यूहन्ना 18

यीशु ढाकणे बझ़यालणअं

(मत्ती 26.47-56; मरकुस 14.43-50; लूका 22.47-53)

1यीशु याह गला बोली करे आपणे चेले संघे किद्रोन रे नालाआ पार नाठअ। तखे एक बारी, जासू में सह आपु होर तेऊरे चेले नाठे। 2तेऊ ढाकण बझयाल़ण आलअ यहूदा भी तेसा जागहा जाणा थी, किबेकि यीशु आपणे चेले संघे तखे नाहे करा थी, 3तेबा यहूदा, फऊजी रअ एक दल होर प्रधान याजक होर फरीसी री तरफा का भेजी दे प्यादे सगे तखे पूजी त्याहे आपु सगे लालटिन, शोली हथियार आणी दे थी। 4तेबा यीशु, त्या सभी गला जोह तेऊ पैंदे इहंणे आली मुशिक्ला थी, जाणी करे, निकतअ होर तेऊ बोलू, कुंण लाऊ लोढ़णअं 5त्याहे तेऊबै उतर दिंना, यीशु नासरी। यीशु तयाबे बोलू, हाऊं साहा। तेऊ ढाकण बझ़यालणअं आलअ यहूदा भी त्याह संघे खडूदअ थी। 6तेऊरे यह बोलदे ही, हाऊं साहा, तेबा सह पीछे होई करे धरती में पडू। 7तेबा तेऊये त्याका भी पुछु, तमे कासु लोडे लागेदे। त्याह बोलू, यीशु नासरी। 8यीशु तयाबे बोलू, मांई तमाबे पहिले ही बोली छेकू कि हाऊं साहा, अगर महा लोडा साहा तेबा या नाहंण देआ। 9यह ऐतकी तणी होऊ कि यीशु रअ यह बचन पूरअ हो जोह तेऊ बोलू, जूणा तांई महा बे दिना त्या मेंज़ा का मांई एक भी नांई खोऊ। 10तेबा सिमोन पतरसे तुलार, जोह तेऊ सेटा थी, खींची होर महायाजका रअ नोकर ढाकु होर तेऊरअ बांअं कणेट काटु। तेऊ नोकरा रा ना मलखुस थी। 11तेबा यीशु पतरसा बे बोलू, आपणी तुलारा म्याना में डाह। जोह कटोरे बापू महा बे दिंनअं, कैह हाऊं तेऊ नांई झुटू?

हत्रा रे सामने यीशु

12तेबा सेना होर त्यारे सूबेदारे होर यहूदी रे प्यादे यीशु ढाकी करे बानूं, 13होर पहिले सह हन्ना सेटा बे नीऊं, किबेकी सह तेसा साला रे महायाजका रे काइफा रअ शहरअ थी। 14यह सह काइफा थी, जूणी यहूदी बे सलाह दिंनी दी थी, कि महारे लोका री तणी एकु मणशा रा मरना ठीक साहा।

पतरसा रा नांई करना

(मत्ती 26.69,70; मरकुस 14.66-68; लूका 22.52-57)

15सिमोन पतरस होर एक होर चेलअ भी यीशु रे पिछे नाठअ। यह चेलअ महायाजका रे जाणा पछेणा रअ थी, एतकि तणी सह यीशु संघे महायाजका रे खोले में नाठअ, 16पर पतरसे बाग़े दुआरा सेटा खड़अ रहू। तेबा दुज़अ चेलअ जोह महायाजका रअ जाणा पछेणा रअ थी, सह बाग़े आउअ होर चौकीदारा बे बोली करे पतरस मितरा बे नीऊं। 17तेसे बेटड़ी जोह दासी चौकीदार थी, पतरसा बे बोलू, कई तूह भी ऐऊरे चेले मेंज़ा का तअ नांई आंधअ? तेऊ बोलू, हाऊं नांई आंधअ। 18दास होर प्यादे; ठांडे रे बजा का खड़े होई करे आगि छिपते रही, होर पतरसे भी त्याह संघे खड़अ आगि छिपतअ रहू थी।

महायाजका रे सामने यीशु री पूछताछ

(मत्ती 26.59-66; मरकुस 14.55-64; लूका 22.66-71)

19तेबा महायाजक यीशु रे चेले रे बारे में होर तेऊरे उपदेशा रे बारे में पूछताछ करी। 20यीशु तेऊबै उतर दिना, मांई संसार संघे खुली करे गला करी; मांई प्रार्थना घरा होर देहुरे में, ज़खे सभे यहूदी कठे हूँदा, सदा उपदेश करू होर गुप्ता में किछे भी नांई बोलू। 21तूह महा का किबे पूछा? शूणने आले का पूछ कि मांई तयाबे कैह बोलू। हेर, त्या जाणा कि मांई कैह-कैह बोलू। 22जेबा तेऊ यह बोलू, तेबा सेबक मेज़ा का एकु जोह नेड खडू दअ थी, यीशु बे थप्पड़ बाही करे बोलू, कैह तूह महायाजका बे ऐऊ साबे उतर दिंदा? 23यीशु तेऊबै उतर दिना, अगर मांई बुरा बोलू, तेबा तेसा बुराई री गुआही देह; पर जेबा भला बोलू, तेबा महा बे किब बाहंदा? 24हन्ना सह बानूदअ ही काइफा महायाजका सेटा बे भेजु।

