यूहन्ना 12
12
बैतनिय्याह गांव दा यीशु का आदर
(मत्ती 26:6-13; मर 14:3-9)
1हौजौ यीशु फसह कै तैयार दा छौ दूस औगौड़ियौ बैतनिय्याह गांव दा ओऊवा; जिथै तैणै लाजर खै मौरेयौंदे मुंजीदा जियुंदी कौरे राए थिया। 2तिथै तिनुऐ तैसी कारिए दावत तैयार कौरे; औरौ यीशु का आदर कौरणौ कारिए मार्थाए सेवा कौरे लोए थै, औरौ लाजर यीशु कै साथै दावत खाणौ वाल़ौ मुंजीदा ऐक थिया। 3तोबै मरियमे जटामांसी कौ आधै लीटर कै लमसम मोहगौं इत्र लोयो खै यीशु कै लातो पांदी मौल़ौ, औरौ आपणै बाल़ो लैई तैसकै लातो कै गुशै; औरौ इत्र कै खुशबू लैई घोर खुशबूदार हौए गौ। 4पौरौ तैसकै चैलै मुंजीदा यहूदा इस्करियोती नांव का ऐक चैला जू तैसीखै थोमाणौवाल़ा थिया, बौलदा लागा, 5“ऐजौ इत्र तीन सौ दूसौ कै धियाड़ी कै दाम कै बोराबर औसौ, इथु बिकैयो कंगालो खै बांडै जाए सौकौ थियु?” 6तैणै ऐजै बात इथकारिए ना बुली कै तैसीखै कंगालो कै परवाह थी, पौरौ इथकारिए कै सै चोर थिया, औरौ तैसीकैईं तिनकी पौयसै की थोली थी औरौ तिंदु जू किछै पांव थिए, सै तिथु उंडु घाड़ो थिया। 7यीशुए बौल़ौ, “इयैं सौमय शै आगैई मैरै दफनाणो की तैयारी कारिए कौरे लो।” 8जिथुकै कंगाल तौ तोंवारै साथै सौदा रौंदै, पौरौ हांव तोंवारै साथै सौदा ना रौंदा।
लाजर कै मारै दैणौ का फोयसला
9जोबै यहूदी लोगै शुणु कै यीशु तिथै औसौ, तोबै लोगौ कै बौड़ी भीड़ तिथै आए। सै सिरफ यीशु कै दैखणौ कारिए ना आए रैई थी, पौरौ लाजर कै बै दैखदै आए रौवै थिए, जैसी तैणै मौरेयौंदे मुंजीदा जियुंदी कौरे राए थिया। 10तोबै मुख्य यहूदी पुरोहिते लाजर कै मारणौ का षडयंत्र रौचा। 11जिथुकै लाजर की बौजैह शै बौहितै लोग तिनुकै भाजदे लागै, औरौ तिनुऐ यीशु पांदी बिशवाश कौरा।
यीशु का यरूशलेम शहर दा जौरदार स्वागत
(मत्ती 21:1-11; मर 11:1-11; लूका 19:28-40)
12ओकी दूसै बौहितै लोगै जू फसह कै तैयारो मुंजी आए रौवै थिए, ऐजौ शुणु, कै यीशु यरूशलेम शहर दा आन्दा लागै रौआ। 13तिनुऐ खजूरो की डाल़ी कौरी, औरौ तैसी भैटिंदै हौटै, औरौ जोर शै लैरौ मारेयों बौल़ौ, “पौरमेशवर कै बौड़ाए हौंव! धन्य औसौ इस्राएल देश का राजा, जू प्रभु कै औधिकार शै आंव।” 14जैशैकैई यीशु यरूशलेम शहर दा ओऊवा, तिथै तैसी ऐक गाधडू भैटा, औरौ सै तिथपांदी बौठै गौआ। जैशै पवित्र शास्त्र दो लैखै राए,
15“ओए रै यरूशलेम शहर कै लोगौ,
डौरेया नै;
दैख, तैरा राजा गाधडू पांदी बोठेयो आन्दा लागै रौआ।”
16यीशु कै चैलै ऐजी बातौ आगै ना सौमझै रैई थी; पौरौ जोबै यीशु की महिमा प्रकट हौए, तौ तिनकै याद ओऊ कै जू किछै बै यीशु कै साथै हौंव सैजौ ठीक तैशैकैई ही थियु जू पवित्र शास्त्र दो लैखै राए थियु। 17तोबै भीड़ कै लोगै जू तैसी सौमय तैसीआरी थिए, ओकी लोगौ कै बौलदै लागै कै तैणै लाजर कै कब्र पौरैशा बौएदैयौ मौरेयौंदे मुंजीदा जियुंदी कौरे राए थिया। 18इयौं बौजैह शै बौहितै लोग यीशु शै भैटिंदै ओऊवे, जिथुकै तिनुऐ ऐसी चौमत्कार कै बारै मुंजी शौणै राए थियु। 19तोबै फरीसी लोगै आपी मुंजी बौल़ौ, “दैखौ आमै किछै ना कौरे सौकु, औरौ पूरी दुनिया कै लोग ऐसकै पौछौड़ियौ चालै रौवै।”
