Genesis 1
1
Idi ojai aagai ix dukatai kïkiba bïïxi aïkatai ix tumaxi oidaga
1Tukamïrï idui Diuxi go tïbagi ïmadï oidigi. 2Aidïpïrï oropiga maaxkatadai oidigi dai mai maatiga maaxkana ix tumaxika agai kia dai tukamugakana. Dai aidï sudagi dama sagiïkatadai ïgai ix makïdï Diuxi Ibhïadï tïgidu.
3Daidi go tukamidïrï tasïrï saidi itïi Diuxi,
—Gï aagai ix oidakana kudagi— itïi ïgai.
Dai ka oidatu kudagi potïkai ïgai.
4Dai bhai gï ïrhidi Diuxi nïiditai go kudagi ix kïïgadu. Dai bhodïrï darai ïgai xïï tïbïpi tukamugakagi oidigi dai xïï tïbïpi ïpamu mamaaxaradagi gobai. 5Dai tïïtï ïgai go kudagi tasai dai gobai ix makïdï mai maaxkatadai tïïtï ïgai tukagi. Gobai idui Diuxi go tukamidïrï tasïrï dai podukai pogïdui ïmo tasai abhiadïrï xi gï aaga idui ïgai oidigi.
6Bhodïrï xadiko saidi itïi Diuxi,
—Gï aagai sai oidakana ïmo gïï ïrhigiñikami tïkabi oidigi dama sai gokïdï ka gokapïrï biyagi go sudagi ix makïdï iiña kaatï oidigi— itïi ïgai.
Dai ka pogïdui gobai mos potïkai ïgai. 7Idui Diuxi go gïï ïrhigiñikami ixtukïdï gokapïrï bia go sudagi ix makïdï iiña kaatïkatadai oidigi. Jaa sudagi go gïï ïrhigiñikami dama dáí Diuxi dai jaa uta bii dai ïgaikïdï kia iiña kaatïkatadai oidigi. 8Dai bhodïrï tïbagi tïïtï ïgai go gïï ïrhigiñikami. Dai podukai ka aiturhi goka tasai abhiadïrï xi Diuxi gï aaga idui oidigi.
9Bhodïrï saidi itïi Diuxi xadiko,
—Ix makïdï tïbagi uta kaatï sudagi gï aagai sai gï ïmapidagi ïmapajako bai ka maaxi kaatïkana oidigi— itïi ïgai.
Dai ka pogïdui mos potïkai ïgai.
10Daidi ix makïdï ka gakikami bii gobai dïbïrai tïïtï Diuxi dai ix makïdï dama kaatïkatadai dai gajiadïrï bii gobai gïï sudagi tïïtï ïgai. Dai bhai gï ïrhidi Diuxi tïïgakai aaduindadï kïïgadukatai gobai.
11Dai bhodïrï saidi itïi Diuxi,
—Gï aagai ix gukakagi uxi oidigi dama iibhaidakami dai basoi ïpï iibhaidakami ïpï— itïi ïgai.
Dai ka pogïdui mos potïkai ïgai. 12Ka bhai gï dui bïïxi tïdoidagai dïbïraiñdïrï. Dai ka bhai gï ïrhidi Diuxi tïïgakai. 13Dai ka ayi baika tasai abhiadïrï xi gï aaga idui Diuxi oidigi.
14-15Bhodïrï saidi itïi Diuxi xadiko,
—Gï aagai sai oidakagi kukudagi tïbagiana sai kudaidakana oidigi sai ïgaikïdï gï maatïkagi xi ïr tasïrï xi ïpï tukarï. Dai ïgaikïdï gï ïkaldagi tasai dai umigi dai gï maatïkagi xudu miadaidagi go gïïgïr tasai— itïi ïgai.
Dai ka pogïdui mos potïkai ïgai. 16Podukai idui Diuxi go tasai ïmadï go masadai. Go gïdukïdï idui ïgai sai kudaidakana tasïrï dai go arhidukïdï tukarï. Dai ïkobïrakoga idui ïgai go xixabugai ïpï. 17Tïka tïbagiana darai Diuxi go kukudagi ix makïdï idui ïgai saidi kudaidakana ïgai oidigi. 18Ïïmo kukudagi idui ïgai sai kudaidakana tasïrï dai ïïmoko tukarï sai podukai gï maatïkagi xi ïr tasïrï xiïpï tukarï. Dai kïïga bhai gï ïrhi Diuxi tïïgakai go kukudagi. 19Dai podukai kaxi gï aiturhi maakoba tasai abhiadïrï xi gï aaga idui Diuxi oidigi.
