतरे में एक सामरी बेटड़ी पाणी भरदी आई। यीशु तेसाबे बोलू, माँह बे पाणी पलाह। 8किबेकि तेऊरे चेले रोटी लउंदे नगरा बे नाठे दे थी। 9तेसे सामरिया बेटड़ी तेऊबै बोलू, तूह यहूदी होई करे माँह सामरी बेटड़ी का पाणी किबे लाऊ मँगणा? (किबेकि यहूदी सामरी संघे कोई व्यवहार नांई डाहंदे थी।) 10यीशु उतर दींना, अगर तूह परमेश्वरा रे बरदाना जाणा, होर यह भी जाणा कि सह कुँण साहा जोह ताहबे बोला, माँह बे पाणी पलाह, तेबा तूह तेऊका माँगा, होर सह माँह बे जिंदगी रा पाणी दींदा। 11बेटड़ी तेऊबै बोलू, हे परमेश्वर, ताह सेटा पाणी भरने बे बालटी साहा भी नांई, होर कुअं डूघअ साहा; तेबा ताह सेटा जिंदगी रा पाणी कंदा का ईहणा। 12कैह तूह महारअ बापू याकूबा का बढ़अ साहा, जूणी हामा बे यह कुअं दींनअं; होर तमें ही आपणे शोहरू, होर आपणे पशु समेत ऐताका झुटुे? 13यीशु तेसाबे उतर दीना, जोह कोई ऐऊ पाणी झुटलअ सह भी शोखअ हुणअ, 14पर जोह कोई तेऊ पाणी मेंज़ा का झुटलअ जोह माँह तेऊबै दींणा, सह तेहुकी अन्नतकाल तणी शोखअ नांई रहंणअं; पर जोह पाणी माँह तेऊबै दींणा, सह तेऊमें एक सोता बणना जोह अनन्त जीबना बे उमड़ते रहंणा। 15बेटड़ी तेऊबै बोलू, हे परमेश्वर, तेऊ पाणी माँह बे देह कि हाऊं शोखी नांई होर नाह पाणी भरदी ऐतरी दूर ईछे। 16यीशु तेसाबे बोलू, नाह, आपणे मर्दा अखे शादअ। 17बेटड़ी उतर दीना, हाऊं बिना मर्दा री साहा दी। यीशु तेसाबे बोलू, तूह ठीक बोला, हाऊं बिना मर्दा री साहा। 18किबेकि ताँईंए पाँज़ बयाह करी दे, होर जासू सेटा तूह ऐबरे साहा सह भी तेरअ मर्द नांई आंधअ। यह तांई सच ही बोलू। 19बेटड़ी तेऊवे बोलु; हे परमेश्वर; माँह लागा कि तूह भविष्यद्वक्त साहा। 20महारे दादू बाबए ऐऊ पहाड़ा पेंदे प्रार्थना करी; होर तूह बोला सह जागा ज़खे प्रार्थना लोड़ी करी यरूशलेम में साह। 21यीशु तेसाबे बोलू; हे बेटड़ी; मेरी गला रा बुशाह कर कि सह वक्त ईंणा कि तमें नांई तअ ऐऊ पहाडा में बापू री प्रार्थना करणी, होर नाह यरूशलेम में। 22तमे जासू नांई ज़ाणदे, तेऊरी प्रार्थना करा; होर जासू हामे जाणा तेऊरी प्रार्थना करा; किबेकि उद्धार यहूदी का ही साहा। 23पर सह वक्त ईंहधा, पर ऐबरे भी साहा, जासू में सच्च भक्त बापू री प्रार्थना आत्मा होर सच्चाई का करलअ , किबेकि बापू आपुबे ऐडे ही प्रार्थना करणे आल़े लोडा। 24परमेश्वर आत्मा साहा, यह जरूरी साहा कि तेऊरी प्रार्थना करणे आले आत्मा होर सच्चाई का नमस्ते करे। 25बेटड़ी तेऊबै बोलू, हाऊं जाणा कि मसीहा बे ख्रिस्त बोला, ईहंणे आलअ साहा; जेबा सह ईलहअ , तेबा हामा बे सभे गला खोज़णी। 26यीशु तेसाबे बोलू, हाऊं जोह ताहबे बोलदअ, सह साहा।