यीशु औरौ यूनानी
20तिथै कुणिए यूनानी देश कै लोग थिए, जू फसह कै तैयारो कै सौमय आराधना कौरणौ कारिए यरूशलेम शहर दै आए रौवै थिए। 21तिनुऐ गलील जिले कै बैतसैदा शहर कै रौणौवाल़ै फिलिप्पुस कै धोरे आयौ खै बिन्ती कौरे, “साहब जी आमुए यीशु आरी भैटिणौ चोऊं।” 22फिलिप्पुसे आयौ खै अन्द्रियास खै बौल़ौ, तोबै अन्द्रियास औरौ फिलिप्पुस जायौ खै यीशु कै बौल़ौ। 23इथपांदी यीशुए तिनुखै बौल़ौ, “कै सैजा सौमय आए गौआ, कै मुं आदमी कै बैटै कै महिमा हौंव।” 24हांव तुऔं कैंई साचौ-साचौ बुलू, कै जांव तौड़ी गियुँ का गुलटा माटियो मुंजी पौड़ेयौ मौरे ना जांव तांव तौड़ी सै इकली रौंव पौरौ जोबै मौरे जांव तोबै बौहिता फोल़ लांव। 25जू आपणी जिन्दगी कै प्यारे जाणौ, सैजै तियौं गवांए दैंदै, जू इयौं धोरती पांदी आपणै जिन्दगी कै प्यार नै कौरला सै आपणी जिन्दगी कै सौदा कै जिन्दगी तौड़ी बौचायौ राखदा। 26जै कुणिए मैरी सेवा कौरणै चांव, तौ आगै तैसी मैरा चैला बौणणौ चैंई, औरौ जिथै हांव औसौ तिथै मैरा सेवक बै हौला; औरौ जू कुणिए मैरी सेवा कौरला तौ पिता पौरमेशवर बै तैसकै इज्जत कौरदा।
आपणै मौत कै बारै मुंजी भविष्यवाणी
27“ऐबै मैरा जी घबराए रौआ कै ऐबै हांव का बुलू ‘ओए रै पिता मुखै इयौं पीड़ो कै सौमय दा बौचा?’ पौरौ ना, जिथुकै दुख सैहणौ औरौ मौरणौ कारिए हांव इयौं दुनिया दा आए रौआ। 28ओए रै पिता, प्रगट कौर कै तू कैतरा महान औसौ।” तोबै स्वर्ग पौरैशी ऐक ऐशणी आवाज़ आए कै, “मोऐं प्रकट कौरे राए कै हांव कैतरा महान औसौ, औरौ हांव इयौं बातौ कै होटेयो प्रकट कौरदा।” 29तोबै जू लोग खौड़ै हौयौ खै धाव शुणदै लागै रौवै थिए, तिनुऐ बौल़ौ; कै ऐजौ बादल़ौ कौ गुड़कौणो थियु। ओकी लोगै बौल़ौ, “कुणजाई स्वर्गदूत तैसीआरी बौल़ौऊवा।” 30इथपांदी यीशुए बौल़ौ, “ऐजै धाव तोंवारै फायदै कारिए थी, मुं कारिए नै। 31दुनिया दै लोगौ का न्याय कौरणौ कारिए पौरमेशवर का सौमय ऐबै आए रौआ, औरौ इयौं दुनिया का ठोगड़ा शैतान गाड़ै दिया जांदा। 32औरौ हांव इयौं धरती पांदी दा ऊंचे पांदी चौढ़ाए जांदा, औरौ सौबी खै आपणै धोरे लांदा।” 33ऐशै बौलेयौ तैणै ऐजौ प्रकट कौर दियु, कै सै कैशैकै मौरणौवाल़ा थिया। 34तिथपांदी लोग बौलदै लागै, “कै आमुए पवित्र शास्त्र दै ऐजी बातौ शुणी, कै मसीह सौदा जियुंदी रौंदा, तौ तुऐं काए बौल़ौ, कै आदमी कै बैटै कै ऊंचे पांदी चौढ़ाए जाणा जौरुरी औसौ? ऐजा आदमी का बैटा कुण औसौ। 35यीशुए बौल़ौ, कै पेयाशो (यीशु) ऐबै दैणिक ही सौमय तौड़ी तोंवारै बीच मुंजी औसौ, जांव तौड़ी पेयाशो तोंवारै साथै औसौ तांव तौड़ी हांडदै रौव; ऐशै नी हौंव कै इनारौ तुऔं खै हिशोए दैंव; जू इनारै दा हांडो सै ना जाणौ कै कुकै हांडै रौआ। 36जांव तौड़ी पेयाशो तोंवारै साथै औसौ, पेयाशै पांदी भोरोशा राखौ कै तुऐं पेयाशै कै सन्तान बौणौ।” ऐजी बातौ बौलेयौ कै यीशु तिथैदा आगु हौटा औरौ तिनुवांदा दूर रौआ।
