Matiye 18

Ka tatta ƴiila mulunniti Mellayi

(Elloŋ Mark 9.33-37, Lik 9.46-48)

1Gaa oko wikinne kaaka saa gu jobookeetee Iisa sappiyyee katta, guu inniyya goo: «Ay we pe ma ay ka tatta ƴiila mulunniti Mellayi?» 2Gaa Iisa kolliɗe miica rootta ka, gaa wirriyya ɗaɗɗakkico. 3Gaa beneyyiyyoo gaa: «Na beneyyatoŋca seene, kuu magica ɗa nuntitoŋ ku leeɗiy zeneetoŋ rootta aleŋ miici, ku akka un̰n̰a ɗa ta kaw mulunniti Mellayi. 4Ay ɗakko appe ga gimu ma leewaa ziiti rootta aleŋ miica keeke, alɗo gata pe ma akka dee ka tatta ƴiila mulunniti Mellayi.»

Warroŋ maaƴi min liyaw ta zunubgeyyo

(Elloŋ Mark 9.42-48, Lik 17.1-2)

5Gaa Iisa gaayiɗe payya gaa: «Maa gaa joobe miica aleŋ keeke saanantu, jobowwinoo saa naa ma kayaatu. 6A innasoo gaa gimu esekkaa zunubgeyyo kaƴi ka kulla min oko giimi ma dowwiy galbigeeco oko naa, guta ma ay aleŋ miici ku rootta kooko, gi samaanee ƴiila oko gata kaaka gu onniyyee ur̰uuti itira yaata, guu uwwiyya baharriti ga deesiɗo, min maa gi parlanti Mellayi baagiyya.

7«Diigane yaata ocokkica dunuune teete ma lekke gaari ma esekkay giimi zunubgeyyo. A gata pa, ay tirta appe gu gaari kotti alɗo, innasoopa gi diigane ocokkiya gimu ma ay milco gaari kotti ma katawko giimi zunubgeyyo. 8Gaa piccum e baŋ ga asincum esekkam zunubgeyyo, ki reepiya, kii uwwiyya arro min oko kii ku maa ga alɗum issa ɗa zunubgeyyo. A gita pa samaane ƴiila ki gassiɗo hayaatane ma gakamma ɗa ta kaw ma pissi kaƴi e baŋ ga asin kaƴi min maa gu uwwiɗum ma piccam serco e baŋ ga ma asincam serco, aattí okko ma batakka ɗa ta kaw. 9A gii iɗiicum pa esekkam zunubgeyyo, ki cimmica, kii uwwicca arro min oko kii ku maa gi alɗum issa ɗa zunubgeyyo. A gita pa samaane ƴiila ki gassiɗo hayaatane ma gakamma ɗa ta kaw ma iɗiicum kaƴi ka min maa ki lekkiɗo iɗi seera, guu uwwiɗum aattí okko ma batakka ɗa ta kaw.»

Masal ta tamo ma masile

(Elloŋ Lik 15.3-7)

10-11Gaa Iisa beneyyiɗe payya gaa: «Warroŋ maaƴi! Ya kaƴi min oko giimi ma ay aleŋ miici ku rootta kooko ku anneeca jaala ɗa. Na beneyyatoŋ kadar gu malaykatnigeeco waraɗɗe aɗe goŋŋa diiman uwwa samaani saripti Tattu ma aaye samaani. 12A oko mooyitoŋ ka pa kuu me? Gaa gimu lekka tamee orooruwee orro, gii ta kaƴi masilɗe ga leewa gaa me? Gata capakkayo ɗa aɗe oko ku orooruwee parnakaƴi o parnakaƴi kayaati dambi gaa kaatiɗo ga deeɗica diyya ta kaƴi ma masalle e? 13Na beneyyatoŋca seene, gaa gassica tamo tee ma masalle, ga parhanna ta tirta ƴiila min oko tamee ku orooruwee parnakaƴi o parnakaƴi ma masalle ɗa. 14Ay goŋŋa appe ga Tattoŋ ma aaye samaani kulla, alɗo aŋka ɗa ga ya kaƴi ka kulla min oko ku rootta kooko masilɗo.»

