IIMU/UUNGW 3
3
Dee/aanuú hee
1Ala dayshamo ku ilakahaár ta makaá sla/a sleémeero ba/a, kudá' AAKOÓ Mungú aa tleéhh. Inós /ameeni gari báy, «Xáy, adoorí an adór Mungú aa oói iwa kaahi, ‹Mamaá xaai sleémeero awa baraá asalmií diriiá' mi /ayaara'.› »
2/Ameeni dayshamo guri beér, «Mamaá xaai kudá' baraá asalmoó i diriiá' i aleeslawaán kiwa /ayaan. 3Ala Mungú ina oó', ‹Mamaá xa'anoodá' baraá tla/ángw asalmií dirií' mi /ayaara', tam mi kwatiitara', as kahhó' daqaní a qatla'aaká.› »
4Ala dayshamo /ameeni gari báy, «Kuungá' a baloó qatla'aaká. 5Asma Mungú ga xuu' bál kuungá' mamaá xa'anoowí bira /agé', ilaahúng ki gwa/atis, kuungá' tari adór Mungú tleehhitá', muruú hhó' nee oo tlákw kuwa xua'.»
6Naxés /ameeni gana aán mamaá xa'anoodá' kúto' i tsuuiyá' /aymaaro, slám ki hhohho' ngiwa ga/eer ilaawo, nee ki hhoo' as iwa sagalooár huwiya' biringa /ák. Maamár xa'anoowí gari bú', gari /ák, gari hhawaatuuwós i hanís, inós sleeme gari /aáy. 7Naxés inooín tsaraawo ilaaín kiri gwa/atís, tiri tsaahhiyé' adór inooín tar /aankwets. Loo/ór puunganí kari hiriít tlabaá wa alé.
8Naagáy afór AAKOÓ Mungú kari axaás iwa hi'iimiti baraá asalmoó wa ale qoomár tsee/amá iwa fuuruú'. Heedaádá' nee hareerós niri nahhaatiyé' baraá xaa'aá asalmoodií ale, as AAKOÓ Mungú mingiwa ár. 9Ala AAKOÓ Mungú heedaádá' guri ateét guri báy, «Kuúng a amá?»
10Heedaádá' iri oó', «Afoorók ana axaás baraá asalmo, aníng niri da'ayuút, asma tawa /aankwets, niri nahhaát.»
11AAKOÓ Mungú iri oó', «Heé ugwa bay kuúng a /aankwets? Xáy, kuúng mamaá xa'anoodá' uwa báw mi /ayaar, ina /ági?»
12Adam iri oó', «/Ameenidá' kuúng na hanís tawa alhootaan, inós maamár xa'anoowí ngina hanís, ngiri /aáy.»
13AAKOÓ Mungú /ameenidá' gari báy, «Gaarí a milá kiíng taa tléhh?»
/Ameenidá' iri ó', «Dayshamo aníng ina al/aáy, ngiri /aáy.»
Sakwasleemár Mungú
14AAKOÓ Mungú dayshamo guri báy,
«Asma adoosíng kawa tléhh,
kuúng taa lu'ús ta makaá ta de'en sleémeero,
nee ta makaá sla/a sleémeero.
An gurúr mandrooqomít,
teeri an /ák,
baraá slafiingók sleémeero.
15Aníng wakaari a qaás tla/aangók nee /ameenirí,
nee tla/ángw xwaylarók nee xwaylarós.
Xwaylarós kuúng un saga naasuúr.
Kuúng inós an koolo kíhh.»
16/Ameeni gari báy,
«Ar ló', aníng slahh'amaayeerók ngi doók qoomár xwaylaro.
Na/ii in xwayluúr ar slahh'amaaye,
nee ilatleeriirók a gawaá daanduú hhawaatuuwók,
nee inós kiíng i sawaawuti'ín.»
17Hhawaata guri báy,
«Asma kuúng afór hareerók kawa iiárií qás,
mamaá xa'anoodá' uwa báw ‹mi /ayaar› kiri /ák,
yaamu kaa lu'ús as kuúng.
Kuúng muruú /aymaarók un baraawós wa sleér
ar slahh'amuú gadiyér ur baraá slafiingók sleémeero.
18Gár yaamu ni kuúngí duuxiya' a fuquráy nee laqaya',
nee kuúng muruú /aymaarók un baraá yaamuú wa sleér.
19Ar hamér gadiyér gawide
muruú /aymaarók un /ák,
ay dír ti ki/ baraá hhape.
Asma kuúng tuna tleéhh ar hhape.
Kuúng a hhape,
nee baraá hhape an i kí/.»
20Adam#3:20 Adam: Umuuwí baraá tsifrír Ebraniaro gídaabárós a hee. hareerós gari umií tsaát, gari báy Hawa#3:20 Hawa: Baraá tsifrír Ebraniaro a slaqmís nee slafiingw. asma a aayór múk slaáf sleémeero. 21AAKOÓ Mungú Adam nee hareerós giri tlabaá kadú i tleéhh, giri tsiitiís.
Guusár Adam nee Hawa
22AAKOÓ Mungú iri oó', «Ga/aaweek, hee daxta aa adór atén tleehhiít gawaá xu'utír hhooeema nee tlakweemaawo. Ala wané dakose mamaá xa'anoó slafíngw koóm gi taataahh, giri /aay, iri slaaf ay kureeraá kureér.» 23Naagáy AAKOÓ Mungú giri duúx baraá asalmooduú Edeniro, as yaamu ngiwa doosli, kudá' hhaper'ín inós kura tleéhh. 24AAKOÓ Mungú hee guri guús baraá asalmoodae, keruúbi#3:24 Keruúbi: Gídaabár /aymuuwí kaa gooín amór alu baraá kitaábuuwihe gari qaás bihhaá da/aáw awa asalmoó Edeni. Paángár asla ar war'eeliim amorqá' nee amqae gari qaás, asma loohidá' amór xa'anoó slafíngw kaw kawa xun.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
IIMU/UUNGW 3: IRQW
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
The Bible in Iraqw © Bible Society of Tanzania, 2004.