लूका 7

इक्क सूबेदार रा विश्वास

1जां यीशु ए सारी गल्लां करी बैठ्ठे, तां से कफरनहूम कस्बे जो वापस हटी गे। 2तित्ते इक्क सुब्बेदार थिया, अते तिसेरा इक्क नौक्कर थिया, जे की तिसजो बड़ा प्यारा थिया से बीमारी री वजह कने मरणे जो होई गे रा थिया। 3तिस्स हाकिम ने यीशु रे बारे अन्दर बड़ी गल्लां सुणे री थिया, इधेरे तांइ तिन्ने किच्‍छ यहूदी लोक्कां रे बुजुर्गां जो यीशु का ए बिनती करणे तांइ भेज्जेया कि से आई करी तिसेरे नौक्कर जो ठीक करी दैण। 4तां से यीशु का जाई करी तिन्हेरे छंदे करी के बोलणा लग्गे, कि तुसा असा रे कन्ने हाकिम रे नौक्कर जो ठीक करणा चलो 5किजोकी से हाकिम, असा यहूदियां कने बडा़ प्यार रखदा, अते तिन्ने ही असा तांइ सभास्थल जो बणवाए दा है 6यीशु तिन्हा कन्ने चली पे, ते जां से सूबेदार रे घर रे नेड़े पूज्जे तां सूबेदार ने अपणे मित्तरां का ए गलाई भेजया, कि ओ प्रभु जी, तुसा मेरे घरे आणे री तकलीफ मत करो, किजोकी मैं इस जोग्गा नी है, कि तुसा मेरे घरे आण। 7अते इस ही वजह कने मैं अप्पु जो इस जोग्गा नी समजेया, कि तुसा रे नेड़े भी आई सकां इधेरे तांइ तुसा जित्ते हिन, तित्ते का ही अपणे मुँह का बोल्ली देयो कि मेरा नौक्कर ठीक होई जाओ, तां तिन्ने ठीक होई जाणा 8किजोकी, मैं भी कुसकी रे हेठ कम्म करणे वाला मणू है, अते किच्‍छ सपाई मेरे भी हेठ कम्म करदे अगर तिन्हा जो मैं कुदखी जाणे तांइ बोल्दा, तां से जान्दे आणे तांइ बोल्दा, तां से आन्दे अते अगर मैं अपणे नौक्कर जो बोल्दा, कि ए कम्म कर, “या से कम्म कर” तां से तिय्यां ही करदे 9ए सुणी करी यीशु हैरान होई गे, अते तिन्हा ने अपणे पीच्छे आणे वाले मणूआं जो बोल्लेया कि, इस गैर-यहूदी मणू सांई विश्वास तां मैं कदी इस्राएल रे मणूआं अन्दर भी नी दिख्खेया।

इक्क विधवा रे पुत्तर जो जिन्दा करणा

10फिरी जे मणू तिस सुब्बेदार ने भेज्जे रे थिये, से घरे जो हटी आए अते तिन्हा दिख्खेया कि से बुमार नौक्कर, जे मरणे जो होई गे रा थिया, से बिल्कुल ठीक होई गे रा थिया। 11थोड़े रोज्जां बाद, यीशु नाईन नां रे ग्रां जो जाया करदे थिये, अते तिन्हेरे कन्ने मते सारे मणू अते तिन्हेरे चेल्‍ले भी थिये। 12जां से तिस ग्रां रे दुआर का पूज्जे, तां इक्क बड्डी भीड़ मणू इक्क मुर्दे जो दबणे तांइ तिस ग्रां का बाहर लेई चले रे थिये। मरणे वाला जे थिया, से अपणी मां रा इकलौता मुन्डा थिया, अते तिसेरी मां विधवा थी। 13ए दिख्खी करी, यीशु रा मन रहम कने भरी गेया, अते तिन्हा ने तिस्स विधवा जो बोल्लेया, मत रोआं! 14अते से तिस अर्थी का गे अते जाई करी तिस अर्थी जो छुतेया जिन्हा ने अर्थी चुक्केरी थी, से रुकी गे तां यीशु ने बोल्लेया, ओ जुआन, मैं तिज्जो बोलदा कि उठी जा! 15तां तिस मुर्दे बिच प्राण आई गे, अते से उठ्ठी करी बेई गेया ते बोलणा लग्गी पेया! यीशु ने तिसजो तिसेरी मां का देई दित्ता 16ए दिख्खी करी मणू डरी गे, अते परमेश्वर री बड़ाई करी के बोल्णा लगे कि, इक्क बड्डा भविष्यद्वक्ता असा का आए रा है, परमेश्वर ने अपणे लोक्कां पर बड़ी दया कित्ती है। 17तिस रोज जे होया थिया, तिसेरी खाप्प यहूदियां प्रदेश अते अरे-परे रे सबणी देसां बिच फैल्ली गई।

