Ijɔ̍ɔn 4
4
Iji̍sɔ̄ɔsi ba̍la ɔnyā Olisame̍riya ɔha̍
1Āchɛ yī Ifa̍rasīi po̍ hīka Iji̍sɔ̄ɔsi ɔ̍lɔ yɛ abɔ̍ɔ ē lɛ a̍chi̍kpo̍ mwɛbɛ, gba̍a yɛ ē hu āchɛ yenyi ē mwɛbɛ ē hi̍ Ijɔ̍ɔn. 2La olēchi̍ lēchi̍ ma̍, Iji̍sɔ̄ɔsi ɔlɔjā i̍ ē hu āchɛ yenyi ni̍. A̍chi̍kpo̍ yī nū lōri̍īwā ē hu āchɛ yenyi a̍nɛ. 3Iji̍sɔ̄ɔsi de po̍ hīka ɛ̍lɛ yɛ ē ka i̍ngɔ̍ɔ ma̍, o̍ pīya hī ajɛ yī Ijudi̍ya, ku̍chē pīya ga Iga̍līli. 4Ɔcha yī Isame̍riya nīi o̍ chī ge̍ē ga a̍nɛ.
5O̍ yɛ ge̍ gbajɛ la ipwo̍gra yī Isame̍riya ɔha̍ nīi re̍ka Isa̍yi̍ka ma̍ bɛ̍ɛ̄nɛ̄. Ajɛ yī yɛrɔ̄ nīi Ije̍kɔ̄ɔpu de de Ijo̍sɛ̄ɛfu ɔyi̍ yī nū ma̍ hɔ̄ abɔ̍ɔ kurɛkurɛ la ɛbɛ ɔla̍ā. 6Ribu̍ yī Ije̍kɔ̄ɔpu rɛ abɔ̍ɔ la ipwo̍gra ɔla̍ā. Bāa yɛ̄grāa yī yɛnɔ oche yakpalɛ̄hu̍ ma̍ nīi Iji̍sɔ̄ɔsi gbajɛ abɔ̍ɔ a̍nɛ. Ɛyɛ jɛ̄ ɔ̄ ma̍, o̍ pīya hyāhɔ̄ abɔ̍ɔ la oko̍o yī ribu̍ ɔla̍ā. 7-8A̍chi̍kpo̍ yī nū pīya ga ipwɔ̍ɔ̄lɛ̍ ge̍ē gāla̍ ojōre̍ ē ra̍. Ɔnyā Olisame̍riya ɔha̍ wā abɔ̍ɔ ge̍ē dɛ̄ yenyi. Iji̍sɔ̄ɔsi da ɔ̍ ka ɔ̍lɔ ge̍ kɔ̄ yenyi de anu̍ nīi anɔ̍lɔ ge̍ gwa̍ gɛ/.
9Ɔnyā ɔla̍ā da Iji̍sɔ̄ɔsi hīka, “Je̍ka aa̍ awɔ - Iju̍u nɛ. Ami chī - Olisame̍riya nɛ! Kana̍ nīi a chōo̍chē ge̍ē chikpo̍ yī yenyi ɔgwɔ̍ɔ̄gwa̍ ē bū la abɔ̍ɔ yī u ma̍?” Ɔnyā nūma̍ ka i̍ngɔ̍ɔ, wu̍chē oji̍ nɛ, Iju̍u i̍ ē tābɔ̄ yī lɛlɛ̄lā ɔyɔ̍ɔ̄ya̍ ba̍la Alisame̍riya ni̍.
10Iji̍sɔ̄ɔsi hīya ɔnyā ɔla̍ā ɔkɔ hīka, “Ma̍ ko̍ō! Ɔ̄chɛ pīya ka a je̍ ɔjā nīi Ɔwɔ yɛ amu ē de ma̍! Ɔ̄chɛ pīya ka a je̍ ɔ̄chɛ nīi yɛ ma̍ ē ra̍ābɔ̄ yī yenyi ɔgwɔ̍ɔ̄gwa̍ ē de wɔ ma̍! Nɛ̄ni̍, a chī ge̍ē ra̍ābɔ̄ de ɔ̍ nīi o̍ de yenyi yī ɔhɔ̄leyī de wɔ!”
