लूका 22

यीशु रे खिलाफ चाल

1फसह रा त्याहार आणे वाला थिया, इस त्योहर जो खमीरी रोट्टी रा त्योहर भी बोलदे 2उत्ते बड्डे पुरोत्त अते शास्त्रि यीशु जो मारणे री ताक बिच थिये पर से मणूआं का डरदे थिये।

यहूदा रा धोखा दैणा

3तां शैतान यहूदा इस्करियोती चेल्‍ले रे सरीर बिच चली गेया ए यीशु रे बारा खास चेल्‍लेयां बिच का इक्क थिया 4तिन्ने जाई करी बड्डे पुरोत्त अते सभास्थल रा पैह्रा दैणे वालेयां रे प्रधाना कने मिली करी सलाह कित्ती कि से यीशु जो तिन्हा का किय्यां पकडवाई सकदा 5यहूदा री ए गल्ल तिन्हा जो बड़ी छैल लग्गी अते तिन्हा ने तिसजो ईनाम दैणे रा वादा भी कित्ता 6यहूदा भी इस गल्ल तांइ तैयार होई गेया, अते यीशु जो पकड़वाणे तांइ भाह्ना तोपणा लगेया, कि जां से किल्ले होण तां से तिन्हा जो पकड़वाई सको 7तां फिरी अखमीरी रोट्टी रा त्योहर आया, जिस अन्दर छेल्लू री कुर्बानी दिन्दे थिये।

चेल्‍लेयां कने फसह रा आखरी धाम

8यीशु ने पतरस अते यूहन्ना जो फसह री रोट्टी री तयारी करणे तांइ ए बोल्ली करी अग्गे भेज्जेयाअसां रे खाणे तांइ फसह री रोट्टी री तैयार करी करो 9तिन्हा ने यीशु का पूच्छेया कि, असी कुस जगाह् पर फसह री धाम रखण? 10यीशु ने पतरस अते यूहन्ना जो बोल्लेया, दिख्खो, यरुशलेम सहर अन्दर पुजदे ही तुसा जो इक्क इदेया मणू मिलणा जिनिये इक्क पाणी री गागर चुक्केरी होणीe, से जिस भी घरां अन्दर जांह्ग्गा, तुसा भी तिस्सी घरां अन्दर चली जाए 11अते तिस घर रे मालक का पूच्छी लै कि, गुरु जी ने तेरे का पूच्छेया है कि से परौणे वाला कमरा कुदे है, जिस अन्दर तिन्हा ने अपणे चेल्‍लेयां कने बेई करी फसह री रोट्टी खाणी है? 12तिन्ने तुसा जो इक्क बड्डा कमरा दसणा, जे पैल्ले रा ही सजाए दा होणा, तुसा तित्ते ही धाम री तयारी करेयो 13फिरी से दोई यरुशलेम जो चली गे, अते तिन्हा ने दिख्खेया कि सब किच्‍छ तिय्यां ही है, जिय्यां कि यीशु ने उन्हा जो बोल्ले रा थिया, फसह री रोट्टी तयारी कित्ती।

प्रभु री धाम

14फिरी जां से बेल्ला आया तां यीशु अपणे बारा प्रेरितां कने फसह री धाम खाणे जो बेई गे।

15यीशु ने तिन्हा जो बोल्लेया, मेरी बड़ी मरजी होए री थी कि मैं मुसीबतां सैह्णे ते मरणा का पैल्ले अपणे प्रेरितां कन्ने फसह री रोट्टी खाँ, 16किजोकी मैं तुसा जो बोल्ली दिन्दा कि जां तांइ परमेश्वर रे राज पूरी तरिक्के कने ना आई जाए, तां तांइ, मैं इसजो दुबारा नी खाणा है। 17फिरी यीशु ने अंगूर रे रास्स रा कटोरा लित्तेया अते परमेश्वर रा सुक्र कित्ता अते अपणे चेल्‍लेयां जो बोल्लेया, कि इसजो अप्पु-मिते बंड्डी लेयो। 18किजोकी आज का बाद, जां तांइ परमेश्वर मणूआं पर राज नी करी लिन्दा, तां तांइ, मैं अंगूर रा रस्स नी पीणा है 19फिरी यीशु ने रोट्टी जो पकड़ी करी परमेश्वर रा सुक्र कित्ता अते तोड़ी करी चेल्‍लेयां जो देई दित्ती अते बोल्लेया कि, ए मेरा जिस्म है, जे तुसा तांइ दित्ता गे रा है: मेरे जो याद करणे तांइ तुसा इय्यां ही करेया करो 20इय्यां ई, यीशु ने रोट्टी खाणे का बाद अंगूर रे रास्स रा कटोरा चुक्केया अते अपणे चेल्‍लेयां जो बोल्लेया, ए अंगूर रास्स परमेश्वर री तरफ का, ए मेरे खून बिच इक्क नौई वाचा है जे तुसा तांइ बहाया जादां। 21पर, आज असा रे बिच से मणू भी बेई करी रोट्टी खाया करदा है, जिनिये मेरे जो पकड़वाणा है 22मणू रे पुत्तर, जे मैं ही है जो तां परमेश्वर रे वचन रे हिसाब कने तां मरणा जरुरी है, पर, लाणत है तिस पर जिसेरे जरिए से पकड़ाया जाणा 23तां फिरी से बारा चेल्‍ले अप्पु-मिते इक्क दूए का पूच्छणा लगे कि असा बिच का इदेया कुण हुणा जे ए कम्म करी सकदा?

