Luka 9
9
Yesu anaarumiha oohuddera khumi ni eelli
(Mat 10.5-15; Mrk 6.7-13)
1Yesu aawiithana oohuddera khumi ni eelli vamodda, aavaha masiva ni olamulello wookhumiha minepa ddoonanara ni woochiriha ereta. 2Nave ahaarumiha wi yallalleye dda omwene wa Mulluku ni waachiriha oovoriiwa. 3Ahaalleella wi, “Muhikuse ello voolendonoolla naari ekopo yaweetana, nthumba na voolendoni, yoocha, makobiri naari malaya mamodda. 4Mpa mutthemwene munaakhelliweenyumo, mwakhalleke mwemmo, ophiyera mwavenyemo. 5#Luk 10.4-11; Mit 13.51Nave athu yaahiwaakhellaniwoni, venyaniwoni nave muttatthe nthupi omanyalloni wanyu. Yoolla okhalle omboni wawi mohaakhoota ekaamba ya nnddo yenriiwa.”
6Sika oohudderaalle yaatimulla yeeteeta m'mizi mutthemwene, ellalleyaka othenga waphaama nave yaachirihaka athu virive veko.
Okhupanya wa Herode
7 #
Mat 16.14; Mrk 8.28; Luk 9.19 Vano Herode,* o Galileya, iiwalleeye ddittheddene ddeereyennddo ddaamuhalleelliha vawi athu amodda yaallota wi Yohane Oobatiza sika avenyille wa ookhwa. 8Amodda yaallota wi namallotella Eliya ohooneya nave amodda yaallota wi mmodda a anamallotella akhalle sika avenyille. 9Koma Herode aallota wi, “Kaamuphadda muru Yohane koma muthu yoolla ttaani kiniiwaami ddawi ddiidda?” Vano aapaallesesa omoona Yesu.
Yesu anachiha mulloko wa athu muullupalli
(Mat 14.13-21; Mrk 6.30-44; Yoh 6.1-14)
10Vano amurummwa a Yesu yahokollowilliiwa yaamulleella Yesu ddittheddene yenriiwa. Ahaakusa attheenaayo ayaana wa weekhiiwa o etawoni yooromolliwa Betisaida. 11Athu yiiwalliiwa ddenndda, yaamuthwara. Aawaakhella, allota dda omwene wa Mulluku nave ahaachiriha athu oovoriiwa.
12Waari nndduwa nivollowaka, oohuddera khumi ni eelli yawiilliiwa wa Yesu ellota wi, “Mwaalleelle athu eye m'mizi ddawaatamella wi yaashe yoocha ni vookona vawi mva tti vahakani va weekhiihu.”
13Yesu aallota wi, “Nyu mwaavahe yoocha.” Yahaakhulla wi, “Nirina mitthi dda buledi mitthanu ni ehomba piilli. Munapaalla niye naakullelle yoocha athu attheenaalla?” 14(Vawi vaakhalla allopwana 5,000.) Nave Yesu ahaalleella oohudderaaye wi, “Akeraatthiheni athwaayo m'millokoni dda athu 50.”
15Vano oohudderaalle yahaakeraatthiha athu attheenaalle vatthi. 16Yesu aakusa mitthi dda buledi mitthanu ni ehomba piilli, aweha oddullu, avekella omuthokoza Mulluku. Aameyameya nave awinnya oohuddera wi evelleelle wa athwaayo. 17Attheene yaacha evona nave oohuddera yaatotella ddoohalla ddooddalla mitaanga khumi ni miilli.
Petro anasimikizella dda Yesu
(Mat 16.13-18,20; Mrk 8.27-30)
18Nllapo nimodda Yesu avekelleeye yeekhaaye oohudderaaye yaawa wa olliye nave ahaakoha wi, “Athu enallota wi miyaano kiri aani?”
19 #
Mat 14.1,2; Mrk 6.14,15; Luk 9.7,8 Yaamwaakhulla wi, “Amodda eni Yohane Oobatiza, amodda eni namallotella Eliya nave amodda eni mmodda a anamallotella akhalle sika avenyille.”
20 #
Yoh 6.68,69 Vano ahaakoha wi, “Nyu munihina miyaano ttaani?” Petro ahaakhulla wi, “Nyu tti Mesiya* oovenyera wa Mulluku.” 21Nave Yesu ahaalamulella moollipa wi, “Muhimulleelle arive muthu dda miyaano.”
