लूका 10

सत्तर चेल्‍लेयां रा भेज्जेया जाणा

1इन्हा गल्लां रे होणे का बाद प्रभु यीशु ने सत्तर चेल्‍ले होर चुणे ते फिरी जिस-जिस सहरां ते जगाह् पर तिन्हा अप्पु जाणा थिया, तित्ते दो-दो करी के पैल्ले तिन्हा जो भेजेया। 2यीशु ने तिन्हा जो बोल्लेया, कि पक्के रे खेतर मते हिन पर मजूर थोड़े हिन इधेरे तांइ खेतर रे मालका का प्रार्थना करो कि फसल कटणे तिकर होर मजूर भेजी देयो 3जाओ दिख्खो, जिय्यां भेड़ां भेड़िये बिच मझाटे होण तिय्यां ही मैं तुसा जो तिन्हा लोक्कां रे बिच मझाटे भेज्जेया करदा है। 4इधेरे तांइ, तुसा जान्दे बेल्ले अप्पु कन्ने किच्‍छ भी मत लिन्दे, ना बटुआ, ना झोला ते ना तां बूट अते रस्ते अन्दर कुसकी रा हाल-चाल भी मत पुछदे 5तुसा जिस भी घर अन्दर ‍जांगे, तिन्हा जो बोल्लेया कि इस घर पर परमेश्वर री सांती बणी रे।

6जे अगर से मणू इस सांती जोग्गे हुन्गे तां से तिन्हा पर बणी रैह्णी ते जे से इस जोग्गे नी होये तां से सांती तुसा का वापस हटी आणी। 7तिसी घर बिच रेयो, ते जे किच्‍छ तिन्हा का मिल्ले, से ही खाओ, किजोकी मजदूर जो तिसेरी मजदूरी मिलणा चाएदी, घर-घर मत फिरदे। 8जे कुसकी ग्रां अन्दर जाई करी तित्ते रे मणू तुसा जो खुस होई करी किच्‍छ भी खुआंगे, से खुसी कने खाई लेयो 9तित्ते रे बिमार मणूआं जो खरा करो ते तिन्हा जो बोल्लो, कि परमेश्वर राज करणे तांइ तुसा रे नेड़े आई गे रा है 10पर, जे कुसकी ग्रां रे मणू तुसा रे आणे पर खुस नी होण तां तिस जगाह् री सड़कां पर जाई करी बोल्लेया करो, 11कि तुसा रे ग्रां री धूड़ जो असी तुसा रे सामणे अपणे पैरां का झम्मी करी इत्ते का चली पे, पर ए गल्ल समजी लेयो, कि परमेश्वर राज करणे तांइ तुसा रे नेड़े आई गे रा है 12यीशु ने तिन्हा चेल्‍लेयां जो बोल्लेया, कि इस सहर री हालत फैसले वाले रोज्जे सदोम देस का भी जादा खराब होणी है 13फिरी यीशु बोल्दे, खुराजीन ते बैतसैदा नां रे सहरां बिच रैह्णे वाले मणूआं तांइ बड़ा बुरा बेल्ला आणे वाला है, किजोकी जिनिये चमत्कारी कम्म मैं इन्हा दो सैहरां बिच जाई करी कित्ते, जे से ही कम्म मैं सूर अते सैदा रे सहर बिच जाई करी करदा, जित्ते मूर्तीियाँ री पूजा करणे वाले मणू रैह्‍न्दे, तां तिन्हा ने भी बोरे रे कपड़े बणाई करी ते अप्पु पर धूड़ मली करी अपणे पाप मन्नी लेरे होणे थिये।

विश्वास ना करणे वाले सहरां पर धिक्कार

14पर परमेश्वर ने जधाड़ी हिसाब-किताब करणा, तधाड़ी सूर अते सैदा रे सहर री हालत तुसा का तां जादा सैणे जोग्गी होणी, जे कि खुराजीन ते बैतसैदा अन्दर रैह्या करदे हिन 15ते ओ कफरनहूम कस्बे रे मणूओ, कै तुसा जो स्वरगा अन्दर लेई जाया जाणा है? पर ना, तुसा जो तां झिक्क पताल अन्दर सुट्टेया जाणा है 16यीशु ने ए भी बोल्लेया, कि जे मणू तुसा री गल्लां पर विश्वास करगा, इसेरा मतलब ए होणा कि तिनिए मेरे पर भी विश्वास करी लेया, ते जे तुसा जो नक्कारी दिंदा, तिनिए मेरे जो भी नक्कारी दित्तेया, ते जे मेरे जो नक्कारी दिंदा, तिसेरा मतलब ए होणा कि तिनिए मेरे भेजणे वाले परमेश्वर जो भी नक्कारी दित्तेया।