20Bhodïrï xadiko saidi itïi Diuxi,
—Gï aagai xi oidakagi sudaïrï óídakami gïïgïrdukami dai saagida aarhidukami dai ujurugi oidigi dama sai ganïnïdagi ïgai— itïi Diuxi.
Dai ka pogïdui mos potïkai ïgai. 21Podukai idui Diuxi go gïïgïr sudaïrï óídakami ïmadï bïïxi go gaa sudaïrï óídakami ïmadï bïïxi go ujurugi ïpï.
Bhodïrï ka nïiditai Diuxi sai kïïgadu ixtumaxi idui ïgai 22sai bhodïrï aagai ïgai ïmo bhaiïrhiaragai ñoki bïïtarï gobai ix makïdï idui ïgai.
Daidi itïtïdai ïgai
—Muidabïrai dai aipako óídaka sudaïrï dai aapimï ujurugi ïpï abïr muida ïpï oidigi dama— itïtïdai.
23Dai ka aiturhi taama tasai abhiadïrï xi gï aaga idui Diuxi oidigi.
24Dai bhodïrï saidi itïi Diuxi,
—Gï aagai sai dïbïraiñdïrï bubuakiagi bïï sudakami oidigi dama ajiopadami maaxi. Oidigïrï ajiopadami buxtaki ïmadï sosiaxikami dai modukai gïïgïr kïkïixi dai saagida aarhi kïkïixi bïïxi gï aagai ix oidakagi— itïi ïgai.
Dai ka pogïdui mos potïkai ïgai. 25Dai kïïga bhai maaxkami dukai nïidi Diuxi bïïxi go oidigi dama ajiopadami ix makïdï idui.
26Bhodïrï ïïgi gï tïtïdai Diuxi
—Xibi gia tïtai gïr ïpïamaaxi iduñi odami sai Bhodïrï tïanïna ïgai oidigi dama bïïxi ixtumaxi oidaga— itïi Diuxi. —Sai tïanïna ïgai go batopa, dai go ujurugi, dai bïïxi go oidigi dama ajiopadami tomaxi oidigïrï ajiopadamikagi xi sosiaxikamikagi ïpï dai modukai go gïïgïrdukami saagida aarhidukami
bïïxi— itïi ïgai.
27Dai ïïgi ïpïamaaxkami idui ïgai odami. Ïmo kïïrhi ïmadï ïmo oki idui ïgai.
28Bhodïrï Diuxi aagai ïmo bhai ïrhiaragai ñoki go odami bïïtarï daidi potïtïdai,
—Kïïga abïr muida oidigi dama sai bhodïrï tïanïna aapimï ïmadï gïn maamara oidigi dama bïïxi ixtumaxi oidaga— itïtïdai. —Daiñi— itïtïdai. —Kaxi gïn maa aanï go batopa dai go ujurugi dai bïïxi go oidigi dama ajiopadami mïxi iduñagi ix dukatai bhai ïrhiadagi aapimï— itïtïdai. 29—Dai kaxi gïn maa aanï go uxi ïpï sai kuada aapimï ibhiadï. Bia aapimï oigaragai xi ugiagi ibhiadï bïïxi go uxi xi ïr aarhidukami uxi xi ïr gïïgïrdukami ïpï— itïtïdai.
Dai ka pogïdui mos potïkai ïgai.
30—Dïï gia go oidigïrï ajiopadami ïmadï ujurugi gobai kaxi maa aanï basoi ïmadï usagai sai kuada ïgai— itïtïdai Diuxi.
31Dai kïïga bhai gï ïrhidi Diuxi nïiditai bïï sudakami aaduindadï. Amaxi ka aiturhi naadami tasai abhiadïrï xi gï aaga idui Diuxi oidigi.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Genesis 1: NTP
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Copyright: Ethnos360 Sanford, Florida