Yesu anallota wowaamba dda okhwa waye
(Mat 16.21-28; Mrk 8.31—9.1)
22Yesu aallotattho wi, “Tti woophwanella wi mi, Mwaana a Muthu, kihoosiwe wunchichi ni okhootiwa ni attekweene a Ayuda,* allupa mukutho uullupalli ni ahuddihi a malamulo.* Kineerewiiphiwa koma vavira mallapo mararu kineerovenyihiwa wa ookhwa.”
23 #
Mat 10.38; Luk 14.27 Nave aallota wa attheenaayo wi, “Muthu aapaallaka okithwara iikhoote yeekhaaye, atukhulle mutandaaye nllapo ni nllapo nave akithwareke miyaano. 24#Mat 10.39; Luk 17.33; Yoh 12.25Vawi muthu aapaallaka ovullusa okumaaye, eneerowutathilla nave atathilla okumaaye kaambiiwa annakithwara miyaano, aneerewuuvullusa. 25Muthu anaapindulevo tini aakhella ellapo yavatthi ettheene atathilla apaalle woononga okumaaye? 26Muthu aawulliwaka muru ekaamba ya miyaano ni mawaaka vano mi Mwaana a Muthu kineerowulliwa muru ni olliye kaawaaka mu ntitimiho naka ni ntitimiho na Attiitthaaka ni angelo aweella. 27Ddawoona, kinimuulleellani wi, aakhallavo amodda vaava khekhwa ophiyera yoonille omwene wa Mulluku.”
Otthattuwa wa ekhove ya Yesu
(Mat 17.1-8; Mrk 9.2-8)
28Viviralle mallapo matthanu ni mararu allotille ddenndda, Yesu ahaakusa Petro, Yohane ni Yakobo awellana vaddullu va mwaango wi yavekelle. 29Avekellaka, wooneya wa ekhovaaye waatthattuwa nave ddoowara ddaye ddaatthattuwa ddikhalla ddaweella mbee. 30Nave enthawi yeeyo athu eelli yaawa enallota ni olliyooyo. Athu yaalla yaari ayo yakhwille khalle, Mose ni Eliya. 31Yahooneya mu ntitimiho na oddullu nave yaallota ni Yesu dda okhwa waye nko onaakwakhwanihelliwe o Yerusalemu. 32Enthawi yeeyo Petro ni akhwaayaayo yaari ekhwillevo ni ekhove. Nave yavenyilliiwa yahoona ntitimiho na Yesu nave athu eelli yiimenlle ni Yesu. 33Athwaalle yamuhiyalliiwa Yesu, vano Petro aallota ni Yesu wi, “Apwiya, ddookhalla phaama wi hiyaano niri vaava, nuutthipellelleni misasa miraru vaava; mmodda wa nyuwaano, mmodda wa Mose nave mmodda wa Eliya.” Koma Petro khaadduwenlle eyo alloteeye.
34Allotaka ddiiddo, waawa murapo waakhuneella ni muuthuuchiiwa. Vano oohudderaayo yahoova mvo murapooyo waakhuneelliwa 35#Yes 42.1; Mat 3.17; 12.18; Mrk 1.11; Luk 3.22; 2 Pet 1.17,18Vano mawu oovenyera m'muraponimmo yaallota wi, “Olla sika Mwanaka ootthoolliwa. Mwiiwellelleni!”
36Mawaalle yamanlliiwa, oohudderaayo yahoona wi Yesu ahanlle yeekhaaye. Nave kheyaallonte ello enthawi yeeyo naari omulleella muthu dda ddeko yoonilliiwannddo.
Yesu anamuchiriha musombwe a munepa woonanara
(Mat 17.14-18; Mrk 9.14-27)
37Osaka wene Yesu ni oohuddera ararwaayo yakitthalliiwa m'mwaangonimmo, Yesu aakumana ni mulloko wa athu anchichi. 38Vano muthu mmodda ovenyera m'mullokonimmo aakhuwa wi, “Ahudduhi, kinimuuvekani, mooneni mwanaka, ari mmoddave yoolla! 39Wiilliwiilli munepa woonanara onnavollowa mwa olliye nave onnamweeriha wi akhuweke. Weeddiiddo onnamukuhella vatthi angomowa, vano annakhuma niphoru owanoni. Nave khonamuhiya shisha ophiyera omuphoriihalle. 40Kahaaveka oohudderaanyu wi ekhumihe munepa koma kheyaawonre.”
41Yesu ahaakhulla wi, “Nyu athu a mbado woohikhulupililoolla ni woonanara! Kinaakhalle ni nyuwaano ophiyera niini? Kinuuvillelleni ophiyera niini? Wannani musombooyo wa miyaano!”
42Nave mwaanooyo aweeye, munepa woonanarooyo waamukuha vatthi omukomolla. Vano Yesu aasimwella munepa woonanarooyo, amuchiriha mwaanooyo nave aamuvelleella wa attiitthinnya. 43Athu attheene yaattikhina ni masiva muullupalli a Mulluku.
