यूहन्ना 10
10
चौराईया औरौ भेड़ो का उदारण
1“हांव तुऔं कै साचौ-साचौ बुलू, कै जू कुणजाई दवार शै भेड़शाल़ दा भीतरै ना आंव, पौरौ कोसी ओकी ढौबौशा आंव, सै चोर औरौ डाकू औसौ। 2पौरौ जू दवारो बाटी भीतरै आंव सै भेड़ो का चौराणौवाल़ा औसौ। 3तैसी कारिए रोखवाल़ा दवार खोले दैंव, औरौ भेड़ो तैसकी आवाज़ पोयछाणो, औरौ सै आपणै भेड़ो का नांव लोयो बोईदौ औरौ बायरै लोए जांव। 4औरौ जोबै सै आपणी सौबै भेड़ो खै बायरै निकाल़ै पांव, तौ तिनकै औगौड़ियौ-औगौड़ियौ चालदा रौंव, औरौ भेड़ो तैसकै पौछौड़ियौ-पौछौड़ियौ हांडो जिथुखै सै तैसकै धाव पोछैयाणौए। 5पौरौ सै पोराये कै पाछै दी ना हांडदी, पौरौ तिनुदी दूर दोऊड़ो जिथुकै सै पोरायो कै धाव ना पोयछाणो।”
6यीशुए तिनुखै ऐजा उदारण बौतौऊवा, पौरौ सै तिथका मतलब ना सौमझी कै तैणै तिनु का बातौ बौल़ै लोई।
7तोबै यीशुए तिनुखै हौजौ बौल़ौ, “हांव तुऔं खै साचौ-साचौ बुलू, भेड़ो कौ दवार हांव ही औसौ। 8जैतरै मुं दै आगै ओऊवे सै सौबै चोर औरौ डाकू थिए, पौरौ मैरी भेड़े तिनकी ना शुणी। 9हांव ही दवार औसौ; जै कुणिए मैरै दवारा भीतरै आला, पौरमेशवर तैसका ही उध्दार कौरला औरौ भीतरै आया जाया कौरला औरौ खाणौ कारिए घास दैला।
10चोर सिरफ भेड़ो कै चुराणो, मारणौ औरौ नाश कौरणौ कारिए ही आंव। हांव इथकारिए ओऊवा ताकि सै पूरी तरह शै जियुंदै रौंव।
11आछा चौराईया हांव ही औसौ; आछा चरवाह भेड़ो कारिए आपणी इछा शै मौरे जांव। 12धियाड़ी पांदी राखैयौंदा नोकर जोबै भेड़िए कै आन्दै बैई दैखौ तौ दौड़ै जांव। सै भेड़ो कै छोड़े दैन्दा जिथुकै सै तिनका चौराईया ना आथी औरौ भेड़ो तैसकी ना आथी। इथकारिए भेड़िया तिनु पांदी हमला कौरौ औरौ डार कै तितर बितर कौरे दैंव। 13सै इथकारिए भागै जांव कै सै मोजदूर औसौ औरौ तैसीकै भेड़ो खै परवाह ना आथी।
14-15आछा चौराईया हांव औसौ, जैशैखै पिता पौरमेशवर मुखै जाणौ औरौ ऐशैखैई हांव पिता पौरमेशवर कै जाणुए, तैशैकैई, हांव आपणी भेड़ो कै जाणु औरौ मैरी आपणी भेड़े मुखै जाणौए। औरौ हांव आपणी भेड़ो कारिए मौरणौ कारिए बै तैयार औसौ। 16मैरी ओकी बै भेड़ो औसौ, जू ऐसी बाडे़ की ना आथी मुखै तिनुकै लाणी बै जौरुरी औसौ, सै मैरी आवाज़ पोयछाणली; तोबै ऐकैई डार औरौ ऐकैई चौराईया हौंदा।
17पिता पौरमेशवर इथकारिए मुं आरी प्यार कौरौ जिथुकै हांव आपणी इछा शै मौरु ताकि हांव होटेयो जियुंदी हौए सौकु। 18कुणिए बै मैरै जिन्दगी मुंआदे छिणै ना सौकौ, पौरौ हांव तियौं आपी ही दियु। मुखै तियौं दैणौ का औधिकार औसौ औरौ तियौं लोणो का बै औधिकार औसौ। जिथुकै ऐजै आज्ञा मुखै मैरै पिता पौरमेशवर कैईंदै भैटी रौए।”
19इनु बातौ की बौजैह शै यहूदी लोगौ मुंजी होटेयो फूट पौड़ै। 20तिनुमुंजी दै बौहितै सारै लोग बौलदै लागै, “ऐसी दै दुष्टआत्मा औसौ, औरौ ऐजा पागल औसौ, ऐसकी नी शुणौ।”
21पौरौ ओकी लोगै बौल़ौ, “जैसदै दुष्टआत्मा हौंव सैजा आदमी ऐशणी बातौ ना कौरौ। का ऐक दुष्टआत्मा कौलोंई बै ऐक आन्धै कै ठीक कौरे सौकौ?”
