यूहन्ना 14

परमेश्वर तांइ पुजणे रा रस्ता

1तुसा रा मन दुखी ना हो। परमेश्वर पर विश्वास रख्खो, ते मेरे पर भी विश्वास रख्खो। 2मेरे पिता रे घरे बड़ी सारी रैह्णे री जगाह् हिन, जे अगर जगाह् नी हुंदी तां मैं तुसा जो बोल्ली दैणा थिया, किजोकी मैं तुसा तांइ जगाह् तैयार करणे तांइ चलेया। 3मैं जाणे रे बाद तुसा रे रैह्णे तांइ जगाह् तैयार करणी, ताकि फिरी आई करी तुसा जो अपणे कने उत्ते लेई जांगा ताकि जित्ते मैं रेयां तित्ते तुसा भी रेयो। 4जित्ते मैं जाया करदा है, तुसा तित्ते रा रस्ता जाणदे। 5थोमा ने यीशु जो बोल्लेया, ओ प्रभु जी, असा नी जाणदे कि तुसा कुते जाया करदे हिन, तां रस्ता किय्यां जाणगे? 6यीशु ने तिसजो बोल्लेया, रस्ता अते सच्चाई ते जिन्दगी मैं ही है, बगैर मेरे कोई पिता-परमेश्वर का नी पूज्जी सकदा। 7जे तुसा मेरे जो जाणेया हुन्दा, तां मेरे पिता जो भी जाणी लैणा थिया: अते अव्वे तिन्हा जो जाणदे हिन, ते तिन्हा जो दिख्खेया भी है 8फिलिप्पुस ने तिन्हा जो बोल्लेया, ओ प्रभु जी, पिता जो असा जो दखाई देयो, ए ही असा तांइ बड़ा है। 9यीशु ने तिसजो बोल्लेया, ओ फिलिप्पुस, मैं इत्तणे रोज्जे रा तुसा कने है, ते कै तू मेरे जो नी जाणदा? जिनिये मेरे जो दिख्खेया तिसने पिता जो दिख्खेया है तां फिरी तू किजो बोल्लेया करदा है कि पिता जो असा जो दिख्खाओ? 10कै तू विश्वास नी करदा कि मैं पिता बिच है ते पिता मेरे बिच हिन? ए गल्लां जे मैं तुसा कने बोल्लेया करदा है, अपणे पास्से का नी है बोल्लेया करदा, बल्कि पिता मेरे बिच रही करी अपणा कम्म करेया करदे हिन। 11मेरे विश्वास करो कि मैं पिता बिच है ते पिता मेरे बिच हिन, नी तां कम्मां ही री वजह कने मेरे पर विश्वास करो। 12मैं तुसा कने सच-सच बोलदा, जे मेरे पर विश्वास रखदा, ए कम्म जे मैं करदा, तिन्ने भी करणे पर तिन्ने इन्हा का भी बड्डे-बड्डे कम्म करणे किजोकी मैं पिता का चलेया 13जे किच्‍छ तुसा मेरे नां कने मंगणा, से मैं करणे, ताकि पुत्तर रे जरिए पिता री बड़ाई हो। 14जे तुसा मेरे नां च मंगगे, तां मैं तिसजो करगा।

पवित्रात्मा रा वादा

15जे तुसा मेरे कने प्यार करदे तां मेरे हुकमा जो मन्नो। 16मैं पिता-परमेश्वर का प्रार्थना करगा, ते से तुसा जो इक्क मदतगार दिंगा, कि से हमेसा तुसा कने रेह्। 17मतलब से आत्‍मा, जे लोक्कां जो परमेश्वर रे सच रे बारे बिच एहसास दुआंदी, ते जिस जो दुनिया अपणाई नी सकदी, किजोकी से ना तां तिन्हा जो दिखदा ते से ना तिसजो जाणदा। तुसा तिसजो जाणदे, किजोकी से तुसा रे कने रैहन्दा, ते से तुसा बिच होणा। 18मैं तुसा जो अनाथ नी छड्डणा, मैं तुसा का आन्दा 19अवे थोड़ी ही देर बाद दुनिया रे लोक्कां ने मेरे जो नी दिख्खणा, पर तुसा ने मेरे जो दिख्खणा, किजोकी मैं जिंदा है, इधेरे तांइ तुसा भी जिंदे रैह्णा। 20तिस रोज जां मैं वापिस हटणा, तुसा जाणना कि मैं पिता बिच है, ते तुसा मेरे बिच हिन, ते मैं तुसा बिच। 21जे मेरे हुकमां जो जाणदा ते तिन्हा जो मनदा, से ही मेरे कने दाह-पीड़ रखदा अते जे मेरे कने दाह-पीड़ रखदा तिस कने मेरे पिता ने भी दाह-पीड़ रखणी, अते मैं तिस कने प्यार करणा ते अप्पु जो तिसेरे सामणे जाहिर करणा। 22तिस यहूदा ने जे इस्करियोती नी थिया, तिसने बोल्लेया, ओ प्रभु जी, कै होया जे तुसा अप्पु जो असा रे सामणे लियाणा चाह्‍ंदे पर दुनिया रे लोक्कां रे सामणे नी? 23यीशु ने तिसजो जवाब दित्तेया, जे कोई मेरे कने प्यार रखगा तिनिये मेरे शिक्षा जो मनणा, ते मेरे पिता ने तिस कने दाह-पीड़ रखणी ते असा तिसका आणा, ते तिसेरे कन्ने रैह्णा। 24जे मेरे कने प्यार नी करदे से मेरे हुकमां जो भी नी मनदा, अते जे हुकमां जो नी मनदा, से मेरे नी पर पिता-परमेश्वर रे हुकमां जो नी मनदा जिन्हा ने मेरे जो लोक्कां बिच भेज्जे रा है। 25ए गल्लां मैं तुसा कने रैह्‍न्दे बेल्ले ही तुसा जो बोल्ली थी। 26पर पिता ने मेरे नां कने भेजणा इक्क मददगार जो भेजणा जे पवित्रात्मा है, तिसने तुसा जो सब गल्लां सखाणी, अते जे किच्‍छ मैं तुसा जो बोल्लेया से सब गल्लां तिन्ने तुसा जो चेत्ता कराणी। 27“मैं तुसा जो अपणी सांती देई करी जाया करदा है। जदेई सांती दुनिया रे मणू दिंदे तैसी सांती नी। तुसा रे दिल दुखी ना हो, ते ना ही डरे।” 28तुसा सुणी चुके रे हिन जे मैं तुसा जो बोल्लेया, मैं जांदा, ते तुसा रे का फिरी आणा, जे तुसा मेरे कने सच्चा प्यार करदे तां इस गल्ल कने खुस हुन्दे कि मैं पिता का जाया करदा है, जे मेरे का बड्डे हिन। 29ते मैं ए सब किच्‍छ होणे का पैल्ले तुसा जो बोल्ली दित्तेया, कि जां से होई जांगा, तां तुसा मेरे पर विश्वास करण। 30मैं अवे तुसा कने जादा गल्लां नी करणी, किजोकी इस दुनिया रा सरदार जे शैतान है, आया करदा है, मेरे पर तिसेरा कोई हक्क नी है, 31पर ए इधेरे तांइ होया करदा है कि दुनिया रे मणू जाणे कि मैं पिता कने प्यार करदा, ते जिय्यां पिता ने मेरे जो हुकम दित्ते हिन मैं तिय्यां ही करदा। उठ्ठो, इत्ते का चलदे।

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

यूहन्ना 14: CDHNT

Highlight

ಶೇರ್

ಕಾಪಿ