महान कुण? पर बैह्स-बाजी

24फिरी तिन्हा अन्दर इस गल्ल री बैह्स चली पेई कि असा बिच का सबका बड्डा कुस जो मन्नया जान्दा? 25यीशु ने तिन्हा जो बोल्लेया, कि गैर यहूदियां रे राज्जे तिन्हा पर राज करदे, अते जे तिन्हा पर अपणा हक्क भी जमान्दे अते से अप्पु जो तिन्हा रे मित्र भी बुलवाणा चाह्‍ंदे। 26पर तुसा जो तां इय्यां बिल्कुल भी नी करणा चाएदा, तुसा बिच जे सबणी का बड्डा है तिसजो सबणी का निमता बणी करी रैह्णा चाएदा अते जे सबणी रा प्रधान है, तिसजो तां इक्क नौक्कर सांई बणी करी रैह्णा चाएदा 27तुसा अप्पु सोच्चो कि जे मणू मेज पर रोट्टी खाणा बैठ्ठे रा हो, से बड्डा हुन्दा कि जे मणू तिसजो रोट्टी खुआया करदा हो, से? बड्डा तां से ही हुन्दा जे मेज पर बेई करी रोट्टी खादां पर, मैं भी तां तुसा कने इक्क नौक्कर सांई रैहन्दा 28तुसा से हिन जे मेरी परखे जाणे रे बेल्ले मेरे कन्ने रेय 29कने जिय्यां मेरे पिता-परमेश्वर ने मेरे जो राज करणे तांइ इक्क प्रदेश दित्ते दा है, तिय्यां ही मैं भी तुसा जो राज करणे तांइ इक्क प्रदेश पर पूरा हक्क दिन्दा 30ताकि तुसा मेरे राज अदंर मेरे मेज पर बेई करी मेरे कन्ने रोट्टी खाण अते सिंहासनां पर बेई करी इस्राएल रे बारा गोत्रां रे मणूआं रा फैसला करण।

पतरस रे मन्हा करणे रे बारे बिच भविष्यवाणी

31ओ शमौन, चुकन्ने रेयो, किजोकी ने शैतान ने परमेश्वर का ए अनुमती मंगे री है कि से तुसा परखे ताकि तुसा मुसीबत बिच पेयो ते तुसा रा जे विश्वास मेरे अंदर है तिसजो हिलाए दीये जिय्यां किसान कणक जो छटकारदा। 32पर मैं तेरे तांइ परमेश्वर का प्रार्थना कित्ती कि तेरा विश्वास टुटी ना जाओ अते जां तू फिरी तौबा करी हटणा तेरे भरोसे जो दिख्खी करी तेरे संगी विश्वास भ्यालां रा भी होंसला होई जाओ। 33इस गल्ल पर शमौन ने यीशु जो बोल्लेया, ओ प्रभु जी, मैं तुसा कने जेल जाणे जो अते होर तां होर मरणे जो भी तैयार है। 34फिरी यीशु ने बोल्लेया, पतरस, मैं तिज्जो बोल्ली दिन्दा कि आज मुर्गे ने तां तांइ बांग नी दैणी जां तांइ तू मेरे जो पछियानणे का तीन्न वरी मुक्करी नी जांगा।

