Matiye 24

Iisa tasaaca ɗimmiti girti Mellayi

(Elloŋ Mark 13.1-2, Lik 21.5-6)

1Gaa Iisa oomiɗe min girti Mellayi. Maa ga ƴelewɗo, guu jobookeetee asiyyee katta. Guu gaariyyeegu samanco gekeewi ku girti Mellayi kotti. 2Gaa Iisa pa beneyyiyyoo gaa: «Elloŋgu ƴa gerra kooko paracco. Na beneyyatoŋca seene, paracco gu akkiy ɗimma, lekka ɗa ya dambu kaƴi maa gu akkee duwa ga jerewɗe kayaati giiti.»

Gaari ma akka asaa omma min gaamití dunuune teete

(Elloŋ Mark 13.3-13, Lik 21.7-19)

3Gaa Iisa kaatiɗe gaa deeɗe nunta dambu ka olibiyeyyi. Guu jobookeetee kayco ka sappiyyee saripti. Guu inniyya goo: «Beneyyani ƴa baŋ gi ɗimmiti girti Mellayi keeke akka dee ya minke, o ga ay ini me ma garaaniica asawcum o ma garaa gaamití dunuune teete?» 4Gaa Iisa tiiliyyoo gaa: «Warroŋ maaƴi! Ga ya gimu aɗitoŋ daɓalla ɗa ga cimmittoŋ min butuuli, 5asan gu giimi maani akka asa ma semeetaw guu asiɗo beneyyo goo gu ay Masi, gata appe maa ga Mella aparre. Guu asiɗiy daɓalla pe giimi maani. 6Ku akka geewa gu giimi beneyya ma gaari ku bokowwo katta e baŋ pa arro, kuŋ soopa asarroŋgu galbigeetoŋ ku alɗo rawruwa ɗa, asan gu gaari kooko asaa ma tirta. A innasoopa gi gaamití dunuune teete ɗa missa. 7Ku akka ella gi jollo akka waca balle ma balle o mulunne ma mulunne. Akka lekekka aziro ta kiɗaati o mayyee wereeriyee pay pay. 8Gaari kooko pa paracco deewa aleŋ diilo ta buybuyne ka wiyaawi.

9«Oko wikinne kaaka pa gu giimi akkitoŋ berewwo oko giimo gu deegeyɗitoŋ o gu deeɗitoŋ deewo. Giimi ku ballee paracco akkitoŋ ɗakita asan ku ay jobookeetaw. 10Ma keeke pa, gu giimi maani akkiti cappa oko amannico oko naa, o gu deeɗiy berewwo gicco picco taattuwee ma hekemeyye gu deegeyɗiy o gu akka ɗakatto zeneeco. 11Guu giimi maani ma leewe goo gu ay nabiinigee asiɗo ooma. Guu asiɗo daɓalla giimi maani. 12Gii miɗɗaco giimo asiɗo dee kaawenta. Ma kaaka pa gu giimi maani gi ƴekkico akka oola. 13A ma gaa deero soopa baatiyne namma ya dessiti akka dee najjiyenta. 14Gii kabarre ta daana ta mulunniti Mellayi deeɗo taasenta dunuune parattí ku maa gu giimi ku ballee paracco giyyicca guu ellicca hatta gii dunuune teete gaamiɗo ka pe.»

Diigane ta yaata

(Elloŋ Mark 13.14-23, Lik 21.20-24)