सत्तर चेल्‍लेयां रा वापस हटणा

17जिस बेल्ले से बाकि रे सत्तर चेल्‍ले खुसी-खुसी वापस हटी आए तां यीशु जो बोलणा लगे, ओ प्रभु, दुष्टात्मा भी तुसा रे नां कने असा रे हुक्मां जो मन्नेया करदी थी। 18इस गल्ल पर यीशु ने तिन्हा जो बोल्लेया, मैं शैतान जो आसमान का बिजली सांई थल्ले पैंदे दिख्खेया। 19दिख्खो, मैं तां तुसा जो कीड़े ते बिच्छुओं जो रौदंणे रा, ते असा रे दुश्मण री सारी ताकत पर जितणे रा अधिकार दित्ते रा है ते तुसा जो कुसकी भी चीज रा कोई नुक्सान नी होणा। 20फिरी भी इस गल्ल पर खुस मत हुदें, कि दुष्टात्मा तुसा रा गलाया मन्दियाँ, पर सिर्फ इस गल्ले री खुसी मनाओ कि तुसा रे नां स्वर्ग अन्दर लिखी दित्ते रे हिन। 21तिस ही बेल्ले यीशु पवित्रात्मा बिच मगन होई करी बड़े खुस होये ते बोलणा लगे, ओ मेरे पिता जी, तुसा आसमान ते जमीन रे प्रभु हिन, मैं तुसा रा बड़ा शुकर करदा, कि तुसा ने इन्हा गल्लां जो उन्हा मणूआं का दुर रखेया जे अप्पु जो बड़े भरी ज्ञानी ते चलाक मन्दे, ते इन्हा बच्चेयां जो सेह्ई गल्लां दस्सी दित्तीयां, हाँ, मेरे पिता जी, तुसा जो इय्यां करणा ही खरा लग्गेया।

यीशु रा खुस होणा

22फिरी यीशु ने तिन्हा चेल्‍लेयां जो बोल्लेया, मेरे पिता जी ने मेरे जो सबणी चीजां पर हक्क दित्ते रा है ते पिता ही जाणदे कि पुत्तर कुण है, ते पुत्तर जो छड्डी करी होर कोई नी जाणदा कि पिता कुण है, या तिन्हेरे जो छड्डी करी से जाणी सकदे जिस जो पुत्तर पिता रे बारे अन्दर दस्सणा चांह्दा 23जिस बेल्ले तित्ते चेल्‍लेयां जो छड्डी करी होर कोई भी नी थिया, तां यीशु ने तिन्हा जो बोल्लेया, तुसा धन्न हिन कि ए सब किच्‍छ जे होया करदा है, से अपणी हाख्खियां कन्ने दिख्खेया करदे हिन 24किजोकी मैं तुसा जो बोल्ली दिन्दा, कि मते राज्जेयां ते भविष्यद्वक्ता ने ए सब किच्‍छ जे तुसा ने दिख्खेया-सूणेया से दिखणा-सुनणा चाह्या पर ना तां से दिख्खी सके ते ना ही सुणी सके।