Botol ka saamiyti gaa giicum niŋgiyam

15Gaa Iisa beneyɗiyo missa gaa: «Gaa giicum niŋgiyam ki aɗe ki deeɗiya gassa, kii deeɗeeca gaara ooranti, innasoo ga aŋka ku alɗo sertoŋ ka. Gaa giyyum pa, ga icciyya beneycum ku taaceero paaɗe. 16Gaa pooce giyyicum pa, ki yookee ma gimu kaƴi e baŋ gu seera. Ma kaaka pa, gu “gaari paracco deewa taacenta oko beneyco giimi seera e baŋ pa subba ma elle o gu giyye”, aleŋ maa gi Kitamniti Muusa beneyye#18.16 Elloŋ Ɗillico Hukumnigeyyo 19.15.. 17Gaa pooce payya giyyico pa, ki beneyyiy gaari kotti oko gimtaw ma temekka saanantu. A gaa pooce giyyico gimtaw pa kulla, ki elliya aleŋ gimu gonek ka ma aabadda ɗa Mella e baŋ ga aleŋ sokooka ka miiri. 18Na beneyyatoŋca seene: Gaari paracco maa ku akka pooca iŋee kiɗaati ay guta ma akka dee poocenta samaani, o gaari paracco maa ku akka oyya iŋee kiɗaati ay guta ma akka dee oyyenta samaani. 19Na gayaatoŋ payya naa: Iŋee kiɗaati, guu giimi seera min aattoŋ onniya beneyco, guu inniɗe caŋ ga ini me, ga Tattu ma aaye samaani oyaayooga. 20A gata pa were maa gu giimi seera e baŋ gu subba temeɗɗe ma semeetaw, na aaye ɗaɗɗakkico.»

Masal ta lubaaka ma saamayya ɗa

21Gaa Piyer saapiyyee saripti Iisa. Gaa inniyya gaa: «Miltu, gaa giitu negekkaw, na saamayyee namma ya minawtiŋ? Namma ya paysaratiŋ e?» 22Gaa Iisa pa tiiliyyee gaa: «Kaw, na leewam ɗa naa namma ya paysaratiŋ ka, innasoo namma ya orooruwee paysara, paysaratiŋ.

23«A gita pa mulunniti Mellayi saabayye aleŋ sultan ma aŋke gu lubaakeetee pilkiyyeegu ɗannannico ku guruzzi maa gu ecekke. 24Maa ga diiliɗe gemmo ta ɗannannico, guu itiriyyee lubaaka kaƴi ma lekke ɗaane maani ta kaw ta guruzzi. 25Mileŋ ga lubaaka kaaka pa lekka ɗa maatiki ku maa ga pilkicca ɗaaniti taata, ga sultan beneyye gaa gu giɗikiki aleŋ lawwu, gata o daatti o rontee o lawtee paracco maa ga lekka ku maa ga pilkicca ɗaaniti. 26Gata pa darse unti sultanti. Gaa malmiliyya gaa: “Ban̰n̰u, suɓarraw, na pelekkamca parattí.” 27Gaa sultan elliɗe saamuwti. Gaa saamiyiyyeeca ɗaaniti, gaa duwiyyee ga kaatiɗe. 28Gata pa oomiti ka, ga waagikki kaƴi min oko gittee ku lubbi ma lekke ɗaane alpaŋgee minnaw ka. Gaa gabbibiyya ga seƴewɗeeca ur̰uuti o ga beneyyee ma raɗɗa gaa: “Pilkawca ɗaanitu.” 29Gaa giiti kaaka darsiɗe unti, gaa malmiliyya gaa: “Ban̰n̰u suɓarraw, na pelekkamca.” 30Gaa gata soopa poociɗe. A ta ƴiila payya pa, ga deyya issa daŋayi kadar ga peleɗɗeeca ɗaaniti. 31Maa gu gittee elliyya latta kaaka ma deero, guu zorontiyɗe ta kaw. Guu deeɗeegu gemma saa oko sultanco gaari kooko paracco ma deero. 32Gaa sultanco n̰aamiɗe gu deeɗiki asa lubaaka gata kee. Gaa beneyyiyyee gaa: “Kii keeke ay lubaaka ma gidaani ɗa. Na saamiyyamca ɗaanicum parattí maa ki lekkaw asan ki malmilnoo. 33Kii kulla ampane kee ki kawayyee ɗa aɗe oko giicum aleŋ tanni maa na kawiyiyyam e?” 34Gaa sultanti boŋsiyyee ta tirta. Gaa biriyyooga oko asaakargee ma deegeyya giimi gu diigiyiyya namma ga pilkiyyeeca ɗaaniti parattí maa ga lekkee.»

35Gaa Iisa beneyyiɗe payya gaa: «Ay goŋŋa appe ga Tattu ma aaye samaani kulla asittoŋ lee, gaa kaƴi min aattoŋ saamayyee ɗa oko giiti ma galbanti paratti.»

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

Matiye 18: mmy

Highlight

ಶೇರ್

ಕಾಪಿ