Luk 23

Jeju ɗa nõ Pilat't

(Oo Mat 27:2,11-14; Mrk 15:2-5; Jã 18:28-37)

1Koosɨg lod tube ɓai, ɔrrɨn Jeju an sia nõ Pilat. 2Mban girr kun dɔa, anan: Kɨ ndɔd de'n ɗan ɗa sɨla deg loj kɨ taanɗɔɔ ngekõɓeg, eld kad ban lambo Sejar al, ɗa el an: Nĩ kɨ dɔn nĩ Krist kɨ ngar tɔ. 3Pilat ndɨje Jeju an: Ĩ ngar lo Juipg a? Jeju tura an: Ĩ el titbe.

4Pilat el ngéjanyamosɨkadkari kɨbog kɨ deg koosɨg an: M'ngaa ta mad dɔ det'n ɗan al.

5Na deg koosɨg hɔn kɨ dɔt kɨ tɔg anan: Ndɨ sila deg kɨ nyandoo loa kam dɔning Judet kɨtaagbe, mbagɨra ko Galilet mbã ɗen nẽbe.

6Na lon Pilat oo dɔ ta 'nten ye, ndɨje ke i de kɨ dɔning Galilet a? 7Lon ger kad Jeju i ko ɓekõt lo Herod ye, laa kɨ ro Herodt gog kɨta Herod kɨdɔn tɔ ndɨ ɓebo Jerusalemt ndɔgt'n non.

Jeju ɗa nõ Herodt

8Lon Herod oo Jeju ye, ɗa ronel ngãi. Kɨtɔ kaglo ngãibe ndig kɨ n'ooa kɨta nyag ngãibe ĩn oo dɔat; nda kamɨnt kad kɨ n'oo Jeju ɗa nya mad kɨ ya. 9Herod ndɨje tag ngãibe na Jeju tur al. 10Na ngéjanyamosɨkadkari kɨbog kɨ ngéndoo Maktubg ɗa unɨn dɔ Jeju kɨ rotɨngad. 11Herod kɨ ngéɗɔɔg lon telɨna nya kɨ pãbet, gon dɔat na lana kub kɨmaj ngãi. Na tel laa kɨ ro Pilat't gog. 12Kam ndɔt'n non Herod kɨ Pilat telɨn ne namna, kɨta maɗi, ndoor i kɨnadt.

Gangɨn ta koi dɔ Jejut

(Oo Mat 27:15-30; Mrk 15:6-15; Jã 18:39—19:16)

13Pilat kun ngéjamosɨ kadkarig kɨ mbaiɓeg kɨ deg kɨnat. 14Eld an: I ɗen kɨ de'n ɗan romt tit de kɨ ngesɨla deg kad taanɗɔɔ, na oon maj, m'nder girra nõsɨt, na m'ngaa ta mad dɔat al tɔ. 15Herod kaa ngah ta mad dɔat al, tel la sia kɨ gog rojt. Oon maj de'n ɗan ɗa nya mad kɨ asɨ koi al. 16Kɨtɔ 'nten m'a mad ndana kɨ ndeh n'a m'ɔrra. 17Kɨtɔ ndɔ ɗa nah Pakɨ kɨɗen, kari na a ɔrrɨn dedangãi kɨɗa. 18Na deg tube unɨn ndid kon ne anan: I tɔlɨn de'n ɗan, na ɔrr Barabas adj. 19Barabas i de'n lana dangait, kɨta lon deg ndun ɗɔɔ kam ɓet ndoorɨn ne romag ye, tɔl de. 20Pilat ndig kɨ n'ɔrr Jeju, kɨta 'nten tel eld ta gog ɓaitɔ. 21Deg kon kɨ tɔgd kɨtɔi anan: I gaa kagdosɨt. I gaa kagdosɨt. 22Pilat eld ta kɨkõmɨta, an: Kɨtɔɗi? Ɗi kɨmajal de'n ɗan ɗa a? M'ngaa ta mad kɨ asɨ koi dɔat al; m'a mad ndana kɨ ndeh, na m'a m'ɔrra. 23Na ɔsɨna tõtõ kɨ ndid kɨbo, ndɨjena kɨ gana kagdosɨt, dumɨn dɔ Pilat kɨ ndid kɨbo'n kon ne. 24Pilat gangta kɨ ɗan nya'n kɔna. 25De'n lana dangait kɨta ɗɔɔ kɨ ndu kɨ tɔl de, ad i de'n ndɨjena ye ɔrra na la Jeju jidt kad ɗan sia kɨgo ndigt lod.

Gan Jeju kagdosɨt

(Oo Mat 27:31-56; Mrk 15:20-32; Jã 19:16-37)

26Lon ndɨ awɨn kɨ Jeju ye, ndɔdɨn de mad kɨ dɔning Sirent, tɔa i Simõ, ɓai ndɔɔt ndɨ ɗe kam ɓet, hɔna lan kagdosɨ dɔat kad to ndulon go Jeju.

