मत्ती 5
5
यीशु मसीह कै पाहड़ै उपदैश
(लूका 6:20-23)
1यीशु भीड़ दैखैयो धारो कै किनारे दैणिक उबोड़े हौटा; औरौ तिनुकै शिखाणौ कारिए बौठै गौआ तोबै तैसकै चैलै तैसकै धोरे आए। 2औरौ यीशुए तिनुकै उपदैश दैणा शुरु कौरा:
धन्य वचन
3“धन्य औसौ सैजै जू महसूस कौरौ कै तिनुकै पौरमेशवर कै जौरुरत औसौ, जिथुखै स्वर्ग का राज्य तिनका ही औसौ।”
4“धन्य औसौ सैजै जू शोक कौरौ, पौरमेशवर तिनुकै शान्तै दैन्दा।”
5“धन्य औसौ सैजै जू नम्र औसौ, जिथुखै सै धोरती कै औधिकारी हौंदै।”
6“धन्य औसौ सैजै जू धार्मिकता शै साचा जीवन जिणौ कै इछा राखौ, पौरमेशवर तिनुकै छोकाला।”
7“धन्य औसौ सैजै जू दया कौरणौवाल़ै औसौ, पौरमेशवर तिनु पांदी दया कौरदा।”
8“धन्य औसौ सैजै, जिनकै मन शुध्द औसौ, जिथुखै सै पौरमेशवर खै दैखदै।”
9“धन्य औसौ, सैजै जू मैल कौरवाणौवाल़ै औसौ, जिथुखै सै पौरमेशवर कै नानड़िया बौल़ै जालै।”
10“धन्य औसौ सैजै, जू धार्मिकता का जीवन जिणौ कै बौजैह शै सताए जांव, जिथुखै स्वर्ग का राज्य तिनका ही औसौ।”
11“धन्य औसौ तुऐं, जोबै लोग तुऔं मैरै चैलै हौणौ की बौजैह शै तोंवारै नेंदैया कौरौ, औरौ सतालै औरौ झूठु बौल बौलेयौ तोंवारै खिलाफ सौबी भान्त की झूठी बातौ बौल़ौ। 12तौलौ तुऐं खुश औरौ मगन हौया जिथुखै तुऔं कारिए स्वर्ग दा बौड़ा इनाम राख राए। इथकारिए कै तिनुऐ तिनु पौरमेशवर कै बातौ बौताणौवाल़ै कै बै जू बौहितै सौमय दै आगै आए रौवै थिए ऐशैखैई सताए राए थिए।”
नूण औरौ पेयाशो
(मर 9:50; 4:21; लूका 14:34-35; 8:16)
13“तुऐं इयौं दुनिया कै लोगौ कारिए नूण कै जैशणै औसौ, पौरौ जै नुणौ का स्वाद बिगड़ै जांव, तौ तिथु कियों चीज़ौ लैई नुणाटौ कौरलै? तोबै सै किथुई कामको ना आथी, सिरफ इथकारिए कै बायरै फेरकाए जांव, औरौ सै आदमी कै लातो तौड़ी मांडे जांव। 14तुऐं पूरी दुनिया कारिए पेयाशै कै जैशणै औसौ जू शहर धारो पांदी बौसै रौआ। सैजा शहर छिपै ना सौकदा। 15औरौ लोग दिवा बाल़ेयो शैकड़ै तौड़ी ना राखौ, पौरौ तिथुकै दियोट पांदी राखौ, तोबै तिथकु पेयाशो घोरो कै सौबी लोगौ खै भैटौ। 16इथकारिए तोंवारो पेयाशो ओकी आदमी कै सामणै चौमकौणौ चैंई ताकि सै बै तोंवारै आछै काम दैखैयो तोंवारै पिता कै बौड़ाए कौरौ, जू स्वर्ग दा औसौ।”
कानून का पूरा हौणा
17“ऐशैखै ना सोंचैया कै हांव मूसा कै कानून औरौ पौरमेशवर कै बातौ बौताणौवाल़ै कै लेखो कै मिटांदा आए रौआ, हांव मिटाणो कारिए नै पौरौ पूरा कौरदा आए रौआ। 18जिथुकै हांव तुऔं खै साचौ बुलू, कै जांव तौड़ी गौयण औरौ धोरती टोल़े ना जांव, यानी पौरमेशवर कै कानून दै सौबै मकसद पूरै ना हौए जांव तांव तौड़ी पौरमेशवर कै कानून मुंजीदा किछै बै इथै तौड़ी कै ऐक मात्रा या ऐक बिन्दु बै ना टौल़दा। 