Luk 1
1
Kɛbɨnɛ kɛtɨbi
1Ayi Tiɔfilus: Bani ecii babum kɔrɛ kɔsɛ birɛ mbi bɛjaga na rɛkaba reyua. 2Barɛ birɛ mbi bani mbɛ barakafa bɨnɛ na kɛbɨnɛ kɛtɨbi bafɛ mɨnɛ bakanɛ mbu bɔjaga. 3Ita Tiɔfilus, nŋua ɛkpaju, nkpɛbɛnɛ birɛ mbi oyiyioyiyi, nayɛ nsi etima emia kɔrɛ nkanɛ wu cɛrɛrɛ mbu bɔjaga, na rejubi rɛyɛ, Tiɔfilus. 4Nsi mbu nsi na esikafa agbɨra kpikpɛ abaŋa mbu awufugɛ.
Onyiɛ-rotuma Ɛbrɔkpabi ɔkanɛ bɔma Jɔn oru-raku
5Kegbu nci Hɛrɔd ɔra ɔkɨm rɔrɛ Judia, ɛfɔnɔ ɔjɔmɔ-kɔya ŋɔ oyinɛ ya Sɛkaria ŋɔ ɔra na ogbigbɛ bajɔmɔ-kɔya ŋɔ osi na kɛtɨbi Abija. Ɔwa ɔmɔ Elisabɛd osi na kɛtɨbi Ɛrɔn. 6Abɛ iti ifa bara brika bani, mɨnɛ bayɔgɛ Ibina Ɛbrɔkpabi. 7Bakifɔnɔ bɔ ndi Elisabɛd okuma, abɛ iti ifa batɨm kuguru.
8Reyi dinɛ Sɛkaria na bajɔmɔ-kɔya mbɛ kɛbari kɛmɔ barabasiŋɛ rɛsɛ rika ɛtɔ-Ɛbrɔkpabi, ndi ɛra reyi rɛmɔ kɔjɔm-kɔya. 9Kɛmanci rɛmaɛ bajɔmɔ-kɔya rɛyɔmɛ rɛjɛ, bara mɔ basɛ ndi batuba bomu agɨri ya ɔnɔ rika eku ɛtɔ- Ɛbrɔkpabi reyi kandi ɔkakɨm mamba. Kafaɛ ɔnɔ rika ɛtɔ-Ɛbrɔkpabi, 10ndi kegbu kebigɛ nci bakɔkɨm mamba, bani mbɛ bawu njɔm kɔrɔbi babɨbi na rofia barɔbɔ njɔm.
11Onyiɛ-rotuma Ɛbrɔkpabi ɔmɨlɛnɛ ɔkɨmanɛ Sɛkaria, ɔbari mbari koruma kerigɛ, kwa ɔkɨma mamba. 12Ndi Sɛkaria ɔfɛ onyiɛ-rotuma Ɛbrɔkpabi, ɔtɨmɛrɛ mɨnɛ bofu bosi mɔ. 13Nsu onyiɛ-rotuma Ɛbrɔkpabi ɔkanɛ mɔ ya, “Kafɔnɔ bofu, Sɛkaria! Ɛbrɔkpabi efugɛ njɔm ɔyɛ. Ɔwa ɔyɛ Elisabɛd kuɔma wu wɔ orumanɛ, mɨnɛ akɔkotu mɔ rirɨna ya Jɔn. 14Bɔma bɔmɔ kubɔjɛ wu na bani ecii kɔrɔmetima. 15Wɔ ɔyɛ ŋɔ kuotumɛ brika oni na jɛnɛ Ɛbrɔkpabi. Bɨnɛ reyi ndi bakɔma mɔ, ɔkaŋɔ kɛlɨŋa mantugi tumcinɛ, tum mmɛ mantigiritigiri, ndi nsɨm Keriragi-kɛkɔ kuotumɛ na amɔ bɨnɛ na kegbu nci bakɔma mɔ. 16Amɔ kuosi bani ecii na Isɨrɛl baŋbɨnɛnɛ bakpɔgɛ Ɔkɨm-kaju Ɛbrɔkpabi ɛbɛ. 17Kuɔbɛ Jisɔs rɔsɔ, mɨnɛ kuɔbɨnɛ Ɛlaija na kɛkɔ mɨnɛ na nsɨm. Kuocimɛ botima britɛ baŋbɨnɛnɛ bakɔnanɛ na bɔbabɛ. Mɨnɛ bani mbɛ babɔbajigɛ Ɛbrɔkpabi babɨnɛ kɔfɔdkanɛ rokpin rɔbɛ. Nanyɛnɛ Jɔn okotubɛrɛ bani ɔyɔgɛ Jisɔs.