15Gaa Iisa beneyɗiyo missa gaa: «Oko wikinne ma asaa ku akkiya ella maatiki ka miɗɗa ta kaw ma ay ka aan̰iti gaa gagakke were ma duwenta oko Mellayi aatti girti. Gata pa nabiinice Daniyel beneyye gaartee min tippa#24.15 Elloŋ Daniyel 9.27, 12.11.. Kaaka pa, ga gimu ma garkayya beneyti Daniyel aŋka ga ibiniyya samaane. 16Maa ku elliyya pa, gu giimi ku kiɗa ta Yudee ɗe gaɗɗu dambabbo, 17o gimu ma nabakka renta pa, ga addo un̰n̰a ɗa ɗakko ga deeɗo sokka lawwi ku girti, 18o ma aaye ganti ga gaɗɗu, ga addo yooka ɗa giiri ga asiyya icca kaɗiyyiti. 19Oko meeni kotti, gi diiganco oko daati ku maaɗiyeeta o ma ay maƴƴappi gi akkiyoo dee raɗɗa ta kaw. 20Kaaka pa ku innoŋga Mella maa gi gaɓiratoŋ alɗitoŋ gala ɗa ma wikinne ka sitiini e baŋ pa ma meene ta nambiti. 21A gata pa oko meeni kotti, gi diigane akka dee yaata ta kaw. Min maa ga Mella kilgiyicca dunuune ya haŋka gi lekke ɗa kaytiŋ diigane aleŋ taata o gi akka lekka ɗa payya ta kaw. 22Guu meeni ku diiganti kotti ga Mella alɗiy koyyo ɗa, ga lekekka ɗa ya gimu kaƴi ma pakaa. A innasoopa, saananco giimi maa ga Mella aparre, ga akkiy koyya meeni kotti.

23«Gaa gimu beneyyitoŋ gaa: “Elloŋga Masi, gata maa ga Mella aparre, ay gata appe keeke”, e baŋ gaa: “Elloŋga, ay gata appe kaaka”, ku aɗoŋ amanna ɗa oko beneyti. 24A guta pa, giimi daare akka asa goo gu ay Masi, gata maa ga Mella aparre, o daare pa goo gu ay nabiinigee o ga ay borooli ka. Guu asiɗo leewo garaawi ku ajjibiti ta tirta o gaari ma kakaaca kaya ku maa gu asiɗiy daɓalla ya giimi kulla maa ga Mella aparre guu gederra. 25Naa pa iyyitoŋgu paaɗe deytoŋ. 26Guu beneyyatoŋ goo: “Gata aaye kayni”, ku aɗoŋ kaata ɗa, e baŋ pa goo: “Gata gobokke iŋee”, ku aɗoŋ amanna ɗa. 27A gita pa asawti oko Runti Gimi akka dee aleŋ eln̰o maa ku ella min jarilti namma ya culumti. 28Kulla were maa ga rimmane alɗo ga unce kulla temekka.»

Asawti Runti Gimi

(Elloŋ Mark 13.24-27, Lik 21.25-28)

29Gaa Iisa beneyɗo missa gaa: «A wikinne maa guu meeni ku diiganti kotti ƴiile pa, gi paato rakamma o kooyo deewa ɗa payya purta, o kalli sobokka min samaani o lawwi ku samaani ma lekka gudirane yagaa. 30Gaa uwwa samaani ga asiɗo ooma latta ka ajjibiti ma garaaca asawti oko Runti Gimi. Guu giimi ku ballee paracco ku kiɗaati asiɗo laatiya. Guu asiyya ella Runti Gimi gaa asaa kayaaco n̰irɗo ma gudirane yaata o ma darjane ta tirta teete. 31Gaa asiɗiy n̰aama malaykatnigeetee ma gubiro raɗɗa ta buruujiti gu asiɗiy timma gimtee maa ga aparre min wereeriyee paracco ku kiɗaati, min jarilti ya culumti.»

Beneyti Iisa ma gaarti booti

(Elloŋ Mark 13.28-31, Lik 21.29-33)

32Gaa Iisa gaayiɗe payya masal gaa: «Ibinoŋca giraane ta booti. Guu linƴaƴƴiti ku rootta alle, o guu tappiti eɗice ku leewa paaɗe kabarre kadar ga piɗiwaŋ katta. 33A kuŋ kulla, wikinne maa kuu elliy gaari kooko paracco gu ase, ku leyyoŋ paaɗe kabarre kadar ga Runti Gimi asaa katta, aleŋ kuu ga aaye biití burgutti. 34Na beneyyatoŋca seene, giimi ku haŋka kooko matakka ɗa paracco omma min maa ga keeke paratti asiɗo asa. 35Samaane o kiɗa akka masila, a beneyyiŋgeetaw soopa masalla ɗa ta kaw.»