पतरसा रा नांई करणा

(मत्ती 26.71-75; मरकुस 14.69-72; लूका 22.58-62)

25सिमोन पतरस खड़े होई करे आगि छिपतअ थी। तेबा त्याह तेऊबै बोलू, कई तूह भी तेऊरे चेले मेंज़ा का तअ नांई? तेऊ नांई करी करे बोलू, हाऊं नांई आंधअ। 26महायाजका रे नोकरा मेंज़ा का एक, जोह तेऊरे कटुम्बा मेंज़ा का थी, जासू कअ कणेट पतरसे काटु थी, तेऊ बोलू, कैह मांई तूह तेऊ संघे बारी में नांई भाल़ु? 27पतरसे भी नांई करू, होर तेभरी मुर्ग बाठअ।

पिलातुसा रे सामने यीशु

(मत्ती 27.1,2,11-14; मरकुस 15.1-5; लूका 23.1-5)

28तेबा त्याह यीशु काइफा सेटा का किले बे नीऊं, होर दोतका रा वक्त थी, पर त्या आपु किले मितरा बे नांई नाठे कि अशुद्ध नांई होए कि फसहा खाई सके। 29तेबा पिलातुस त्या सेटा बे बागे आउअ होर बोलू, तमे ऐऊ मणशा बे कासु गला रा आरोप लाऊंदा? 30त्याहे तेऊबै उतर दिंना, अगर कुकर्मी नांई हूँदअ तेबा हामा यह तेरे हाथे नांई दिणअं। 31पिलातुसे तयाबे बोलू, तमे ही ऐऊ नी करे आपणी व्यवस्था रे साबे तेऊरा न्याय करा। यहूदी तेऊबै बोलू, हामा अधिकार नांई कि कास्के प्राण लए। 32यह ऐतकी तणी होऊ कि यीशु री गल पूरी हो जोह तेऊ यह रीहाउणए बे बोली थी, कि तेऊरी मउत केहडी हूँणी। 33तेबा पिलातुस भी किले मितरा बे नाठअ, होर यीशु शादी करे तेऊका पुछू, कैह तूह यहूदी रअ राजा साहा? 34यीशु उतर दिंना, कैह तूह याह गला आपणी तरफा का बोला या होरी मेरे बारे में ताहबे बोलू दा? 35पिलातुसे उतर दिंना, कैह हाऊं यहूदी साहा? तेरी ही जाति होर प्रधान याजक तूह मेरे हाथे सौंपु दअ। तांई कैह करू। 36यीशु उतर दिंना, मेरा राज्य ऐऊ संसारा रा नांई आंधा; अगर मेरा राज्य संसारा रे हूँदअ, तेबा मेरे सेबक लड़दे कि हाऊं यहूदी रे हाथे नांई सौंपते पर मेरा राज़ अखे नांई आंधा? 37पिलातुस तेऊबै बोलू, तेबा कैह तूह राजा साहा? यीशु उतर दिंना, तूह बोला कि हाऊं राजा साहा। मांई ऐतकी तणी ज़न्म लउ होर ऐतकी तणी संसारा में आउअ कि सत्य री गुआही दे। जोह कोई सत्य रे साहा, सह मेरअ शब्द शूणा। 38पिलातुसे तेऊबै बोलू, सत्य कैह साहा? होर एडा बोली करे सह तेऊकी भी यहूदी फेरा वै नाठअ होर तेऊ बोलू, हांउ तो एउ में किछे भी दोष नांई पाऊंदा।

मृत्यु दण्डा री आज्ञा

(मत्ती 27.15-31; मरकुस 15.6-20; लूका 23.13-25)

39यह बोली करे भी सह यहूदी सेटा बे आउअ होर तेऊ बोलू, महा तअ तेऊमें किछे दोष नांई लागा। पर थारी यह रीति साहा कि हाऊं फसह में थारी तणी एकु मणशा छाडू। कैह तमे चाहंदा कि हाऊं थारी तणी यहूदी रे राजा छाडू? 40तेबा त्याह भी जोरे करे बोलू, ऐऊ नांई, पर महारी तणी बरअब्बा छाड़े। होर बरअब्बा चोर थी।

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

यूहन्ना 18: ISJNT

Highlight

ಶೇರ್

ಕಾಪಿ