Lukas 23

Inllaren e Jesuse kai o Pilato

Mt 27.1-2,11-14; Mk 15.1-5; Jn 18.28-38

1Sa ustile, ta inllarde e Jesuse kai o Pilato. 2Angla o Pilato thode te phenen:

Dikhlam gale llene kana divola e llenen katar amari phuv. Ta phenel te na da love kai o kralio, ta i phenel kai vou si o Mesias, o Charo.

3O Pilato puchla le:

¿San tu o Charo e Judionengo?

Tu phendanle.

4Ondaka o Pilato phenda e gazdenge katar e zakonura ta e llenenge:

Ni malavav niso ande gava lleno te dosarav le.

5A von ios mai but orbe dena ta phenena:

Pe sikadimaia divol sa e foro. Cherda le ande Galilea, ta akana cherel le kate, ande Judea.

Inllaren e Jesuse kai o Erodes

6Kana asunda gua, o Pilato puchla dal gua manus saia katar e Galilea. 7Ta kana asunda kai o Jesus avela kotar katar gazdarila o Erodes, bichalda le lete, soke o Erodes ande gola llivesa saia ando Jerusalem. 8Kana dikhla e Jesuse, o Erodes veselisailo but, soke cherela but vreme kai mangela te dikhel le, soke asundaia kai den leke orbe ta mangela te dikhel sar cherel varesavi bari ezgoda Devlikani. 9Puchla le but ezgode a vou ni phenda leke niso. 10Kote saia i o gazda e poponengo ta e gazda e zakonoke, ta dosarena le but. 11Ondaka o Erodes ta leke boñikura avile lea bilache, ta te maren letar espurnia thode pe lete patave barikane, sargo charoke. Mapalal o Erodes bichalda le pale kai o Pilato. 12Gua llive o Pilato ta o Erodes cherdile amal, soke omanglal jaleape.

E kris phenel kai o Jesus si te merel

Mt 27.15-26; Mk 15.6-15; Jn 18.39—19.16

13O Pilato chidia e gazden katar e popura, e sudonen ta e foro, 14ta phenda lenge:

Tumen anden gale llene, ta phenen kai divol e foro, a me andem le angla tumende ta ni maladem le dosalo ande ni iek ezgoda kai phenen letar. 15Ta ni o Erodes, soke irisarda le amende. Ni cherda niso te mundaren le. 16Ka phenav te chalaven le ta mapalal ka mukliarav le. 17O Pilato phenda gua, soke pe suako Paskua saia te mukliarel iekhe phangle.

18A sa e llene urkisarde:

¡Nikama gole! ¡Mukliaren amenge e Barrabase!

19Gale Barrabase phanglea le soke mardaiape ando foro e llenenchar kai gazdarina e foro, ta soke mundardaia iekhe llene 20O Pilato, mangela te mukliarel e Jesuse, ta dia lenchar orba pale. 21A von urkisarde ios mai zurale:

¡Krustosaren le! ¡Krustosaren le!

22Pale e trito drom o Pilato phenda lenge:

¿Savo bilachipe cherda? Me ni dikhav niso bilacho ande gava lleno te sai avel mundardo. Ka phenav te chalaven le ta mapalal ka mukliarav le.

23A von pale urkina, ta mangena te krustosaren le, ta pe gachin urkisarde kai cherde pe piro. 24O Pilato mangla te cherel so mangle letar. 25Mukliarda gole llene kai von esvirisarde, gua kai saia ande rubie soke mardaiape ta mundarda, ta mukla e llenen te cheren so von mangena e Jesusea.

Krustosaren e Jesuse

Mt 27.32-44; Mk 15.21-32; Jn 19.17-27

26Kana inllarde e Jesuse te krustosaren le, istarde iekhe llene kai saia katar o foro Sirene kai ikhardola Simon, kai avela katar o vos, ta cherde te inllarel o krusto palal pala o Jesus.

27But llene ta but diskinie llana pala le, rovena ta urkina zalbatar pala so vou nakhela. 28A o Jesus dikhla pe lende ta phenda lenge:

Diskinie katar o Jerusalem, na roven pala ma, roven isto pala tumende ta pala tumare minone. 29Soke ka aven llivesa kai ka phendolpe:

Blagosime e diskinie kai nasti avel len minone, gola kai ni biande ni gola kai ni bariarde minonen. 30Ondaka e llene ka phenen e burdonenge:#Os 10.8; Apo 6.16.