11Ɔnyā ɔla̍ā da Iji̍sɔ̄ɔsi hīka, “Ādā, a i̍ chī bī igārāwā amu ni̍. Ribu̍ ɔla̍ā chī ri̍īyī gba̍a̍. Aba̍ nīi a ge̍ē bī yenyi yī ɔhɔ̄leyī ɔla̍ā bū ma̍? 12A jo̍ōkū hīka Ije̍kɔ̄ɔpu nīi a̍dɔ̄kū yī alɔ ma̍, anu̍ bu ribu̍ nūma̍ de alɔ a̍nɛ. Anu̍ ɔlɔjā ba̍la ayi̍ yī nū tūla ɛbɛ̍ nīi o̍ ta̍ wa̍a̍ ma̍ gwa̍ yenyi yī ribu̍ nūma̍. A gbɛri̍ya̍ ka aɔ̍lɔ ɔ̄chɛ ɔnɔ̄kɔ̄kū hi̍ ādā Ije̍kɔ̄ɔpu nɛ?”
13Iji̍sɔ̄ɔsi hīya anu̍ ɔkɔ hīka, “Ma̍ ko̍ō! Ɔ̄chɛ ge̍ gwa̍ yenyi nūma̍, odīyenyi ē ya̍ ɔlɔjā kpɔ̍ɔ̍ we̍. 14Ɔ̄chɛ ge̍ chī gwa̍ yenyi ɔla̍ā nīi n ge̍ē de ma̍, odīyenyi i̍ ge̍ē ya̍ ɔlɔjā ge̍ē gbo̍ ē gɛ ni̍. Yenyi ɔla̍ā nīi n ge̍ē de ē de ɔlɔjā ma̍ ge̍ē de ē pīya ribu̍ ɔngmɔ̍ɔ̄ngma̍ ē de yenyi yī ɔhɔ̄leyī de ɔlɔjā, ya̍ nīi o̍ ē lɛ ɔhɔ̄leyī i̍mɔ̄mɛni̍.”
15Ɔnyā ɔla̍ā da Iji̍sɔ̄ɔsi bɛ̍ɛ̄nɛ̄ hīka, “Chu̍chu̍u ādā, de yenyi ɔ̍lɔma̍ de u gɛ, hɛ̄ɛbɛ nīi odīyenyi ge̍ e̍e ya̍ u ge̍ gbo̍ gɛ ni̍; hɛ̄ɛbɛ nīi n ā gba̍a wā ge̍ dɛ̄ yenyi amu u̍ma̍ gɛ ni̍.”
16Iji̍sɔ̄ɔsi da ɔ̍ ka ɔ̍lɔ ge̍ gāa ge̍ hī ɔbu̍ ɔ̍lɔ ɛra̍ nīi ɔ̍lɔ ge̍ ku̍chē wā.
17Ɔnyā ɔla̍ā de Iji̍sɔ̄ɔsi ka anɔ̍lɔ i̍ blɛ̍ba̍ ni̍.
Iji̍sɔ̄ɔsi ka de ɔ̍ bɛ̍ɛ̄nɛ̄ hīka, “A ka yɛ̍yɛ̍ kpɛ̍ɛji nīi a hīka aɔ̍lɔ i̍ blɛ̍ba̍ ni̍ ma̍. 18Lɛba̍ ma̍, a bla̍a āchɛ ɛrwɔ̄ mɛ̍. Ɔngrɔ̄ɔ nīi a hɔ̄ aa̍ u̍ma̍ama tāa anu̍ ma̍, i̍ ɔbu̍wɔ kpakpa ni̍. Bū la ɛbɛ ɔla̍ā, lɛlā lēchi̍ lēchi̍ nīi a ka de u a̍nɛ.”
