यूहन्ना 6

पांज्ज हजार मणूआं जो खुआणा

1इनाह् गल्लां रे बाद यीशु गलील प्रदेश री झीला मतलब की तिबिरियुस री झीला रे पार चली गे 2कने इक्क बड़ी भीड़ तिसरे पीच्छे चली पेई किजोकी जे चमत्कार से बिमारा पर दसदा थिया से तिन्हा जो दिखदे थिये 3तां यीशु पहाड़ा पर चढ़ी करी अपणे चेल्‍लेयां कने उत्ते बेई गे 4यहूदियां रा फसह रा त्याहार नेड़े थिया 5जिस बेल्ले यीशु ने अपणी हाख्खियां चुकी करी इक्क बड्डी भीड़ जो अपणे पासे आंदे दिख्खेया, तां फिलिप्पुस जो बोल्लेया, असी इन्हा रे खाणे तांइ रोट्टी कुते का रोटी खरीदी करी लेई आण 6तिसने ए गल्ल तिसजो परखणे तिकर बोल्ली किजोकी सेह़ अप्पु जाणदा थिया कि तिसने कै करणा 7फिलिप्पुस ने तिसजो जवाब दित्ता, कि दो सौ दीनार#6:7 दो सौ दिन री धियाड़ी री रोट्टी भी तिनेरे तांइ पूरी नी होणी कि तिन्हा तिस बिच का हर इक्क जो थोड़ी-थोड़ी भी मिली जाए। 8तिसेरे चेल्‍लेयां बिच का शमौन पतरस रा भ्याल अन्द्रियास ने तिसजो बोल्लेया 9इत्ते इक्क मुडां है जिस का जौ री पांज्ज रोट्टियां ते दो मच्छियाँ हिन पर इतणे लोक्कां तांइ पूरी नी होणियां। 10यीशु ने बोल्लेया लोकां जो बिठाई देओ तिस जगाह् बड्डा वरी घा थिया तां मणू जिहना बिच मणू री गिनती तकरिबन पांज्ज हजार थी बेई गे 11तां यीशु ने रोटियां लित्ती ते शुक्रिया करी के बैणे बाले जो बन्ड़ी दित्तीयां ते तिय्यां ही मच्छियाँ जितणी से चाह्‍ंदे थिये बन्डी दितियां। 12जां से खाई करी से रजी गे तां तिन्हा ने अपणे चेल्‍लेयां जो बोल्लेया बचे रे रोट्टी रे टोकरे किठ्ठे करी लिओ कि किच्‍छ भी सूटे ना जाण। 13ते तिन्हा ने तिसजो कठेरया कने जो री पांज्ज रोट्टी रे टुकड़े जे खाणे वालया का बचे करदे थिये बाहरा टोकरिया भरियां। 14तां जे चमत्कार तिसने करी दखाया तिसजो दिख्खी करी मणू बोलणा लगे, से भविष्यवाणी करणे वाला जे दुनिया अन्दर आणे वाले थिया, पक्का ऐई है 15यीशु ए जाणी करी कि सेह़ मेरे जो राजा बणाणे तांइ पकड़ना चाह्‍ंदे हिन फिरी से पहाड पर किल्ला चली गेया।

यीशु रा पाणी पर चलणा

16जिस बेल्ले सँझ होई तां तिसेरे चेल्‍ले झील रे किनारे चली गे। 17कने किस्ती पर चढ़ी करी झील रे पार कफरनहूम कस्बे जो जाणे लगे तिस बेल्ले निहारा होई गे रा थिया कने यीशु तिस बेल्ले तक तिन्हेरे का नी आए रा थिया। 18तूफान री वजह कने झिलां अन्दर छलारां उठणे लगियां 19जिस बेल्ले से चप्पु मारदे-मारदे लगभग छे किलोमीटर चली गे, तां तिन्हा ने यीशु जो झील पर चली करी किस्ती रे नेड़े आंदे दिख्खेया ते डरी गे। 20पर तिसने तिन्हा जो बोल्लेया, डरो मत! मैं है! 21ते से तिसजो किस्ती पर चढ़ाणे तांइ तैयार होए ते से किस्ती तिस जगाह् पर जाई पूजी गई जित्ते से जाए करदे थिये।