18Sɛkaria ɔsɨna onyiɛ-rotuma Ɛbrɔkpabi ya, “Nkosi nyan ŋbɨra mɔ gbambu kubɔjaga? Ntɨm, ɔwa omia mɨnɛ ɔtɨm.”
19Onyiɛ-rotuma Ɛbrɔkpabi ɔfɛlɛ mɔ ramu ya, “Ami Gebɨrɛl, ŋɔ mbara na rɔsɔ Ɛbrɔkpabi, etigɛ mi ya nwukanɛ wu brika rotuma ndu. 20Nsu ndi abɔakinyiɛ na rotuma ndu, akocimɛnɛ nsɨl ta birɛmbi fɛb bɛjaga na kegbunci ɛyɔmɛ ɛjɛ.”
21Bani mbɛ babɨbi na rofia bafumanɛ Sɛkaria babɨnɛ kodinɛ botima mbubosi ɔgarɛ osu rika eku ɛtɔ-Ɛbrɔkpabi. 22Ndi ɔjaga, ɔra nsɨl, bagbɨra mɨnɛ ya ɔfɛ gba mbubocia mɔ rika eku ɛtɔ-Ɛbrɔkpabi. Okiyɛ ɔsɛremu, ekicia ɔwaga bɛ ibɔibɔ.
23Ndi kegbu Sɛkaria nci kɔya kojijɔmɔ na ɛtɔ-Ɛbrɔkpabi kɛyɛ, oruŋɛ ɔgbaŋɛ. 24Kegbu kekifɨranɛ ɔwa ɔmɔ Elisabɛd ɔsɔgɛ esukpa mɨnɛ okijaga osugɛ ɛtɔ rafɛ ratan. 25Ɔkanɛ ɛkpaju ɛmɔ ya, “Kunku na kekurɛ-kɛtɨbi Ɛbrɔkpabi ɛnyaŋɛ mi,” “Ɛsɛ mi na rɛsɛgɛlɛ bani.”
Bakanɛ bɔma Jisɔs
26Ndi esukpa Elisabɛd ɛra rafɛ ratabarataa, Ɛbrɔkpabi etigɛ onyiɛ-rotuma ɔmɔ Gebɨrɛl oruŋɛ Nasarɛd, rɔrɛ ndu rɔra na Galili. 27Etigɛ mɔ rotuma ɛyɛ wɔ owura ŋɔ ɔbɔokigigbɨra orumanɛ ŋɔ oyinɛ ya Meri, ŋɔ Josɛb ŋɔ osi na kɛtɨbi Ɔkɨm Debid otimanɛ kɔsa. 28Onyiɛ-rotuma Ɛbrɔkpabi oruŋɛ ɔkakɨmanɛ Meri, ɔyɛ mɔ, mɨnɛ ɔkanɛ mɔ ya, “Reŋunɛ retumɛ na awu! Ɛbrɔkpabi ɛra na awu mɨnɛ ɛjɛ wu ɔkɨmkɨm reŋunɛ!”
29Meri ɔtɨmɛrɛ na ramu ndɛ onyiɛ-rotuma Ɛbrɔkpabi ɔkanɛ mɔ mɨnɛ odinɛ etima na mbu ramu ndɛ rajaga. 30Onyiɛ-rotuma Ɛbrɔkpabi ɔkanɛ yɛ Meri ya, “Kafɔnɔ bofu, fɛŋɛ ajugi Ɛbrɔkpabi na kɛrɔ. 31Kuasɔgɛ esukpa ama wɔ orumanɛ, mɨnɛ kuatu mɔ rirɨna ya Jisɔs. 32Kuɔjaga robin mɨnɛ kubajia mɔ ya Wɔ Ɛbrɔkpabi nji ɛfa eciacia. Ɔkɨm-kaju Ɛbrɔkpabi kuesi mɔ ɔkɨm, aya oni kɛtɨbi kɛmɔ Debid ɔra; 33Mɨnɛ kuɔjaga robin na bani bamɔ Jekɔb najunaju, rɛkɨm rɛmɔ rɛfɔnɔ itɨm.”
34Meri ɔsɨna onyiɛ-rotuma Ɛbrɔkpabi ya, “Mbu bokosi nyan bɔjaga bɔjɛ mi? Ndi nkigigbɨra orumanɛ?”