Yesu anallota waneepiilli dda okhwa waye
(Mat 17.22-23; Mrk 9.30-32)
Athu ettikhinaka ni ddeko ddittheddene Yesu addeereeyennddo, Yesu ahaalleella oohudderaaye wi, 44“Muhitiwalle kinapaalleemi wi kuulleelleni vawi mi Mwaana a Muthu kineerovelleelliwa wa athu.” 45Koma oohudderaayo kheyaawiiwesesa mawu yaalla kaambiiwa ottaphullella wiwa waavitthiwa wa alliwaayo. Koma yahoova wi emukohe dda mawu yaalla.
Muullupalli ttaani
(Mat 18.1-5; Mrk 9.33-37)
46 #
Luk 22.24
Ovaanyihana wahaambeya va oohuddera ddawi muullupalli ttaani mwa attheenaayo. 47Yesu aadduwella wi yaamavaanyihana, sika aamukusa mwaana amwiimesa vakhwipi vaye. 48#Mat 10.40; Luk 10.16; Yoh 13.20Allota wi, “Nave muthu anamwaakhella mwaanoolla ekaamba ya miyaano, anakaakhella miyaano. Nave oyo anakaakhella miyaano, anamwaakhella oyo akirumalle miyaano. Vawi oyo ari mung'onong'ono mwa attheenenyu yooyo sika muullupalli.”
Oohivaanyihana ni nyuwaano anniiwanana ni nyuwaano
(Mrk 9.38-40)
49Yohane aamulleella Yesu wi, “Ahuddihi, naamoona muthu akhumihaka minepa ddoonanara vooromollani nnddina nanyu. Nave naheesa omuhiiha kaambiiwa khaari mmodda a mullokwaahu.”
50Koma Yesu aamulleella ni oohuddera akhwaayaayo wi, “Muhinamuhiiha vawi muthu ahinanivaanyiha anniiwanana ni hiyaano.”
Okhootiwa wa Yesu o Samariya
51Mallapo yaatamelliiwa awi Yesu awellihiwe aye oddullu, aaganizera wi aye o Yerusalemu. 52Vano ahaaruma athu amodda wi ehoolle. Yaavollowa m'muzi mwa Asamariya* wi yamukhozere nipuro naye. 53Koma athu a wenko kheyaamwaakhenlle kaambiiwa aya o Yerusalemu. 54#2 Mam 1.9-16Oohudderaaye, Yakobo ni Yohane, yoonilliiwa wi Yesu khaakhelliwe, yaallota wi, “Apwiya, munapaalla wi niithanihe munllo okitthe oovenyera oddullu wi owiiphe athu yaalla?”#9.54: Ddoolemba ddimodda ddakhalle ddaanaanjerera mawu awi wonanko mmo Eliya eerelleeye.
55Koma Yesu aarukunuwa aahumullulla oohudderaayo.#9.55: Ddoolemba ddimodda ddakhalle ddaanaanjerera mawu awi nave aallota wi, “Khonadduwella munepa oyo onuulamulella vawi Mwaana a Muthu khaawiille wi oononge okumi wa athu koma wi aavulluse.” 56Sika Yesu ni oohudderaaye yaaya m'muzi mmodda.
Dda omuthwara Yesu
(Mat 8.19-22)
57Yesu ni oohudderaaye yaariiwa m'musewuni yeetaka, muthu mmodda aallota wa Yesu wi, “Kineerewuuthwarani orive weko munayeenyu.”
58Yesu aallota wi, “Akhatwe aakhalla ni milliha ddiwa navettho epallame ddookhalla ni emphuru ddiwa koma mi, Mwaana a Muthu, nginna naari voohameella murwaaka.”
59Aallotattho wa muthu mmodda wi, “Kithware.”
Nave muthooyo aallota wi, “Apwiya, mukaakhullelle wi kaambe waavittha attiitthaaka.”
60Koma Yesu ahaakhulla wi, “Waahiye ookhwa yaavittheke ookhwa akhwiiwa. Koma khawe waallalleye dda omwene wa Mulluku.”
61 #
1 Mam 19.20
Muthu mmoddattho aallota wi, “Kineerewuuthwarani, Apwiya koma mukaakhullelle wi kaambe ollaanya nibanja naka.”
62Koma Yesu aallota wi, “Khaavo muthu anallima awehaka mutulli anaphwanella mu omwene wa Mulluku.”
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Luka 9: MW2019
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
The Bible in Elhomwe © The Bible Society of Malawi, 2019.