लोक्कां रा यीशु जो तोपणा

22अगले दिन तिस भीड़ ने जे झील रे किनारे ही रुकी गे थिये, तिन्हा ने दिख्खेया कि यीशु रे चेल्‍ले इक्को-इक्क किस्ती लेई करी चली गेरे हिन, तां तिन्हा जो समझ आई गेया कि यीशु अपणे चेल्‍लेयां कने नी गेरे हिन।

23तां बाकि किस्तियां, गलीली समुन्द्र रे किनारे बसे रे इक्क सहर तिबिरियुस बिच तिस जगाह् पर आई, जित्ते तिन्हा ने प्रभु रा शुकर करणे का बाद रोट्टी खाई थी। 24इस तांइ जिस बेल्ले भीड़ ने दिख्खेया कि इत्ते ना यीशु है कने ना तिसेरे चेल्‍ले, तां सेह़ भी किश्तिया पर चढ़ी करी यीशु जो तोपदे कफरनहूम कस्बे का पूज्जे।

यीशु जिन्दगी री रोट्टी

25झील रे पार जिस बेल्ले से तिस कने मिल्ले तां बोल्लेया, ओ गुरु, तू इत्ते कुस बेल्ले आया।

26यीशु ने जवाब दिता, मैं तुसा कने सच-सच बोलदा तुसा मेरे जो इधेरे तांइ नी थिये तोपदे किजोकी तुसा ने मेरे का चिन्ह-चमत्कार दिख्खे पर इधेरे तांइ किजोकी तुसा रोट्टियां खाई करी रज्जे थिये। 27मुकी जाणे वाली रोट्टी तांइ परिश्रम न करो, पर तिस रोट्टी तांइ मैहनत करो जे कि हमेसा री जिन्दगी तक रैह्‍ंदी, जिस जो मणू रा पुत्तर, जे मैं ही है, तुसा जो दिंगा, किजोकी पिता परमेश्वर ने ए करणा रा अधिकार भी दित्ते रा है। 28तिन्हा ने तिसजो बोल्लेया, परमेश्वर रा कम्म करणे तांइ असी कै करिये? 29यीशु ने तिन्हा जो जवाब दित्ता परमेश्वर तुसा का ए चाह्‍ंदे कि तुसा मणू तिस पर विश्वास करो जिस जो परमेश्वर ने भेज्जे रा है। 30तां तिन्हा ने तिसजो बोल्लेया, फिरी तू कुण सी निशानी दिखान्दा है कि असी तिसजो दिख्खी करी तुसा पर विश्वास करण? तू कुण देय्या कम्म दसदा? 31असा रे पूरखां ने बणा अन्दर मन्ना खाया, जिय्यां कि पवित्रशास्त्र बिच लिख्खे रा है,