चेले री बापसी

27ऐतरे में तेऊरे चेले आउए, होर परेशान होई कि सह बेटड़ी संघे गला लागदअ; तेबा भी कोही नांई पुछु, तूह कैह चाहंदा? या कीज़की तणी गला करदअ लागदअ? 28तेबा बेटड़ी आपणें घड़े छाड़ी करे नगरा बे नाठी, होर लोका बे बोलदी लागी, 29ईच्छा, एकु मणशा हेरा, जूणी सब कुछ जोह मांई करू माँह बे खोजू। कही यह तअ मसीह नांई आंधअ? 30तेबा त्या नगरा का निखल़ी करे तेऊ सेटा बे ईंहधे लागे। 31ऐता मेंझे तेऊरे चेले यीशु का यह बिनती करी, हे गुरु कुछ खाआ। 32पर तेऊ तयाबे बोलू, माँह सेटा खाणे बे ऐहडा खाणा साहा जासू तमें नांई ज़ाणदे। 33तेबा चेले आपु में बोलू, कैह कुणीए तेऊबै खाणे बे आणुदा? 34यीशुये त्याहबे बोलू, मेरा खाणा यह साहा कि आपणे भेज़णे आले री इच्छा रे साबे चलू होर तेऊरा काम पूरा करू। 35कैह तमे नांई बोलदे, लउणे बे मची चार महीने रहिदे? भालाआ, हाँऊ तमाबे बोला, आपणी आछी खोली करे खेचा फेरा बे नज़र देआ कि लउणे बे पाकी मुके दे आसा। 36लउणे आले मज़दूरी मांगा होर अनन्त जीबना बे फल़ बटोरा, कि बऊंणे आल़े होर लउणे आल़े दुहे मिली करे मज़ा करे। 37किबेकि अखे यह कहाबत ठीक बेशा, बऊंणे आलअ होर साहा होर काटणे आलअ होर। 38मांई तमें तेऊ खेचा लऊंदे भेजी जासू में तमें महनत नांई करी दूजे मेहनत करी होर तमें त्यारी मेहनता में भारी होई।

सामरी रा बुशाह करणा

सामरी रा बुशाह करणा। 39तेऊ नगरा रे बहू सामरिया तेसा बेटड़ी रे बोलने का यीशु पेंदे बुशाह करू; किबेकि तेसे यह गुआही दीनी, तेऊ सब कुछ खोजू कि जोह मांई करू, महा बे खोजू। 40ऐतकी तणी जेबा या सामरी तेऊ सेटा आऊए, तेवा तेसा का बिनती करदे लागे कि माहरे अखे रह। तेबा सह दुई धियाडी तणी तखे रहू। 41तेऊरे बचना रे कारण होर भी बहू लोके बुशाह करू। 42होर तेसा बेटड़ी बे बोलू, ऐबा हामें तेरे बोलने में ही बुशाह नांई करदे; किबेकि हामे ऐबा आपे भी शुणु होर जाणा कि यह सची संसारा रअ उद्धारकर्ता करन आल़ साहा। 43तेहुकी त्या दुई धियाड़ी बाद सह तखा का निखली करे गलीला बे नाठअ, 44किबेकि यीशु आपे ही गुआही दीनी कि भविष्यद्वक्ता आपणे देशा में आदर नांई पाऊंदअ। 45जेबा सह गलीला में आउअ, तेबा गलीली खुशी होई करे तेऊ संघे मिली; किबेकि जेतरे काम तेऊ यरूशलेम में ज़ाचा रे वक्ते करी, त्याहे त्या सबे हेरी, किबेकि त्या ज़ाचा में नाठदे थी।

राज कर्मचारी रअ शोहरू चांगअ करनअ

46तेबा सह गलीला रे काना में आउअ, ज़खे तेऊ पाणी दाखरस बणाऊ। तखे राजा रअ एक कर्मचारी थी, जासू कअ शोहरू कफरनहूम नगर में बीमार थी। 47सह यह शूणी करे कि यीशु यहूदी का गलीला में आउअद, तेऊ सेटा नाठअ होर बिनती करदअ लागअ कि चालअ मेरे शोहरू चांगे कर। किबेकि सह मरने आलअ थी। 48यीशु तेऊबै बोलू, जेबरे तणी तूह चिन्ह होर अदभुत काम नांई हेरलअ तेबरे तणी कधी भी बुशाह नांई करणा। 49राजा रे कर्मचारी तेऊबै बोलू, हे परमेश्वर, मेरे शोहरू रे मरने का पहिले चालअ। 50यीशु तेऊबै बोलू, नाह, तेरअ शोहरू जिऊंदअ साहा। तेऊ मणशे यीशु री बोली दी गलअ शूणी बुशाह करू होर नाठअ। 51सह बाता ही थी, कि तेऊर नोकर तेऊ होर बोलद लाग, तेरअ शोहरू जिऊंदअ साहा। 52तेऊ त्याका पुछु, केबरा ओरी ठीक हुँदअ लागअ? त्याहे तेऊबै बोलू, हिज़ सात घण्टे में तेऊरअ ज़र उतरु। 53तेबा बापू ज़ाणु कि यह तेहू वक्ते होऊ जासू वक्ते यीशु तेऊबै बोलू, तेरअ शोहरू जिऊंदअ साहा, होर तेऊ होर तेऊरे सारे घराने बुशाह करू। 54यह दूजा चिन्ह आला काम थी, जोह यीशु यहूदीया का इच्छी करे गलीला में रिहाऊ।

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

यूहन्ना 4: ISJNT

Highlight

ಶೇರ್

ಕಾಪಿ