दयालू सामरी रा उदारण

25फिरी इक्क दिन जां यीशु लोक्कां जो सिखाया करदे थिये, तां शास्त्री लोक्कां बिच का इक्क जणा उठी करी यीशु जो परखणे तांइ सुआल पूच्छणा लग्गेया, कि ओ गुरु जी, मेरे जो कै करणा चह्ईंदा कि मेरे जो हमेसा री जिन्दगी मिल्ली जाओ? 26तिन्हा ने जवाब दित्तेया, कि तैं मूसा रे कानून री कताब बिच कै पढ़दा? 27से बोलणा लगेया, कि तू परमेश्वर कने पूरे मन, पूरे प्राण ते सारी ताकत लाई करी ते अपणी सारी समझ कने प्यार करेयां, ते अपणे पड़ोसियाँ जो भी अप्पु बराबर प्यार करेयां 28यीशु ने बोल्लेया, तैं ठीक जवाब दित्तेया इतणा ही करेया कर, तां तिज्जो हमेसा री जिन्दगी मिली जाणी। 29पर से मणू अप्पु जो सही जताणा चाह्‍न्दा थिया, इधेरे तांइ से यीशु का फिरी पूच्छणा लग्गेया, तुसा ए दस्सो कि मेरा पड़ोसी कुण होया? 30यीशु ने इक्क उदारण बोल्ली करी तिसजो जवाब दित्ता, कि इक्क मणू यरुशलेम सहर का यरीहो नां रे इक्क सहर जो जाया करदा थिया, ते रस्ते अन्दर तिसजो किच्‍छ डकैत्तां ने मिल्ली करी लुट्टी लित्तेया, ते तिन्हा ने तिसेरे कपड़े खुलाए ते तिसजो मारी-कुट्टी करी धाणस करी के रस्ते पर ही छड्डी करी चली गे। 31ते इय्यां होया, कि तिस ही रस्ते का इक्क यहूदी पुरोत्त जाया करदा थिया, पर तिनिए तिसजो तड़फदा दिख्खी करी तिसका मुँह फेरी करी चली गेया ते तिस बचारे जो अण-दिख्खा करी दित्तेया 32फिरी इय्यां ही इक्क लेवी, सेवादार मणू, उत्ते आया ते से भी तिसजो अण-दिख्खा करी के चली गेया। 33पर इक्क सामरिया प्रदेश रा मणू उत्ते का जाया करदा थिया, जां तिनिए उस बचारे अध-मरे मणू जो तड़पदे दिख्खेया, तां तिसजो उस पर बड़ा तरस आया। 34से तिसेरे नेड़े गेया ते तिनिए तिसेरे जखमां पर तेल ते अंगूर रा रस्स लाई करी पट्टी बह्न्नी दित्ती ते अपणे खोत्ते पर बिठाई करी रैण-बसे रे जो लेई गेया, ते तिसेरी सेवा कित्ती। 35दूए रोज्जे तिस सामरी मणू ने दो दीनार #10:35 दो दिन की धियाड़ीरैण-बसे रे मालक जो दित्ते ते तिसजो बोल्लेया, कि इसेरी दिख-रिख्ख करदे रेयां ते जे तेरा जादा खरचा होई जाह्न्गा तां से मैं हटदे बेल्ले आई करी तिज्जो देई दिंगा 36फिरी यीशु ने तिस शास्त्रि मणू का पूच्छेया, कि अवे तू दस कि इन्हा तीन्न जह्णेयाँ बिच का तिस धाणस मणू रा पड़ोसी कुण होया? 37से बोलणा लगेया, जिस सामरी मणू ने तिस पर तरस खाया थिया। यीशु ने तिस्जो बोल्लेया, जा ते अज्ज का बाद तू भी इय्यां ही करेयां।

मार्था ते मरियम रे घरे यीशु

38जां यीशु ते तिन्हेरे चेल्‍ले यरुशलेम पास्से जाया करदे थिये तां से इक्क ग्रां बिच पूज्जे, जित्ते मार्था नां री इक्क जनानी ने तिन्हेरा अपणे घरे सुआगत कित्ता।

39मार्था री इक्क भैण भी थी, जिसेरा नां मरियम थिया से यीशु रे पैरां का बेई करी तिन्हेरे वचन सूणेया करदी थी 40पर मार्था रोट्टी पकाणे री तयारी जो लेई करी फिक्र अन्दर पेई गई, से यीशु का आई ते बोलणा लग्गी, ओ प्रभु जी, कै तुसा जो फिक्र नी है कि मेरी भैण ने सारा कम्म मेरे उप्पर पाई दित्ते रा है? इधेरे तांइ इसजो बोल्लो की मेरे कने हत्थ बटाए। 41पर प्रभु यीशु ने तिसजो जवाब दित्तेया, ओ मार्था, तू मती गल्लां रे बारे अन्दर फिकर करदी रेह्न्दी। 42पर इक्क बदिया चीज है जिस जो मरियम ने चुणी लित्ते रा है, जे तिसका खुस्सेया नी जाणा।

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

लूका 10: CDHNT

Highlight

ಶೇರ್

ಕಾಪಿ