यूहन्ना बपतिस्मा दैणे वाले रा सवाल

18ए जे किच्‍छ भी होया थिया, इन्हा सबणी गल्लां रे बारे अन्दर यूहन्ना जो तिसेरे चेल्‍लेयां ने खबर देई दित्ती। 19तां यूहन्ना ने अपणे दो चेल्‍लेयां जो यीशु का ए पूच्छणे तांइ भेज्जेया, कि जिस मसीह यीशु जो असी भालदे हिन, से तुसा ही हिन, कि से कोई होर है? 20तां से चेल्‍ले यीशु का गे अते तिन्हा जो बोल्णा लगे कि, असा जो यूहन्ना बपतिस्मा दैणे वाले ने ए पूच्छणे तांइ भेज्जेया, कि जिस मसीह यीशु जो असी भालदे हिन, से तुसा ही हिन कि कोई होर हिन? 21तां यीशु ने तिन्हेरे ही सामणे मते जणेयाँ जो बुमारियाँ का अते तकलिफां, अते दुष्टात्मा का छुड़ाया, अते मते जणे अन्ने मणूआं जो लौ दित्ती 22फिरी यीशु ने यूहन्ना रे चेल्‍लेयां जो बोल्लेया, तुसा ने अब्बे जे किच्‍छ भी दिख्खेया-सूणेया, ए जाई करी यूहन्ना जो दस्सी देयो, कि अन्ने दिखदे हिन, लट्टे मणू हन्ड़दे-फिरदे हिन, कोढ़ी मणू सुच्चे होया करदे हिन, जे मणू टौणे थिये से सूणेया करदे हिन, मुरदे जिन्दे होया करदे हिन, अते गरीबां जो परमेश्वर रा सुब बसेख सुणाया जाया करदा है 23धन्न हिन से जे मेरे बारे बिच धोखा ना खाए 24जां यूहन्ना रे चेल्‍ले चली गे, तां यीशु मणूआं जो पूच्छणा लगे, ए यूहन्ना है कुण, जिस जो दिखणा तुसा बणा अन्दर गे थिये? कै से हवा कने हिली जाणे वाले नलू सांई इक्क कमजोर मणू है? 25कि तुसा ए सोची करी गे थिये कि, तित्ते कोई मैह्न्गे अते छैल कपड़े पाणे वाला मणू होणा? तां कै तुसा ए नी जाणदे कि जे मैह्न्गे अते छैल कपड़े पान्दे, से मज्जे कने अपणी कोठ्ठियाँ बिच रैह्‍न्दे, बणा बिच नी 26तां फिरी तुसा कै दिखणा गे थिये? कुसकी भविष्यद्वक्ता जो? हाँ, मैं तुसा जो बोल्दा, कि से तां भविष्यद्वक्ता का भी बड्ड़ा है 27यूहन्ना से ही है, जिसेरे बारे अन्दर पवित्रशास्त्र बिच लिख्खे गे रा है,

“दिख्ख, मैं अपणे दूत जो तेरे अग्गे-अग्गे भेजदा, जिनिये तेरे का पैल्ले जाई करी तेरे मणूआं जो तेरे तांइ तैयार करणा।”

28फिरी यीशु ने बोल्लेया, मैं तुसा जो बोल्दा, कि हल्ले तांइ इदेया कोई मणू नी जम्मेया, जे यूहन्ना का बद्धी करी हो पर, परमेश्वर रे राज बिच जे सबका छोटा है, से यूहन्ना का भी बद्धी करी है 29जा तिन्हा लोक्कां ने ए सूणेया, तां सारे लोक्कां ने ते इत्ते तिकर कि चुंगी लैणे वालेयां ने भी मन्नी लेया कि परमेश्वर री गल्लां जो मनणा सही है किजोकी तिन्हा ने यूहन्ना का बपतिस्मा लेई लित्तेया थिया। 30पर फरीसियां अते शास्त्री लोक्कां ने परमेश्वर री मर्जी जो सच नी मन्नी करी यूहन्ना का बपतिस्मा लैणे का मना करी दित्ता थिया। 31यीशु ने मणूआं जो फिरी पूच्छेया कि, मैं अज्ज रे जुग रे मणूआं री बराबरी कुस्स कने करां? कि ए हिन कुस्स सांई? 32किजोकी ए मणू तां तिन्हा बच्चेयां सांई हिन, जे कि खेल-खेल बिच इक्क-दूज्जे री सिकाइता लान्दे, कि असा ने तुसा तांइ पीपणी बजाई पर तुसा नच्चे नी, असा ने तुसा तांइ रोणे वाले गाणे गाए, पर, तुसा रोए नी 33किजोकी यूहन्ना बपतिस्मा दैणे वाला ना रोट्टी खान्दा अते ना ही अंगूर रा रस्स पीन्दा थिया पर तुसा बोल्दे हिन कि तिस्स बिच दुष्टात्मा है 34अते मैं, मणू रा पुत्तर, जे मैं ही है रोट्टी खान्दा अते अंगूर रास भी पीन्दा, तां तुसा मेरे बारे अन्दर बोल्दे, कि ए तां भुखांग ते पियक्कड़ है अते चुंगी लैणे वाले अते पाप्पी मणूआं कन्ने रैहन्दा 35पर समझ अपणे मनणे वालेयां री वजह कने सही साबित हुंदी 36इक्क फरीसी मणू ने यीशु रे छंदे कित्ते कि, मेरे घरे रोट्टी खाणे तांइ चलो अते तिस फरीसी री गल्ल मन्नी करी यीशु तिसेरे घरे आए अते रोट्टी खाणा बेई गे।

