Matìyò 7
7
Anug ni saʼ bəd ndəŋ
(Lug 6:37-38; Lug 6:41-42)
1Yeso ya chè imbìghè gha, “Imbə̀ʼ mbə̰ saʼa awən wə̀d, nji Ŋwiye biri bə saʼ awən. 2Icheg ne mbə̰ mbe sàʼa bəd angu, à ya bə̀ ìwiwən ne Ŋwiye biri bə saʼ awən. Icheg ne mbə̰ mbe sɔ̀bɔ isaʼi igun bəd ya bə̀ ìwiwən ne Ŋwiye biri bə sɔb isaʼi igun inən. 3Aton ne àghò ya nḛ̀ achəpi aghi ne yaʼi inga ighə abə ìwe ifi ne chəyi àghò ya bàrà akwiri iŋwen ne yaʼi inga ìwe tì ighə àkə gha? 4Àghò kə̀ che iye ni ghà abə ìwe ifi gha, ‹Si mə̀ chiye achəpi aghi ne yaʼi ine inga ighə,› ne akwiri iŋwen yaʼi inga ìwe tì ighə? 5Àghò ya wə̀d ne bèmnè inug! Fə bi chì akwiri iŋwen ze ne yaʼi ine inga ighə bɔŋ si bàd isiŋi icheg chɔm ni chì achəpi aghi ne yaʼi inga ighə abə ìwe ifi.
6Imbə̀ʼ mbə̰ naʼa awən aghi Ŋwiye abə bog, nji ti biri ghabri sètì awən iba iba. Imbə̀ʼ mbə̰ mèʼe awən mə̀pə#7:6 Mə̀pə ya ikum ndəŋ àka inun mɔ̀ʼɔ ne ya kwàʼ ìti chɔm chɔm. abə ìkuŋə, nji mbi biri yèn igun tə̀ʼrì.”
Anug ni nɔn tì ni kə̀b fɔrɔ ni gɔngi.
(Lug 11:9-13)
7Yeso ya chè imbìghè gha, “Mbə̀ nɔn, Ŋwiye biri nàʼ inən. Mbə̀ kəbə, mbə biri bàd. Mbə̀ gɔngi, Ŋwiye biri fìʼì inən. 8À ya ane imbə̀ʼ icheg ne wə̀d ne nɔ, Ŋwiye biri nàʼ ibo. Wə̀d ne kə̀bi, Ŋwiye biri ghì wì bàd. Wə̀d ne gɔngi, Ŋwiye biri fìʼì ibo. 9Wə̀d abɔ̀ʼ inən ne tì wì naʼ iteg abə ŋwan məd anyumə̀ ne wì bìri ngə̀ŋ, 10kə̀ nàʼ jo anyumə̀ ne wì bìri su àkə we? 11Mbə̰ bəd ne ghìyə̀ inug tibɔ̀ŋ kə mə̀ kyèri icheg ni nàʼ ighi chɔm chɔm abə ìmbən bɔn, mbə̀ si kɔ̀ndi icheg ne ìwən Mbaʼ we ne yaʼi ikaŋ àbɔ̀ŋɔ biri taŋ nàʼ ighi chɔm chɔm abə bəd mbe ne nɔ̰ ighi ibo.
12Ane, inga inug ijìm, aghi ze ne àghò kə̀bi gha mbe faʼa ine, àghò faʼa àzewən abə mə̀mbin. Aŋa ya anug ne yaʼi inga mə̀nɔ̀ʼɔ̀ Muse fɔrɔ inga inug mbe ne bədkə̀n Ŋwiye yaya ghà.”
Inuʼ ikam kwa tì inuʼ ikam kyen
(Lug 13:24)
13Yeso ya chè imbìghè gha, “Mbə̀ nyi inga anug ìfɔ̀n ikaŋ ane inuʼ ikam kwa. Inuʼ ikam kyen fɔrɔ inɔnjì kyen ya we ne ghò inga asiŋi ne bəd biri ku nim. Bəd nɔʼ nɔʼ ya nyḭ̀yḛ inga ìwiwən. 14Àsi inuʼ ikam kwa tì inɔnjì kwa ya we ne ghò inga asiŋi ne bəd biri jəg ìtḛ̀. Bəd ne biri nyi inga asiŋi ìtḛ̀ ze ya məyi iki piʼì.”