कि परमेश्वर ने तिन्हा लोक्कां जो खाणे तांइ स्वर्ग का रोट्टी दित्ती।

32यीशु ने तिन्हा जो बोल्लेया, मैं तुसा जो सच-सच बोलदा कि मूसा ने तुसा जो से रोट्टी स्वर्ग का नी दित्ती, पर मेरा पिता तुसा जो सच्ची रोट्टी स्वर्ग का दिंदा। 33परमेश्वर री रोट्टी ओ ही है, जेडी स्वर्ग का उत्तरी करी दुनिया रे लोक्कां जो जिन्दगी दिन्दी। 34तां तिन्हा ने बोल्लेया, ओ प्रभु ए रोट्टी असा जो हमेसा देया कर। 35यीशु ने तिन्हा जो बोल्लेया, हमेसा री जिन्दगी री रोट्टी मैं ही है: जे मेरे का आंगा से कदी भी भूखा नी रैह्णा ते जेडा मेरे पर विश्वास करगां से कदी भी प्यासा नी रिगां 36पर जिय्यां मैं तुसा जो बोल्लेया थिया, कि तुसा ने मेरे जो दिख्खी भी लित्या तां भी मेरा विश्वास नी करदे। 37जिस कुसकी जो मेरा “पिता” मेरे जो दिंदा, से मेरे का आंगा, ते जे कोई मेरे का आदां, तिसजो मैं कदी भी नी नक्कारणा। 38किजोकी मैं अपणी मर्जी कने नी, पर अपणे “पिता” री मर्जी पूरी करणे तांइ स्वर्ग का उतरेया। 39पर मेरे “पिता” री इच्छा ए है कि जे किच्‍छ तिन्ही मेरे जो दित्ता है, उस बिच का मैं किच्‍छ न गवाई देयां पर तिसजो आखरी दिन फिरी जिन्दा करणा, 40किजोकी मेरे “पिता” री इच्छा ए है कि जे कोई पुत्तर जो दिख्खे, कने तिस पर विश्वास रखे, से हमेसा री जिन्दगी पाये कने मैं तिसजो आखरी दिन फिरी जिन्दा करणा। 41फिरी यहूदी मणू यीशु पर बुड़बुड़ाणे लग्गे, इस तांइ कि तिन्ही बोल्लेया थिया कि जेडी रोट्टी स्वर्ग का उतरी है, से मैं है 42फिरी तिन्हां ने बोल्लेया कै ए यूसुफ रा मुंडा यीशु नी है, जिस्स रे अम्मा बाबे जो असी जाणदे? तां फिरी ए किजो बोलदा कि मैं स्वर्ग का उतरया है। 43यीशु ने तिन्हा जो जवाब दित्या, कि अप्पु बिच मत बडबडाओ। 44कोई मेरे का नी आई सकदा, जा तक “पिता” जिन्हा ने मेरे जो भेज्जे रा है, तिसजो मेरे का ना लेई आए, फिरी मैं तिसजो आखरी दिन फिरी जिन्दा करगां। 45कुसकी भविष्यद्वक्ता री कताब बिच ए लिख्खे रा है, कि से सब परमेश्वर रे पासे का सिखाए रे होणे जिन्नी भी बाबे का सूणेया कने सिखया, से मेरे का आन्दा। 46इय्यां नी है कि कुसकी ने भी “पिता” जो नी दिख्खेया, पर मैं परमेश्वर जो दिख्खे रा है, जे अप्पु परमेश्वर रे पास्से का आए रा है। 47मैं तुसा जो सच-सच बोलदा, कि जे कोई विश्वास करदा, हमेसा री जिन्दगी तिसेरी ही है। 48जिन्दगी री रोटी, मैं ही हैं। 49तुसा रे पुरखे ने मन्ना खाया ते मरी गे 50ए से रोट्टी है जेडी स्वर्ग का उत्तरी है ताकि मणू तिस बिच का खाए ते न मरण 51हमेसा री जिन्दगी री रोट्टी, जे स्वर्ग का उतरे री है, से मैं है, जे कोई इस रोट्टी जो खान्दा, तिनिये हमेसा तांइ जिन्दा रैह्णा ते जे रोट्टी मैं दुनिया रे लोक्कां जो जिन्दगी तांइ दैणी, से मेरा सरीर है। 52इस पर यहूदी मणू ए बोल्ली करी अप्पु मिते लडने लगे, कि ए मणू किय्यां अपणा सरीर खाणे जो देई सकदा। 53यीशु ने तिन्हा जो बोल्लेया मैं तुसा जो सच-सच बोलदा जां तांइ मणू रे पुत्तर, जे मैं ही है रा सरीर नी खांगे, कने तिसेरा खून नी पींगे, तुसा बिच जिन्दगी नी है। 54जे कोई मेरा सरीर खान्दा, कने मेरा खून पीन्दा, हमेसा री जिन्दगी तिसेरी है, कने मैं अन्त रे दिना फिरी तिसजो जिन्दा करणा। 55किजोकी मेरा सरीर असलियत बिच खाणे री चीज है ते मेरा खून असलियत बिच पीणे री चीज है, 56जे मेरा सरीर खान्दा ते मेरा खून पीन्दा, तिनिये हमेसा तिकर मेरे अन्दर बणी रैह्णा, ते मैं तिस बिच 57जिय्यां जिन्दे पिता ने मेरे जो भेज्जेया ते मैं पिता री वजह कने जिन्दा है, तिय्यां ही से भी जे मेरे जो खाणा, तिनिये भी मेरी वजह कने जिन्दा रैह्णा। 58जेड़ी रोट्टी स्वर्ग का उतरी, ए ही है, से तिस रोटी सांई नी जिस जो बाब्बे-दाद्दे ने खाया ते मरी गे, जे कोई ए रोट्टी खांगा, से हमेसा जिन्दा रैहन्गा। 59ए गल्लां तिन्ही कफरनहूम कस्बे रे इक्क सभास्थल बिच उपदेस दिन्दे बेल्ले बोल्ली।