19Ɔnyā ɔla̍ā ka bɛ̍ɛ̄nɛ̄ hīka, “Ādā, n de jo̍ōkū mɛ̍! Awɔ - ɔ̄chɛ ɔkɛrɔ̄ yī Ɔwɔ nɛ. 20Ma̍ ko̍ō, ādā! Aa̍ ɔ̍kɔ̄kū yī alɔ Alisame̍riya ē gāa ge̍ē ya̍ otūlichō de Ɔwɔ amu la yɛwu nūma̍. Ala̍ Iju̍u chōo̍chē ka hīka Ijɛru̍sālɛm ɔ̍lɔ ngma̍ nīi aɛ̍lɛ ē wā ge̍ē ya̍ otūlichō de Ɔwɔ a̍nɛ.”
21Iji̍sɔ̄ɔsi da ɔnyā ɔla̍ā hīka, “Nāa lɛlā yī u lēchi̍ lēchi̍ gɛ, ɔnyā! Yɛ̄grāa ɔha̍ yɛ amu yewā nīi āchɛ i̍ ge̍ē ya̍ otūlichō de Ɔwɔ A̍dā amu la yɛwu nūma̍ kɛ̄ɛ abɔ̍ɔ la Ijɛru̍sālɛm ē gɛ ni̍. 22Ala̍ Alisame̍riya u̍tu je̍ ɔ̄chɛ nīi ala̍ ē ya̍ otūlichō ɔla̍ā de ɔ̍ ma̍? Alɔ Iju̍u ma̍ je̍ ɔ̄chɛ nīi alɔ ē ya̍ otūlichō ɔla̍ā de ɔ̍ ma̍. Wu̍chē oji̍ nɛ, ɔhɛ̍ta̍ hɔ̄ bū la abɔ̄ yī Iju̍u. 23Yɛ̄grāa ɔha̍ yɛ amu yewā; o̍ u̍tu de gbɔ̄gbajɛ mɛ̍! Yɛ̄grāa nūma̍, āchɛ nīi ē ya̍ otūlichō ɔlamu-ɔlamu ma̍ ge̍ē ya̍ otūlichō de Ɔwɔ A̍dā la olēchi̍ lēchi̍ gala abwɔ̄hu̍ yī Uhu Ɔnɛ̄ɛhɛhi yī Ɔwɔ. Āchɛ ɔya̍ otūlichō i̍ngɛ̍ɛ̄nɛ̄ nūma̍ nīi Ɔwɔ A̍dā chikpo̍ nīi e̍ ge̍ē ya̍ otūlichō yī nū a̍nɛ. 24Ɔwɔ - Uhu nɛ. Wu̍chē yī ɔla̍ā āchɛ nīi ē ya̍ otūlichō yī nū ma̍ ge̍ē ya̍ ē gala abwɔ̄hu̍ yī Uhu Ɔnɛ̄ɛhɛhi yī Ɔwɔ la olēchi̍ lēchi̍.”
25Ɔnyā ɔla̍ā hīyɔkɔ bɛ̍ɛ̄nɛ̄ hīka, “N jo̍ōkū i̍ngɔ̍ɔ hīka Ɔhɔ̍ɔnyɛta̍ Nīi Ɔwɔ hōhu re̍ka Ikra̍yisi ma̍ ge̍ē wā. O̍ ge̍ wā mɛ̍, anu̍ ge̍ē ka ɛlāha̍-ɛlāha̍ wa̍a̍ ē de alɔ a̍nɛ.”
26Iji̍sɔ̄ɔsi ka de ɔnyā ɔla̍ā bɛ̍ɛ̄nɛ̄ hīka, “Ma̍ gɛ ko̍ō! Ami nīi yɛ ma̍ ē kɛlā tāa awɔ ma̍, Ami - Anu̍ a̍nɛ.”
27Yɛ̄grāa ɔla̍ā ɔpɔ̄ɔpɛ̄, a̍chi̍kpo̍ yī Iji̍sɔ̄ɔsi cha gbajɛ wā abɔ̍ɔ. O̍ lɛ wa̍ lɛbɛ̍bi̍ kpɛ̍ɛ nīi e̍ ma̍ nīi Iji̍sɔ̄ɔsi yɛ ē kɛlā tāa ɔnyā ma̍. Ɔ̄chɔ̄chɛ i̍ chī che ɔnyā ɔla̍ā ikpo̍ hīka, “Iyi̍ nīi a ē chikpo̍ ma̍?” ni̍. Ɔ̄chɔ̄chɛ i̍ chī che Iji̍sɔ̄ɔsi ikpo̍ hīka, “Oji̍ - ohu̍ nīi a ē kɛlā tāa anu̍ ma̍?” ni̍.