27Bakad deg koosɨg a ndulon goa kɨ dekɨdẽg tɔ, ĩgɨn a tɨgan kad'd a udɨn wi kɨ tɔa. 28Jeju mbel kɨ rodt an: Ngan kɨdẽg kɨ Jerusalem, ot nõmɨn, na i non rosɨ kɨ ngansɨg. 29Kɨtɔ oon maj, ndɔg a ɗen nõ ĩn a elɨnt anan: Ngeronel la i kujdekɨdẽ ye, ngéronel la ĩn dekɨdẽg'n oojɨn nja kɨɗa al, kɨ ĩgɨn lan mba ta ngont ad il al tɔ.

30Kamla a mbã girr kel mbalbog kɨ son kɨ dɔdt. Kɨ doorlog utɨn dɔd. 31Kɨtɔ ĩla ɗan nyag 'nten lon kag i mbool ɓaitɔ a ne, ɗi a ɗa nya lon kag ĩn kɨ tut a?

32Ɔrrɨn ngéɗamajal madg joo tɔ, kad kɨ'n tɔlɨnd nat kɨ Jeju. 33Lon ɗen lot'n a kunɨna ka dɔ ye, nu la gana kagdosɨt nat kɨ ngéɗamajal kɨ joo'n non, kɨkɨɗa ko kõat kɨ mad ɗa ko gelat. 34Jeju el an: Bɔw i nyàgo majal lod kɔ; kɨta gerɨn nya'n ɗa ɗan al. Deg kegɨn kubg loa yan yuk dɔt.

35Deg lan na nat ɗa oon, na mbaiɓeg lo Juipg telɨn Jeju nya got anan: Aj deg madg, ĩla i Krist kɨ mbed lo Luwah a ne, kɨ aj ron. 36Ngeɗɔɔg tɔ ɗa gon dɔat, awɨn roat nderbe ɗa lan kasɨnduu kɨmasɨ kɨ dɔat, 37anan: Ĩla ĩ Ngar lo Juipg a ne, aj roi. 38Maktub mad kɨ ndang i dɔat dõ titbe. Ĩn ɗan i Ngar lo Juipg.

39Kɨkɨɗa ku ngeɗamajalgt'n non ĩgɨn gand dõ ye, elta kɨmal an: I Krist ale? Aj roi kɨ jĩ tu.

40Na kɨmad un tan ndánga'n an: Mbã Luwah kaa i ɓoola ale?

41El tɔ an: Na rota kɨ dɔjt i goɗobat kɨta kɨ ɗa kɨ taa bajij ĩn asɨ ta nyaɗaj; na de'n ɗan ɗa nya mad kɨgoɗobat al al.

42El Jeju an: Bɨraɓe, i ga kami dɔmt lon i ɗe kɨ kõɓe loi. 43Jeju ela an: Rota la m'ndɨ m'eli ye: Ɓola a i ndɨ sem kam Paradisɨt.

Jeju oi kagdosɨt

(Oo Mat 27:45-56; Mrk 15:33-41; Jã 19:28-30)

44Nãi nderbe kad kàd ɗadenɓet, til ut dɔning kɨtaagbe mbã kàd norrjin. 45Til ut kum kàd, ad lo duw dɔningt kɨtaagbe; kubganglo kam kuj ndub Luwaht til dene joo. 46Jeju ko kɨ ndin kɨbobe an: Bɔwm m'ndɨ m'la ndilɨm kam jiit. Lon elta 'nten ye, ad ndilɨn tee. 47Lon bɨradɔ ngéɗɔɔg oo nya'n ɗa nya ye, ɔsɨgon Luwah an: Rota de'n ɗan i de kɨdenesew. 48Koosɨdeg tube'n kawɨn na kɨ nat kad kɨ n'oon nyag'n non ye, lon oon nyag'n ɗan nya ye, tel gan gud. 49Nam Jejug tube kɨ dekɨdẽg'n ndulon goa ko dɔning Galilet tɔ ye, ɗan sãi ɗa oon nyag'n non.

Duwɨn Jeju bulombalt

(Oo Mat 27:57-61; Mrk 15:42-47; Jã 19:38-42)

50De mad ndɨ nõ tɔa i Jojep i kɨkɨɗa ku ngékoogotat lo Juipg, i de kɨmaj, i de kɨdenesew tɔ, 51ɓe loa i Arimate kam dɔningt lo Juipg. De'n non la kɔn ta kɔjt lo ngekoogota kɨ nyaɗad al, ndɨ ngoo kõɓe lo Luwah keɗengẽ. 52Jojep aw ro Pilat't kɔa dãro Jeju. 53Ɗisɨ sia kagdosɨt kɨ ber. Duloa kɨ kub nĩn; laa kam ɓet'n urr kam mbalt, i ɓe kɨ lan det nja kɨɗa al. 54I ndɔ ɗago nyag, kɨta ndɔ taakò i nderbe.

55Dekɨdẽg'n ɗen ko Galilet nat kɨ Jeju ye, ndulon go Jojep, oon ɓe nĩn ke titbãi lan Jeju tit a? 56Kamla telɨn kɨɓe ɗan go nyakɨkootg kɨ yib kɨ kootmbĩ. Taan koo ndɔ taakòt kɨgo Mberkɨndat.

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

Luk 23: MlL

Highlight

ಶೇರ್

ಕಾಪಿ