Genesis 8
8
1Dai tomaxi tïbïpi kaatï go sudagi Diuxi bïïxkïrï apia tïtïitoi go kïïrhi Noé ïmadï go buxtaki dai go oidigana buxtaki dai kïkïixi ïmadï ujurugi ix makïdï barko ïraan darajatadai. Dai otoi ïgai ïbïrhi bai ïgaikïdï tïbañimi go sudagi. 2Dai gï kukupa oidigi ïpamu xajadïrï bhïbhïtorhimi sudagi dai go tïbagi ïpï kukupa ïpamu xako kukupiokiñitadai dai ka dukio oidigi. 3Bhodïrï ïmo ciento daan gokobhai dan bhaibuxtama tasai mos tïbañimi go sudagi kïïdukai. 4Dai bhodïrï taam masadai abhiadïrï ix dibia go duki sai ïmapïkïrï xako Ararát tïgidu oidigi sai ami tubidaki dama bii go barko. 5Dai bhodïrï ïpï baika masadaikïdï ka bamioma umimi go sudagi kia dai ka maaxi guka kukugadï tutubidaki.
6Bhodïrï abhiadïrï ïpï gokobhai tasaikïdï kupioko Noé bentanagadï go barko. 7Dai Noé busaitu ïmo kokoñi ix makïdï aipako dadaïyitadai nïnïraitai asta xïxkadï ka gakiagi oidigi ïpamu. 8Kia aipako dadaïyitadai go kokoñi bai go Noé busaitu ïmo tugu dai nïida aagai sa bhai ka utadai go sudagi. 9Dïï go tugu mai tïï xako gï ibhïxtagi mosïï gïïpikatai sudagi kia. Dai ïpamu dibia go tugu dai Noé bhïiyi dai ïpamu báí barko ïrana.
10Bhodïrï ïpï ïmo ïkarhikïdï ïpamu busaitu ïgai go tugu. 11Dai ka didiaymi oidigi xi ïpamu dibia go tugu dai kixatugai ïmo ipoñigadï uxi. Podukai máí Noé ix ka gakikatadai oidigi. 12Bhodïrï ïpï ïmo ïkarhikïdï ïpamu busaitu ïgai go tugu dai ka mai dibia ïgai ïpamu.
13Noé ka biakatadai naadan ciento dan ïmo umigi. Dai bhodïrï mos baakïkai utu umigi sai ka utadai go sudagi. Dai Noé maigo dáí damanagadï go barko dai aipako nïnïaba dai tïï oidigi ix ka dïïbhataimi. 14Dai bhodïrï ïpï goka masadaikïdï ka kïïgakïrï gakikami bii oidigi.
15-16Bhodïrï Diuxi potïtïdai go Noé,
—Tïbañiñi barkoañdïrï ïmadï gï aduñi dai ïmadï gï maamara ïmadï gï kaakaxdïïdï— itïtïdai. 17—Dai bubaidañi bïïxi go ujurugi ïmadï kiiyïrï buxtaki dai oidigan buxtaki dai kïkïixi dai aarhi kïkïixi bai muidana ïgai ïpamu aipakoga— itïtïdai.
18Dai bhodïrï tïbai Noé barkoañdïrï ïmadï aduñdï dai ïmadï maamaradï dai kaakaxdïïdï. 19Dai go kiiyïrï buxtaki dai oidigana buxtaki dai kïkïixi dai aarhi kïkïixi ïmadï ujurugi bïï tïapai ïpï dai aipako iji chïchïki go ix makïdï ïr ïmo aadunumï. 20Bhodïrï Noé kïi ïmo daxdakarui xadutudaragai bïïtarï Gïr Nukadakami. Dai bïïxi go ix makïdï gï kuayi buxtaki ïmadï ujurugi bui ïgai ïïmoko dai mua dai daxdakarui dama tua dai mïïji. Bïï sudakami tukugadï mïïji ïgai dai podukai xadutudai Gïr Nukadakami.
21Dai ojoidan ubaitu Diuxi go xadutudaragai daidi itïi,
—Xibi bhaitiakoga ka mai ïpamu xia duadamu aanï oidigi. Kïï maatï aanï odami ix arhidukatai abhiadïrï soimaaxi tïgibodadï. Dïï tomax dukai ka mai ïpamu xia duadamu aanï podukai odami, tomarhi kiiyïrï buxtaki, tomarhi oidigana buxtaki, tomarhi kïkïixi, tomarhi go aarhi kïkïixi, tomarhi ujurugi. 22Ïïgi xïï tïbïpi kïkibagi oidigi kia oidaka agai ïxidagai ïmadï yoobaragai dai oidaka agai ïpidagai ïmadï toiñdagai dai toomoko ïmadï tïdaako dai tasai ïmadï tukagi asta xuduku ka ugitiagi oidigi— itïi Gïr Nukadakami.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Genesis 8: NTP
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Copyright: Ethnos360 Sanford, Florida