हौणौवाल़ी बातौ कौ पूरु हौणौ
37तोबै यीशुए तिनकै सामणै ऐतरै चौमत्कार कै काम दिखाए, तोबै बै तिनुऐ तैसी पांदी बिशवाश ना कौरी; 38ऐजौ इथकारिए हौं ताकि यशायाह पौरमेशवर कै बातौ बौताणौवाल़ै जू बौल़ै राए थियु सैजौ साचौ हौए जांव। तैणै बौल़ौ:
“ओए रै प्रभु, ओए रै प्रभु, कोसीए बै अमारै सौंदेश पांदी बिशवाश ना कौरी,
औरौ कुणिए ना सौमझौ कै ऐजै तैरै शौकतीशाली ताकत थी।”
39इयौं बौजैह शै सैजै बिशवाश ना कौर सौकी, जिथुकै यशायाहै दुजाल़ियो ऐजौ बै बौल़ौ:
40“तैणै तिनकी आखी आन्धी कौरी दी ताकि सै दैखै नी सौकौ,
औरौ तिनकै दिमाक बंद कौरे दिए ताकि सै सौमझी नी सौकौ।
नही तौ सै मैरी ढौबौ फिरी जांदै औरौ हांव तिनु ठीक कौरे दैंदा।”
41यशायाहै ऐजी बातौ इथकारिए बुली, कै तैणै यीशु कै महिमा सौमय दी आगै दैखै; औरौ तैसकै बारै मुंजी बातौ कौरी। 42तोबै बै यहूदी नेताओं मुंजीदै बौहितै तैसी पांदी बिशवाश कौरा, पौरौ फरीसी लोगौ की बौजैह शै सै खौलेयौ तैसी नी मानौ थिए, तिनु इयौं बातौ का डौर थिया कै तिनु यहूदी सभा-घोरो शै बायरै ना गाड़ै दैंव। 43जिथुकै तिनुकै पौरमेशवर कै तारीफ शै आदमी कै तारीफ जादा प्यारे लागै।
पेयाशै दौ हांडणौ
44यीशुए भीड़ कै लोगौआरी जोर शै बौल़ौ, “जू मुं पांदी भोरोशा कौरौ, सै मुं पांदी नै पौरौ मैरै भैजणौवाल़ै पौरमेशवर पांदी बिशवाश कौरौ। 45औरौ जू कुणिए मुखै दैखौ, सै मैरै भैजणौवाल़ै पौरमेशवर कै दैखौ। 46हांव दुनिया कै लोगौ कारिए पेयाशै कै जैशणा आए रौआ, ताकि जू कुणिए मुं पांदी बिशवाश कौरौ, सै इनारै दै नी रौंव। 47जै कुणिए मैरी बातौ शोणेयो खै तिनुकै ना मानौ, तौ हांव तैसी दोषी ना ठैहरोऊं। जिथुकै हांव दुनिया कै लोगौ कै दोषी ठोहराणो कारिए ना ऐई, पौरौ तिनु बौचांदा आए रौआ। 48जू मुखै बैकार सौमझौ, औरौ मैरी बातौ ना शुणौ तैसका न्याय कौरणौवाल़ा ऐक औसौ: यानी जू बातौ मोऐं बौल़ै रैई, सै तैसीकै न्याय कै दूसै दोषी ठोहरांदी। 49जिथुकै मोऐं खुद आपणै औधिकार शै आपणी औरौ शी बातौ ना कौरी, पौरौ पिता पौरमेशवरे जैणै मुखै भैजै राए तैणैई मुखै आज्ञा दैय राए, कै का-का बौतौऊं, औरौ का-का सौमझौऊं। 50औरौ हांव जाणुए कै तैसकै आज्ञा कै मानणै सौदा कै जिन्दगी कै ढौबौ लोए जांव इथकारिए हांव तुऔं सैजौई बौतौऊं, जू पिता पौरमेशवर मुंकैई बौल़ौ।”
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
यूहन्ना 12: SRXNT
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
