Luka 20

Nikoho na olamulello wa Yesu

(Mat 21.23-27; Mrk 11.27-33)

1Nllapo nimodda Yesu aariiye mu enyumba ya Mulluku aahuddihaka athu ni ollalleya othenga waphaama, allupa mukutho uullupalli, ahuddihi a malamulo* ni attekweene a Ayuda* yaawa. 2Yaamukoha wi, “Munilleelle, muneera ddenndda ni olamulello woovenyera wuuwi? Uuvahilleni olamulello yoolla ttaani?”

3Yesu aawaakhulla wi, “Mittho kineerewuukohani nikoho nimodda. 4Mukilleelle, Yohane aakusalle wuuwi olamulello woobatiza, waavenyenre wa Mulluku apaalle wa athu?”

5Yaakambirana weekhiiwa wi, “Nillote wi tini? Namwaakhulla wi wa Mulluku, aneerollota wi, ‘Khamwaamukhulupililalle Yohane kaambiiwa tini?’ 6Koma nallota wi, ‘Ovenyera wa athu’, athu attheene eneeroniipha voonivokhani malluku kaambiiwa attheene yaamwaakhullella Yohane wi aari namallotella.” 7Sika yaamwaakhulla wi, “Khaninadduwella wi wavenyenre wuuwi.”

8Vano Yesu aallota wi, “Naari miyaanottho nguulleellani wi ddenndda kineera ni olamulello wa aani.”

Niphwanaphwaniho na oollima oonanara

(Mat 21.33-46; Mrk 12.1-12)

9 # Yes 5.1 Vano Yesu ahaamba waalleella athu niphwanaphwaniho nawi, “Waakhalla muthu mmodda aallimalle emataaye ya ezipaso ddampesa. Nave aapolleyiha emateeyo wa athu oollima nave olliye avenyavo aya o ellapo emodda wa enthawi yoorekama. 10Yakwakhwanilliiwa enthawi yootthukumaniha ezipaso ddampesooyo, aamuruma mullupa muttekwaaye wa oollimaayo wi aakhelle ezipaso dda m'matanimmo. Oollimaayo yaamuukutha, emuhokollosa ehimuvahille ello. 11Aamurumihattho mullupa mutteko mmodda koma oollimaayo yaamuukuthattho emweerella ddoowulliha muru, emuhokollosa ehimuvahille ello. 12Aamurumihattho mullupa mutteko waneeraru koma oollimaayo yamphoriiha emuvokhella otte wa emateeyo. 13Nave mwaneena a ematooyo aallota wi, ‘Keere tini vano? Kineeromurumiha mwanaka ookondiwa apaalle yoollave eneeromuvaha olemu!’ 14Koma oollimaayo yamoonilliiwa yaalleellana wi, ‘Olla sika mwanaye aamullopwana anaahallena eyuumeella, hankoni nimwiiphe wi eyuumeella ekhalle yaahu.’ 15Vano yaamuvokhella otte wa emateeyo emwiipha.” Yesu ahaakoha wi, “Vano mwaneena a ematoolle anaaweere tini wa oollimaalle? 16Aneeroowa wi awiiphe oollimaayo nave aneeropolleyiha emateeyo wa athu amodda.”

Athwaalle yiiwalliiwa yaallota wi, “Ddennddo ddiheereye!”

17 # Mas 118.22 Koma Yesu ahaaweha, aakoha wi, “Vano mawu a Mullukwaalla enattaphullella wi tini?

‘Nlluku nno nakhootiwe ni oomaka enyumba

nenno naakhalla nlluku noopaalleya.’

18Nave anaamorelle va nllukunna aneerewinttakeya nave nllukunna namorella va muthu nineeromusilla.”

Nikoho na okhoma musonkho

(Mat 22.15-22; Mrk 12.13-17)

19Ahuddihi a malamulo ni allupa mukutho uullupalli enthawi yeeyo yaapaalla wi emmake Yesu kaambiiwa yaadduwella wi ahaalleella niphwanaphwaniho nowaavaanyiha. Koma yawoova athwaayo. 20Vano emweetellelle Yesu, yahaaruma athu ookhalla wonanko oolungama wi yamukoheke ddoomuwaka muwano nave emphwanyelle mullatu, yamuvelleelle wa oolamulella a o Roma oyo aari ni masiva ni olamulello. 21Athwaayo yaamukoha wi, “Ahuddihi, ninnadduwella wi munnallota ddawoona moohiwehattho wi olla ttaani. Koma munnahuddiha ddawoona dda opaalla wa Mulluku wa athu. 22Sika munilleelle hiyaano. Tti ddawaakhullelliwa ni malamulwaahu okhoma musonkho wa Kaisara,* o Roma apaalle khe ddiiddo?” 23Nave Yesu voodduwellani woottha wiiwa aallota wi, 24“Ngakooniheni nikobiri nookhomella musonkho! Ekhoveella ni nnddinanna tti ddawani?” Yahaakhulla wi dda Kaisara.