बटुआ, झोली ते तलवार

35तां यीशु ने तिन्हा का पूच्छेया, कि जां मैं तुसा जो बगैर बटुए, बगैर झोले अते बगैर बूट रे सुब बसेख सुनाणे तांइ भेज्जेया थिया, तां तुसा जो कुसकी चीज रा घाट्टा होया थिया? तिन्हा ने जवाब दित्ता, कि ना, कुसकी भी चीज रा घाट्टा नी पेया थिया। 36फिरी यीशु ने बोल्लेया, अवे हालात अलग होणे इधेरे तांइ जिस का बटुआ अते झोली होण, से तिन्हा जो अप्पु कन्ने लेई चलो अते जिस का तलवार नी है, से अपणे चोग्गे जो बेच्ची करी इक्क तलवार भी लेई लेयो। 37किजोकी मैं तुसा जो बोल्ली दिन्दा, कि पवित्रशास्त्र अन्दर मेरे बारे अन्दर लिख्खे री गल्ल अवे पूरी होणे वाली हिन

“कि तिसजो अपराधियां बिच गिणेया गेया,”

अते मेरे बारे अन्दर होर जितणी भी गल्लां उस अन्दर लिख्खे री हिन,

से इक्क-इक्क करी के सब पूरी होया करदी हिन।

38चेल्‍लेयां ने बोल्लेया, ओ प्रभु जी, दिख्खो, असा का दो तलवारां हिन, यीशु ने बोल्लेया, इन्नी ही बड़ी हिन।

जैतून रे पहाड़ पर यीशु री प्रार्थना

39तां यीशु तित्ते का जैतून नां रे पहाड़ा पर चली गे, जिय्यां कि से हर वरी जांन्दे थिये अते तिन्हेरे चेल्‍ले भी तिन्हा कन्ने चली पे 40तित्ते पूज्जी करी यीशु ने चेल्‍लेयां जो बोल्लेया, कि प्रार्थना करदे रेयो कि परखे ना जाओ 41फिरी यीशु चेल्‍लेयां का थोड़े अग्गे चली गे, जितणी दुर तांइ इक्क पत्थर सूटी सकदे थिये, तितणि दुर जाई करी जाह्न्नु रे भारे बेई करी परमेश्वर कने प्रार्थना करणा लगे, 42कि ओ परम पिता जी, अगर तुसा चाह्‍ंदे तां इस दुख रे कटोरे जो मेरे का दुर हटाई देयो, पर, फिरी भी मैं चाह्‍ंदा कि जे तुसा री मरजी है से ही पूरी हो ना की मेरी मरजी पूरी हो 43तां स्वर्ग का इक्क स्वर्गदूत सामणे आई रेया अते तिन्ने यीशु जो सैह्णे री ताकत दित्ती 44अते यीशु बडे़ भरी बेचैन होई गे अते होर भी जादा वरी मन कने प्रार्थना करणा लग्गी पे तिन्हेरा पसिना इय्यां निकलदा थिया जिय्यां खून री बुदां जमीन पर पेय करदी हो 45तां से प्रार्थना का उठे ते अपणे चेल्‍लेयां का आई करी तिन्हा जो उदास होई करी सुत्ते रा दिख्खेया 46यीशु ने तिन्हा जो बोल्लेया, तुसा सोई किजो गेरे हिन? उठी जाओ अते प्रार्थना करो, ताकि परखे ना जाओ।

यीशु रा धोखे कने पकड़ाया जाणा

47यीशु हल्ले गल्ल करेया ही करदे थिये कि तित्ते मते जणे मणू आई रे अते बारा चेल्‍लेयां बिच का इक्क जिसेरा ना यहूदा थिया से तिन्हा सबणी का अग्गे चले दा थिया से यीशु रे नेड़े जाई खड़ितेया कि से तिन्हा जो सुन्ना देई सको। 48यीशु ने तिसजो बोल्लेया, यहूदा, कै तू चुम्मी करी मणू रे पुत्तर, जे मैं ही है जो पकडवाणा लगे रा है? 49यीशु रे चेल्‍लेयां जो लग्गेया कि किच्‍छ होणे वाला है तिन्हा ने यीशु जो बोल्लेया, प्रभु जी, कै असी इन्हा कन्ने लड़ने तांइ अपणी तलवारां कड्डी लैण? 50तां तिन्हा बिच का इक्क जणे ने प्रधान पुरोत्त रे नौक्कर रा सज्जा कान्न अपणी तलवार कन्ने बड्डी रख्या 51पर यीशु ने बोल्लेया, लड़ीणा बांद करी देयो अते तिन्हा ने तिस मणू रे कान्न जो छुत्तेया अते ठीक करी दित्तया 52तां यीशु ने बड्डे पुरोत्त, मन्दिर रे पैहरेदारां अते बुजुर्ग लोक्कां जो बोल्लेया, कै तुसा मेरे जो इक्क डाकू समजदे जे कि तुसा मेरे जो पकड़ने तांइ तलवारां अते डंडे लेई करी आए दे हिन? 53जां मैं तुसा कने मन्दिर अन्दर हुन्दा थिया, तुसा ने मेरे जो तां किजो नी पकड़ेया? पर अज्ज ए तुसा रा बेल्ला है, अते निहारे रा राज करणे रा बेल्ला है।