Anug imbə̀ʼ azed tì titam azed
(Lug 6:43-44)
15Yeso ya chè imbìghè gha, “Mbə̀ we awən tì bədkə̀n mbe ne ghà inug ako. Anyumə̀ ne mbɔb mbe yèʼe inən, mbi ya bɔ̀tɔ kwàʼ icheg njə̀g. Si ya gha, mbɔb ya kwàʼ ìfɔn tɔ tɔ. 16Mbə̰ biri kyeri awɔb ane ìtɔb tìghinùg. Tì fìkɔ̀ njəŋ ko mə̀namchì? Kə̀ tì fèkye ko akwebì? Chəyi ka! 17À ya bə̀ ane ne azed chɔm ze ko titam chɔm, azed tibɔ̀ŋ bə̀ ko titam tibɔ̀ŋ. 18Chəyi tì azed chɔm ko titam tibɔ̀ŋ. Chəyi tì azed tibɔ̀ŋ bə̀ ko titam chɔm. 19Mbi biri sɔb ized ijìm mbe ne chəyi mbe ko titam chɔm màʼ inga iywid. 20Ane, mbə̰ biri kyeri awɔb ane ìtɔb tìghinùg.”
Bəd ne chəyi Yeso kyeri awɔb
(Lug 13:25-27)
21Yeso ya ghà ywìrì ghà inɔb gha, “Kayi wə̀d ijìm ne kàrà amə gha, ‹Anɔŋisəg! Anɔŋisəg!› biri nyi inga anug ìfɔ̀n ikaŋ. À ya məyi bəd mbe ne fàʼà inug mbe ne ìmə Mbaʼ ikaŋ àbɔ̀ŋɔ kə̀bi ne biri nyi inga anug ìfɔ̀n məd. 22Inga nyùmə̀ we ne Ŋwiye biri saʼ bəd, bəd nɔʼ nɔʼ biri ghà inum gha, ‹Anɔŋisəg, imbə̀ʼ à ya inga ìwe ikum ne tì yaya ghà ikən Ŋwiye, bə̀ kàmna izwighi tibɔ̀ŋ, bə̀ fàʼà iyeti inug?› 23Mə biri si ghà inɔb gha, ‹Chəyi mə̀ kyeri awən. Mbə̀ kye iban inum. Mbə̰ ya bəd ne ghìyə̀ inug tibɔ̀ŋ!›”
Wə̀d iwe tì anen
(Lug 6:47-49)
24Yeso ya bə̀ ywìrì ghà inɔb gha, “Wə̀d ijìm we ne zùghə àmə anug bə̀ fàʼà ikuchèg ne ze yaʼi, wì ya icheg wə̀d iwe ne ya kɔri nəb igun igho. 25Mbə̀ŋ ya no, tigyi sweg gwàʼà, afim bə̀ chè tḭ nəb ze. Si ya gha, chəyi zì ya wùti imbə̀ʼ icheg ne ati nəb məd ya wì ya kɔri igun igho. 26Àsi bəd mbe ne zùghə àmə anug chəyi mbe fàʼà icheg ne mbi koʼi ni fàʼ, mbɔb ya icheg anen ne kɔri ìzi nəb igun tìsiwaŋ. 27Mbə̀ŋ ya no, tigyi sweg gwàʼà, afim bə̀ chè tḭ nəb ze, zì suyə̀ yɔ̀kɔ̀ yɔ̀kɔ̀.”
28Anyumə̀ ne Yeso ya màni ni ghàm inug mbo̰, anug ya chè inɔ̰ bəd we 29imbə̀ʼ icheg ne chəyi wì yaya chwìte inug icheg ìmbɔb mə̀chwitì mə̀nɔ̀ʼɔ̀. Wì yaya chwìte inug icheg wə̀d ne beri ika ni chwiti inug.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Matìyò 7: MBTP
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
© 2019 CABTAL