28Bɛ̍ɛ̄nɛ̄, ɔnyā ɔla̍ā pīya hī yɛ̄hī yī yenyi rɛ abɔ̍ɔ, ku̍chē pīya ga ipwɔ̍ɔ̄lɛ̍. O̍ gāa ge̍ ka de āchɛ hīka, 29“Ala̍ tu̍ wā ge̍ ma̍ ɔngrɔ̄ɔ ɔha̍ gɛ! O̍ koko̍o yī lɛlāha̍-ɛlāha̍ wa̍a̍ nīi n ya̍ je̍ ma̍ de u cha̍cha̍! Anu̍ ka̍a - Ɔhɔ̍ɔnyɛta̍ Nīi Ɔwɔ Hōhu Ma̍ a̍nɛ oo?” 30Bū la ɛbɛ ɔla̍ā, aa̍ wa̍a̍ pīya bū abɔ̍ɔ la ipwɔ̍ɔ̄lɛ̍ yī wā wā dikpo̍ba̍ Iji̍sɔ̄ɔsi.
31Yɛ̄grāa ɔla̍ā wa̍a̍, a̍chi̍kpo̍ yī Iji̍sɔ̄ɔsi gblāa amu ē ra̍ābɔ̄ de ɔ̍. Ɔngūlɛ̄lā, ɔ̍lɔ ge̍ re̍ ojōre̍ gɛ!
32Iji̍sɔ̄ɔsi ka de wa̍ hīka anɔ̍lɔ lɛ ojōre̍ ɔha̍ nīi anɔ̍lɔ ge̍ē re̍ ma̍ mɛ̍. Ɛ̍lɛ i̍ chī je̍ ojōre̍ ɔ̍lɔma̍ ni̍.
33A̍chi̍kpo̍ yī nū gblāa abɔ̍ɔ ē che iyī wā ikpo̍ hīka, ɔ̄chɛ ɔha̍ ɔ̍lɔ ka̍a bī ojōre̍ ɔha̍ ge̍ de ɔ̍lɔ mɛ̍ oo?
34Iji̍sɔ̄ɔsi koko̍o de wa̍ hīka, “Ala̍ ma̍ ko̍ō! Otūlichō odōde de ɔ̄chɛ nīi de u tɛ̄rɔ̄ ma̍, ba̍la u̍ku̍rɔ̍ nīi o̍ de de u ma̍ - ode ya̍ kwɛ̍ɛjī, anu̍ - ojōre̍ yī u a̍nɛ. 35Je̍ka aa̍ ala̍ lɛ wɔ̄chīije ɔha̍ nīi ka hīka, ‘O̍ hī ɔyɔ̍ɔ ɛnɛ nīi yɛ̄grāa okpo̍ ɛjāyɛ̄rɔ̄ tu̍chɛ̄ ge̍ē gbajɛ.’ N ā koko̍o de ala̍! Ala̍ ā gbeyīchi̍i̍ ma̍ yɛrɔ̄ wa̍a̍ we̍ e̍e! Ɛjāyɛ̄rɔ̄ wa̍a̍ pīya bāa ɔnyɔnyɔ ma̍ mɛ̍. Yɛ̄grāa okpo̍ wā tu̍chɛ̄ gbajɛ hɔ̄ aa̍ bɛ̍ɛ̄nɛ̄ a̍nɛ. 36Ɔ̄chɛ nīi ē ya̍ u̍ku̍rɔ̍ yī ɛjāyɛ̄rɔ̄ ma̍, e̍ ē kla̍ anu̍ ure̍ yī u̍ku̍rɔ̍ yī nū. O̍ ē kpo̍ ɛjāyɛ̄rɔ̄ ɛla̍ā tu̍chɛ̄ gbo̍ ɔhɔ̄leyī i̍mɔ̄mɛni̍. Bū la ɛbɛ ɔla̍ā, ɔ̄chɛ nīi nyi ɔjā onyōnyi ma̍, ba̍la ɔ̄chɛ nīi kpo̍ōkpo̍ tu̍chɛ̄ ma̍ ē lɛ ɔwɔ̄wīyā āchɛ ɛpɛpa. 37Bū la ɛbɛ ɔla̍ā, wɔ̄chīije ɔha̍ nīi e̍ ka hīka, ‘Ɔ̄chɛ ɔha̍ ē nyōnyi, ɔ̄chɛ ɔha̍ ē kpo̍ōkpo̍ ē tu̍chɛ̄ ma̍’ de pīya ichɛ̄ɛhi mɛ̍. 38Wu̍chē oji̍ nɛ, n de ala̍ tɛ̄rɔ̄ ge̍ē kpo̍ ɛjāyɛ̄rɔ̄ ɔha̍ ē tu̍chɛ̄. I̍ ala̍ hi̍yɛ̄rɔ̄ ɔla̍ā a̍ni̍. Āchɛ ɛha̍ ya̍ u̍ku̍rɔ̍ ɔla̍ā a̍nɛ. Ala̍ chī lɛ ɛpiyabuna bū la u̍ku̍rɔ̍ yī wā.”
