Luk 24
24
Jeju ɓai lo koit
(Oo Mat 28:1-10; Mrk 16:1-11; Jã 20:1-10)
1Dekɨdẽg'n non unɨn nyag kɨ kootmbĩ'n ɗan go, awɨn ne dɔɓadt kɨsĩ ritit ndɔt kɨ dasabang lo ndɔg kɨtanãimɨta. 2Oon ndubɨrɨn mbal ta dɔɓadt kɔ woi kete nõdt. 3Andɨnt na ngahn dãro Bɨraɓe al. 4Ɗan nõ, kamd ɗa dad ta paa dɔ nyat 'nten ɓaitɔ ye, oon deg joo ɗan kadt kɨ kubg kɨ ndulo ngẽingẽi. 5Ɓool tɔl dekɨdẽg sɔkɨr ad lan dɔd kɨber. Deg'n non elɨnd anan: Kɨtɔɗi i ɗa i sahn ne ngekumkajɨr ku ngékoigt a? 6Goto nẽbe, na ɓai lo koit. I gan kamsɨ dɔtat'n elsɨ lon ndɨn dɔning Galilet ɓaitɔ. El an: 7Kari na a lan Ngon de ji ngéɗamajalgt, a gana kagdosɨt, na ndɔt kɨkõmɨta a ɓai lo koit. 8Dekɨdẽg gan kamd dɔ tagt lo Jeju. 9Ɓain dɔɓadt tel ɗen ɓe, ɔrrɨn hoi nyag 'nten ngéndoog kɨkɨlah gidaikɨɗa kɨ ndegag tube tɔ. 10Dekɨdẽg'n elɨn ngombangkɨlag tag'n non ye, i Mari Madelen kɨ Jãn, kɨ Mari kõ Jak kɨ ndeg dekɨdẽ madg'n ĩn sed nat. 11Na ngombangkɨlag oon tit ta'n non i ta kɨpãbe, taan ta lo dekɨdẽg al. 12Na Pierr ɓai, la ɔrr kɨ ngɔd aw dɔɓadt, ud gat oo kub duba tã to kɨɗabe. Kamla ɓai aw ɓe lon, ta yaa dɔ nyat'n ɗa nya.
Jeju ndɔd ngéndoog lon joo dɔ ɗob kaw ɓet kɨ Emawst
13Ndɔt'n non deg joo ku ngéndoogt lo Jeju ndɨ awɨn ngonɓet mad kɨ tɔa i Emaws ɗoba wo kɨ ɓebo Jerusalem asɨ kilometɨr kɨlah gidaikɨɗa. 14A dan na ta, dɔ nyagt tube'n ɗa nya. 15Lon a dan na ta, na a ndɨjen na ta ɓaitɔ ye, Jeju kɨ dɔn ɗe rodt aw sed nat. 16Na tɔg mad ut kumd ad gerɨn takĩa Jeju al. 17Jeju eld an: Ta ɗi a elɨn na, a i lan nat i ndɨ aw ne a? Duban, ɗa ndɨngan ndo. 18Kɨ kɨɗa'n tɔa i Kleopas tura an: I kɨ kɨɗaibe la ĩ mbah kam Jerusalemt la ĩ ger nyag'n ɗan nya kamt kam ndɔgt'n non al yo? 19Jeju eld an: Nya ɗig a? Elɨna anan: Nyag kɨ dɔ Jeju kɨ Najaret'n i Ngekelta kɨ ta Luwaht, kɨ ngétɔg kam kɨlat nõ Luwaht kɨ nõ degt tube tɔ. 20Ngéjamosɨkadkari kɨbog kɨ mbaiɓeg loj lana kad gangɨn ta koi dɔat, gana kagdosɨt tɔ. 21Na maɗi kɨ nda kamj dɔat j'an ĩla a badɔ Israel ye. Na kanj nyag'n non tube, ɓone la i ndɔ kɨkõmɨta go nyagt 'nten'n ɗan nya. 22Dɔ ĩt 'nten tɔ dekɨdẽ madg ku degt loj elɨn ad yaj, awɨn dɔɓadt kɨ sĩ ritit. 23Na lon ngahn dãroa al ye, tel ɗe anan: N'oon malaikag, anan aw kɨ dɔn dõ. 24Kɨmadg ku ĩgɨtɨn ndɨn nat sed tɔ ye, awɨn dɔɓadt, ngahn tit'n dekɨdẽg elɨn ne, na ĩn kɨɓeg oon Jeju kɨ kumd al.
25Kamla Jeju eld an: Ĩn ɓood deg ngékamkɔidɨrɨr dɔ kadkam nyagt tube'n ngékelta kɨ ta Luwaht elɨn. 26Kari na Krist a dai yon kɨ nyag kɨ kõ 'nten, kamla a ndɨ kam kɔsɨgont tɔ ale? 27Ɔrrd girr nyag kɨ ndangɨn dan ne dɔa kam maktubt lo Luwah tube mba girra dɔ maktubgt lo Moij ɗen kɨdɔ tat lo ngékelta kɨ ta Luwaht tube.