फरीसी रे घरे इक्क पापण जनानी जो माफ करणा

37जां तिस ग्रां री इक्क पापण जनानी जो पता लग्गेया, कि यीशु फरीसी रे घरे रोट्टी खाणे तांइ आए दे हिन, तां से इक्क संगमरमर रे भाडें अन्दर खुशबू वाला इक्क बड़ा मैहन्गा इत्र लेई आई। 38अते अपणे गोडे रे भारे बेई करी रोणा लग्गी अते हाख्खी का फुए यीशु रे पैरां पर पैणा लगे अते से यीशु रे पैरां जो अपणे बालां कने पुंजणा लग्गी अते तिन्हा जो घड़ी-घड़ी चुम्मी करी तिस पर इत्र मली करी तिन्हेरा अभिषेक कित्तेया। 39ए दिख्खी करी, से फरीसी मणू जिनिये यीशु जो सद्दे रा थिया, अपणे मन अन्दर सोच्णा लग्गेया कि, अगर यीशु सच्चे भविष्यद्वक्ता हुन्दे तां इन्हा जो ए पता लग्गी जाणा थिया कि इन्हा जो छुणे वाली ए जनानी कुण है अते कदेइ है, किजोकी ए तां पापण है। 40पर यीशु ने तिस फरीसी रे मन री गल्ल जाणी गे, अते तिन्हा ने तिसजो जवाब दित्ता, ओ शमौन, मैं तेरे जो इक्क गल्ल दसणी, तां से बोलदा, गुरु जी बोल्लो। 41तां यीशु ने तिन्हा जो इक्क उदारण दित्तेया, कि कुसकी सेठे रे दो दैण-दार थिये, तिन्हा बिच का इक्क जणे ने पांज्ज-सौ दीनार रे सिक्के कने दूज्जे ने पंज्जाह् दीनार हटाणे थिये। 42जां दोन्नो दैण-दार उधार वापस नी हटाई सके, तां तिस सेठ ने तिन्हा पर तरस कित्ता अते दोन्नी रा उधार माफ करी दित्ता। अवे तू बोल, कि तिन्हा बिच का कुन्ने तिस सेठ कने जादा प्यार रखणा? 43फिरी तिस फरीसी मणू, शमौन ने जवाब दित्ता, जी! मेरे हिसाब कने तां, जिसेरी जादा उधारी माफ होई, तिन्ने जादा प्यार रखणा। यीशु ने तिस्स जो बोल्लेया, तैं ठीक बोल्लेया, 44फिरी यीशु तिस जनानी पास्से मुड़ी करी शमौन जो बोल्लेया, इस जनानी पास्से दिख्ख, जे अपणे गोड्डे रे भारे बैठ्ठी री है, मैं तेरे घरे आए दा है, पर तैं मेरे पैर धुआणें तांइ पाणी नी दित्ता, अते इन्ने तां मेरे पैर अपणे आँसुआं कन्ने धोए अते अपणे बालां कने पुंझे। 45तैं मेरे जो चुम्मेया भी नी, पर जिस बेल्ले रा मैं आए दा है, इन्ने मेरे पैरां जो चुमणा बांद्द नी कित्तेया 46तैं मेरे सरा पर तेल मलणा भी जरुरी नी समजेया पर इन्ने मेरे पैरां पर इत्र मलेया 47इधेरे तांइ मैं तिज्जो बोल्दा, कि इसेरे पाप जे कि मते थिये, से सब माफ होई गे, किजोकी इन्ने जादा प्यार रख्खेया पर जिसेरे घट्ट पाप माफ होए होण, से प्यार भी घाट्ट ही करदा 48अते यीशु ने तिस जनानी जो बोल्लेया, तेरे पाप माफ होई गे 49तां जे मणू तिन्हा कन्ने रोट्टी खाणा बैठ्ठे रे थिये, से अपणे मनां अन्दर सोचणा लगे कि मणूआं रे पाप्पां जो तां सिर्फ परमेश्वर ही माफ करी सकदे तां ए इय्यां बोलणे वाला कुण हुंदा? 50पर यीशु ने तिस्स जनानी जो बोल्लेया, तेरे विश्वास दी वजह कने तू बची गई, अव्वे सांती कने घरे चली जा।

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

लूका 7: CDHNT

Highlight

ಶೇರ್

ಕಾಪಿ