39Alisame̍riya yɛ̄mɛ̄mɛ̄ chɛ̄ku Iji̍sɔ̄ɔsi abɔ̍ɔ la ipwo̍gra ɔla̍ā wu̍chē lɛlā nīi ɔnyā ɔla̍ā ka de wa̍ ma̍. O̍ ka ɔ̍lɔ ka ɛlāha̍-ɛlāha̍ wa̍a̍ nīi anɔ̍lɔ ya̍ je̍ ma̍ de anu̍. 40Wu̍chē yī ɔla̍ā, aa̍ wa̍a̍ wā dikpo̍ba̍ Iji̍sɔ̄ɔsi ma̍, e̍ ra̍ābɔ̄ de ɔ̍ ka ɔ̍lɔ ge̍ hɔ̄ tāa aa̍ chi̍i̍ o̍bū. Iji̍sɔ̄ɔsi hɔ̄ abɔ̍ɔ ɔ̄chī ɛpa.
41Āchɛ yɛ̄mɛ̄mɛ̄ gba̍a chɛ̄ku Iji̍sɔ̄ɔsi wu̍chē yī ɛrɔ̄ yī nū nīi o̍ ka ma̍. 42E̍ da ɔnyā ɔla̍ā bɛ̍ɛ̄nɛ̄ hīka, “U̍ma̍ama nūma̍ nīi alɔ chɛ̄ ma̍, alɔ i̍ chɛ̄ wu̍chē yī lɛlā nīi a ka de alɔ ma̍ gɛ ni̍. Alɔ chɛ̄ wu̍chē yī lɛlā yī nū nīi alɔ ɛlɛjā po̍ ma̍. Wu̍chē oji̍ nɛ, alɔ de jo̍ōkū mɛ̍ hīka anu̍ - Ɔhɔ̍ɔnyɛta̍ yī yɛchɛ ichɛ̄ɛhi a̍nɛ.”
Iji̍sɔ̄ɔsi nyiya ɔyi̍ yī ɔlɛhu̍ ɔha̍
43Iji̍sɔ̄ɔsi hɔ̄ abɔ̍ɔ ɔ̄chī ɛpa ma̍, o̍ wā ge̍ pīya ga Iga̍līli. 44Iji̍sɔ̄ɔsi ɔlɔjā ka i̍ngɔ̍ɔ hīka ɔ̄chɛ ɔkɛrɔ̄ yī Ɔwɔ ɔ̍lɔ i̍ ē lɛ otūlichō la ɔcha yī ɔ̍lɔ ɔlɔjā ni̍. 45O̍ gbajɛ ga Iga̍līli ma̍, e̍ nāa lɛlā yī nū hwɔhi hwɔhi. Wu̍chē oji̍ nɛ, e̍ ga Ijɛru̍sālɛm la Ɔwɔ̄wīyā yī Owu̍lā ma̍, e̍ ma̍ lɛlā wa̍a̍ nīi o̍ ya̍ abɔ̍ɔ ma̍.