Mella kayti ka ibinya wikinne ka asawti Runti Gimi

(Elloŋ Mark 13.32-37, Lik 17.26-30,34-36)

36Gaa Iisa gaayiɗe payya gaa: «Lekka ɗa ma ibinca meene e baŋ gi saha ta asawti oko Runti Gimi, bala gu malaykatnigee ku samaani o bala ga Runti Mellayi. Illa ay Mella Baaba kayti ka ma ibinca. 37Aleŋ gaari ma deero oko wikinniti Nowe gi asawti oko Runti Gimi kulla akka dee pe goŋŋakite aɗe. 38Omma min wikinne maa ga Mella bittiɗiy giimi ma ammi ku suura, gu giimi teewa o gu ar̰aa o gu sokokka beenannico, o gu beray ronco jiizanti, namma ya meene maa ga Nowe un̰n̰iɗe markaba ta yaata. 39Guta pa doroyye namma gu ammi ku suura asiɗe. Guu bittiɗiy paracco. A asawti oko Runti Gimi kulla deewa pe aleŋ taata aɗe. 40Oko wikinne kaaka pa, guu miɗi seera aaye gaani, ga ka kaƴi gu ecekkaa, ka kaƴi pa gu merekkaa. 41A guu daati seera ayakka korƴo itiraati, gi ta kaƴi gu ecekkaca, ta kaƴi pa gu merekkaca. 42Kaaka pa ku nuntoŋ nadiraŋgee asan ku ibinca ɗa meene maa ga Miltoŋ asiɗo asa. 43Keeke pa ku lekke paaɗe kabarre, gaa milti giiri ibinca saha ta aandoŋ maa ga mariŋ asawɗo, ga nowotta nadirane ku maa ga alɗe duwa ɗa ga mariŋ noomiɗo buulu ga un̰n̰iɗo girti. 44A kuŋ pa kulla aɗoŋ doriya ɗa asan ku ibina ɗa baŋ ga wikinne ŋawwa maa ga Runti Gimi asiɗo asa.»

Lubaaka ka daŋgam o ka daŋgam ɗa

(Elloŋ Lik 12.41-48)

45Gaa Iisa beneyɗo payya gaa: «A haŋka pa, ay lubaaka ŋawwa ma ay ka damannenta o ga ibina gaari? Ay gata appe maa ga tattuwti merekkeega lubbi maa ga deeɗiyo berewwo tiyaw oko lubaakeetee daare ku giiri wikinne maa guu aŋka. 46Baarikenta ay lubaaka kaaka maa ga tattuwti akkiya gassa oko yookiti gaa leewa lubbiti ma butulti. 47Na beneyyatoŋca seene: Lubaaka kaaka, ga tattuwti akkeegu amanna lawtee ku girti paracco. 48A gaa lubaaka kaaka gidaani ɗa soopa, gaa beneyɗo ma galbanti gaa: “Tattuwtu asaa ɗa koɗok”, 49ga delaa paaɗe ga tamanɗiy gittee ku lubbi o ga teewa o ga ar̰aa ma mowookee. 50Gaa tattuwti asiɗo yooka oko meene maa ga alɗiya ocokka ɗa o oko saha maa ga ibina ɗa. 51Gaa tattuwti asiyya diigiya raɗɗa aleŋ diiganco giimi ma beneyya ma beneeco ka, ka galbigeeco pa kayti. Ga uwwiya were ka diiganti, iŋaakite pa gu giimi erecca o gu ayammay saanco.»

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

Matiye 24: mmy

Highlight

ಶೇರ್

ಕಾಪಿ