¡Peren upral pe amende ta guruven amen! 31Soke te cheren gava e zelene kastea, ¿So ni ka cheren e suke kastea?

32Ta i inllarena duie bilache llenen, te krustosaren len e Jesusea. 33Kana avile kote kai ikhardol o than e kokalengo, krustosarde e Jesuse ta duie bilache llenen, iek pe leki chachi ta ogole pe leko estingo. 34O Jesus phenda:#Sal 22.18.

Dade, prostisar len soke ni llanen so cheren.

Ta e boñikura fulade maskar pete leke patave, ta chelenape te dikhen ko ka achel leke patavenchar. 35E llene kai sea kote dikhena peke. Ta llik e sudura marena letar espurnia, ta phenena:

Braduisarda averen, te braduil isto vou pe akana, te si chachimaia o Mesias e Devleko esvirime.

36I e boñikura marena espurnia katar o Jesus. Avena pasa le ta dena le te piel mol cherki, 37ta phenena leke:

¡Te san tu o Charo e Judionengo, braduisar tu tut!

38Ta upral po krusto saia pisime: Gava si o Charo e Judionengo.

39Iek katar e dui llene bilache kai saia krustome kusela le ta phenela:

¡Te san tu o Mesias, braduisar tu tut ta braduisar i amen!

40A o gua lleno dia pe lete, ta phenda leke:

¿Ni dara e Devletar, tu kai san isto ande goia patnia? 41Amen nakha gaia duk, soke chachimaia pochina so cherdam, a gava lleno ni cherda nisavo bilachipe.

42Ta phenda:

Jesus, de tut golli mandar kana ka gazdari ande chi charoina.

43O Jesus phenda leke:

Chachimaia phenav chuke kai allive ka ave manchar ando paraiso.

O meripe e Jesuseko

Mt 27.45-56; Mk 15.33-41; Jn 19.28-30

44Kana nakhle e desudui e lliveseke llik kai e trin e lliveseke, sa e phuv achili ando truniariko. 45O kham ni kletosarda, ta o chiti kai si ando cher e Devleko chindilo po dopas.#Ek 26.31-33; 2 Kr 3.14. 46O Jesus urkisarda zurale ta phenda:#Sal 31.5; Ech 7.59.

¡Dade, ande che va mukau mo duo!

Ta kana phenda gua, mulo.

47Kana o boñiko rromano dikhla so avilape, blagosisarda e Devle, ta phenda:

Chachimaia, gava manus saia chacho.

48Sa o sueto kai saia kote kai dikhle so avilape, lleletar kotar ta chalavenape ande po kolin. 49Sa e llene kai pinllarena e Jesuse sea dur letar, ta i e diskinie kai llelea pala le katar e Galilea sea kote ta dikhena.#Lk 8.2-3.

Prajon e Jesuse

Mt 27.57-61; Mk 15.42-47; Jn 19.38-42

50Saia iek manus lacho ta chacho kai ikhardola Jose, vou saia katar e Arimatea, iek foro katar e Judea kai i vou saia iek lleno katar e kris e judionengi. 51Gava Jose, adurichare la e charoina e Devleki ta ni saia leke drago so cherda lengi kris, 52llelo kai o Pilato ta mangla letar e esnaga e Jesuseki. 53Kana fuliarda le katar o krusto, ulisarda le ande iek chiti ta thoda le ande iek limori kai saia anado ande iek pechina, ande gua limori nikada ni prajosardea nika. 54Gua llive lacharena sa soke ia dena ando sabado. 55E diskinie kai llelea pasa o Jesus katar e Galilea, llele te dikhen o limori, ta dikhle sar thode leki esnaga. 56Kana irisaile chere, cherde merisura. E diskinie ni radisarde o llive sabado, gia sar phenel o zakono.#Ek 20.10; Dt 5.14.

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

Lukas 23: BACHRO

Highlight

ಶೇರ್

ಕಾಪಿ