35Onyiɛ-rotuma Ɛbrɔkpabi ɔfɛlɛ mɔ ramu ya, “Keriragi-kɛkɔ kukeriɛ kɛkɨmanɛ wu, mɨnɛ nsɨm Ɛbrɔkpabi kuotumɛ na awu. Wɔ ŋɔ akɔma kuotumɛ keriragi wɔ mɨnɛ kubajia mɔ ya Wɔ Ɛbrɔkpabi. 36Gbɨra mɨnɛ ya oni kɛtɨbi kɛyɛ, Elisabɛd, ŋɔ batuŋɛ bokuma, na bɔtɨma bɔmɔ ɔra kunku na esukpa rafɛ ratabarataa. 37Ndi gbabɔra mbu Ɛbrɔkpabi ɛbɔ ɛyɛŋɛ kosi.”
38Meri ya, “Ami ori Ɛbrɔkpabi, yɔgɛ mbu atanɛ abaŋa mi botumɛ kanya.” Mɨnɛ onyiɛ-rotuma Ɛbrɔkpabi osugɛ mɔ oruŋɛ.
Meri orua iriba ɛyɛ Elisabɛd
39Egbigbɨra kegbu Meri otubɛrɛnɛ ɛkpaju oruŋɛ fɨrifɨri na rɔrɛ ndu rɔra na rokuku na rɔrɛ Judia. 40Ɔkanɔ na ɛtɔ Sɛkaria ɔyɛ Elisabɛd. 41Ndi Elisabɛd ofugɛ rɛyɛ Meri, wɔ ŋɔ ɔra mɔ na rejua ɔnyɨŋanɛ, mɨnɛ Keriragi-kɛkɔ kɛnɔ mɔ na ɛkpaju. 42Elisabɛd ɔtanɛ na remu ndi retigiritigiri ɔjɛ Meri: “Reŋunɛ ndi Ɛbrɔkpabi ɛjɛ wu rɛfa reci ndi babanɛ fɛb! Mɨnɛ eŋunɛ wɔ ŋɔ akɔma. 43Bu na ɔkɨmkɨm gbambu bɔjaga bɔjɛ mi, ya minka Ɔkɔ-rokuku omia owu iriba ɛyɛ emia? 44Ɔmɛ ndi nfugɛ rɛyɛ rɛyɛ, wɔ ŋɔ ɔra mi rika rejua ɔnyɨŋanɛ na kɔrɔmetima. 45Ɛbrɔkpabi ɛjɛ wu reŋunɛ ndi afɔnɔ renyiɛ ya aji kuesi nansɛrɛ ɛkanɛ.
Ibɨna Meri nji rɛka
46Meri ya:
“Na etima emia fɛb nka Ɛbrɔkpabi,
47mɨnɛ kɛkɔ kemia kɛfɔn kɔrɔmetima na Ɛbrɔkpabi ɔnyaŋɛ mi;
48Ekijiɛ mi,
ori ɔmɔ ŋɔ rejubi.
Bɨnɛ kunku aruŋɛ rɔsɔ bani kubajia mi ya reŋunɛ,
49ndi Ɛbrɔkpabi nji eciacia esi brika birɛ ɛjɛ mi,
mɨnɛ rirɨna rimɔ riragaraga.
50Na kɛsɛ nancinɛ,
ɛkɔgɛ bani mbɛ bajigɛ ji erun.
51Ɛbrɔkpabi ɛbɛ nsɨm ɔmɔ
ɛnyan bani ɛnyaŋɛ na retimanɛ rɛbɛ.
52Ɛjam bakɨm mbɛ bafɔnɔ nsɨm na mankɔbi babɛ,
mɨnɛ ebirɛ bani mbɛ batuɛnɛ botu.
53Ɛjɛ bani mbɛ bara na ŋbɔ brika birɛ,
mɨnɛ ekpu ɔkɔogbuga ibɔibin.
54Ɛyɔgɛ ɔŋɔŋɔ ŋɔ ɛsa na britɛ bayua,
mɨnɛ ewu kɔnyaŋɛ ori ɔmɔ Isɨrɛl.
55Ejinɛnɛ kɔkɔgɛ Abraham erun
mɨnɛ na bani kɛtɨbi bamɔ fɛb najunaju!”
56Meri otumɛ na Elisabɛd rafɛ rataa nayɛ ɔŋbɨnɛnɛ ɔgbaŋɛ.
Bɔma Jɔn oru-raku
57Ndi kegbu bɔma kebigɛ, Elisabɛd ɔma wɔ orumanɛ. 58Bani mbɛ batumɛ bakunɛ mɔ na bani kɛtɨbi bamɔ bafugɛ kɛmanci Ɔkɨm-kaju ɔkɔgɛ mɔ boyi, abɛ mɨnɛ bafɔnɔ kɔrɔmetima na amɔ.