हमेसा री जिन्दगी रे वचन

60तिसेरे दूए चेल्‍ले#6:60 यीशु रे खास बारा चेल्‍लेयां रे अलावा दूए चेल्‍ले थिये। बिच मत्ते जणे ने ए सुणी करी बोल्ले, कि ए गल्ल तां मनणे तांइ मुस्किल है ते इसजो कुण सुणी सकदा?

61यीशु ने अपणे मन बिच ए जाणी करी कि मेरे चेल्‍ले अप्पु बिच इस गल्ल पर बुड़बुड़ाया करदे हिन, तिन्हा जो पूच्छेया कै इस गल्ल कने तुसा जो ठेस लग्गी? 62पर जे तुसा मणू रे पुत्तर, जे मैं ही है जो जित्ते से पैल्ले थिया, उत्ते का उप्पर जांदे दिखगे, तां कै हुगां? 63आत्‍मा ते जिन्दगी दिंदी, पर सरीर कने किच्‍छ फैदा नी है, जेडी गल्लां मैं तुसा जो बोल्ली, से पवित्रात्मा रे पास्से का है, जे जिन्दगी दिंदा। 64पर तुसा बिच किन्ने इदेए मणू हिन जे विश्वास नी करदे: किजोकी यीशु ता पैल्ले का ही जाणदे थिये कि जे विश्वास नी करदे से कुण हिन? ते कुनिये मेरे जो पकडवाणा। 65फिरी तिन्हा ने बोल्लेया, इस तांइ मैं तुसा जो बोल्लेया थिया जां तांइ कुसकी जो पिता रे पास्से का वरदान ना मिल्ले, तां तांइ से मेरे का नी आई सकदा।

पतरस रा विश्वास

66इसेरे बाद यीशु रे दूए मते चेल्‍ले #6:66 ए चेल्‍ले यीशु रे खास बारा चेल्‍लेयां रे अलावा दूए चेल्‍ले थिये। तिन्हा जो छड्डी करी चली गे, ते तिन्हेरी गल्लां जो मनणा छड्डी दित्तेया।

67तां यीशु ने तिन्हा बारा चेल्‍लेयां जो बोल्लेया, कै तुसा भी चली जाणा चाहदें? 68शमौन पतरस ने तिसजो जवाब दिता, ओ प्रभु, असी कुसका जाईए? तुसा का हमेसा री जिन्दगी रे वचन हिन। 69असा ने तुसा बिच विश्वास कित्या, कने जाणी गे हिन, कि परमेश्वर रा भेज्जे रे पवित्र मसीह तू ही है। 70यीशु ने तिन्हा जो जवाब दित्ता, कि मैं तुसा बारा जणेया जो मैं चुणी लित्ते रा है पर तां भी तुसा बिच इक्क जणे जो शैतान ने काबू बिच करी लित्ते रा है। 71ए यीशु ने शमौन इस्करियोती रे पुत्तर यहूदा रे बारे बोल्लेया, किजोकी ए ओई बारह बिच का इक्क थिया, जे यीशु जो पकड़वाणे पर थिया।

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

यूहन्ना 6: CDHNT

Highlight

ಶೇರ್

ಕಾಪಿ