46Bū la ɛbɛ ɔla̍ā, Iji̍sɔ̄ɔsi wā ge̍ ku̍chē ga Ike̍na abɔ̍ɔ la ajɛ yī Iga̍līli la ɛbɛ nīi o̍ de yenyi pīya ɛ̍mwɔ̄ ma̍. Ɔlɛhu̍ yī Igɔ̍mɛ̄ɛti ɔha̍, ɔyi̍ yī nū ɔnɔ̄ngrɔ̄ɔ kwi̍īyē gbo abɔ̍ɔ la Ikapa̍num. 47O̍ po̍ hīka Iji̍sɔ̄ɔsi ɔ̍lɔ cha bū la ajɛ yī Ijudi̍ya wā abɔ̍ɔ la Iga̍līli ma̍, o̍ gāa dikpo̍ba̍ ɔ̄. O̍ ra̍ābɔ̄ de Iji̍sɔ̄ɔsi ka ɔ̍lɔ ge̍ yewā la Ikapa̍num ge̍ de ɔyi̍ yī anu̍ nīi - ɔ̍lɔ gbo abɔ̍ɔ ge̍ē pīyaku̍ ma̍ nyiya. 48Iji̍sɔ̄ɔsi da ɔ̍ hīka, “O̍ re̍ka ala̍ ma̍ i̍ ē chɛ̄ku u ni̍ kpɛɛ nīi ala̍ ē ma̍ lɛlā ɔnɔ̄kɔ̄kū ba̍la lɛlā ɔlɛbɛ̍bi̍ o̍bū?”
49Ɔngrɔ̄ɔ ɔla̍ā ra̍ābɔ̄ de ɔ̍ hīka, “Chu̍chu̍u ādā, pīya wā ba̍la ami gɛ; hɛ̄ɛbɛ nīi ɔyi̍ yī u ge̍ e̍e hīyɔtū o̍bū ni̍.”
50Iji̍sɔ̄ɔsi da ɔ̍ hīka ɔ̍lɔ ge̍ pīya gɛ, ma̍ ɔyi̍ yī ɔ̍lɔ de wōwi mɛ̍.
Ɔngrɔ̄ɔ ɔla̍ā chɛ̄ lɛlā nīi Iji̍sɔ̄ɔsi ka ma̍. O̍ pīya ga wɔlɛ̍. 51O̍ yɛ gāa ge̍ grāa a̍chɛ̍ yī nū la ɔpɔ̄pū. E̍ de koko̍o de ɔ̍ hīka ɔyi̍ yī ɔ̍lɔ yɛ abɔ̍ɔ ge̍ē de ē wōwi.
52O̍ che wa̍ ikpo̍ ka yɛ̄grāa ɔna̍ nīi ibi̍īyē ɔ̍lɔ de hīya ɔ̍lɔ ma̍? E̍ ka de ɔ̍ hīka ɔ̍lɔ - yɛ̄grāa yī oje ūkpo̍he yī yɛnɔ nīi ibi̍īyē ɔkwɔ̍la̍ ɔla̍ā ɔ̍lɔ pi̍ye̍mā hī ɔ̍lɔ a̍nɛ. 53Ɔngrɔ̄ɔ ɔla̍ā lɛ ɔbɔ̄bla ɔpɔ̄ɔpɛ̄ hīka yɛ̄grāa ɔla̍ā pi̍i̍ nīi Iji̍sɔ̄ɔsi ɔ̍lɔ da anu̍ hīka ɔyi̍ yī anu̍ ɔ̍lɔ ge̍ē wōwi a̍nɛ. Bū la ɛbɛ ɔla̍ā, anu̍ ba̍la alwɔlɛ̍ yī nū wa̍a̍ chɛ̄ku Iji̍sɔ̄ɔsi.
54Lɛlā ɔlɛbɛ̍bi̍ ɔ̍mɛpa nīi Iji̍sɔ̄ɔsi ya̍ nīi o̍ cha bū la Ijudi̍ya wā la Iga̍līli ma̍ hɔ̄ ma̍ a̍nɛ.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Ijɔ̍ɔn 4: YBASR
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
© 2020 Bible Society of Nigeria (second edition)