59Ndi wɔ ɔyɔmɛ rɛfɨn dinɛ, bawukosi mɔ bɔyɛmɛ aya Ibina Mosis ikanɛ. Batimanɛ kotumɔ rirɨna Sɛkaria, rirɨna mintɛ ɔmɔ. 60Nsu minka ya, kanyanɛ, ya, “Rirɨna rimɔ riyinɛ ya Jɔn.”
61Bani mbɛ barakafa banyara, “Oni ɔra na kɛtɨbi kenua ŋɔ owunɔŋɔ yinɛ rirɨna kandi!”
62Batuba yɛ nsɨbiri bajɛ mintɛ, basɨna mɔ rirɨna ndi oduga ya wɔ oyinɛ. 63Sɛkaria ɔsɨna ya bajɛ mɔ kɛkpa manrɛ mɨnɛ ɔrɛ ya, “Rirɨna rimɔ riyinɛ ya Jɔn. “Ɛkpaju ɛyɛbɛ fɛb! 64Kafa ɔmɛ Sɛkaria ɔbɨnɛ kɔtanɛ mɨnɛ ɔkaŋɛ Ɛbrɔkpabi. 65Bofu bosi bani fɛb mbɛ batumɛ bakunɛ mɔ na mbubɔjaga, mɨnɛ kɔtanɛ nku kɔbaŋa birɛmbi kokudkanɛ rɔrɛ Judia ndu rɔra birebirɛ rokuku. 66Oni naŋɔnɛ ŋɔ ofugɛ kɔtanɛ nku ɛkpaju ɛbamɔ, botima bɔbɨnɛ kɔcɛŋɛ bɛ ɛdɔ oni ŋɔ wɔ ŋɔ okotumɛ ara ɔtɨm, ndi ɛra jaɛ ya nsɨm Ɛbrɔkpabi ɔra na amɔ.
Sɛkaria ɔkanɛ mbu bɔkɔjagi
67Keriragi-Kɛkɔ keriɛ kɛnɔ Sɛkaria, mɨnɛ ɔbɨnɛ kɔkanɛ rotuma Ɛbrɔkpabi:
68“Yɔgɛ yu rɛka Ɔkɨm-kaju, Ɛbrɔkpabi Isɨrɛl!
Ewu kɔnyaŋɛ banibamɔ mɨnɛ ɛsɛbɛ na botiga.
69Ɛjɛ yu ɔkɨmkɨm ɔnyaŋɛ yu,
osi na kɛtɨbi ori ɔmɔ Debid,
70nansɛrɛ ɔsa ɔŋɔŋɔ na keriragi bakanɛ-rotuma bamɔ reyikandi
71ya aji kuɛnyaŋɛ yu na ibɔ bani mbɛ rekpugabɛ,
mɨnɛ na ibɔ oni naŋɔnɛ ŋɔ ɔbɔokiduga yu.
72Ya aji kuɛkɔgɛ britɛ bayua erun
mɨnɛ ɛyɔgɛ renyiɛ ndi aji ɛfɔnɔ na abɛ na rɛŋɨba.
73Renyiɛ ndi ɛsa ɔŋɔŋɔ na mintɛ oyua Abraham:
74ya aji kuɛsɛ yu na ibɔ bani ɛban bayua
mɨnɛ esugɛ yu retuga ji rɛkafɔnɔ bofu,
75na esikafa retumɛ brika bani minɛ rɛbara kɔŋ na rɔsɔrɔmɔ na rayi rokpin rayua sɛnsɛn.
76Awu, wɔ omia, kubajia wu ya ɔkanɛ-rotuma Ɛbrɔkpabi nji eciacia.
Kuabɛ Ɔkɔ-rokuku rɔsɔ, akayuɛ ɛyɔ ɛmɔ ayɔgɛ mɔ.
77Kuakanɛ bani bamɔ ya,
kubasɔrɔ ara bagbɛ basugɛ bɛ na bobi bɔbɛ.
78Rɔraganɛ na koyibi etima Ɛbrɔkpabi
kuroyuma rɔjɛ yu aya royi ndu rɔjaga na kaju.
79Mɨnɛ na ayu mbɛ rɛra na kerurɔbɔ,
rɛjaɛ ndi kureyuma,
kɔbabɛrɛ bɔkpaga boyua na ɛyɔreŋunɛ.”
80Jɔn ɔtɨma na ɛkpaju mɨnɛ na kɛkɔ. Otumɛ na kwancɛ bani ecii babɔbatumɛ ta reyindi ɔmɨlɛnɛ na eruma rofia na jɛnɛ bani Isɨrɛl.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Luk 1: Olulumo-Ikom
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
©️2022 Luke Initiative for Scripture Translation