28Nãi nderbe kad teen ngon ɓet'n ndɨ awɨnt, na Jeju ɗa tit ndɨ aw kɨ kete ɓaitɔ. 29Na deg kɨ joo'n non ɗe elɨna anan: I ndɨ sej, kɨta lo kɨ sɔl i nderbe, kàd ndɨ aw kɨta kud tɔ. Ad Jeju and kam kujt kad kɨ'n ndɨ nat sed. 30Lon ndɨ sed nat ta nyasat ye, un bɨna ɗa mersi Luwah hɔ tet, ad'd. 31Kamla kumd tee ad gerɨn takĩa Jeju, na nyimɨr takumdt. 32Elɨn na anan: Lon a elj ta dɔ ɗobt, a ɔrrjɨn girr ta kɨ kam maktubt lo Luwah ye, takela i tit horr kɨ õ kamjt ale? 33Tajigtbe ɓai awɨn ɓebo Jerusalemt gog, ngahn kɨkɨlah gidaikɨɗa'n non, kɨ ĩgɨn ĩn sed nat, kawɨn na kɨ nat lo kɨɗabe. 34Ndɨ anan Bɨraɓe ɓai lo koit, tee hɔi kɨ ro Simõt. 35Deg kɨ joo'n non ɔrrɨn hoi nyag'n ɗan nya dɔ ɗobt, kɨ tit'n ad'd gerɨn ne takĩa Jeju lo tet bɨnat.
Jeju tee hɔi kɨ ro ngéndoogt lon
(Oo Mrk 16:14-18; Jã 20:19-29)
36Ndɨ elɨn tag 'nten ɓaitɔ a ne, Bɨraɓe kɨ dɔn ɗa dandt eld an: Lapia kɨ ndɨ dɔsɨt.
37Ɓool tɔld sɔkɨr ad ndild tee saw oon a anan i ndil la n'ndɨ n'oon ye. 38Na Jeju eld an: Kɨtɔɗi kamsɨ gangɨn ngalang a? Kɨtɔɗi tɔ tagah kɨtitbe ndɨ ɓain kamsɨt a? 39Oon jim kɨ njam, i mĩ kɨ dɔm, ɔdmɨn oon; kɨta ndil a kɨ dã kɨ kɨngag al tit'n i ndɨ oon ne m'ndɨn. 40Lon elta 'nten ye dad jin kɨ njan. 41Na lon ndɨ adɨn kamd al ɓaitɔ kɨta ronel, ta yad tɔ ye, eld an: I ndɨn kɨ nyasa mad nẽbe e? 42Adɨna gind kanj kɨ su kɨ mbãr tej. 43Jeju un sa nõdt. 44Kamla eld an: 'Nten la i ta lom'n m'elsɨ lon mĩn sesɨ nat ɓaitɔ ye. Kari na a tɔlɨn ta nyag tube'n ndangɨn dan ne dɔm kam Mberkɨndat lo Moij kɨ kam tat lo ngékelta kɨ ta Luwaht kɨ kam pagt tɔ.
45Kamla tee hangald kɨtakad gerɨn ne girr ta kɨ kam Maktubt lo Luwah ye. 46Eld an: Titbe la ndangɨn ne kam Maktubt lo Luwah ye, kari na Krist a dai yon na ndɔt kɨkõmɨta a ne a ɓai ku ngékoit. 47Kari na a lan mber ta kɨ ro girrdegt kɨ dang dang tube kam tɔat kad tɔrrɨn ndid dɔ majalgt lod; a mbã girra Jerusalemt. 48Ĩn la ĩn ngémanaj dɔ nyagt 'nten ye. 49Oon tɔ. M'ndɨ m'la kɨ nya'n Bɔwm unɨn kɔn adsɨ kɨdɔsɨt, na ĩn i ndɨn bá kam ɓebot, mbã kad tɔg kɨ ko dõ dɔrãt ɗe dɔsɨt.
Jeju tel aw dɔrãt gog
(Oo Mat 16:19-20; Knk 1:4-12)
50Kamla aw sed kɨtɨga mbã kɨkad ɓet kɨ Betani, nu la ɔi jin kɨ dõ njangɨn dɔd ye. 51Lon ɗa njang dɔd ɓaitɔ ye, Jeju nyad, unɨn na kɨ kam dɔrãt dõ. 52Ɔsɨn dɔd ber nõat, kamla tel awɨn ɓebo Jerusalemt gog kɨ ronel kɨ ngãi. 53Ndɨn kam kuj ndub Luwaht kɨndɔgndɔg ndɨ ndubɨn Luwah.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Luk 24: MlL
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