यहूदी लोगौ का बिशवाश ना कौरणा
22हियुन्दौ का मौसम थिया, औरौ यरूशलेम शहर दा यहूदी मन्दिर कै स्थापना का तैयार थिया। 23औरौ यीशु मन्दिरो कै आँगणो दा थिया, औरौ तियौं जौगैह दा घुमै रौआ थिया जिथुकै लोग राजा सुलैमान का ओसारा बौल़ौ थिए। 24तोबै यहूदी नेताए तैसीखै आयौ खै घेरे दिया औरौ पूछु, “तुऐं आमु जादा सौमय तौड़ी शक दै पाए राए। जै तू मसीह औसौ, तौ आमुखै साफ-साफ बौताए दै?” 25यीशुए तिनुखै जवाब दिया, “मोऐं तुऔं खै बौल़ै दियु, पौरौ तुऐं बिशवाश ना कौरौ, जू काम हांव आपणै पिता पौरमेशवर कै कौरु सैजाई मैरा गवाह औसौ। 26पौरौ तुऐं इथकारिए बिशवाश ना कौरौ, जिथुखै मैरै भेड़ो मुंजीदै ना आथी। 27मैरी भेड़ो मैरै धाव पौछेयाणौए, औरौ हांव तिनुकै जाणुए औरौ सै मैरै पाछै-पाछै दी हांडो। 28औरौ हांव तिनुकै सौदा कै जिन्दगी दियु, औरौ सै कौलोंई नाश ना हौंदै औरौ कुणिए तिनुखै मुंआदे छीणै ना सौकौ। 29मैरा पिता पौरमेशवर, जैणै तिनुखै मुखै दैय राए, सै सौबिदा बौड़ा औसौ, औरौ कुणिए बै इनुखै पिता पौरमेशवर खै हाथौ पौरैशी छीणै ना सौकौ। 30हांव औरौ पिता पौरमेशवर ऐक औसौ।”
31यहूदी नेताए तैसी मारणौ कारिए दुजाल़ियो पाथर टिपै। 32इथपांदी यीशुए तिनुखै बौल़ौ, “मोऐं तुऔं आपणै पिता पौरमेशवर कै ढौबौशै बौहितै भले काम दिखाए राए, तिनुमुंजी दै कोसी काम कारिए तुऐं मुखै मारणौ कारिए पाथर टिपो?” 33यहूदी नेताए जवाब दिया, “भले काम कारिए आमै तांव पांदी पाथरो की ना लोऊँ, पौरौ पौरमेशवर कै नेंदैया कौरणौ की बौजैह शै औरौ इथकारिए कै तू आदमी हौयौ दावा कौरे कै तू पौरमेशवर औसौ।” 34यीशुए तिनु जवाब दिया, “का पवित्र शास्त्र दो ऐशैखै ना लैखै रैई कै पौरमेशवरे आपणै लोगौ कै नेताओं खै बौल़ौ कै, ‘तुऐं ईशवर औसौ?’ 35औरौ तुऐं जाणौए कै पवित्र शास्त्र कै तुऐं ना बौदलै सौकौ, जै सै लोगौ कै नेताओं कै ईशवर बौलल़ै, 36तौ जोबै हांव ऐजौ बुलू, ‘हांव पौरमेशवर का बैटा औसौ।’ तौ तुऐं मुखै काए बौल़ौ, ‘तू नेंदैया कौरे।’ इथकारिए मोऐं बुलू, ‘हांव सैजाई औसौ जैसी पिता पौरमेशवरे जौई कौरा औरौ मुखै दुनिया पांदी भैज राए।’
37जै हांव आपणै पिता पौरमेशवर कै काम नी कौरदा, तौ मैरा बिशवाश ना कौरौ। 38पौरौ जै हांव कौरुए, तौ चाहै मैरा बिशवाश ना बै कौरौ, पौरौ तिनु कामौ पांदी बिशवाश कौरौ, तोबै तुऔं पौता चालदा औरौ तुऐं जाणदै कै हांव पौरमेशवर दा रौंऊ।”
39तोबै तिनुऐ हौजौ तैसी थामणो कै कौचिश कौरे, पौरौ सै तिनुवांदा दूर हौटै गौआ।
40तोबै यीशु यरदन नोंदी कै पूरब दिशा कै ढौबौ तियौं जौगैह दा हौटै गौआ, जिथै यूहन्ना आगै बपतिस्मा दैया कौरौ थिया, औरौ तिथी रौआ। 41औरौ बौहितै सारै लोग तैसकै धोरे आयौ खै बौल़ौ थिए, “यूहन्नाए तौ कुणजैई चौमत्कार कै काम ना दिखैई, पौरौ जू किछै यूहन्ना ऐसकै बारै मुंजी बौल़ौ थिया सै सौबै साचौ औसौ।” 42औरौ तिथै बौहितै लोगै यीशु पांदी बिशवाश कौरा।
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
यूहन्ना 10: SRXNT
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