25Vano Yesu aallota wi, “Ddawoona, sika velleellani wa Kaisara nnddo ddiri dda Kaisara nave velleellani wa Mulluku nnddo ddiri dda Mulluku.”

26Vano kheyaaworille omuphwanyella mullatu vamiitthoni va athu. Koma yaattikhina ni ddoowaakhulla ddaye, emaalla.

Nikoho na ovenya wa ookhwa

(Mat 22.23-33; Mrk 12.18-27)

27 # Mit 23.8 Asaduki* amodda ayo ehinakhulupilila wi ookhwa ttuuvenya yaawa wa Yesu ellota wi, 28#Deu 25.5“Ahuddihi, Mose aalemba wi muthu akhwa amuhiya mwaariye ahinna anamwani mwanamunne amutthelle mutthiyanooyo wi amuyarelle anamwani ookhooyo. 29Vano waakhalla muthu ni asinne atthanu ni mmodda, aatthella akhwa ahinna anamwani 30Nave mwanamunne aamutthella mutthiyanooyo akhwa ahinna anamwani. 31Nave emoddamoddave yeeyo yaheereya wa mwanamunne aneeraru owaakattho wa asinne attheene. 32Voomallihellani, mutthiyanoollettho aakhwa. 33Vano va nllapo na ovenya wa ookhwa mutthiyanooyo anaakhalle mwaara awani va allopwana atthanu ni eellaayo vawi attheene yaamutthella?” 34Yesu aawaakhulla wi, “Allopwana ni atthiyana amuttano ennatthella ni otthelliwa. 35Koma allopwana ni atthiyana ayo enaphwanella ovenya wa ookhwa ni okhalla mu omwene wa Mulluku khetthella apaalle otthelliwa. 36Khekhwattho koma enaakhalle wonanko angelo. Kaambiiwa tti anamwani a Mulluku vawi aavenya wa ookhwa. 37#Eks 3.6Nave Mose ahooniha khalle wi athu eneerovenya wa ookhwa. Kaambiiwa mu mwaha wa makukhu yakhara munllwaalle Mose ahaaromolla Apwiya wi, ‘Mulluku amakhollwaahu Mulluku a Abrahamu, Mulluku a Isaki ni Mulluku a Yakobo.’ 38Olliyooyo khahiyo Mulluku a athu ookhwa koma tti a athu ookumi. Vawi wa olliye arive muthu tti mukumi vamiitthoni vaye.”

39Vano amodda a ahuddihi a malamulo yaallota wi, “Mohaakhulla phaama, Ahuddihi!” 40Nave kheyaallipalle murima wi emukohe makoho mamodda.

Nikoho na Mesiya

(Mat 22.41-46; Mrk 12.35-37)

41Yesu ahaakoha wi, “Enallota mwawiidde dda Mesiya* wi tti edduullu ya Davide? 42#Mas 110.1Vawi Davide yeekhaaye aallota mu Nibukhu na Masalimo wi,

‘Apwiya yahaalleella apwiyaaka wi,

“Khalla o nnattanatta naka

43ophiyera kaatthattusalle adanaawo

voonyingallavo manyallwaawo.” ’

44Sika Davide aamuromolla olliye wi Apwiya, Mesiya vano anaakhalle edduullu ya Davide mwawiidde?”

Yesu anaachenjeza dda ahuddihi a malamulo

(Mat 23.1-36; Mrk 12.38-40)

45Athu attheene yamwiiwelliiwa, Yesu aallota wa oohudderaaye wi, 46“Chenjerani ni ahuddihi a malamulo vawi ennakonda weeteeta ewanre mikanjo ddiwa ni ovahiwa mooni moolemu mu misika. Ennakondattho otthoolla mipando ddoolemu mu enyumba ddamavekello* ni mapuro oolemu vamachellelloni. 47Ennaachella anaamukhwelle ni waakusella katundwiiwa naari enyumba ddiwa ddene, vawaamarani athu muyeepe owiitthoni ni mavekello oorekama. Ollakiwa wiwa oneerokhalla wuullupalli waakhwaranya athu amodda!”

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

Luka 20: MW2019

Highlight

ಶೇರ್

ಕಾಪಿ