19इथकारिए जू कुणिए नानड़ी शी नानड़ी आज्ञा मुंजीदै कोसी ऐकी कै ना मानौ, औरौ तैशैखैई लोगौ कै शिखांव, तैसीखै स्वर्ग कै राज्य दा सौबिदा नानड़ा बौलदै, पौरौ जू कुणिए इनु आज्ञा का पालन कौरला औरौ तिनु ओकी खै शिखाला, तैसीखै स्वर्ग कै राज्य दा महान बौलदै। 20जिथुकै हांव तुऔं खै बुलू, कै तुऐं स्वर्ग कै राज्य दै तोबै प्रवेश कौरे पांदै जोबै तुऐं यहूदी शास्त्री औरौ फरीसी लोगौ कै तुलना दै जादा भरोशै कै लायक हौलै जू पौरमेशवर कै बातौ खै पूरी कौरौ।”
खून कौरणा औरौ गुस्से कै सौजा
21“तुऐं इयौं आज्ञा कै बारै मुंजी तौ शौणै राए, कै पौरमेशवरे अमारै बुड़ेईको खै बौल़ै राए थियु कै, ‘खून नै कौरेया,’ औरौ ‘जू कुणिए खून कौरला सै अदालत दा सौजा पाल़ा।’ 22पौरौ हांव तुऔं खै ऐजौ बुलू, कै जू कुणिए आपणै भाई पांदी गुस्सा कौरला, अदालत दा पौरमेशवर तैसीकै सौजा दैला, औरौ जू कुणिए आपणै भाई खै निकम्मा बौलला तैसीखै महासभा दै सौजा भेटली; औरौ जू कुणिए बौल़ौए, ‘ओए रै मूर्ख’ सै नरक कै आग मुंजी सौजा कै लायक हौंदा।
23इथकारिए जै तू आपणै भैंट मन्दिर दै चौढ़ाए, औरौ तिथै ताखै याद आंव कै, तुऐं कोसी ओकी आदमी कै नुकसान पोऊंचाए राए। 24तौ आपणै भैंट तिथै वेदी कै सामणै छोड़े दै, औरौ जाऐबा आगै आपणै भाईआरी मैल मिलाप कौरेया तोबै आयौ भैंट चौढ़ाया।
25जांव तौड़ी तू आपणै बौयरी कै साथै बाटो पुंडा औसौ, तौ तैसी आरी पटापट मैल जोल कौर, कोदी ऐशैखै ना हौंव जै बौयरै ताखै न्यायी खै सौंपौ, औरौ न्यायी ताखै सैनिक खै सौंपै दैंव, औरौ ताखै ज़ेलो दा पाए दैंव। 26हांव ताखै साचौ बुलू, जांव तौड़ी तू पाई-पाई ना भोरै दैय तांव तौड़ी ज़ेलो पौरैशा ना छौटे सौकै।”
गौलत सौमबंध कै बारै मुंजी शिक्षा
27“तुऐं इयौं आज्ञा कै बारै मुंजी शौणै तौ राए कै, ‘गौलत सौमबंध नै बाणैया।’ 28पौरौ हांव तुऔं खै ऐजौ बुलू, कै जू कुणिए कोसी बैटमाणिश खै गौलत नज़र शै दैखला तौ सै आपणै मन दा तियांरी गौलत सौमबंध बाणै दैंव।
29जै तैरै सोऐं आख तांव लैई पाप कौरांव, तौ तू तियौं आख निकाल़ैबा आपणै धोरे दै बैगाए दै, जिथुखै तांव कारिए ऐजौई बोड़िया औसौ जै तैरै अंगो मुंजीदा ऐक नाश हौए जांव औरौ तैरा सौबै शोरीर नरको दा ना फेरकाए जांव। 30पाप कौरणौ कै सौब बौजैह खै आपणै जिन्दगी शै दूर कौरौ, जैशैखै तैरा सोंवा हाथ तांव लैई पाप कौरांव, तौ तू तैसीखै काटेबा आपणै धोरे दा बैगाए दै, जिथुखै तांव कारिए ऐजौ ठीक औसौ, कै जै तैरै अंगो मुंजीदा ऐक नाश हौए जांव तौ तैरा सौबै शोरीर नरक दा ना पाया जांव।”
खित कै बारै मुंजी शिक्षा
31“मूसा कै कानून दो ऐजौ बौल़ै राए थियु, ‘कै जू कुणिए आपणै घोरवाल़ी खै खित दैणै चांव सै तियौंखै खितनांमा दैंव।’ 32पौरौ हांव तुऔं खै ऐजौ बुलू कै जू कुणिए आपणी घोरवाल़ी खै गौलत सौमबंध कै सिवा किथुई ओकी बौजैह शै खित दैला तौ सै तियौं लैई गौलत सौमबंध बौणांव, औरौ जू कुणिए तियौं छोड़ेयौंदी आरी बैयाव कौरला, सै बै गौलत सौमबंध बौणांव।