पतरस रा मन्हा करणा

54तिन्हा ने यीशु जो पकड़ेया अते प्रधान पुरोत्तां रे घरे जो लेई गे अते पतरस तिन्हा का दुर-दुर रेई करी तिन्हेरा पीच्छे-पीच्छे थिया आया करदा 55अते जां से पैह्रेदार अंगणा अन्दर आग्ग भखाई करी बेई गे तां पतरस भी तिन्हेरे बिच जाई करी बेई गेया 56इक्क जनानी ने पतरस जो आग्ग री लौ अन्दर दिख्खी करी पछियाणी लेया अते बोल्णा लग्गी कि ए मणू भी तां यीशु रे कन्ने हुन्दा थिया 57पर, पतरस ने तिस जनानी जो बोल्लेया कि मैं तां तिसजो जाणदा भी नी कि से कुण है 58थोड़ी देर बाद इक्क होर मणू तिसजो दिख्खी करी बोल्णा लगेया, तू भी तां इन्हा बिच का ही है, पतरस ने बोल्लेया, ओ भाई, मैं इन्हा बिच का नी है 59कोई इक्क कर घंटे बाद इक्क होर मणू बड़ा जोर देई करी बोल्णा लगेया, पक्का ए भी तिन्हा कन्ने ही थिया किजोकी ए भी गलीली 60पर, पतरस बोल्णा लगेया, ओ भाई, मेरे जो तां पता भी नी है कि तू कुसेरे बारे अन्दर गल्ल करेया करदा है जिय्यां ही तिन्ने ए गल्ल बोल्ली, तिस्सी बेल्ले मुर्गे ने बांग देई दित्ती 61तिस्सी बेल्ले यीशु ने पतरस पास्से मुडी करी दिख्खेया, तां पतरस जो यीशु री तिस गल्ल रा चेता आया कि, आज मुर्गे ने तां तांइ बांग नी दैणी जां तांइ तू मेरे जो पछियानणे का तीन्न वरी मुक्करी नी जांह्ग्गा 62तां पतरस तिस अंगणा का बाह्र चली गेया अते जोरे-जोरे रोणा लग्गी पेया।

यीशु रा मजाक उड़ाया जाणा

63जिन्हा मणूआं ने यीशु जो पकड़े दा थिया, से तिन्हेरा मजाक उडाणा लगे अते तिन्हा जो मारणा लग्गी पे 64तिन्हा ने यीशु री हाखियाँ पर पट्टी बन्नी दित्ती अते तिन्हा जो मारणा लगे अते तिन्हा का पूच्छणा लगे कि, अवे तू दस्स कि से कुण है जिनिये तिज्जो मारेया? 65अते तिन्हा ने यीशु री बेजती करणे तांइ होर भी मती सारी गल्लां बोल्लियाँ।

महासभा रे सामणे यीशु

66जां भ्याग होई तां बड्डे पुरोत्तां अते शास्त्रियां समेत मन्दिर रे बुजुर्गां री इक्क सभा बैठ्ठी, फिरी से मणू यीशु जो महासभा बिच लेई आए। 67तिन्हा ने यीशु का पूच्छेया, कि अगर तू मसीह यीशु है, तां असा जो दस्सी दे यीशु ने तिन्हा जो जवाब दित्ता, कि अगर मैं तुसा जो दस्सी भी देयां, तां भी तुसा मेरे पर विश्वास नी करणा 68अते जे मैं तुसा का इक्क सुआल पुछाँ, तां तुसा ने भी, तिधेरा कोई जवाब नी दैणा 69पर, अवे का मणू रे पुत्तर, जे मैं ही है (यीशु मसीह यीशु) जो सबका ताकतवर परमेश्वर रे सज्जे पास्से बठाया जाणा 70फिरी सब पूच्छणा लगे, कै तू परमेश्वर रा पुत्तर है? यीशु ने तिन्हा जो जवाब दित्ता, तुसा ठीक बोल्लेया करदे हिन, मैं परमेश्वर रा पुत्तर है 71तां तिन्हा ने बोल्लेया, अवे असा जो कुसकी होरसी री गुवाई री कै जरुरत है? किजोकी असा तां अप्पु ही इसेरे मुंआ का ए सुणी लेया।

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

लूका 22: CDHNT

Highlight

ಶೇರ್

ಕಾಪಿ