शौं नै खाया
(मत्ती 19:9; मर 10:11-12; लूका 16:18)
33तुऐं शौणै राए, कै पौरमेशवरे अमारै बुड़ेईको खै बौल़ै राए थियु कै, ‘झूठी शौं नै खाया पौरौ प्रभु कारिए आपणै शौं पोरे कौरेया।’ 34पौरौ हांव तुऔं खै ऐजौ बुलू कै कौलोंई शौं नै खाया, ना तौ स्वर्ग कै जिथुखै सै पौरमेशवर का सिंहासन औसौ। 35औरौ ना धोरती कै, जिथुखै सै तिथै आपणै लात राखौ; औरौ ना ही यरूशलेम शहर कै जिथुखै सै महाराजा का शहर औसौ जिथै पौरमेशवर राज्य कौरौ। 36आपणै मुंडौ कै बै शौं नै खाया जिथुखै तू ऐकी बाल़ौ खै बै ना तौ चिटा औरौ ना ही काल़ा कौरे सौकै। 37पौरौ तोंवारै बात हां कै हां औरौ ना कै ना हौणै चैंई, जिथु जू किछै इदु जादा हौंव सै दुष्ट शैतान लैई हौंव।”
बौदला नै लोया
(लूका 6:29-30)
38“तुऐं शौणै तौ राए हौल़ौ, कै मूसा कै कानून दो का लैखै राए, कै आख कै बौदलै आख, औरौ दांदो कै बौदलै दांद। 39पौरौ हांव तुऔं खै ऐजौ बुलू कै बुरै आदमी शै बौदला नै लोया, पौरौ जू कुणिए तैरै सोऐं खोखटै पांदी चटाका लालै, तैसकै ढौबौ खै ओका खोखटा बै फैरै दैया। 40औरौ जै कुणिए तुऔं खै अदालत दै खिंचैयौ तोंवारा झागा निणा चांव, तैसीखै आपणा लोइया बै निणो दैंव। 41जै कुणिए रोमी सिपाही ताखै जबरदस्ती ऐक कोस दूर निणा चांव, तौ तू तैसकै साथै दौ कोस दूर जा। 42जू कुणिए तांव कैईंदु मांगलै, तैसीखै दैय दै, औरौ जू तांव कैईंदु उधार निणु चांव, तैसी मना नै कौर।
बौयरी साथै प्यार कौरणौ कै शिक्षा
43तुऐं शौणै तौ राए हौल़ौ, कै मूसा कै कानून दो का लैखै राए, ‘आपणै पड़ोसी आरी तैशणा प्यार कौर जैशणा आपिआरी कौरे, औरौ आपणै बौयरीआरी बैर कौरेया।’ 44पौरौ हांव तुऔं खै ऐजौ बुलू कै आपणै बौयरीआरी प्यार कौरौ औरौ आपणै सतानेवाल़ै कारिए प्रार्थना कौरौ। 45जिथलैई तुऐं आपणै स्वर्गीय पिता कै नानड़िया ठोरल़ै जिथुखै सै भले औरौ बुरै लोगौ पांदी आपणौ पेयाशो प्रगट कौरौ, औरौ धरमी औरौ अधरमी लोगौ पांदी बारिश बरसांव। 46जै तुऐं आपणै प्यार कौरणौवाल़ै आरी प्यार कौरलै, तौ पौरमेशवर तुऔं खै इनाम ना दैंदा? जिथुखै मामला लोणो वाल़ै बै तौ ऐशैखैई कौरौ?
47औरौ जै तुऐं सिरफ आपणै ही भाई खै नमशकार कौरौ, तौ तुऐं ओकी लोगौ कै तुलना दा कुणजाई बौड़ा काम ना कौर लैई? जिथुखै बैगानै यहूदी लोग जू पौरमेशवर कै आज्ञा का पालन ना कौरौ, सै बै ऐशैखैई कौरौ? 48तुऔं तिनु लोगौ शै प्यार कौरणौ कै जौरुरत औसौ जू तुऔंआरी प्यार ना कौरौ औरौ ऐशैखैई पौरमेशवर तुऔं सिद्ध बाणौ, जैशणा कै तोंवारा पिता स्वर्ग दा सिद्ध औसौ।”
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
मत्ती 5: SRXNT
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
